Vinn proche ar Bondié

1 ROIS 14:13

“JÉHOVAH examine tou bann leker ek Li discerne tou tendance bann pensée.” (1 Chroniques 28:9) Ti ecrire sa bann parole inspiré-la pou faire nou ena enn grand reconnaissance pou l’interet profond ki Jéhovah ena pou nou. Jéhovah rod seki bon dan nou leker mem si nou bann dimoune imparfait. Nou trouve sa bien dan bann parole ki Li ti dire concernant Abiya, dan 1 Rois 14:13.

Famille Abiya ti bann mauvais dimoune ek zot ti ena enn conduite immoral. So papa, Yarobam, ti chef enn famille apostat.a Jéhovah ti decide pou detruire lakaz Yarobam net, “pareil couma tire malpropté.” (1 Rois 14:10) Mais Bondié ti donne l’ordre ki enn sel membre dan famille Yarobam, Abiya—ki ti bien malade—gagne enn l’enterrement ki digne.b Kifer? Bondié ti expliké: “Finn trouve enn kitsoz ki bon dan li envers Jéhovah Bondié Israël, dan lakaz Yarobam.” (1 Rois 14:1, 12, 13) Ki sa bann parole-la montré nou lor Abiya?

La Bible pa dire si Abiya ti enn adorateur fidele Jéhovah. Mais kan-mem, ti ena enn kitsoz ki bon dan li. Sa kitsoz ki bon-la ti “envers Jéhovah,” kitfois sa ti ena enn rapport avek l’adoration Jéhovah. Dapré bann ecrivain rabbin, Abiya ti faire enn pelerinage pou al dan temple ki ti trouve Jérusalem ou-soit li ti renvoye bann garde, ki lor l’ordre so papa, ti empeche bann Israélite al Jérusalem.

Mem si nou pa koné exactement couma li’nn montré sa bonté-la, sa ti extraordinaire. Premierement, sa bon kitsoz-la ti sincere; li ti “dan [Abiya]”—setadir, dan so leker. Deuxiemement, li ti special. Abiya ti montré sa bonté-la mem si li ti reste “dan lakaz Yarobam.” Enn specialiste lor la Bible dire: “Li enn grand kitsoz ki bann dimoune reste bon alors ki zot vive dan bann place ek bann famille ki mauvais.” Enn lot dire ki sa bonté ki Abiya ti ena-la ti “bien visible . . . , pareil couma bann zetoile parette pli brillant kan le ciel noir, ek bann cedre, pli joli kan [zot] entouré ar bann pié ki pena feuille.”

Seki pli important, bann parole ki ena dan 1 Rois 14:13 enseigne nou enn joli kitsoz lor Jéhovah ek lor seki Li rodé dan nou. Rappel ki ti “trouve enn kitsoz ki bon dan” Abiya. Kitfois Jéhovah ti rod dan leker Abiya ziska ki Li ti trouve enn ti trace bonté dan li. Comparé ar so famille, Abiya ti sa sel perle “dan enn tas ti roche[-la],” pareil couma enn specialiste lor la Bible ti dire. Jéhovah ti bien apprecié sa ‘kitsoz ki bon-la’ ek ti recompense Abiya, kan Li ti manifesté So misericorde envers zis li tousel ek pa envers bann lezot membre so famille ki ti immoral.

Eski sa pa rassure nou pou koné ki Jéhovah rod seki bon dan nou ek ki sa ena valeur pou Li, mem si nou bann dimoune imparfait? (Psaume 130:3) Sa bizin encourage nou pou vinn pli proche avek Jéhovah, Bondié ki examine bien nou leker pou trouve mem enn ti ‘kitsoz ki bon.’

[Notes]