Pa laisse l’orgueil developpé dan nou leker
“Bondié kont bann ki ena l’orgueil.”—JACQUES 4:6.
1. Ki l’exemple montré ki li pa mauvais ki nou senti-nou fiere?
ESKI finn deja arrive enn kitsoz dan ou la-vie ki’nn faire ou senti-ou bien fiere? La plupart parmi nou finn deja ena sa sentiment-la. Li pa mauvais ki parfois, nou senti-nou fiere. Par exemple, kan bann parent guette cahier-rapport zot tifi, ek zot lire ki li ena enn bon conduite ek ki li travail dur dan lekol, surement zot senti-zot bien satisfait. L’apotre Paul ek so bann camarade ti fiere kan zot ti tann dire ki bann membre dan enn nouveau congregation ki zot ti’nn aidé pou formé, ti pé reste fidel malgré bann persecution.—1 Thessaloniciens 1:1, 6; 2:19, 20; 2 Thessaloniciens 1:1, 4.
2. Kifer souvent, li pa bon ki enn kikenn fiere?
2 Sa bann l’exemple-la montré nou ki parfois nou fiere parski nou satisfait ar seki nou finn faire, ou-soit a cause enn kitsoz ki nou ena. Seulement, li arrivé souvent ki enn kikenn ki fiere, li ena enn trop grand l’opinion lor li-mem, kitfois a cause so bann capacité, so beauté, so richesse, ou-soit so position. Souvent, li ena enn l’attitude ek enn maniere arrogant. En tant ki chrétien, nou bizin faire bien attention ar sa qualité fierté-la. Kifer? Parski, a cause l’imperfection ki nou finn gagné ar Adam, nou ena tendance pou montré-nou egoïste. (Genèse 8:21) A cause sa, nou leker kapav bien vite trompe nou ek faire nou ena enn fierté ki pa bon. Par exemple, bann chrétien bizin faire attention pou pa fiere a cause zot race, zot richesse, zot l’education, zot capacité naturel, ou-soit zot capacité pou faire enn travail pli bien ki lezot. Li pa bon si zot fiere a cause sa bann kitsoz-la, ek sa pa faire Jéhovah plaisir.—Jérémie 9:23; Actes 10:34, 35; 1 Corinthiens 4:7; Galates 5:26; 6:3, 4.
3. Ki été l’orgueil, ek ki Jésus ti dire lor la?
3 Enn lot raison kifer fodé pa nou ena enn mauvais fierté, c’est parski si nou laisse sa sentiment-la grandi dan nou leker, sa qualité fierté-la kapav vinn l’orgueil. Ki sa vedir l’orgueil? Enn dimoune ki ena l’orgueil, li pa zis pensé ki li pli bon ki lezot, mais li aussi meprise bann dimoune ki li considere couma inferieur. (Luc 18:9; Jean 7:47-49) Jésus ti cite ‘l’orgueil’ parmi bann mauvais kitsoz ki sorti ‘dan leker’ ek ki “faire enn dimoune vinn impur.” (Marc 7:20-23) Bann chrétien comprend ki quantité li important pou evite developpe enn leker ki rempli ar l’orgueil.
4. Couma sa kapav aide nou si nou examine l’exemple bann dimoune ki mentionné dan la Bible ek ki ti ena l’orgueil?
4 Pou aide nou pou rejette l’orgueil, nou pou examine certain l’exemple ki sorti dan la Bible ek ki koz lor bann dimoune ki ti ena l’orgueil. Sa pou aide ou pou trouve pli bien si ou ena enn mauvais fierté dan ou leker, ou-soit si sa kapav developpé plitar. Sa pou aide ou pou rejette bann pensée ou-bien bann sentiment ki kapav faire ou ena l’orgueil dan ou leker. Lerla, ou pa pou peur kan Bondié faire seki Li ti dire: “Mo pou retire bann dimoune ki parmi toi, dan la joie a cause zot l’orgueil, ek jamais encore to pa pou ena l’orgueil dan mo montagne sacré.”—Tsephania 3:11.
Bondié agir kont bann dimoune ki ena l’orgueil
5, 6. Couma Pharaon ti montré ki li ti ena l’orgueil, ek ki ti arrive li a cause sa?
