Eski ou pou suive direction ki Jéhovah donne ou avek amour?
“Mo finn ena la haine pou tou chemin ki fausse.”—PS. 119:128.
1, 2. (a) Kan ou pé rod conseil pou al dan enn l’endroit, ki qualité l’avertissement ou pou apprecié, ek kifer? (b) Ki qualité l’avertissement Jéhovah donne bann ki servi Li, ek kifer?
FAIRE coumadir ou bizin al dan enn certain l’endroit. Pou koné ki chemin ou bizin prend, ou demann enn camarade ar ki ou ena confiance ek ki konn la route-la bien. Kan li pé donne ou bann instruction bien precis, kitfois li pou dire ou: “Faire attention ar prochain contour, panneau indication ki ena-la, pa bon. Beaucoup dimoune suive sa ek zot perdi.” Eski ou pou apprecié l’interet ki li ena pou ou? Eski ou pou suive so l’avertissement? Dan enn sens, Jéhovah Li pareil couma sa camarade-la. Li donne nou bann bon direction pou nou reussi arrive kot nou bizin allé ek gagne la vie eternel. Mais Li aussi donne nou bann l’avertissement concernant bann mauvais l’influence ki kapav faire nou prend enn mauvais chemin.—Deut. 5:32; Is. 30:21.
2 Jéhovah, nou Camarade, mette nou en garde kont certain l’influence. Dan sa lartik-la ek dan prochain lartik, nou pou examine sa bann l’influence-la. Anou garde dan nou l’esprit ki Jéhovah donne nou sa bann l’avertissement-la parski Li interessé ar nou ek Li content nou. Li envie ki nou reussi arrive kot nou pé allé. Li chagrin kan Li trouve bann dimoune cedé devant bann mauvais l’influence ek lerla perdi zot chemin. (Ézék. 33:11) Dan sa lartik-la, nou pou examine trois mauvais l’influence. Premier-la concerne l’influence ki lezot kapav ena lor nou, deuxieme-la, koz lor l’influence ki nou ena lor nou-mem. Troisieme l’influence-la, li pa mem réel; mais selman, li bien dangereux. Nou bizin koné ki sa bann l’influence-la sa, ek couma nou Papa ki dan le ciel enseigne nou pou resisté kont sa. Enn psalmiste ki ti inspiré, ti dire Jéhovah: “Mo finn ena la haine pou tou chemin ki fausse.” (Ps. 119:128) Eski ou ena mem sentiment? Anou guetté couma nou kapav faire sa sentiment-la vinn pli fort ek agir dapré sa.
Pa suive “la foule”
3. (a) Kifer li kapav dangereux pou suive lezot voyageur kan nou pa sur dan ki direction nou bizin allé? (b) Ki principe important nou trouvé dan Exode 23:2?
3 Kan ou pé faire enn longue voyage, ki ou pou faire si ou pa trop sur dan ki direction ou pou allé? Kitfois ou pou tenté pou suive lezot voyageur—surtout si ou trouve beaucoup ki pé choisir mem chemin. Ou pé prend enn risk si ou faire sa. Apré tou, kitfois sa bann voyageur-la pa pé al dan mem l’endroit ki ou, ou-soit kitfois zot aussi zot finn perdi. En rapport avek sa, guette enn principe ki trouve dan enn parmi bann la loi ki bann Israélite ti gagné. Bann juge ek bann temoin dan bann jugement ti gagne l’avertissement pou faire bien attention ar danger pou “suive la foule.” (Lire Exode 23:2.) Pena doute ki li bien facile pou bann dimoune imparfait cedé devant pression lezot ek lerla pa agir avek justice. Selman, eski sa principe concernant pa suive la foule-la, applik zis kan pé faire bann jugement? Non.
4, 5. (a) Couma Josué ek Caleb ti gagne pression pou suive la foule? (b) Ki ti aide zot pou resisté?
