Kifer Nou Bizin Laranson?

1-2. Kifer nou bien bizin ki enn kikenn sap nou? (Romin 7:22-24) (Get zimaz osi.)

FER koumadir enn batiman inn kraze ek enn kikenn inn bloke dan bann debri sa batiman-la. Sa zom-la ankor vivan, selman li pa kapav bouze, ek par limem li pa kapav sorti dan sa bann debri-la. Sel kitsoz ki li kapav fer se kriye ek atann ki enn kikenn vinn sap li.

² Nou sitiasion inpe parey azordi. Kifer nou dir sa? Kan Adan ti dezobeir Zeova, li ti fer pese ek li ti vinn inparfe, ek parski nou so bann desandan, nou osi nou inparfe. Parey kouma bann debri ki’nn blok sa zom-la, pese inn blok tou bann imin, ek nou bien bizin ki enn kikenn sap nou. Dan let ki li ti ekrir bann Romin, Pol dir ki nou tou nou bann “prizonie” akoz pese. (Lir Romin 7:22-24.) Ek apre sa, li ti dir: “Kisann-la pou sap mwa?” Pol ti kone ki akoz pese, li ti pou mor. (Rom. 6:23) Ek nou tou nou dan mem sitiasion azordi. Nou bien bizin ki enn kikenn sap nou!

3. Ki bienfe nou kapav gagne gras-a laranson?

³ Selman, apre ki Pol ti koz lor pese, li ti donn nou enn lespwar. Apre ki li ti dir, “Kisann-la pou sap mwa ar sa lekor ki pe amenn mwa ar sa lamor-la?” li ti dir, “Mo remersie Bondie par Zezi Kris nou Segner!” (Rom. 7:25) Dan sa verse-la, Pol ti pe rod dir ki Zeova inn sap nou gras-a laranson, setadir sakrifis Zezi.a Gras-a laranson, (1) Zeova kapav pardonn nou bann pese, (2) nou kapav vinn parfe, ek (3) nou kapav ena enn bon lamitie ar Zeova. Dan sa lartik-la, nou pou aprann plis lor sa bann kitsoz-la, ek gras-a sa, nou lamour pou Zeova, nou “Bondie ki donn lesperans,” pou ogmante. (Rom. 15:13) Nou rekonesans pou Zezi osi pou ogmante, parski “atraver li, nou libere gras-a laranson.”—Kol. 1:14.

GRAS-A LARANSON, ZEOVA KAPAV PARDONN NOU BANN PESE

4-5. Kifer nou tou nou bizin laranson? (Ekleziast 7:20)

⁴ Nou bizin laranson pou ki Zeova kapav pardonn nou bann pese. Nou tou nou fer pese, ki li par nou bann parol ouswa nou bann aksion. (Lir Ekleziast 7:20.) Ena sertin pese ki pli grav ki lezot. Par exanp, dan Lalwa Moiz, si enn Izraelit ti komet ladilter ouswa si li ti touy enn kikenn, ti pou bizin touy li. (Lev. 20:10; Nonb 35:30, 31) Biensir, pa tou pese ki grav koumsa. Selman, ki li enn gro pese ouswa enn ti pese, li res enn pese. Par exanp, David ti dir: “Mo pou fer atansion ki mo pa fer pese ar seki mo dir.” (Ps. 39:1) Sa verse-la montre ki mem par nou bann parol nou kapav fer pese.—Zak 3:2.

⁵ Eski to’nn deza dir ouswa fer bann kitsoz ki to’nn regrete apre? Sirman sa finn deza ariv nou tou, pa vre! Anplis, Labib dir: “Si nou dir, ‘Nou pa fer pese,’ nou pe anbet noumem ek laverite pa dan nou.”—1 Zan 1:8.

6-7. Gras-a ki kitsoz Zeova ena drwa legal pou pardonn nou bann pese? (Get zimaz osi.)

⁶ Zeova, Li Bondie lazistis. Akoz sa, Li ti bizin fer enn kitsoz pou ki Li ena enn drwa legal pou pardonn nou bann pese; sa kitsoz-la se laranson. (Efe. 1:7) Selman, mem si Zeova kapav pardonn nou bann pese gras-a laranson, sa pa vedir ki Li pa kas latet si nou fer pese. Zeova deteste pese ek Li pa anvi ki nou fer pese.—Iza. 59:2.