5 Ou kapav aussi comprend ki Jéhovah pensé lor l’orgueil, par la fason ki li ti agir avek bann grand dirigeant couma Pharaon. Pena okenn doute ki Pharaon ti ena enn leker rempli ar l’orgueil. Li ti considere li-mem couma enn bondié ki dimoune ti bizin adoré, ek li ti meprise so bann esclave, bann Israélite. Guetté couma li ti reagir kan Moïse ek Aaron ti demann li laisse bann Israélite al dan desert pou al “faire enn fête” pou Jéhovah. Li ti reponn avek beaucoup l’orgueil: “Kisannla sa Jéhovah-la, pou ki mo bizin ecoute so la-voix ek laisse Israël allé?”—Exode 5:1, 2.
6 Apré ki Jéhovah ti envoye six plaie lor l’Égypte, Li ti dire Moïse demann Pharaon: “Eski to pé toujours montré l’orgueil dan fason ki to traite mo peuple ek to pa’lé laisse zot allé?” (Exode 9:17) Apré sa, Moïse ti annonce septieme plaie—la grêle, ki ti faire ravage dan pays. Apré dixieme plaie, bann Israélite ti gagne permission pou quitte l’Égypte, mais Pharaon ti revinn lor so decision, ek li ti suive zot. Finalement, Pharaon ek so l’armée, ti’nn bloqué dan la mer Rouge. Maziné ki zot ti ressenti kan zot ti trouve la mer pé ferme lor zot! Ki ti arrive Pharaon a cause so l’orgueil? So bann pli bon soldat ti dire: “Anou sauvé ek anou reste loin ar Israël, parski pena doute ki Jéhovah pé laguerre pou zot kont bann Égyptien.”—Exode 14:25.
7. Couma bann dirigeant Babylone ti montré ki zot ti ena l’orgueil?
7 Ti ena lezot dirigeant ki ti ena l’orgueil, ki Jéhovah ti abaissé aussi. Enn parmi zot ti Sennakérib, le roi l’Assyrie. (Isaïe 36:1-4, 20; 37:36-38) Bann Babylonien ti finalement attak l’Assyrie, mais Jéhovah ti abaisse aussi deux lé-roi babylonien parski zot ti ena l’orgueil. Rappel fête ki le roi Belshatsar ti faire, kan li ek so bann invité royal ti pé boire di-vin dan bann coupe ki ti sorti dan temple Jéhovah, ek zot ti pé rann gloire bann bondié babylonien. Enn coup, bann lé-doigt la main enn dimoune ti apparette ek ti ecrire enn message lor muraille. Kan Belshatsar ti demann prophete Daniel pou explik li sa l’ecriture bizarre-la, Daniel ti rappel li: “Bondié Très-Haut Li-mem ti donne Neboukadnetsar, to papa, so royaume . . . mais kan so leker ti commence rempli ar l’orgueil . . . , Bondié ti tire li lor trone so royaume, ek ti faire li perdi so dignité. . . . Mais toi, so garson Belshatsar, mem si to ti konn tousala, to pa finn humilié to leker.” (Daniel 5:3, 18, 20, 22) Dan mem la-nuit, l’armée Médo-Perse ti attak Babylone ek ti touye Belshatsar.—Daniel 5:30, 31.
8. Couma Jéhovah finn agir avek plusieurs dimoune ki ti ena l’orgueil?
8 Rappel aussi bann dimoune ki ti ena l’orgueil ek ki ti meprise le peuple Jéhovah: Goliath, enn geant Philistin, Hamân, premier ministre Perse, ek le roi Hérode Agrippa, ki ti dirige province Judée. Parski zot ti ena l’orgueil, Jéhovah ti abaisse sa trois zom-la ek ti faire zot mort. (1 Samuel 17:42-51; Esther 3:5, 6; 7:10; Actes 12:1-3, 21-23) Maniere ki Jéhovah ti agir avek sa bann dimoune ki ti ena l’orgueil-la, montré enn kitsoz ki bien vrai: “Avant la ruine, ena l’orgueil, ek avant enn faux pas, ena enn l’esprit vantard.” (Proverbes 16:18) Oui, pena okenn doute ki “Bondié kont bann ki ena l’orgueil.”—Jacques 4:6.