4 En realité, nou kapav senti sa pression pou “suive la foule[-la]” preské n’importe kan. Sa kapav arrivé enn coute, ek kitfois li bien difficile pou resisté kont sa. Mazinn par exemple, kan enn fois, Josué ek Caleb ti bizin faire face ar pression lezot. Zot ti forme partie dan enn groupe 12 zom ki ti al couma bann espion dan la Terre promise. Kan zot ti retourné, dix parmi sa bann zom-la ti faire enn rapport bien negatif ek ki ti decourage lezot. Zot ti mem dire ki certain parmi bann dimoune dan sa pays-la ti bann geant, bann descendant bann Nephilim ki ti bann zenfant bann ange rebelle ek bann femme. (Gen. 6:4) Mais seki zot ti dire pa ti ena okenn sens. Sa bann mauvais Nephilim-la ti’nn disparette net lor la terre pendant deluge plusieurs siecle avant, sans laisse enn sel descendant derriere zot. Mais mem bann raisonnement pli fausse, kapav ena enn grand pouvoir lor bann ki ena enn la foi faible. Sa rapport negatif ki sa dix espion-la ti faire, ti fann la peur ek panik bien vite parmi le peuple. Bien vite, la plupart ti sur ki li ti pou enn erreur pou rente dan la Terre promise couma Jéhovah ti demann zot pou faire. Dan sa situation grave-la, ki Josué ek Caleb ti faire?—Nomb. 13:25-33.
5 Zot pa ti suive la foule. Mem si la foule pa ti content ditou pou tann seki zot ti pé dire, sa deux zom-la ti dire la verité ek zot ti reste lor zot position—mem kan lezot ti menace pou lapide zot! Kot-sa zot ti gagne courage? Pena okenn doute, c’est surtout grace a zot la foi. Bann dimoune ki ena la foi trouve bien difference ki ena entre bann fausse kitsoz ki bann dimoune dire ek bann promesse sacré ki Jéhovah faire. Plitar, Josué ek Caleb ti faire konn zot sentiment concernant reputation ki Jéhovah ena pou realise tou so bann promesse. (Lire Josué 14:6, 8; 23:2, 14.) Josué ek Caleb ti attaché ar zot Bondié ki fidele, ek jamais sa ti pou vinn dan zot l’esprit pou blesse Li, pou al suive enn la foule ki pa ti ena la foi. Alors, zot ti tini ferme, ek zot inn laisse enn l’exemple extraordinaire pou nou zordi.—Nomb. 14:1-10.
6. Dan ki different fason nou kapav gagne pression pou suive la foule?
6 Eski parfois ou senti ki ena pression lor ou pou suive la foule? Bann dimoune ki eloigné ar Jéhovah ek ki bouffonne so bann principe moral, forme enn grand la foule zordi. Kan sa concerne divertissement ek detente, sa la foule-la souvent favorise bann fausse raisonnement. Kitfois zot insisté pou dire ki sa quantité l’immoralité, violence ek spiritisme ki ena dan bann programme television, cinema, ek dan bann video game, zot pa faire okenn di-tort. (2 Tim. 3:1-5) Kan ou choisir divertissement ek detente pou ou-mem ek ou famille, eski ou laisse conscience bann dimoune ki pa prend compte bann principe Bondié influence ou bann decision ek forme ou conscience? En realité, eski sa pa pou pareil coumadir ou pé suive la foule?
7, 8. (a) Couma eski nou forme nou “bann capacité mental,” ek kifer sa qualité formation-la pli bon ki suive enn quantité regle bien severe? (b) Kifer ou trouve l’exemple beaucoup jeune chretien bien encourageant?
7 Jéhovah finn donne nou enn cadeau ki ena enn grand valeur pou aide nou prend bann bon decision: c’est nou “bann capacité mental.” Selman, nou bizin forme sa bann capacité-la par la ’pratik.’ (Héb. 5:14) Kan nou suive la foule, sa pa pou forme nou bann capacité mental; ek de lot coté, c’est pa enn quantité regle bien severe dan bann domaine kot nou conscience impliké, ki pou forme nou bann capacité mental. C’est a cause sa ki, par exemple, bann serviteur Jéhovah pa gagne enn la liste film, livre ek site Internet ki zot bizin rejeté. Le monde pé changé bien vite, alors, enn la liste coumsa pou nepli a jour enn ti moment apré ki’nn faire li. (1 Cor. 7:31) Mais pli pire, sa pou empeche nou pou faire enn travail bien important: examine bien bann principe biblik dan la priere ek apré, prend bann decision ki basé lor sa bann principe-la.—Éph. 5:10.
