Developpe vrai l’humilité
“To pou sauve bann dimoune ki ena l’humilité.”—2 SAMUEL 22:28.
1, 2. Ki mem defaut beaucoup dirigeant dan le monde ti ena?
BANN pyramide ki ena en Egypte, rann temoignage lor bann zom ki ti dirige sa pays-la longtemps. Dan le monde, finn ena aussi lezot grand dirigeant couma Sennakérib, le roi l’Assyrie, Alexandre le Grand ki’nn dirige la Grèce, ek Jules César, l’empereur romain. Tou sa bann dirigeant-la ti ena mem defaut: zot pa ti manifesté l’humilité.—Matthieu 20:25, 26.
2 Eski ou pensé ki enn parmi sa bann dirigeant-la ti ena l’habitude pou al partout dan so pays, pou rod bann ti-dimoune ki bizin l’encouragement? Surement pa! Ou-soit eski ou pensé ki zot ti al dan bann ti-lakaz, pou al encourage bann dimoune ki ena beaucoup problem? Zot l’attitude bien different avek l’attitude ki Jéhovah ena envers bann ti-dimoune, Li ki pli grand Dirigeant dan l’univers!
Pli grand l’exemple l’humilité
3. Couma pli grand dirigeant dan l’univers, traite so bann serviteur?
3 Pena personne ki pli grand ki Jéhovah, pourtant “so lizié pé guette partout lor la terre pou montré so la-force en faveur bann dimoune ki ena enn leker complet envers Li.” (2 Chroniques 16:9) Ki Jéhovah faire kan Li trouve so bann serviteur ki ena enn grand la-peine dan zot leker parski zot pé konn beaucoup problem? Dan enn certain sens, Li “reste” avek zot par so l’esprit saint, pou Li “faire revive l’esprit bann ki ena l’humilité ek pou faire revive leker bann ki dan la peine.” (Isaïe 57:15) Lerla, sa bann serviteur-la ena plus la-force pou kapav contigne servi Li avek la joie. Sa c’est vrai-mem enn grand l’humilité ki Bondié manifesté!
4, 5. (a) Ki enn ecrivain Psaume ti dire lor fason ki Bondié dirigé? (b) Kan la Bible dire ki Bondié “abaisse-Li” pou aide bann “ti-dimoune,” ki sa vedir?
4 Personne dan l’univers pa finn abaisse li-mem pareil couma Jéhovah, pli grand le Roi dan l’univers, pou aide bann dimoune imparfait. C’est pou sa ki enn ecrivain Psaume ti kapav ecrire: “Jéhovah inn vinn pli grand ki tou bann nation; so la-gloire pli grand ki le ciel. Kisannla ki couma Jéhovah nou Bondié, Li ki reste la-haut? Li abaisse-Li pou guette le ciel ek la terre, Li releve ti-dimoune dan la poussiere; Li tire seki misere dan la cendre ek Li eleve li.”—Psaume 113:4-7.
5 Remarké ki sa Psaume-la servi mot ‘abaissé.’ Kan servi sa mot-la en rapport avek bann dimoune, li kapav ena enn sens negatif, li kapav donne l’impression ki enn dimoune pé ‘faire croire ki li superieur ar enn kikenn ki pli bas, ou-soit enn kikenn ki ena moins chance’ ki li. Jéhovah pa coumsa, parski Li pur ek Li saint ek Li pena okenn “l’orgueil” dan Li. (Marc 7:22, 23) Dan ki sens eski Jéhovah “abaisse-Li”? C’est kan Li mette-Li lor mem niveau ki enn kikenn ki inferieur. Coumadir Li quitte so position ou-soit so grandeur pou Li traite avek enn kikenn ki pli bas. C’est pou sa ki dan certain la-Bible, Psaume 113:6 dire ki Bondié humilié Li-mem. Sa montré bien couma nou Bondié ki ena l’humilité, prend compte seki so bann serviteur imparfait bizin!—2 Samuel 22:36.
Kifer Jésus ti ena l’humilité?
