Zeova Kapav Ed Twa kan To Ena Bann Santiman Negatif

1-2. Parfwa, ki santiman lapot Pol ti ena, ek kifer so lexanp kapav ed nou azordi? (Romin 7:21-24)

KAN nou mazinn lapot Pol, sirman nou rapel ki li ti al prese dan plizir pei, li ti ekrir plizir liv Labib, ek li ti enn bon ansegnan. Wi, Pol ti enn zom ki ti fidel ek ki ti ena boukou kouraz. Selman, li ti osi ena bann santiman negatif. Par exanp, parfwa li ti santi li tris, li ti dekouraze, ek li ti trakase. Alor, parey kouma nou, li ti bizin lit kont sa bann santiman-la.

² Lir Romin 7:21-24. Dan let ki li ti ekrir bann Romin, Pol koz lor sertin santiman ki li ti ena, ek boukou parmi nou kitfwa ena mem santiman azordi. Pol ti enn Kretien ki ti fidel ek li ti vremem anvi obeir Zeova. Selman, akoz li ti inparfe, parfwa li ti gagn difikilte pou fer seki Zeova ti anvi li fer. Parfwa, li ti santi li koupab osi akoz bann kitsoz ki li ti fer avan ki li ti vinn enn Kretien, ek li ti dekouraze osi parski li ti pe viv enn sitiasion ki pa ti pe ameliore ditou.

3. Ki nou pou examine dan sa lartik-la? (Get osi “Expresion Ki’nn Explike.”)

³ Mem si Pol ti ena bann santiman negatifa, li pa ti pas so letan nek pans samem. Dan sa lartik-la, nou pou reponn sa bann kestion-la: Kan Pol ti mazinn so sitiasion, kifer li ti dir “pov mwa”? Kouma li ti lit kont so bann santiman negatif? Ek kouma nou nou kapav lit kont nou bann santiman negatif?

KI KITSOZ TI FER POL ENA BANN SANTIMAN NEGATIF?

4. Kifer Pol ti ena bann santiman negatif?

⁴ Bann kitsoz ki li ti fer avan. Avan ki li vinn enn Kretien, Pol ti fer boukou move kitsoz. Par exanp, li ti la kan bann dimounn ti touy Etienn kout ros, ek li ti mem dakor avek sa. (Zist. 7:58; 8:1) Pol ti osi persekit boukou Kretien ek li ti kriel anver zot.—Zist. 8:3; 26:9-11.

5. Akoz bann kitsoz ki li ti fer dan lepase, ki Pol ti resanti?

⁵ Apre ki li ti vinn enn Kretien, Pol ti santi li koupab pou bann kitsoz ki li ti fer dan lepase. Ek plis letan ti pase, plis sa santiman-la ti ogmante. Par exanp, ver lane 55 Nou Lepok, kan li ti ekrir so premie let pou bann Korintien, li ti dir: “Mo pa merite ki apel mwa enn zapot, parski mo ti persekit lasanble Bondie.” (1 Kor. 15:9) Apepre sink an plitar, dan so let pou bann Efezien, li ti dir ki limem “pli tipti parmi tou bann ki sin.” (Efe. 3:8) Ek kan li ti ekrir Timote, Pol ti explike kouma li ti ete avan. Li ti dir: “Mo ti koz kont Bondie, mo ti persekit so pep ek mo ti enn zom insolan.” (1 Tim. 1:13) Sey mazine seki Pol ti resanti kan li ti vizit enn lasanble ek ki li ti zwenn bann dimounn ouswa fami bann dimounn ki li ti persekite avan!

6. Sit enn lot kitsoz ki ti fer Pol bien trakase. (Get not osi.)

⁶ Enn pikan dan laser. Pol ti pe viv enn sitiasion difisil ki li ti konpar ar ‘enn pikan dan so laser.’ (2 Kor. 12:7) Mem si li pa ti dir exakteman ki kitsoz ti pe fer li soufer, kitfwa sa ti enn problem lasante, ouswa enn lot problem ki ti pe fer li bien trakase.b

7. Ki Pol ti resanti kan li ti fer bann erer? (Romin 7:18, 19)

⁷ So bann erer. Pol ti bien dekouraze kan li ti fer bann erer. (Lir Romin 7:18, 19.) Ek mem si li ti fer bann gro zefor pou amelior so personalite, parfwa li pa ti reisi fer seki li ti anvi fer. Ek parfwa, li ti mem fer seki li pa ti sipoze fer. Pol explike ki li ti bizin kontign lit kont so bann move dezir ek kontign fer zefor pou fer seki bon. (1 Kor. 9:27) Me kanmem sa, li ti fer bann erer. Mem si li ti fer boukou zefor pou lit kont so bann defo, sey mazine kouma sa ti bien dekouraz li kan li ti fer bann erer!