8 Bien sur, li possible ki nou bann decision ki basé lor la Bible, pa pou faire nou gagne faveur tou dimoune. Kitfois bann jeune ki al lekol gagne beaucoup pression pou guetté ek pou faire seki tou dimoune guetté ek faire. (1 Pierre 4:4) Alors, nou bien content pou trouve bann chretien, jeune ek agé, ki imite la foi Josué ek Caleb, kan zot refuse pou suive la foule.
Pa suive “zot leker ek zot lizié”
9. (a) Pendant enn voyage, kifer sa kapav dangereux pou zis suive nou bann tendance ek nou bann desir? (b) Kifer la loi ki trouve dan Nombres 15:37-39 ti bien important pou peuple Bondié dan le passé?
9 Deuxieme l’influence dangereux ki nou pou examiné c’est l’influence ki nou ena lor nou-mem. Nou kapav explik sa dan sa fason-la: si ou bizin faire enn voyage pou al dan enn certain l’endroit, eski ou pensé ki ou pou kapav mette ou map enn coté pou faire zis seki ou envie—kitfois ou prend n’importe ki chemin kot ou pensé ena bann joli vue? Li clair ki si nou suive nou bann desir, sa pou empeche nou pou realise nou l’objectif. Dan sa domaine-la, anou prend enn lot la loi ki Jéhovah ti donne bann Israélite dan le passé. Kitfois zordi, li possible ki beaucoup dimoune pou trouve difficile pou comprend enn la loi ki demann zot pou mette bann frange ek enn cordon bleu lor zot linge. (Lire Nombres 15:37-39.) Mais kan-mem sa, eski ou trouve so l’importance? Kan peuple Bondié ti obeir sa la loi-la, sa ti aide zot pou reste different ek separé ar bann nation païen ki ti entoure zot. Li ti bien important ki zot faire sa si zot ti envie gagne faveur Jéhovah ek garde sa faveur-la. (Lév. 18:24, 25) Selman, sa la loi-la montré aussi ki l’influence ki nou ena lor nou-mem, li dangereux ek li kapav eloigne nou ar nou l’objectif: la vie eternel. Couma?
10. Couma Jéhovah ti montré ki Li ti konn bien bann dimoune?
10 Remarké seki Jéhovah ti dire so peuple pou montré kifer Li ti donne sa la loi-la: “Fodé pa ki zot suive zot leker ek zot lizié, ki zot pé suive pou gagne bann relation immoral.” Jéhovah ena enn connaissance bien profond lor bann dimoune. Li bien koné couma li extra facile pou nou leker, setadir seki nou été au fond nou-mem, attiré par seki nou trouvé ar nou lizié. La Bible donne nou sa l’avertissement-la: “Leker pli traitre ki n’importe ki lezot kitsoz ek li bien mauvais. Kisannla kapav konn li?” (Jér. 17:9) Alors, eski ou trouvé, couma sa l’avertissement ki Jéhovah ti donne bann Israélite-la ti bien approprié? Li ti bien koné ki zot ti pou ena tendance pou guette bann nation païen ki ti autour zot ek pou laisse-zot attiré par seki zot ti trouvé. Kitfois zot ti pou tenté pou ressemblé bann dimoune ki pa ti servi Jéhovah ek apré, pou pense pareil couma zot, pou ena mem sentiment ek pou faire pareil couma zot.—Prov. 13:20.