9. Couma bann lé-roi Tyr ti vinn bann traitre?
9 Le roi Tyr ti different avek le roi l’Égypte, l’Assyrie, ek Babylone, bann dirigeant ki ti ena l’orgueil, parski le roi Tyr li, li ti aide peuple Bondié pendant enn certaine temps. Pendant règne David ek Salomon, li ti donne bannla bann zouvrier qualifié ek bann materiaux pou monte bann batiment royal, ek temple Bondié. (2 Samuel 5:11; 2 Chroniques 2:11-16) Mais malheureusement, plitar bann lé-roi Tyr ti tourne kont peuple Jéhovah. Kifer?—Psaume 83:3-7; Yoël 3:4-6; Amos 1:9, 10.
“To leker ti commence rempli ar l’orgueil”
10, 11. (a) Kisannla nou kapav compare ar bann lé-roi Tyr? (b) Kifer bann lé-roi sa pays-la ti change zot l’attitude envers bann Israélite?
10 Jéhovah ti inspire prophete Ézékiel pou li denonce bann lé-roi ki’nn dirige Tyr ek pou condamne zot. Dan message ki Ézékiel ti dire “le roi Tyr,” ena certain l’expression ki concerne bann lé-roi Tyr ek Satan, toulé-deux. Satan, li-mem premier traitre, ek li “pa’nn tini ferme dan la verité.” (Ézékiel 28:12; Jean 8:44) Avant, Satan ti enn creature spirituel fidel ki ti servi ensam avek bann lezot garson spirituel Jéhovah, dan So l’organisation. Par Ézékiel, Jéhovah ti donne bann renseignement lor raison principal kifer bann lé-roi Tyr ek Satan finn tombé. Li ti dire:
11 “To ti en Éden, jardin Bondié. To ti couvert ar tou bann pierre precieuse . . . To-mem cherubin ki couvert, ek ki mo ti choisir . . . To ti fidel dan seki to ti faire depuis jour ki to ti’nn crée, ziska ki finn trouve l’injustice en toi. Parski to ti ena enn quantité marchandise, sa finn rempli toi ar violence ek to finn commence faire peché. Ek mo pou . . . detruire toi, ah cherubin ki couvert . . . To leker ti commence rempli ar l’orgueil a cause to beauté. To finn ruine to sagesse a cause to beauté extraordinaire.” (Ézékiel 28:13- 17) Oui, c’est l’orgueil ki ti pousse bann lé-roi Tyr pou vinn violent kont peuple Jéhovah. La ville Tyr ti enn centre commercial ki ti vinn extra riche, ek tou dimoune ti konn li pou so bann joli produit. (Isaïe 23:8, 9) Bann lé-roi Tyr ti commence ena enn trop grand l’opinion lor zot-mem, ek zot ti commence faire dominere ar peuple Bondié.
12. Couma Satan finn vinn enn traitre, ek ki li finn contigne faire?
12 Li ti pareil aussi pou sa creature spirituel ki ti vinn Satan-la. Au commencement, li ti ena la sagesse necessaire pou faire tou seki Bondié ti dire li faire. Au lieu ki li ti ena reconnaissance, li ti commence “rempli ar l’orgueil” ek li ti meprise fason ki Bondié ti pé dirigé. (1 Timothée 3:6) Li ti ena tellement enn grand l’opinion lor li-mem, ki li ti commence envie ki Adam ek Ève adore li. Sa mauvais desir-la finn developpé dan so leker, ek sa finn faire li faire peché. (Jacques 1:14, 15) Satan ti embete Ève ek ti faire li mange fruit ki ti lor sel pié ki Bondié ti interdit zot mangé. Apré sa, Satan ti servi Ève pou faire Adam mange sa fruit ki Bondié ti defann-la. (Genèse 3:1-6) C’est coumsa ki premier couple humain ti rejette droit ki Bondié ti ena pou dirige zot, ek avredir zot ti vinn bann adorateur Satan. Pena okenn limite ar l’orgueil Satan. Li finn essaye tente tou bann creature intelligent ki Jéhovah ti crée dan le ciel ek lor la terre—mem Jésus Christ—pou faire zot adore li, ek rejette domination Jéhovah.—Matthieu 4:8-10; Révélation 12:3, 4, 9.