KOUMA POL TI LIT KONT SO BANN SANTIMAN NEGATIF?

8. Sit sertin kitsoz ki Pol ti fer pou li kontign amelior so personalite.

⁸ Kan nou lir bann let ki Pol inn ekrir, nou konpran ki li ti reflesi boukou lor kouma lespri sin Bondie kapav ed bann Kretien pou rezet zot bann move dezir ek pou amelior zot personalite. (Rom. 8:13; Gal. 5:16, 17) Pol souvan ti koz lor bann dezir ek bann aksion ki bann Kretien bizin rezete pou ki zot kapav fer Zeova plezir. (Gal. 5:19-21, 26) Sa montre ki li ti reflesi lor bann kitsoz ki limem li ti bizin sanze dan so personalite. Sirman li ti etidie bann Lekritir pou kone ki sanzman li bizin fer ek osi kouma li kapav fer sa. Alor, kan nou lir seki Pol inn ekrir lor bann kitsoz ki nou bizin fer pou ki nou kapav fer Zeova plezir, nou kapav sir ki limem li ti pe fer sa bann kitsoz-la.

9-10. Ki kitsoz ti ed Pol pou lit kont so bann santiman negatif? (Efezien 1:7) (Get zimaz osi.)

⁹ Mem si parfwa Pol ti dekouraze, ti ena boukou kitsoz ki ti ed li pou gard so lazwa. Par exanp, li ti kontan kan li ti tann bann bon kitsoz lor bann lasanble ki ti lwin. (2 Kor. 7:6, 7) So lamitie avek so bann frer ek ser osi ti rann li zwaye. (2 Tim. 1:4) Li ti ere osi parski li ti kone ki li ti ena faver Zeova. Wi, Pol ti ere parski li ti pe servi Zeova “avek enn konsians kler.” (2 Tim. 1:3) Mem kan li ti dan prizon dan Rom, Pol ti ankouraz bann frer ek ser pou ‘res dan lazwa dan Lesegner.’ (Fil. 4:4) Kan nou lir bann parol ki Pol inn ekrir, nou trouve ki li pa ti pas so letan pans bann kitsoz negatif. Ek kan li ti ena bann santiman negatif, deswit li ti fer zefor pou pans bann kitsoz ki ti rann li ere.

¹⁰ Enn lot kitsoz ki ti ed Pol pou lit kont so bann santiman negatif se laranson. Pol ti sir ki Zeova ti kontan li ek ki Li ti donn laranson pou li osi. (Gal. 2:20; lir Efezien 1:7.) Gras-a sakrifis Zezi, Pol ti sir ki Zeova ti pardonn so bann pese ek ki Li ti pou kontign pardonn li. (Rom. 7:24, 25) Alor, mem si li ti fer bann erer dan lepase ek ki li ti ena bann defo, Pol ti kapav kontign servi Zeova avek lazwa.—Ebre 9:12-14.

11. Kifer lexanp lapot Pol kapav ankouraz nou?

¹¹ Parey kouma Pol, kitfwa nou osi nou bizin fer boukou zefor pou ki nou pa dir, nou pa fer, ek nou pa pans bann kitsoz ki pa fer Zeova plezir. Kan nou mazinn nou sitiasion, kitfwa nou osi kouma Pol nou dir, ‘Pov mwa!’ Eliza,c enn ser ki’nn viv bann sitiasion difisil, dir: “Kan mo reflesi lor lexanp lapot Pol, sa bien ankouraz mwa. Sa rekonfort mwa kan mo kone ki se pa zis mo tousel ki ena bann santiman koumsa. Sa rapel mwa osi ki Zeova konn bann difikilte ki so bann serviter gagne.” Parey kouma Pol, nou osi nou kapav ena enn konsians kler ek gard nou lazwa mem si nou ena bann santiman negatif. Ki kitsoz kapav ed nou pou fer sa?

