Eski bann mort kapav aide bann ki vivant?

TAMBA, enn jeune homme ki reste dan l’ouest l’Afrique, ti pré pou compose enn l’examen dan so lekol.a So mama ti insisté ki li ti bizin l’aide so bann ancetre ki’nn mort pou ki li kapav passe so l’examen. Dan Palerme, en Sicile, bann tourist visite bann cimetiere souterrain kot inn expose bann centaine momie ki’nn preservé avek soin. Certain pensé ki sa bann momie-la kapav donne bann dimoune ki vivant enn protection. Chaque l’année, bann dimoune visite Lily Dale, enn la ville ki trouve dan l’ouest New York dan l’Amérique. C’est enn la ville ki renommé a cause grand quantité sorcier ki vive la-bas. Bann dimoune visite sa la ville-la avek l’espoir ki zot kapav rente en contact avek bann famille ou-soit bann camarade ki’nn mort ek gagne zot l’aide.

A travers le monde, croyance ki bann mort kapav aide bann ki vivant encore existé. Ki ou l’opinion lor la? Kitfois finn enseigne ou sa bann croyance-la ou-soit ou bien proche avek certain ki attaché avek sa croyance-la. Li normal ki nou envie trouve bann dimoune ki nou content mais ki’nn mort. Bann sorcier promette ki zot kapav satisfaire sa desir-la. Dan Time magazine enn sorciere ti dire ki le monde bann l’esprit li “toujours la, si bizin l’aide bizin zis demandé.” Eski sa li vrai? Eski bann mort vrai-mem kapav aide bann dimoune vivant? Ou kapav etonné par reponse bien clair ki ena dan la Bible.

Eski bann mort zot vivant kit place?

La Bible koz lor condition bann mort, dan enn fason simple, ki facile pou comprend. Guetté ki Ecclésiaste 9:5 dire: “Bann ki vivant koné ki zot pou mort; mais bann dimoune mort zot, zot pa konn nanyin ditou.” Eski li possible ki bann mort ena sentiment? Verset 6 reponn: “Zot l’amour, zot la haine ek zot jalousie finn fini disparette, ek pou touletan, zot nepli pou ena enn part dan n’importe ki kitsoz ki bizin faire lor la terre.” Remark aussi ki verset 10 dan mem chapitre dire ki “pena ni travail, ni plan, ni connaissance, ni sagesse dan shéol, place kot to pé allé.” Mot hébreu “shéol” ki ti servi ici vedir “tombe kot tou dimoune allé.” Seki interessant, inn servi mot grec “hadès,” ki ena mem signification ki “shéol,” dan bann l’Ecriture pou montré place kot Jésus Christ ti allé pendant enn temps apré so la mort.—Actes 2:31.

Jésus ti aide beaucoup dimoune letan li ti vivant, mais li ti koné ki li ti pou bizin mort. Eski li ti attann ki li ti pou toujours kapav aide bann dimoune kan li ti pou dan tombe? Non. Li ti compare so prop la mort ki ti bien pré ar enn la nuit kot li impossible pou travail. (Jean 9:4) Jésus ti konn bien ki kan bann dimoune arrete vive, zot “sans la force dan la mort.”—Isaïe 26:14.

Jésus ti aussi servi enn comparaison ki ti faire enn mem application lor la mort. Kan so camarade Lazare ti mort, Jésus ti compare la mort ar enn sommeil. (Jean 11:11-13) Nou pa attann ki enn dimoune ki pé dormi pou aide nou, pa vrai? Enn dimoune ki pé dormi li pa konn nanyin ek li pa kapav agir en faveur n’importe kisannla.

Eski nâme contigne vive apré la mort?

Beaucoup inn aprann ki nâme li enn partie invisible dan zot ki contigne vive apré la mort. La Bible enseigne enn kitsoz different. Premier livre la Bible, Genèse, explik nou ki été nâme. Genèse 2:7 dire ki kan ti pé crée premier zom, li “ti vinn enn nâme vivant.” Nâme enn dimoune c’est dimoune-la en entier; bann zanimo aussi zot bann nâme. (Genèse 1:20-25) Alors, li logik ki kan enn dimoune ou-soit enn zanimo mort, nâme-la li mort. La Bible confirme sa.—Ézékiel 18:4.

