“Contigne veillé”—L’heure jugement finn arrivé!
Bann renseignement ki ena dan sa lartik-la, basé lor brochure Contigne Veillé! ki ti sorti dan l’assemblée district ki ti ena dan le monde entier en 2004/05.
“Contigne veillé parski zot pa koné ki jour zot Seigneur pé vini.”—MATTHIEU 24:42.
1, 2. Ki l’exemple Jésus ti servi pou montré couma li pou vini?
KI OU pou faire si ou koné ki enn voleur pé circulé trankil-trankil dan ou l’endroit, ek ki li pé rod enn l’occasion pou li rente dan lakaz bann dimoune pou li kokin? Ou pou reste lor ou garde pou ou kapav protege ou famille ek ou di-bien. Kifer? Parski enn voleur pa envoye enn lettre pou faire koné ki li pé vini. Au contraire, li vinn trankil kan personne pa pé attann.
2 Plusieurs fois dan so bann l’exemple, Jésus ti cite bann fason ki enn voleur agir. (Luc 10:30; Jean 10:10) Jésus ti donne enn l’avertissement concernant bann l’evenement ki pou arrivé pendant lepok la fin, avant li vini en tant ki juge. Li ti dire: “Alors, contigne veillé parski zot pa koné ki jour zot Seigneur pé vini. Mais, pense enn coup: si proprietaire enn lakaz ti koné kan pendant la nuit, enn voleur pé vini, li pa ti pou dormi, ek li pa ti pou laisse voleur-la rente dan so lakaz.” (Matthieu 24:42, 43) Jésus finn montré ki li pou vini pareil couma enn voleur—enn coup, sans ki personne attann.
3, 4. (a) Ki nou bizin faire pou suive conseil ki Jésus ti donné concernant jour ki li pou vini? (b) Ki bann question ki nou kapav demandé?
3 L’exemple Jésus ti bien approprié, parski personne pa konn date exact ki li pou vini. Avant, dan mem prophetie, Jésus ti dire: “Concernant sa jour-la, ek sa l’heure-la, personne pa koné, ni bann ange ki dan le ciel ni-mem le Fils, mais seulement le Pere.” (Matthieu 24:36) C’est pou sa ki Jésus ti donne sa l’encouragement-la so bann disciple: “Montré ki zot inn paré.” (Matthieu 24:44) N’importe kan Jésus pou vini pou faire jugement Jéhovah, tou seki prend compte conseil Jésus pou paré, zot pou montré sa par zot bon conduite.
4 Sa faire nou pose bann question important: Eski l’avertissement Jésus concerne zis bann dimoune dan le monde, ou-soit eski bann vrai chrétien aussi bizin “contigne veillé”? Kifer li important ki nou “contigne veillé,” ek couma nou kapav faire sa?
Pou ki Jésus ti donne sa l’avertissement-la?
5. Couma nou koné ki l’avertissement pou “veillé” concerne bann vrai chrétien?
5 Nou koné ki pou bann dimoune dan le monde, Jésus pou vinn pareil couma enn voleur, parski zot pa’lé ecoute bann avertissement ki pé donne zot concernant sa catastrophe ki pé vini-la. (2 Pierre 3:3-7) Mais, ki nou kapav dire lor bann vrai chrétien? Guette ki l’apotre Paul ti ecrire bann chrétien: “Zot bien koné ki jour Jéhovah pé vinn pareil couma enn voleur dan la nuit.” (1 Thessaloniciens 5:2) Nou, nou pena okenn doute ki ‘jour Jéhovah pé vini.’ Mais eski a cause sa, li moins important ki nou contigne veillé? Nou remarké ki c’est avek so bann disciple ki Jésus ti dire: “C’est dan enn l’heure ki zot pa attann ki Fils de l’homme pé vini.” (Matthieu 24:44) Avant, kan Jésus ti pé encourage so bann disciple pou contigne rod Royaume Bondié, li ti donne zot sa l’avertissement-la: “Prepare zot, parski c’est dan enn l’heure ki zot pa attann ki Fils de l’homme pé vini.” (Luc 12:31, 40) Li clair ki Jésus ti pé pense so bann disciple kan li ti dire: “Contigne veillé”?