KOUMA NOU KAPAV LIT KONT NOU BANN SANTIMAN NEGATIF?

12. Kouma bann bon labitid spiritiel kapav ed nou pou lit kont bann santiman negatif?

¹² Gard bann bon labitid spiritiel. Kan nou ena bann bon labitid spiritiel, sa ed nou pou res konsantre lor bann kitsoz ki pozitif. Pou ki nou res an bonn sante, nou bizin ena bann bon labitid, kouma par exanp, manz bann manze ki bon pou lasante, fer lexersis regilierman, ek dormi kantite letan ki bizin. Dan mem fason, kan nou lir Labib sak zour, nou prese, nou prepar ek asiste nou bann renion, ek nou reponn dan renion, sa pou fer nou boukou dibien. Si nou kontign fer sa bann kitsoz-la, sa pou ed nou pou pans bann kitsoz pozitif olie ki nou pans bann kitsoz ki negatif. Lerla, nou pou santi nou pli bien ek nou pou ere.—Rom. 12:11, 12.

13-14. Ki bienfe sertin frer ek ser inn gagne parski zot ti ena bann bon labitid spiritiel?

¹³ Anou get lexanp John, ki ti ena 39 an kan li ti aprann ki li ti ena enn kanser. Li ti gagn sok kan li ti gagn sa nouvel-la, parski li ti ankor zenn. Ek akoz sa, li ti ena boukou santiman negatif. Anplis, sa lepok-la, so garson ti ena trwa-z-an. Ki kitsoz ti ed John pou lit kont so bann santiman negatif? Li dir: “Mem si mo ti bien fatige, mo ti fer an sort ki nou pa rat okenn renion, ki nou al prese, ek ki nou fer nou ladorasion an fami sak semenn. Nou ti fer sa bann kitsoz-la mem si parfwa sa ti bien difisil.” Azordi, kan John mazinn sa lepok-la, li dir: “Kan nou pas dan enn sitiasion difisil, o-koumansman kitfwa nou pou gagn sok ek nou pou bien dekouraze. Selman, mo’nn trouve ki kantite Zeova kontan nou ek kouma Li donn nou lafors ki nou bizin. To kapav sir ki Zeova pou ed twa osi, parey kouma Li’nn ed mwa.”

¹⁴ Eliza, ki nou ti mansione taler-la, dir: “Sak fwa ki mo asiste bann renion ek ki mo fer mo letid personel, mo trouv enn kitsoz ouswa mo tann enn kitsoz ki fer mwa konpran ki Zeova vremem kontan mwa ek ki Li ekout mo bann lapriyer. Sa vremem rann mwa ere.” Nolan ek so madam, Diane, dan servis sirkonskripsion dan Lafrik. Nolan explike ki kitsoz ed li ek so madam. Li dir: “Mem kan nou dekouraze, nou kontign priye Zeova, nou etidie Labib, nou asiste bann renion, ek nou prese. Gras-a sa bann kitsoz-la, Zeova touletan ed nou pou gard nou lazwa. Kan nou dekouraze, nou fer zefor pou rapel ki Zeova pou ed nou ek ki Li pou beni nou. Nou pa kone kouma Li pou fer sa, selman nou kone ki Li pou fer li.”

15. Ki kitsoz ankor nou kapav fer pou lit kont bann santiman negatif? Donn enn lexanp pou explike.

¹⁵ Ena lezot kitsoz ankor ki nou kapav fer kan nou ena bann santiman negatif. Anou pran enn lexanp pou explik sa. Kan nou ledo fermal, kitfwa nou pou demann enn manb nou fami pou pez nou ledo. Selman, pou ki douler-la ale, kitfwa sa pa pou ase. Kitfwa nou pou bizin fer bann resers, ouswa mem al get enn dokter, pou kone kifer nou pe gagn sa douler-la. Dan mem fason, kan nou kontign ena bann santiman negatif, kitfwa nou pou bizin fer bann resers dan Labib ek nou bann piblikasion, ouswa koz ar enn Kretien ki ena matirite, pou ki nou kapav lit kont sa bann santiman-la. Anou get lezot kitsoz ankor ki kapav ed nou.