11. Dan ki fason nou kapav laisse-nou attiré par nou leker ek par seki nou lizié trouvé?
11 Dan nou lepok, li encore pli facile pou nou leker ki bien traite, laisse-li attiré par seki nou lizié trouvé. Nou pé vive dan enn le monde ki pousse bann dimoune pou satisfaire desir zot la chair. Couma nou kapav applik principe ki ena dan Nombres 15:39? Anou prend enn l’exemple: si bann dimoune ki autour ou dan lekol, dan travail, ou-soit kot ou resté, pli allé, zot pé habille dan enn fason indecent, eski sa pou ena enn l’influence lor ou? Eski ou pou tenté pou ’suive ou leker ek ou lizié,’ ek eski ou pou laisse-ou attiré par seki ou trouvé? Eski lerla, ou pou tenté pou baisse niveau ou bann principe pou habille pareil couma zot?—Rom. 12:1, 2.
12, 13. (a) Ki nou bizin faire si nou lizié ena tendance pou guette kot pa bizin? (b) Ki kapav pousse nou pou evité vinn enn tentation pou lezot?
12 Nou bien bizin developpe maitrise de soi. Si nou lizié ena tendance pou guette kot pa bizin, anou rappel determination ki Job, enn zom fidele, ti ena. Li ti faire enn contrat avek so lizié—li ti prend enn decision bien ferme pou pa guette enn lot femme, a part so prop femme, dan enn fason pou flirt avek li. (Job 31:1) Le roi David aussi pareil, li ti ena sa determination-la: “Mo pa pou mette devant mo lizié okenn kitsoz ki pa vaut nanyin.” (Ps. 101:3) N’importe ki kitsoz ki kapav sali nou conscience ek gate nou bann relation avek Jéhovah, c’est pou nou enn “kitsoz ki pa vaut nanyin.” Sa concerne aussi n’importe ki tentation ki parette attirant pou nou lizié ek ki kapav incite nou leker pou faire seki pa bon.
13 De lot coté, surement jamais nou pa pou envie vinn coumadir enn “kitsoz ki pa vaut nanyin” pou lezot kan nou tente zot pou guette seki pa bon. Alors, nou prend sa conseil inspiré ki la Bible donne nou-la serieux pou habille bien ek dan enn fason modeste. (1 Tim. 2:9) Modestie, c’est pa enn kitsoz ki nou kapav decrire dan enn fason ki faire nou plaisir. Nou bizin prend en consideration conscience bann dimoune tout autour nou ek seki kapav affecté zot. Nou bizin faire en sorte ki zot la paix l’esprit ek zot bien-etre passe avant seki nou prefere. (Rom. 15:1, 2) Dan congregation chretien nou ena privilege pou ena plusieurs millier jeune ki donne enn l’exemple extraordinaire dan sa domaine-la. Nou vrai-mem fiere kan nou trouve zot refusé pou suive ’zot leker ek zot lizié,’ mais zot choisir pou faire plaisir Jéhovah dan tou seki zot faire—mem dan fason ki zot habillé!
Pa suive bann “fausse” l’idée
14. Ki l’avertissement Samuel ti annoncé en rapport avek suive bann “fausse” l’idée?
14 Faire coumadir kan ou pé voyagé, ou’nn arrive dan enn grand desert. Ki pou arrivé si ou change direction, ou prend enn chemin pou suive enn mirage, reflet enn kitsoz ki kitfois pa existé? Si ou suive sa mirage-la, ou kapav perdi ou la vie! Jéhovah konn bien sa danger-la. Anou prend enn l’exemple. Bann Israélite ti envie ressemblé bann nation ki ti entoure zot, ek ki ti dirigé par bann le roi humain. Selman, sa l’envie-la ti enn peché grave, parski lerla, coumadir zot ti rejette Jéhovah en tant ki zot le Roi. Mem si Jéhovah ti permette zot pou ena enn le roi humain, Li ti faire so prophete Samuel annonce enn l’avertissement bien clair lor danger pou suive bann “fausse” l’idée.—Lire 1 Samuel 12:21.