Mais selman, certain kapav demandé: ‘Ki nou kapav dire lor tou sa bann zistoire concernant bann dimoune ki’nn gagne contact avek bann mort, ki’nn tann zot la voix, ou-soit mem ki’nn trouve zot?’ Nou tann souvent sa bann qualité zistoire-la dan beaucoup pays. Zot donne l’espoir bann dimoune ki finn perdi bann famille ou-soit bann camarade proche, ek motive beaucoup dimoune pou rod l’aide bann sorcier ki pretann ki zot kapav rente en contact avek bann mort.

Eski sa bann zistoire-la zot vrai? Si oui, eski sa pa pou contredire bann l’enseignement basé lor la Bible ki nou fek lire dan bann paragraphe pli avant? Christ Jésus ti decrire Parole Bondié couma la verité. (Jean 17:17) La verité li pa contredire li-mem. Avredir, la Bible donne nou bann conseil bien clair lor couma nou bizin considere l’idée ki bann mort kapav aide bann dimoune vivant. La Bible koz lor enn kikenn ki ti essaye gagne l’aide ar bann mort. Kan nou lire bien sa passage-la, nou pou trouve la verité.

Enn le roi rod l’aide ar enn mort

Sa ti passé dan enn l’endroit dan nord Israël kot ti ena enn la guerre. Le roi Saül ek so l’armée ti faire face ar l’armée Philistin, enn l’armée ki ti faire peur. Kan Saül ti trouve camp bann Philistin, “so leker ti commence batté fort-fort.” Sa lepok-la le roi Saül ti’nn abandonne vrai l’adoration. A cause sa, Jéhovah pa ti reponn li kan li ti prié pou gagne so l’aide. Kot-sa Saül ti pou allé pou gagne l’aide? Samuel ki ti prophete Bondié ti mort.—1 Samuel 28:3, 5, 6.

Saül ti rod conseil ar enn sorcier dan la ville En-Dor. Li ti suppliye sa sorcier-la pou “faire Samuel monté” parmi bann mort. Sa sorcier-la ti provok enn apparition. Sa “Samuel[-la]” ti dire Saül ki bann Philistin ti pou pli fort ek ki Saül ek so bann garson ti pou mort dan la guerre. (1 Samuel 28:7-19) Eski sa kikenn ki ti kozé-la ti vrai-mem Samuel ki ti relevé parmi bann mort?

Anou reflechi. La Bible dire ki kan enn dimoune mort li “retourne dan so la terre” ek ki “so bann pensée fini net.” (Psaume 146:4) Saül ek Samuel toulé-deux ti koné ki Bondié ti defann gagne contact avek bann sorcier. En realité, enn tigit avant, Saül ti’nn prend la tête pou tire bann pratik spiritisme dan pays!—Lévitique 19:31.

Anou contigné dan nou raisonnement. Si Samuel ki ti fidele ti encore vivant couma enn l’esprit, eski li ti pou al kont la loi Bondié kan li ti pou travail ensam avek enn sorcier pou gagne contact avek Saül? Jéhovah ti refuse koz avek Saül. Eski enn sorcier ti pou kapav force Bondié Tout-Puissant pou communik avek Saül par moyen Samuel ki ti mort? Non. Li clair ki sa “Samuel[-la]” li pa ti prophete Bondié dan okenn fason. Sa ti enn l’esprit—enn mauvais demon ki ti pé pretann ki li ti Samuel ki ti mort.

Bann demon c’est bann ange ki ti rebelle kont l’autorité Bondié au commencement l’histoire bann dimoune. (Genèse 6:1-4; Jude 6) Sa bann demon-la kapav observe bann dimoune letan zot vivant; zot koné couma sakenn kozé, couma zot été, ek couma zot agir. Zot rod tou l’occasion pou fann l’idée ki seki la Bible enseigné li pa vrai. Sa pa etonne nou ki la Bible averti nou pou pa gagne okenn contact avek sa bann qualité la force spirituel-la! (Deutéronome 18:10-12) Sa bann mauvais l’esprit-la encore bien actif zordi.