6. Ki pli grand fason ki Jéhovah finn montré so l’humilité?
6 Pli grand fason ki Bondié inn montré so l’humilité ek so l’amour c’est kan Li ti envoye so Garson premier-né couma enn dimoune lor la terre, pou donne so la-vie pou sauve l’humanité. (Jean 3:16) Jésus ti enseigne nou la verité lor so Papa ek apré li ti donne so la-vie en sacrifice pou li tire “peché le monde.” (Jean 1:29; 18:37) Jésus ti reflete personnalité so Papa dan enn fason parfait ek li ti manifesté mem l’humilité ki Li, parski li ti disposé pou faire seki Bondié ti demann li. Okenn creature Jéhovah pa finn manifesté l’humilité ek l’amour couma Jésus finn manifesté. Pa tou dimoune ki ti apprecié l’humilité Jésus; so bann l’ennemi ti mem considere li couma enn kikenn ki ‘pena okenn l’importance.’ (Daniel 4:17 Bible du Semeur) Pourtant, l’apotre Paul ti realisé ki bann lezot chrétien bizin imite Jésus ek ena l’humilité dan zot rapport avek zot prochain.—1 Corinthiens 11:1; Philippiens 2:3, 4.
7, 8. (a) Couma Jésus ti aprann pou manifesté l’humilité? (b) Ki Jésus ti dire ar bann dimoune ki ti pou vinn so bann disciple?
7 Paul ti attire l’attention lor l’exemple extraordinaire ki Jésus finn laissé ek li ti ecrire: “Garde sa l’attitude mental ki Jésus Christ aussi ti ena-la, ki mem si li ti existé dan forme Bondié, li pa ti pense pou prend place Bondié, setadir pou vinn egal ar Bondié. Non mais li ti laisse tou, li ti prend forme enn esclave ek li ti vinn pareil couma bann zom. En plus, kan li ti trouve-li couma en zom, li ti abaisse li-mem, ek li ti obeir ziska la mort, oui, la mort lor enn poteau.”—Philippiens 2:5-8.
8 Certain kapav demandé: ‘Couma Jésus ti aprann pou ena l’humilité?’ C’est parski li’nn vive avek so Papa pendant bien-bien longtemps; pendant sa lé-temps-la, Bondié ti servi li couma enn “zouvrier qualifié” dan creation tou kitsoz. (Proverbes 8:30) Apré rebellion ki ti ena dan jardin Éden, li ti bien placé pou trouve l’humilité ki so Papa ti montré envers bann dimoune imparfait. C’est pou sa ki, kan Jésus ti lor la terre, li ti reflete l’humilité so Papa, ek li ti kapav dire: “Prend mo joug lor zot, ek aprann ar moi, parski mo ena enn caractere doux, ek enn leker humble, ek zot pou gagne soulagement pou zot nâme.”—Matthieu 11:29; Jean 14:9.
9. (a) Ki Jésus ti trouve attirant ar bann zenfant? (b) Jésus ti servi enn zenfant pou enseigne ki leson?
9 Parski Jésus ti ena enn vrai l’humilité, bann ti-zenfant pa ti peur li. Au contraire, zot ti attiré ar li. Li ti montré ki li bien content bann zenfant ek li ti prend zot compte. (Marc 10:13-16) Ki Jésus ti trouve attirant coumsa ar bann zenfant? Zot ti ena bann bon qualité ki certain parmi so bann disciple, pourtant bann adulte, pa ti toujours ena. Nou tou koné ki bann zenfant considere bann adulte couma superieur. Nou trouve sa parski zot pose beaucoup question. Oui, kan nou compare bann zenfant ar beaucoup adulte, nou trouvé ki li pli facile pou enseigne bann zenfant, ek zot pena tendance pou ena l’orgueil. Enn fois, Jésus ti prend enn ti-zenfant, ek li ti dire so bann disciple: “Si zot pa changé ek vinn pareil couma bann ti-zenfant, zot pa pou rente ditou dan royaume ki dan le ciel.” Li ti ajouté: “Seki ena l’humilité couma sa ti-zenfant-la, c’est li ki pli grand dan royaume ki dan le ciel.” (Matthieu 18:3, 4) Jésus ti donne sa regle-la: “Celui ki rod grandeur, li pou abaissé, ek celui ki abaisse-li, pou donne li grandeur.”—Luc 14:11; 18:14; Matthieu 23:12.
10. Ki question nou pou examiné?
10 Sa l’enseignement-la faire nou pose bann question important. Parmi bann kitsoz ki nou bizin faire pou gagne la vie eternel, nou bizin developpe enn vrai l’humilité. Mais kifer bann chrétien parfois trouve sa difficile pou montré l’humilité? Kifer li difficile pou nou, pou avale nou l’orgueil, ek pou faire face ar bann problem avek humilité? Ek ki pou aide nou pou reussi developpe enn vrai l’humilité?—Jacques 4:6, 10.