6. Kifer eski nou bizin “veillé”?
6 Kifer nou bizin “veillé” ek “prepare nou”? Jésus ti expliké: “Deux zom pou dan karo: pou prend enn, ek pou abandonne lot-la; deux femme pou crase la grain avek enn moulin a bras: pou prend enn ek pou abandonne lot-la.” (Matthieu 24:40, 41) “Pou prend” bann ki montré ki zot inn paré, setadir zot pou gagne la vie sauve kan Bondié pou detruire sa mauvais lé-monde-la. “Pou abandonne” lezot, setadir zot pou detruire, parski dan zot fason vive, zot finn guette zis zot prop l’interet. Parmi zot, pou ena sans doute bann dimoune ki, avant zot ti eclairé lor plan spirituel, mais zot pa finn veillé.
7. Le fait ki nou pa koné kan la fin pou vini, ki l’occasion sa donne nou?
7 Le fait ki nou pa koné ki jour exactement la fin sa vié system-la pou vini, sa donne nou l’occasion pou montré ki nou pé servi Bondié avek bann bon mobile. Couma? Kitfois la fin parette pé tardé pou vini. Li bien triste ki certain chrétien ki’nn fatigué attann, finn ralenti dan service Jéhovah, ek zot nepli ena sa mem zèle ki zot ti ena avant-la. Pourtant, kan nou ti prend bapteme, nou ti voué nou la-vie pou servi Jéhovah sans okenn condition. Bann ki konn Jéhovah, koné ki Li pa pou impressionné par enn kikenn ki, dernier minute, decide pou servi Li avek zèle. Jéhovah trouve seki ena dan leker enn dimoune.—1 Samuel 16:7.
8. Couma eski l’amour pou Jéhovah pousse nou pou contigne veillé?
8 C’est parski nou vrai-mem content Jéhovah, ki nou trouve beaucoup plaisir pou faire so volonté. (Psaume 40:8; Matthieu 26:39) Et nou envie servi Jéhovah pou touletan. Ek mem si nou bizin attann inpé pli longtemps ki nou ti pensé, sa l’esperance-la pa perdi so valeur. Avant tou, nou contigne veillé parski jour Jéhovah, c’est enn l’evenement important dan realisation so bann projet. Nou ena enn desir sincere pou faire Bondié plaisir, ek sa pousse nou pou mette en pratik bann conseil ki ena dan so Parole ek pou mette so Royaume dan premier place dan nou la-vie. (Matthieu 6:33; 1 Jean 5:3) Anou guetté couma kan nou veillé, sa influence bann decision ki nou prend, ek fason ki nou vive chaque jour.
Ki direction ou la-vie pé prend?
9. Kifer li bien important ki bann dimoune dan le monde comprend signification bann l’evenement dan nou lepok?
9 Zordi, beaucoup dimoune reconette ki ena bann problem bien grave ek bann l’evenement terrible ki pé arrivé toulé-jour, ek kitfois zot pa satisfait ar direction ki zot prop la-vie pé prend. Seulement, eski zot konn vrai-mem signification bann l’evenement ki pé arrivé dan le monde? Eski zot rann-zot compte ki nou pé vive dan lepok la “fin sa system-la”? (Matthieu 24:3) Eski zot koné ki, kan zot trouve partout bann dimoune ki pena l’attachement pou Bondié, ek ki ena enn l’attitude egoïste ek violent, sa montré ki nou pé vive dan “dernier jour”? (2 Timothée 3:1-5) Li bien important ki zot comprend ki tousala vedir, ek ki zot examine direction ki zot la-vie pé prend.