⁷ Dan Lalwa Moiz, bann Izraelit ti bizin fer sakrifis bann zanimo pou ki zot kapav gagn pardon zot bann pese. (Lev. 4:27-31; 17:11) Sa bann sakrifis-la ti montre ki bann dimounn ti pou bizin enn pli gran sakrifis, ek se sakrifis Zezi ki ti pou fer bann dimounn gagn bann zoli benediksion. Gras-a sakrifis Zezi, Zeova ti pou ena enn drwa legal pou pardonn nou bann pese. Kan nou lir seki Pol ti ekrir bann Kretien dan Korint, nou trouve ki Pol ti konpran valer ki sakrifis Zezi ti ena. Apre ki li ti dir tou bann move kitsoz ki sa bann Kretien-la ti pe fer avan, li ti dir zot: “Me finn lav zot; finn sanktifie zot; finn deklar zot kouma bann dimounn drwat dan nom Lesegner Zezi Kris ek avek lespri nou Bondie.”—1 Kor. 6:9-11.

8. Avan ki to asiste Komemorasion Lamor Zezi, lor ki kitsoz to bizin pran letan pou reflesi?

⁸ Avan ki to asiste Komemorasion Lamor Zezi sa lane-la, pran letan pou reflesi lor Zeova so pardon ek lor seki sa vedir pou twa. Par exanp, gras-a laranson, to nepli bizin santi twa koupab pou bann pese ki to’nn fini repanti. Me eski to trouv sa difisil pou krwar ki Zeova inn vremem pardonn bann pese ki to’nn fer dan lepase? Kitfwa to pans koumsa, ‘Mo kone ki Zeova kapav pardonn mwa, me mwa, mo pa kapav pardonn momem.’ Si to pans koumsa, rapel sa: Se Zeova ki pardonn nou, ek Li’nn donn so Garson responsabilite pou ziz nou. Li pa’nn donn twa ouswa enn lot dimounn drwa pou deside kisann-la Li pou pardone ouswa non. Labib dir: “Si nou pe mars dan lalimier parey kouma [Zeova] li dan lalimier, . . . disan Zezi so Garson pirifie nou ar tou pese.” (1 Zan 1:6, 7) Nou kapav sir ki sa lansegnman-la li vre, parey kouma tou bann lezot lansegnman ki ena dan Labib. Gras-a laranson, Zeova ena drwa legal pou pardonn nou, ek Labib dir ki “so pardon bien gran.”—Iza. 55:7.

GRAS-A LARANSON, NOU KAPAV VINN PARFE

9. Dan Labib, ki vedir mo “pese”? (Psom 51:5)

⁹ Kan Labib servi mo “pese,” se pa zis pou koz lor bann move kitsoz ki nou fer, me se osi pou koz lor linperfeksion, ki nou’nn erite ar Adan ek Ev ek ki nou ena depi nou nesans. (Lir Psom 51:5.) Akoz nou inparfe, nou ena bann move panse ek nou fer bann move kitsoz, ek nou lekor pa reisi fonksionn san poursan dan fason ki Zeova inn kree nou. Se akoz sa ki nou vinn vie, nou malad, ek nou mor. Alor, nou konpran kifer bann ti-baba, ki pankor fer okenn pese, tom malad ek zot mor, ek osi kifer bann bon ek bann move dimounn toule-de, soufer ek zot mor. Wi, se akoz pese ki Adan inn fer ki nou tou nou inparfe.

10. Ki Adan ek Ev ti resanti apre ki zot ti fer pese?

¹⁰ Anou esey reflesi lor seki Adan ek Ev ti resanti apre ki zot ti fer pese ek ki zot ti vinn inparfe. Akoz pese, zot ti koumans ena bann santiman negatif. Apre ki zot ti dezobeir lalwa Zeova, setadir lalwa ki ti “ekrir dan zot leker,” deswit Adan ek Ev ti koumans ena bann remor. (Rom. 2:15) Zot ti santi ki enn kitsoz ti sanze. Ek sa santiman-la ti pous zot pou kouver sertin parti zot lekor ek pou kasiet pou ki Zeova pa trouv zot. (Zen. 3:7, 8) Pou premie fwa dan zot lavi, Adan ek Ev ti santi zot koupab, zot ti trakase, zot ti per, zot ti an soufrans, ek zot ti gagn onte. Ek sa bann santiman-la ti res avek zot ziska ki zot mor.—Zen. 3:16-19.