13. Ki resultat l’orgueil finn produire?
13 Nou trouvé ki l’orgueil ti commencé ar Satan; c’est a cause sa defaut-la ki ena peché, souffrance ek corruption dan le monde zordi. Satan, li-mem “bondié sa system-la,” ek li pé contigne pousse bann dimoune pou ena enn mauvais fierté ek l’orgueil. (2 Corinthiens 4:4) Li koné ki li ena enn tigit lé-temps-mem, alors li pé laguerre avek bann vrai chrétien. So but c’est pou detourne zot ar Bondié, pou faire zot content zot-mem, pou vinn vantard ek pou ena l’orgueil. La Bible ti annoncé ki beaucoup dimoune pou ena sa bann defaut-la dan “dernier jour.”—2 Timothée 3:1, 2, note; Révélation 12:12, 17.
14. Ki principe Jéhovah servi pou traite avek so bann creature?
14 Avek courage, Jésus Christ ti denonce bann mauvais resultat ki l’orgueil Satan finn produire. Dan au moins trois l’occasion, en presence so bann l’ennemi ki ti pensé ki zot pli droite ki tou dimoune, li ti montré principe ki Jéhovah servi pou traite avek bann dimoune: “Celui ki rod grandeur, li pou abaissé, ek celui ki abaisse li-mem, pou donne li grandeur.”—Luc 14:11; 18:14; Matthieu 23:12.
Veillé ki pena l’orgueil dan zot leker
15, 16. Kifer Agar ti commence ena l’orgueil?
15 Surement ou finn remarké ki bann l’exemple ki nou finn cité la-haut koz lor bann dimoune ki ti ena enn grand position. Eski sa vedir ki bann dimoune ordinaire pa kapav ena l’orgueil? Non, sa kapav arrivé! Anou examine enn l’evenement ki ti arrivé dan famille Abraham. Li pa ti ena enn garson pou vinn so heritier, ek so femme Sara, ti’nn fini depasse l’age pou gagne zenfant. Dan sa lepok-la, li ti normal ki enn zom dan sa situation-la, prend enn deuxieme femme ek gagne bann zenfant avek li. Bondié ti tolere sa qualité mariage-la parski pa ti encore arrive lepok pou Li retabli bann principe concernant mariage ki li ti’nn etabli au commencement parmi bann vrai adorateur.—Matthieu 19:3-9.
16 Kan Sara ti insisté pou ki Abraham gagne enn zenfant avek Agar, so servante Égyptien, Abraham ti accepté ek sa zenfant-la ti pou vinn zot l’heritier. Agar ti vinn deuxieme femme Abraham, ek li ti tombe enceinte. Au lieu ki li ti ena enn grand reconnaissance pou sa privilege-la, li ti laisse so leker rempli ar l’orgueil. La Bible raconté: “Kan li ti trouvé ki li enceinte, alors li ti commence meprise so maitresse.” Sa l’attitude-la ti faire enn grand la-guerre dan lakaz Abraham, ek Sara ti renvoye Agar. Mais, ti ena enn solution pou sa problem-la. Ange Bondié ti donne Agar sa conseil-la: “Retourne kot to maitresse ek abaisse toi enba so la-main.” (Genèse 16:4, 9) Li parette ki Agar ti suive sa conseil-la, li ti change so l’attitude envers Sara, ek plitar li ti vinn ancetre beaucoup dimoune.
17, 18. Kifer nou tou nou bizin veillé pou pa developpe l’orgueil?
17 Seki’nn arrive Agar montré nou ki, kan situation enn dimoune vinn pli bon, li kapav commence ena l’orgueil. Leson ki nou tiré ici c’est ki, mem si enn chrétien finn servi Bondié avek enn bon leker, li kapav commence ena l’orgueil si li vinn riche ou-soit si li gagne l’autorité. Li kapav aussi developpe sa l’attitude-la, si lezot flatte li pou seki li reussi faire, pou so sagesse, ou-soit pou so bann capacité. Oui, enn chrétien bizin veillé pou pa developpe l’orgueil dan so leker, surtout si li finn reussi dan certain domaine, ou-soit si li gagne bann plus grand responsabilité.