Kifer li difficile pou manifesté l’humilité
11. Kifer li pa etonnant ki nou bizin lutté pou manifesté l’humilité?
11 Si ou trouve sa difficile pou manifesté l’humilité, ou pa tousel dan sa cas-la. Deja en 1920, La Tour de Garde ti koz lor l’importance pou ena l’humilité, pareil couma la Bible conseillé. Li ti faire sa commentaire-la: “Kan nou trouvé ki l’importance nou Seigneur ti donne l’humilité, sa bizin encourage tou bann vrai disciple pou developpe sa qualité-la toulé-jour.” Apré sa, La Tour de Garde faire sa commentaire bien franc-la: “Malgré tou bann conseil ki la Bible donné, l’imperfection bann dimoune parette tellement fort, ki bann ki vinn serviteur nou Seigneur ek ki prend l’engagement pou suive li, parette ena plus difficulté, ek bizin plus lutté dan sa domaine-la ki dan n’importe ki lot domaine.” Sa montré enn raison kifer bann vrai chrétien bizin lutté pou manifesté l’humilité—nou nature imparfait faire nou rod gagne enn la-gloire ki nou pa supposé gagné. Ek sa, c’est parski nou bann descendant enn couple imparfait, Adam ek Ève, ki finn tombe dan tentation pou satisfaire zot desir egoïste.—Romains 5:12.
12, 13. (a) Kifer li difficile pou enn chrétien manifesté l’humilité dan sa lé-monde-la? (b) A cause kisannla nou gagne encore plus difficulté pou developpe l’humilité?
12 Enn lot raison kifer nou kapav trouve sa difficile pou manifesté l’humilité c’est parski nou pé vive dan enn lé-monde ki encourage bann dimoune pou faire tou pou vinn pli bon ki lezot. Parmi bann but ki nou trouvé dan le monde c’est enn grand l’envie pou satisfaire ‘desir la chair, desir lizié, ek pou vinn enn kikenn ki faire l’etalage ar seki so moyen permette li ena.’ (1 Jean 2:16) Mais au lieu ki bann disciple Jésus laisse-zot dominé par bann desir ki ena dan le monde, zot bizin garde zot lizié simple ek concentré zot l’attention pou faire volonté Jéhovah.—Matthieu 6:22-24, 31-33; 1 Jean 2:17.
13 Enn troisieme raison kifer li difficile pou developpe ek manifesté l’humilité c’est parski celui ki la source l’orgueil, Satan le Diable, pé dirige le monde. (2 Corinthiens 4:4; 1 Timothée 3:6) Satan encourage bann dimoune pou manifesté so bann vilain defaut. Par exemple, li ti demann Jésus adore li, ek en echange li ti promette pou donne li “tou bann gouvernement dan le monde ek zot la-gloire.” Jésus ti reste humble, ek li ti bien ferme pou rejette seki Satan ti offert li. (Matthieu 4:8, 10) Li pareil aussi pou bann chrétien, Satan tente zot pou rod la gloire pou zot-mem. Mais bann chrétien ki ena l’humilité faire zeffort pou imite Jésus: zot faire tou pou donne Jéhovah tousel la gloire ek l’honneur.—Mark 10:17, 18.
Developpe ek manifesté vrai l’humilité
14. Ki sa vedir “fausse humilité”?
14 Dan lettre ki Paul ti ecrire bann Colossien, li ti mette zot en garde kont tendance pou manifesté enn soit-disant l’humilité, zis pou impressionne bann dimoune. Paul ti dire ki c’est “enn fausse humilité.” Bann dimoune ki faire semblant ena l’humilité, zot pa spirituel. Au contraire, zot montré ki en realité, zot “rempli” ar l’orgueil. (Colossiens 2:18, 23) Jésus ti donne l’exemple bann dimoune ki ti manifesté sa fausse l’humilité-la. Li ti condamne bann Pharisien parski zot ti faire tou dimoune trouvé kan zot ti faire la priere, ek kan zot ti garde careme zot ti faire enn figure triste ek malade, pou ki dimoune remark zot. Mais nou, pou ki nou la-priere ena valeur devant Bondié, nou bizin prié avek humilité.—Matthieu 6:5, 6, 16.
15. (a) Ki nou kapav faire pou garde enn l’attitude humble? (b) Cite certain l’exemple l’humilité.
