Eski Mo Bizin Priye Bann Sin?

Seki Labib dir

Non. Labib montre nou ki nou bizin priye zis Bondie tousel, o-nom Zezi. Zezi ti dir sa so bann disip: “Gete kouma zot bizin priye: ‘Nou Papa lao dan lesiel, ki to nom sanktifie.’” (Matie 6:9, NTKM) Zezi zame inn dir so bann disip priye bann sin, bann anz, ouswa ninport kisannla apart Bondie.

Zezi ti dir sa osi so bann disip: “Momem sime, laverite, lavi; personn pa kapav al kot mo Papa si li pa pas par mwa.” (Zan 14:6, NTKM) Alor, Bondie finn donn zis Zezi tousel lotorite pou pled pou nou.​—Ebre 7:25.

Me, si mo priye Bondie ek bann sin osi?

Kan Bondie ti donn bann Dis Komannman, Li ti dir: “Mwa Yahve, to Bondie, mo enn Bondie ki zalou.” (Exod 20:5, Jérusalem) Dan ki sans Bondie Li “zalou”? Dan Labib Jérusalem, ena enn not ki dir ki Li “exize . . . ki ador Li tousel.” Bondie exize ki tou seki konsern ladorasion, mem lapriyer, bizin zis pou Li.​—Izai 48:11.

Nou pou fer leker Bondie fer mal si nou priye enn lot kikenn, mem bann sin ouswa bann anz. Kan lapot Zan ti esey ador enn anz, anz-la ti aret li ek ti dir li: “To pa fer sa! Mo enn koleg serviter avek twa ek to bann kamarad, bann temwin fidel Zezi. Bondie ki to bizin adore.”​—Revelasion 19:10, NTKM.