16. Ki to kapav fer pou to kone kifer to ena bann panse negatif? (Psom 139:1-4, 23, 24)

¹⁶ Priye Zeova, demann Li pou ed twa konpran seki to vremem bizin, ek analiz tomem. Lerwa David ti kone ki Zeova ti konn li bien. Akoz sa, li ti demann Zeova pou ed li konpran ‘bann panse ki ti pe fatig li.’ (Lir Psom 139:1-4, 23, 24.) Twa osi, to kapav demann Zeova pou ed twa konpran kifer to ena bann panse negatif ek osi pou ed twa pou lit kont sa. To kapav poz tomem bann kestion koumsa: ‘Ki kitsoz fer mwa ena bann panse negatif? Eski ena enn kitsoz presi ki deklans mo bann santiman negatif? Kan mo koumans ena bann panse negatif, eski mo fer zefor pou pans seki pozitif, ouswa eski mo res pans seki negatif mem?’

17. Ki size kapav ed twa pou ena bann panse pozitif? (Get zimaz osi.)

¹⁷ Etidie bann size ki pou ed twa. Detanzantan, li bon ki to etidie lor enn kalite presi ki Zeova ena. Par exanp, kan lapot Pol ti reflesi an profonder lor pardon Zeova, sa ti ed li pou konpran ki Zeova ti vremem kontan li ek sa ti ogmant so rekonesans pou Zeova. Twa osi, to kapav fer parey. To kapav servi Liv Resers pou Bann Temwin Zeova, Index des publications des Témoins de Jéhovah, ouswa bann lezot piblikasion ki ena dan to lang, pou etidie bann kalite ki Zeova ena, kouma par exanp so mizerikord, so pardon, ek so lamour fidel. Kan to trouv bann lartik ki kapav ed twa, fer enn lalis sa bann lartik-la ek gard zot enn plas kot to pou trouv zot fasilman. Koumsa, kan to koumans ena bann panse negatif, to kapav etidie sa bann lartik-la ek esey met an pratik seki to’nn aprann.—Fil. 4:8.

18. Ki size sertin frer ek ser inn etidie?

¹⁸ Dan so letid personel, Eliza, ki nou ti mansione taler-la, ti fer bann resers lor Zob. Li dir: “Mo’nn gagn boukou leprev anmemtan. Alor, mo ti etidie lor lexanp Zob. Zob osi ti gagn boukou problem ek li ti extra dekouraze. Selman, mem si li pa ti kone kifer li ti pe soufer, li ti kontign kont lor Zeova pou ed li.” (Zob 42:1-6) Diane, ki nou ti mansione taler-la, dir: “Mo mari ek mwa nou pe etidie liv Approchez-vous de Jéhovah, ek nou bien kontan ki Zeova form nou, parey kouma enn potie ki travay larzil. Kan nou dekouraze akoz bann erer ki nou fer, nou fer zefor pou rapel ki Zeova pe form nou pou vinn bann pli bon dimounn. Sa ed nou pou vinn pli pros ar Li.”—Iza. 64:8.

NOU KAPAV SIR KI ZEOVA POU ED NOU EK REKONPANS NOU

19. Ki kitsoz kapav arive parfwa, me ki kitsoz nou kapav sir?

¹⁹ Mem si nou met tou bann konsey ki ena dan sa lartik-la an pratik, sa pa vedir ki nou pou nepli ena okenn santiman negatif. Ena zour, kitfwa nou pou santi nou bien dekouraze. Selman, avek led Zeova, nou kapav lit kont nou bann santiman negatif, aret pans bann kitsoz ki kapav dekouraz nou, ek santi nou anpe. Avek led Zeova, nou kapav sir ki laplipar ditan nou pou zwaye, parski nou kone ki Li nou Kamarad ek ki tou seki nou fer pou servi Li, fer Li plezir.

20. Ki nou bien deside pou fer?

²⁰ Anou bien deside pou pa les nou bann difikilte, bann kitsoz ki’nn ariv nou dan lepase, ouswa nou bann erer, fer nou perdi nou lazwa. Avek led Zeova, nou kapav lit kont nou bann santiman negatif ek santi nou anpe. (Ps. 143:10) Biento, dan lemond nouvo, nou pou ena zis bann panse pozitif, ek sa pou rann nou ere. Sa lepok-la, nou pa pou ena okenn traka. Toule gramatin, nou pou leve ek nou pou ere, parski nou pou servi nou Papa ki kontan nou, Zeova!