10. Ki nou bizin faire pou nou kapav sur ki nou pé veillé?
10 Ki nou kapav dire lor nou-mem? Toulé-jour nou bizin prend bann decision ki concerne nou travail, nou la-santé, nou famille ek nou l’adoration. Nou konn bann principe la Bible, ek nou faire tou seki nou kapav pou mette zot en pratik. Alors, li bon ki nou demann nou-mem: ‘Eski mo finn laisse bann tracas ki ena dan la vie detourne moi ar mo bann l’objectif spirituel? Eski mo pé laisse bann philosophie ek fason pensée ki ena dan le monde, influence bann decision ki mo prend?’ (Luc 21:34-36; Colossiens 2:8) Nou bizin montré ki nou faire Jéhovah confiance avek tou nou leker, ek ki nou pa pé fié lor nou prop l’intelligence. (Proverbes 3:5) C’est dan sa fason-la ki nou pou kapav “saisi vrai la-vie”—la vie eternel dan le monde nouveau ki Bondié inn promette.—1 Timothée 6:12, 19.
11-13. Ki nou kapav aprann par seki ti arrivé (a) dan lepok Noé? (b) dan lepok Lot?
11 Dan la Bible, ena beaucoup l’exemple ki kapav aide nou pou veillé. Guette seki ti arrivé dan lepok Noé. Bien longtemps avant ki Jéhovah ti agir, Li ti faire en sorte ki bann dimoune gagne enn l’avertissement. Mais apart Noé ek so famille, personne pa ti prend compte. (2 Pierre 2:5) Jésus ti dire: “Pareil couma li ti été dan lepok Noé, coumsa-mem presence Fils de l’homme pou été. Parski, pareil couma zot ti été zis avant deluge, zot ti pé mangé ek boire, bann zom ti pé marié ek ti pé donne bann femme en mariage, ziska jour ki Noé ti rente dan l’arche; ek zot pa ti prend compte, ziska ki deluge ti vini ek ti balié zot tou, coumsa-mem presence Fils de l’homme pou été.” (Matthieu 24:37-39) Ki nou aprann par sa? Si n’importe kisannla parmi nou pé laisse bann kitsoz ki ena dan le monde—mem bann l’activité ki normal dan la vie—empeche li pou mette bann kitsoz spirituel dan premier place dan so la-vie, pareil couma Bondié demandé, li bizin bien reflechi lor so situation.—Romains 14:17.
12 Mazinn aussi seki ti arrivé dan lepok Lot. Lot ek so famille ti reste dan la ville Sodome, enn la-ville bien riche, mais kot bann dimoune ti bien immoral. Jéhovah ti envoye so bann ange pou detruire sa la-ville-la. Zot ti dire Lot ek so famille sauvé, quitte la ville ek pa guette derriere. Lot ek so famille ti quitte la ville. Mais li parette ki madame Lot, ti chagrin so lakaz dan Sodome. Li pa ti obeir, li ti guette derriere, ek a cause sa li ti perdi so la-vie. (Genèse 19:15- 26) Dan enn fason prophetik, Jésus ti donne nou sa l’avertissement-la: “Pa blié femme Lot.” Eski nou bann action montré ki nou pé prend compte sa l’avertissement-la?—Luc 17:32.
13 Bann dimoune ki ti prend compte bann l’avertissement ki Bondié ti donné, ti gagne la vie sauve. C’est seki ti arrive Noé ek so famille, ek Lot ek so deux tifi. (2 Pierre 2:9) Kan nou medite lor l’avertissement ki ena dan sa bann l’exemple-la, nou gagne aussi enn l’encouragement par message delivrance ki ena ladan pou bann dimoune ki content la justice. Sa faire nou attann avek confiance kan promesse Bondié concernant “enn nouveau lé-ciel ek enn nouveau la-terre, kot pou ena la justice,” pou realisé.—2 Pierre 3:13.