15. Dan ki different fason bann Israélite ti poursuive bann fausse l’idée?
15 Eski sa bann Israélite-la ti pensé ki enn le roi humain ti pou pli réel, ki zot ti pou kapav depann plus lor li, ki lor Jéhovah? Si oui, zot ti pé vrai-mem poursuive enn fausse l’idée! Zot ti riské suive beaucoup lezot fausse l’idée satanik. Li ti pou bien facile ki bann le roi humain entraine zot pou adore bann zidole. Bann dimoune ki adore bann zidole faire erreur pou pensé ki bann kitsoz physik—bann bondié ki’nn faire ar di-bois ou-soit roche—parette pli réel ki Jéhovah. Zot pensé ki zot kapav compte plus lor sa bann zidole-la ki lor Jéhovah, Bondié ki invisible ek ki’nn crée tou kitsoz. Mais pareil couma l’apotre Paul ti faire remarké, bann zidole zot “nanyin ditou.” (1 Cor. 8:4) Zot pa kapav trouvé, tendé, kozé, ou-soit agir. Kitfois ou kapav trouve zot ek touche zot, mais si ou bizin adore enn ladan, ou pou vrai-mem poursuive enn fausse l’idée—enn l’idée ki dan vide, ki pou amenn zis malheur lor ou.—Ps. 115:4-8.
16. (a) Couma Satan embete beaucoup dimoune zordi pou poursuive bann fausse l’idée? (b) Kan nou compare bann kitsoz materiel ek l’argent ar Jéhovah, zot faire bann dimoune gagne bann fausse l’idée. Kifer?
16 Satan li encore bien fort pou convaink bann dimoune pou suive bann fausse l’idée. Par exemple, li finn embete beaucoup dimoune pou zot compte lor bann kitsoz materiel pou gagne securité. L’argent, bann kitsoz materiel, ek enn travail bien payé kitfois parette donne bann l’avantage. Mais ki bann kitsoz materiel kapav faire pou nou kan nou la santé deterioré, kan l’economie dan probleme, ou-soit kan ena enn catastrophe naturel? Ki bann kitsoz materiel kapav faire pou bann dimoune kan zot senti-zot vide endan zot-mem, kan zot pé rod enn sens ek enn direction dan zot la vie, ek zot pé rod reponse pou bann question profond lor la vie? Ki soulagement bann kitsoz materiel kapav donné kan enn dimoune bizin faire face ar la mort? Si nou compte lor bann kitsoz materiel pou satisfaire nou bann besoin spirituel, nou pou bien chagrin. Bann kitsoz materiel pa kapav faire nanyin pou nou; zot faire nou gagne bann fausse l’idée. A la longue, zot pa mem kapav faire nou gagne enn securité physik, parski zot pena enn l’effet durable lor la vie bann dimoune, enn la vie ki bien courte ek n’importe kan zot kapav faire face ar maladie ek la mort. (Prov. 23:4, 5) Mais nou Bondié, Jéhovah Li, Li beaucoup plus réel! Zis enn relation bien solide avek Li ki kapav faire nou gagne enn vrai securité. Sa c’est vrai-mem enn benediction! Anou faire zeffort pou ki jamais nou pa abandonne Li pou poursuive bann fausse l’idée.
17. Ki determination ou ena concernant bann mauvais l’influence ki nou finn examiné?
17 Eski li pa enn benediction ki nou ena Jéhovah couma nou Camarade ek nou Guide pendant nou voyage dan la vie? Si nou contigne suive so bann l’avertissement ki Li donne nou avek amour kont sa trois mauvais l’influence-la—la foule, nou prop leker ek bann fausse l’idée—nou pou plus kapav arrive kot nou pé allé ek gagne la vie eternel. Dan prochain lartik, nou pou examine trois lezot l’avertissement ki Jéhovah donné pou aide nou ena la haine ek pou rejette bann fausse chemin ki faire tellement beaucoup dimoune prend enn mauvais direction.—Ps. 119:128.
Ki ou pensé?
Couma ou kapav applik personnellement bann principe ki trouve dan sa bann verset-la?
• 1 Samuel 12:21
• Psaume 119:128
[Zimage page 11]
Eski parfois ou tenté pou suive la foule?
[Zimage page 13]
Kifer li dangereux pou suive certain desir?
[Zimage page 14]
Eski ou pé suive bann fausse l’idée?