18 Kan nou aprann couma Bondié considere l’orgueil, sa donne nou enn pli grand raison pou rejette sa defaut-la. So Parole dire: “Enn regard vantard ek enn leker ki rempli ar l’orgueil, sa-mem la lampe bann mauvais dimoune, ek toulé-deux enn peché.” (Proverbes 21:4) Li interessant ki la Bible donne l’avertissement bann chrétien ki “riche dan sa system-la” ki fodé pa zot ena “l’orgueil” ou-soit zot vinn “vantard.” (1 Timothée 6:17, note; Deutéronome 8:11-17) Bann chrétien ki pa riche bizin faire attention pou pena “enn lizié ki envié” seki lezot ena, ek zot bizin rappel ki l’orgueil kapav developpé dan leker n’importe kisannla—bann dimoune riche ek misere toulé-deux.—Marc 7:21- 23; Jacques 4:5.
19. Dan ki fason Ouzziya ti gate bann bon relation ki li ti ena avek Jéhovah?
19 Si nou ena l’orgueil ek bann lezot mauvais defaut encore, sa kapav gate bann bon relation ki nou ena avek Jéhovah. Anou guette par exemple couma le roi Ouzziya ti été pendant premier partie so règne. La Bible dire: “Li ti contigne faire seki droite devant lizié Jéhovah . . . ek li ti contigne faire zeffort pou rod Bondié . . . ; ek dan lepok kot li ti rod Jéhovah, vrai Bondié ti faire li prosperé.” (2 Chroniques 26:4, 5) Mais malheureusement, le roi Ouzziya ti gate bann bon relation ki li ti ena avek Jéhovah, parski “so leker ti commence rempli ar l’orgueil ziska ki sa inn fini li net.” Li ti commence ena tellement enn grand l’opinion lor li-mem, ki li ti rente dan temple pou offert l’encens. Kan bann pretre ti mette li en garde parski li pa ti gagne droit faire sa, “Ouzziya ti extra en colere.” Lerla, Jéhovah ti faire li gagne la lepre, ek li ti mort sans faveur Jéhovah.—2 Chroniques 26:16-21.
20. (a) Couma bon reputation ki Hizqiya ti ena, ti kapav gaté? (b) Ki nou pou examiné dan prochain lartik?
20 Nou trouve enn difference entre sa l’exemple-la ek l’exemple le roi Hizqiya. Enn fois, bon reputation sa lé-roi-la, ti kapav gaté parski “so leker ti commence rempli ar l’orgueil.” Heureusement, “Hizqiya ti abaisse-li, ek li ti arrete ena l’orgueil dan so leker,” ek li ti regagne faveur Bondié. (2 Chroniques 32:25, 26) Nou remarké ki, pou ki Hizqiya tire sa l’orgueil-la dan so leker, li ti bizin developpe l’humilité. Oui l’humilité, li contraire ar l’orgueil. C’est pou sa ki dan prochain lartik, nou pou guetté couma nou kapav developpe l’humilité ek garde sa qualité-la.
21. Ki bann chrétien ki ena l’humilité kapav attann?
21 Alors, fodé jamais nou blié tou bann mauvais resultat ki l’orgueil produire. Anou bien decidé pou rejette enn mauvais fierté, parski “Bondié kont bann ki ena l’orgueil.” Anou faire tou pou developpe l’humilité, lerla, nou kapav attann pou gagne la vie sauve pendant grand jour Bondié, kan Li pou tire tou bann dimoune ki ena l’orgueil ek tou bann mauvais resultat ki sa finn produire. Lerla, “fierté enn dimoune ki’nn faire ar la poussiere, pou bizin courbé, ek vrai-mem grandeur bann dimoune pou abaissé; ek Jéhovah tousel ki pou grand sa jour-la.”—Isaïe 2:17.
Bann point lor ki nou kapav medité
• Couma ou pou decrire enn dimoune ki ena l’orgueil?
• Kisannla l’origine l’orgueil?
• Ki kapav faire enn dimoune developpe l’orgueil?
• Kifer nou bizin veillé pou pa vinn bann dimoune ki ena l’orgueil?
[Zimage, page 15]
A cause so l’orgueil, Pharaon ti’nn abaissé
[Zimage, page 16]
Hizqiya ti abaisse li-mem ek li ti regagne faveur Bondié