‘L’heure jugement finn arrivé!’
14, 15. (a) Ki arrivé pendant “l’heure” jugement? (b) Ki nou bizin faire si nou ‘ena la crainte pou Bondié ek nou donne Li la gloire’?
14 Ki nou kapav attann si nou veillé? Livre Révélation montré couma Bondié pou realise so projet, etape par etape. Pou montré ki nou finn paré, li bien important ki nou agir dapré seki sa livre-la dire. Sa prophetie-la montré dan enn fason bien clair bann l’evenement ki pou arrivé dan “jour du Seigneur,” ki ti commencé kan Christ ti vinn lé-roi dan le ciel, en 1914. (Révélation 1:10) Livre Révélation attire nou l’attention lor enn ange ki finn gagne ‘enn bon nouvel eternel pou li annoncé.’ Li dire bien fort: “Ena la crainte pou Bondié ek donne Li la gloire, parski l’heure so jugement inn arrivé.” (Révélation 14:6, 7) Sa ‘l’heure jugement-la’ c’est enn period bien courte; pendant sa period-la, Bondié prononce ek applik bann jugement ki mentionné dan prophetie Révélation. Zordi, nou pé vive dan sa period-la.
15 Zordi, avant ki sa l’heure jugement-la fini, nou gagne sa conseil-la: “Ena la crainte pou Bondié ek donne Li la gloire.” Ki sa vedir? Si nou ena enn vrai la-crainte pou Bondié, sa pou empeche nou faire seki mauvais. (Proverbes 8:13) Si nou donne la gloire Bondié, nou pou ecoute Li avek enn grand respé. Nou pa pou trop occupé pou lire so Parole la Bible, regulierement. Nou pou prend compte so conseil pou assisté reunion. (Hébreux 10:24, 25) Nou pou considere couma enn privilege pou preche la bonne nouvelle lor Royaume Bondié ek nou pou faire sa avek zèle. Nou pou ena confiance en Jéhovah touletan, ek avek tou nou leker. (Psaume 62:8) Parski nou reconette ki Jéhovah, Li tousel ki ena droit pou dirige l’univers, nou donne Li la gloire ek nou accepté so direction dan nou la-vie. Eski vrai-mem ou ena la crainte pou Bondié, ek ou pé donne Li la gloire dan tou sa bann fason-la?
16. Kifer nou kapav dire ki’nn fini faire jugement kont Babylone la Grande, ki mentionné dan Révélation 14:8?
16 Apré, Révélation chapitre 14 decrire lezot l’evenement ki arrivé pendant l’heure jugement. Babylone la Grande, l’empire mondial fausse religion, mentionné en premier: “Enn lot ange, enn deuxieme, ti sorti, li ti dire: ‘Li finn tombé! Babylone la Grande finn tombé!’ ” (Révélation 14:8) Oui, pou Bondié, Babylone la Grande inn fini tombé. En 1919, bann chrétien oint finn liberé ar bann doctrine ek bann pratik ki sorti dan Babylone. Sa bann doctrine-la finn ena enn grand l’influence lor bann dimoune ek bann nation pendant plusieurs siecle. (Révélation 17:1, 15) A partir sa moment-la, bann chrétien oint finn kapav devoué zot pou favorise vrai l’adoration. Depuis sa, la bonne nouvelle finn preché dan le monde entier.—Matthieu 24:14.
17. Ki nou bizin faire pou sorti dan Babylone la Grande?
17 Mais ena encore lezot kitsoz en rapport avek jugement Bondié kont Babylone la Grande. So destruction final pré pou arrivé. (Révélation 18:21) C’est pou sa raison-la ki la Bible donne sa conseil-la bann dimoune, partout lor la terre: “Sorti ladan [Babylone la Grande] . . . si zot pa envie participe dan so bann peché.” (Révélation 18:4, 5) Couma nou kapav sorti dan Babylone la Grande? Sa vedir plus ki zis arrete frequente bann fausse religion. Ena l’influence Babylone la Grande dan beaucoup fête ek coutume populaire ek dan l’attitude le monde lor l’immoralité sexuel. En plus Babylone la Grande pé favorise developpement bann divertissement ki ena enn rapport avek spiritisme, ek lezot kitsoz encore. Pou nou contigne veillé, li bien important ki dan nou bann action ek nou bann desir toulé-deux, nou montré ki nou vrai-mem separé ar Babylone la Grande dan tou fason.
