BANN ZENN DEMANDE
Kouma Labib Kapav Ed Mwa?—1e Parti: Dekouver Seki Ena dan Labib
“Mo’nn sey lir Labib, me kan mo trouve ki kantite ena pou lir sa fer mwa per!”—Briana, 15 an.
Eski twa osi to resanti sa? Sa lartik-la kapav ed twa!
Kifer li inportan to lir Labib?
Eski to fini plin kan to zis mazine ki to bizin lir Labib? Si wi, nou konpran twa. Kitfwa pou twa Labib se enn liv ki ena enn kantite paz, ki ena bann ti lekritir, ek ki pena okenn zimaz. Alor, li mwin atiran ki get televizion, get fim ouswa al lor Internet.
Anou pran enn lexanp: Si to ti dekouver enn gro kof trezor, eski to pa ti pou anvi kone ki trezor ena ladan?
Labib li parey kouma sa kof trezor-la. Sazes ki ena dan Labib, li parey kouma bann zoli perl ki kapav ed twa pou
Pran bann bon desizion
Ena enn bon relasion avek to bann paran
Gagn bann bon kamarad
Zer to stres
Kouma enn vie liv koumsa kapav ed twa azordi? Li kapav ed twa parski “tou Lekritir inspire par Bondie.” (2 Timote 3:16) Savedir ki dan Labib to pou gagn bann konsey ar sa Kikenn ki pli saz dan liniver la.
Labib se enn kof trezor ki ranpli ar bann konsey bien saz ek ki ena boukou valer
Kouma mo kapav fer pou lir Labib?
Enn fason pou lir Labib, se pou lir li depi koumansman ziska lafin. Lerla, to pou kone lor ki Labib koze an-gro. Ena plizir fason pou lir Labib. Anou get de fason:
Ena 66 ti liv dan Labib. Alor, to kapav lir zot dan lord ki zot aparet, setadir depi Zenez ziska Revelasion.
To kapav lir Labib dan lord ki bann levennman inn deroule.
Tips: Dan seksion 4 dan brosir Enn Gid pou Pli konpran Parol Bondie, to pou gagn bann levennman prinsipal dan lavi Zezi, dan lord ki zot inn deroule.
Enn deziem fason pou lir Labib, se pou rod enn parti ki koz lor enn problem ki to pe gagne. Par exanp:
Eski to ti pou kontan gagn bann kamarad ki to kapav fer konfians? To kapav lir zistwar Zonatan ek David. (1 Samiel, sapit 18-20) Rod bann kalite ki ti ed David ek Zonatan pou vinn bann bon kamarad.
Eski to ti pou kontan reisi reziste bann tantasion? Lir zistwar Zozef, ek gete kouma li ti reziste ar bann tantasion ki li ti gagne. (Zenez, sapit 39) Ek gete kotsa Zozef ti gagn lafors pou reziste bann tantasion.
Eski to ti pou kontan kone kouma lapriyer kapav ed twa? Lir seki ti ariv Neemi. (Neemi, sapit 2) Ek rod bann prev ki montre ki Bondie ti reponn so bann lapriyer.
Tips: Kan to lir to Labib, fer li dan enn plas ki kalm pou ki to kapav konsantre.
Enn trwaziem fason pou lir Labib, se swazir enn zistwar ouswa enn Psom, lir li, ek apre sa, gete kouma sa kapav ed twa personelman. Apre to lektir, demann tomem:
Kifer Zeova inn fer ekrir sa dan Labib?
Ki sa aprann mwa lor Zeova ek fason ki Li azir?
Kouma seki mo’nn lir kapav ed mwa?
Tips: Fixe twa enn lobzektif! Ekrir dat ki to ti pou kontan koumans to lektir Labib, ek to kapav servi program lektir Labib ki ena lor jw.org pou ed twa.