11. Ki lefe linperfeksion ena lor nou?

¹¹ Akoz nou inparfe, nou osi parfwa nou santi nou koupab, nou trakase, nou per, nou an soufrans, ek nou gagn onte, parey kouma Adan ek Ev. Ek mem si nou fer boukou zefor pou amelior nou sitiasion ek pou evit bann problem, pou touletan ena bann problem ki nou pa pou reisi rezoud par nou-mem. Kifer? Labib explike ki, akoz Adan ek Ev inn fer pese, bann dimounn pou touletan dan problem. (Rom. 8:20) Ek ninport ki zefor ki sakenn parmi nou fer, sa pa pou sanze. Se akoz sa ki, mem si bann dimounn ouswa bann gouvernman fer boukou zefor pou protez lanvironnman, pou diminie laviolans, pou lit kont lamizer, ek pou aret bann lager, tousala dan vid. Selman, gras-a laranson, nou ena enn lespwar. Ki lespwar nou ena?

12. Ki lespwar nou ena gras-a laranson?

¹² Gras-a laranson, nou ena lespwar ki “kreasion . . . pou libere ar lesklavaz enn lekor ki pouri.” (Rom. 8:21) Savedir ki, kan nou pou vinn parfe dan Paradi, nou pou nepli malad fizikman ek emosionelman. Nou pou nepli santi nou koupab, trakase, per, ek nou pou nepli gagn onte. Anplis, pou ena lape lor later ek pou nepli ena okenn problem, parski se Zezi, “Prins Lape,” ki pou diriz later sa lepok-la, ek li pou ed nou pou rezoud tou bann problem ki nou pa ti pe reisi rezoud par nou-mem.—Iza. 9:6, 7.

13. Avan ki to asiste Komemorasion Lamor Zezi, lor ki kitsoz ankor to kapav reflesi?

¹³ Esey mazine kouma to lavi pou ete kan to pou parfe. Toulezour to pou leve an bonn sante, ek to pa pou trakase tansion twa ouswa bann dimounn ki to kontan, pa gagn manze, tom malad, ouswa mor. Labib dir ki nou lesperans li kouma “enn lank pou nou lavi, li sir ek ferm.” Alor, si to “tini ferm” sa lesperans-la, depi aster-la mem to pou santi twa anpe. (Ebre 6:18, 19) Kan to reflesi souvan lor to lesperans, sa pou ranforsi to lafwa ek ed twa pou andir ninport ki difikilte to gagne. To kapav sir ki Zeova Li “sa kikenn ki rekonpans bann ki fer gran zefor pou rod li.” (Ebre 11:6) Wi, gras-a laranson, depi aster-la mem to kapav gagn rekonfor ek ena enn zoli lespwar pou lavenir.

GRAS-A LARANSON, NOU KAPAV ENA ENN BON LAMITIE AR ZEOVA

14. Ki lefe pese finn ena lor nou lamitie ar nou Kreater, ek kifer?

¹⁴ Akoz pese ki Adan ek Ev ti fer, bann dimounn ti nepli kapav ena enn bon lamitie ar zot Kreater. Labib dir ki bann imin inn ‘elwagne ar Bondie.’ (Rom. 8:7, 8; Kol. 1:21) Kifer nou’nn elwagne ar Bondie? Parski Zeova Li parfe ek Li pa kapav aksepte pese. Konsernan Zeova, Labib dir: “To lizie tro sin pou get seki move, ek to pa kapav toler lemal.” (Abak. 1:13) Depi ki bann imin inn vinn inparfe, koumadir finn ena enn gran trou ant Zeova ek bann imin. Ek okenn imin pa ti pou kapav ena enn bon lamitie ar Zeova amwin ki ena enn pon ki permet zot travers sa trou-la, setadir revinn pros ar Zeova. Sa pon-la, se laranson. Alor, gras-a laranson, nou kapav regagn enn bon lamitie ar nou Kreater, Zeova.