Asterla nou kapav comprend kifer beaucoup dire ki zot “inn tann” ou-soit “inn trouve” bann ki zot content mais ki’nn mort. Mem si sa bann apparition-la kapav parette enn bon kitsoz, bann mauvais l’esprit zot bien decidé pou trompe bann dimoune.b (Éphésiens 6:12) Pense aussi lor la: Jéhovah li enn Bondié ki rempli ar l’amour ek ki interessé ar nou. Si bann mort ti pé existé dan kit place ek zot ti kapav vinn aide zot bann camarade ek zot famille, eski nou Createur ki rempli ar l’amour ti pou empeche sa bann contact-la ek dire ki c’est enn kitsoz “detestable”? Nou sur ki non! (1 Pierre 5:7) Alors, eski ena enn place kot nou kapav gagne enn l’aide ki sur?

Vrai l’aide pou bann ki vivant ek bann mort

Avek seki nou’nn lire avant, nou comprend ki bann mort pena capacité pou aide bann ki vivant. En plus, rod l’aide avek bann mort li pa efficace ditou ek surtout li pa bon; li bien dangereux, parski sa li al kont la loi Bondié ek kapav faire nou tombe enba l’influence bann demon.

La Bible dirige nou vers meilleur Source l’aide ki ena—nou Createur, Jéhovah. Li kapav libere nou, mem ar la mort. (Psaume 33:19, 20) Azordi, Li la pou aide nou. Li donne enn vrai l’espoir, contrairement ar bann fausse l’espoir ki bann sorcier donné.

Tamba, ki nou ti mentionné dan l’introduction, ti aprann par so prop l’experience difference ki ena entre bann fausse l’espoir ki bann sorcier offert ek la verité ki Jéhovah offert nou. Bann sorcier ti pretann ki si li pa ti faire enn sacrifice pou so bann ancetre ki’nn mort, li ti pou fail so l’examen. Tamba ti’nn commence etudié la Bible avek bann Témoins de Jéhovah. Li ti’nn aprann vrai condition bann mort ek aussi ki derriere bann ki pretann ki zot bann ancetre ki’nn mort, ena bann mauvais l’esprit. Malgré bann grand pression ki li ti gagné avek so mama ki ti pé dire li rod l’aide enn sorcier, Tamba ti refusé ek li ti dire so mama: “Si mo fail, mo pou travail pli dur l’année prochaine.”

Ki resultat li finn gagné? Li ti sorti premier dan sa l’examen-la! So mama ti etonné, li ti nepli ena confiance dan bann sorcier, ek jamais li finn koz sa bann qualité sacrifice-la encore. Tamba ti aprann ki Jéhovah averti nou pou evite “demann conseil avek bann mort en faveur bann dimoune vivant.” (Isaïe 8:19) L’etude la Bible ti donne Tamba confiance ki si li ti prend plaisir dan la loi Jéhovah, li ti pou reussi.—Psaume 1:1-3.

Mais, ki nou kapav dire lor bann dimoune ki nou content mais ki’nn mort? Eski pena okenn l’espoir pou zot? Jéhovah pa zis aide nou, bann ki vivant, mais Li finn promette pou aide aussi bann ki dan tombe. Apré ki li ti decrire couma bann dimoune mort pa kapav faire nanyin, guetté ki prophete Isaïe ti annoncé dan chapitre 26 verset 19: “To bann mort pou vive. . . . Levé ek criyé dan la joie, zot bann ki reste dan la poussiere!” Sa prophetie-la dire aussi ki “bann ki sans okenn la force dan la mort” pou revive.

Mazinn enn coute! Sa bann million dimoune ki pé dormi dan tombe-la pou regagne la vie! En realité, la Bible montré ki Jéhovah pé “attann avek impatience” pou donne la vie bann mort. (Job 14:14, 15) Eski sa bann qualité promesse-la parette trop joli pou ki zot vrai? Jésus Christ ti tellement sur sa l’esperance-la ki li ti decrire bann mort coumadir deja vivant devant lizié Jéhovah.—Luc 20:37, 38.

Eski ou ti pou content ena sa l’esperance-la?c Contigne gagne connaissance exact lor la Bible. A mesure ki ou etudié, ou pou sur ki Jéhovah kapav aide bann vivant ek bann mort ek ki so bann promesse zot “fidele ek vrai.”—Révélation 21:4, 5.

[Notes]

[L’encadré page 11]

Li normal ki nou envie trouve bann dimoune ki nou content mais ki’nn mort

[Zimage page 12]

Eski prophete Samuel ti relevé parmi bann mort ek ti koz avek le roi Saül?