18. Dapré seki dire dan Révélation 14:9, 10, kont ki kitsoz bann chrétien ki reste lor zot garde, faire bien attention?
18 Dan Révélation 14:9, 10, nou aprann enn lot kitsoz lor ‘l’heure jugement.’ Enn lot ange dire: “Si kikenn adore la bête sauvage ek so zimage, ek gagne enn mark lor so front ou-soit lor so la-main, li aussi li pou boire di-vin la colere Bondié.” Kifer? Parski sa ‘bête sauvage-la ek so zimage’ represente bann gouvernement humain ki rejette domination Jéhovah. Bann chrétien ki reste lor zot garde veille bien lor zot l’attitude ek lor zot action. Zot pa laisse-zot influencé ou-soit marké, dan enn fason ki montré ki zot esclave bann dirigeant ki rejette domination vrai Bondié Jéhovah. Bann chrétien koné ki Royaume Bondié inn fini etabli dan le ciel, ek ki li pou detruire tou bann domination ki ena lor la terre, ek ki li pou dirigé pou touletan.—Daniel 2:44.
Pa blié ki la fin pré!
19, 20. (a) Plus la fin kosté, ki nou kapav sur Satan pou essaye faire? (b) Ki nou bizin bien decidé pou faire?
19 Plus la fin pé kosté, plus bann pression ek bann tentation pou augmenté. Tant ki nou pou vive dan sa lé-monde-la, ek ki nou imparfait, nou pou affecté par la maladie, la vieillesse, la mort bann dimoune ki nou content, nou pou affecté kan dimoune offense nou, nou pou decouragé kan nou joinde bann dimoune ki pa interessé kan nou preche Parole Bondié ar zot, ek par beaucoup lezot kitsoz encore. Pa blié jamais ki Satan pou exploite sa bann pression-la pou faire nou baisse lé-bras—pou arrete preche la bonne nouvelle ou-soit pou arrete vive en accord avek bann principe Bondié. (Éphésiens 6:11-13) Mais surtout asterla, fodé pa ki nou blié dan ki lepok nou pé vive!
20 Jésus ti koné ki nou pou ena beaucoup pression lor nou pou decourage nou, a cause sa, li ti donne sa conseil-la: “Contigne veillé parski zot pa koné ki jour zot Seigneur pé vini.” (Matthieu 24:42) Alors, anou reste bien lor nou garde, ek pa blié ki nou bien pré ar la fin sa system-la. Anou reste lor nou garde kont bann piege Satan ki kapav faire nou ralenti ou-soit arreté servi Jéhovah. Anou bien decidé pou preche la bonne nouvelle lor Royaume Bondié avek beaucoup plus zèle encore. Oui, pa blié ki la fin pré, pendant ki nou pé suive sa conseil Jésus-la: “Contigne veillé.” Kan nou faire sa, nou pou donne la gloire Jéhovah ek nou pou parmi bann ki pou gagne la vie eternel.
Couma ou pou reponn?
• Couma nou koné ki conseil ki Jésus ti donné pou “contigne veillé,” applik ar bann vrai chrétien?
• Ki bann l’avertissement ki ena dan bann l’exemple biblik kapav aide nou pou “contigne veillé”?
• Ki été l’heure jugement, ek ki la Bible encourage nou pou faire avant sa l’heure-la fini?
[Zimage, page 26]
Destruction Babylone la Grande bien pré