15. Kouma bann imin kapav regagn enn bon lamitie ar Zeova gras-a sakrifis Zezi?

¹⁵ Labib dir ki Zezi li “enn sakrifis rekonsiliasion pou nou bann pese.” (1 Zan 2:2) Savedir ki gras-a sakrifis Zezi, bann imin kapav regagn enn bon lamitie ar Zeova. Kouma sa li posib? Sakrifis Zezi donn Zeova enn drwa legal pou fer lape ar bann imin ek sa permet Li pou ena enn bon lamitie avek zot. (Rom. 3:23-26) Avan mem ki Zezi donn so lavi an sakrifis, Zeova ti kapav “konsider” bann dimounn ki ti fidel anver Li, kouma bann dimounn ki drwat. (Zen. 15:1, 6, not.) Kifer? Parski Li ti sir ki Zezi ti pou donn so lavi kouma enn ranson. (Iza. 46:10) Wi, gras-a sakrifis Zezi, bann imin kapav regagn enn bon lamitie ar Zeova.

16. Avan ki to asiste Komemorasion Lamor Zezi, lor ki kitsoz ankor to kapav reflesi? (Get zimaz osi.)

¹⁶ Reflesi lor kouma to lavi ena enn sans azordi parski to ena enn bon lamitie ar Zeova. Par exanp, to kapav apel Zeova “Papa,” parey kouma Zezi inn ansegn nou pou fer. (Mat. 6:9) To kapav osi konsider Li kouma to “Kamarad.” Kan nou servi bann expresion kouma “Papa” ouswa “Kamarad,” nou bizin fer sa avek boukou respe ek limilite. Kifer? Parski akoz nou inparfe, nou pa kapav vinn pros ar Zeova par nou-mem. Se zis gras-a laranson ki nou kapav ena enn bon lamitie ar Zeova. Labib dir ki gras-a “disan ki [Zezi inn] verse lor poto soufrans, Bondie rekonsilie ar limem tou lezot kitsoz.” (Kol. 1:19, 20) Se pou sa rezon-la ki nou kapav ena enn bon lamitie ar Zeova, mem si nou inparfe.

LARANSON MONTRE KI ZEOVA ENA BOUKOU MIZERIKORD

17. Kouma laranson se enn prev ki Zeova ena boukou mizerikord? (Efezien 2:4, 5)

¹⁷ Laranson se enn prev ki Zeova “ena boukou mizerikord.” Zeova finn “donn nou lavi . . . kan nou ti’nn mor akoz nou bann fot.” (Lir Efezien 2:4, 5.) Parey kouma sa zom ki bloke dan bann debri sa batiman-la, bann dimounn ki ena limilite konpran ki pese pe blok zot ek ki zot bizin enn kikenn pou sap zot. Alor, zot pe sipliy Bondie pou gagn led. (Zist. 13:48) Lerla, Zeova ed sa bann dimounn-la gras-a bon nouvel lor Rwayom Bondie, pou ki zot kapav aprann konn Li ek so Garson, Zezi. (Zan 17:3) Kan Satan ti fer Adan ek Ev fer pese, li ti panse ki sa ti pou aret proze Zeova, me li ti ena tor!

18. Kan nou reflesi lor laranson, ki kitsoz nou bizin rapel?

¹⁸ Kan nou reflesi lor bann bienfe ki nou gagne gras-a sakrifis Zezi, fode pa nou bliye rezon prinsipal pou kifer Zeova inn donn laranson. Li’nn donn laranson, pa zis pou sap nou, me osi pou fer enn kitsoz boukou pli inportan. Laranson se mwayin ki Zeova inn servi pou reponn lakizasion ki Satan ti fer dan zardin Eden. (Zen. 3:1-5, 15) Gras-a laranson, Zeova sanktifie so nom, setadir montre ki tou seki Satan inn dir lor Li, fos. Li osi liber nou ar pese ek lamor, ek sa montre ki Li kontan nou. Ek dan so bonte extraordiner, Zeova permet bann imin inparfe pou montre ki tou seki Satan inn dir lor Li, fos. (Prov. 27:11) Kouma nou kapav montre nou rekonesans pou laranson? Nou pou reponn sa kestion-la dan prosin lartik.