15 Bann chrétien kapav garde enn vrai l’humilité kan zot fixé zot l’esprit lor pli bon l’exemple l’humilité ki ena, setadir l’exemple Jéhovah ek Jésus Christ. Pou nou kapav faire sa, nou bizin etudié regulierement la Bible ek bann publication ki aide nou pou comprend la Bible, ki “l’esclave fidel et avisé” donne nou. (Matthieu 24:45) Li bien important ki bann ancien faire sa l’etude-la, ‘pou ki dan zot leker, zot pa croire ki zot pli superieur ki zot bann frere.’ (Deutéronome 17:19, 20; 1 Pierre 5:1-3) Reflechi lor l’exemple bann dimoune ki Jéhovah finn beni parski zot ti ena l’humilité, couma Ruth, Hanna, Élisabeth, ek beaucoup lezot encore. (Ruth 1:16, 17; 1 Samuel 1:11, 20; Luc 1:41-43) Pense aussi l’exemple beaucoup zom ki ti ena bann grand privilege couma David, Yoshiya, Jean le Baptiste, ek l’apotre Paul ek ki finn reste humble dan service Jéhovah. (2 Chroniques 34:1, 2, 19, 26-28; Psaume 131:1; Jean 1:26, 27; 3:26-30; Actes 21:20-26; 1 Corinthiens 15:9) Dan nou lepok, ena aussi l’exemple beaucoup dimoune dan congregation ki manifesté l’humilité, pa vrai? Si bann vrai chrétien medite lor sa bann l’exemple-la, sa pou aide zot pou manifesté “l’humilité sakenn envers so camarade.”—1 Pierre 5:5.
16. Couma predication aide nou pou ena l’humilité?
16 Kan nou participe regulierement dan predication sa aussi kapav aide nou pou ena l’humilité. Enn l’attitude humble kapav faire nou gagne bann bon resultat kan nou koz avek bann dimoune ki nou pa koné dan predication, ou-soit dan lezot place. Sa li surtout vrai kan nou joinde bann dimoune ki indifferent ar nou message, ou-soit ki reponn nou brite. Souvent bann dimoune mette en doute nou bann croyance, ek l’humilité kapav aide nou pou contigne reponn zot bann question avek “douceur ek enn grand respé.” (1 Pierre 3:15) Bann serviteur Jéhovah ki ena l’humilité, finn demenagé pou al preche dan bann nouveau territoire ek finn aide bann dimoune ki ena different culture ek fason vive. Avek humilité, kitfois sa bann chrétien-la finn bizin aprann enn nouveau langue, pou zot kapav aide pli bien bann dimoune avek ki zot preche la bonne nouvelle. Zot vrai-mem merite enn grand felicitation!—Matthieu 28:19, 20.
17. Ki bann responsabilité nou ena en tant ki chrétien, ki demann nou manifesté l’humilité?
17 Beaucoup chrétien finn assume zot responsabilité avek humilité, ek zot finn mette l’interet lezot avant zot prop l’interet. Par exemple, enn papa bizin ena l’humilité pou li prend lor so lé-temps, pou li kapav prepare ek conduire enn l’etude la Bible efficace avek so bann zenfant. L’humilité aide aussi bann zenfant pou honore zot parent, ki imparfait. (Éphésiens 6:1-4) Bann femme ki zot mari pa dan la verité, bizin souvent manifesté l’humilité dan certaine situation, ek en mem temps zot essaye gagne zot mari avek enn “conduite pur, ek enn grand respé.” (1 Pierre 3:1, 2) L’humilité ek enn l’amour ki basé lor l’esprit sacrifice, zot important aussi kan nou bizin prend soin nou bann parent malade ou agé.—1 Timothée 5:4.
L’humilité reglé bann problem
18. Couma l’humilité kapav aide nou pou reglé bann problem?
18 Tou bann serviteur Bondié, zot imparfait. (Jacques 3:2) Parfois, kapav ena bann ti problem ou-soit bann malentendu entre zot. Enn chrétien kapav ena enn raison valable pou li plaigne enn lot chrétien. En general, kapav reglé enn situation coumsa si applik sa conseil-la: “Contigne supporte sakenn so camarade, ek si kikenn ena enn kitsoz kont enn lot, li bizin pardonne li volontairement. Pareil couma Jéhovah inn pardonne zot volontairement, faire pareil zot aussi.” (Colossiens 3:13) Nou reconette ki li pa facile pou suive sa conseil-la, mais si kikenn ena l’humilité, li pou mette sa en pratik.
19. Ki nou bizin rappel kan nou koz ar kikenn ki finn offense nou?
19 Parfois, enn chrétien kapav ena sentiment ki problem ki li’nn gagné avek enn lot chrétien trop grave pou passe lor la. Dan sa cas-la, l’humilité pou aide li pou al guette sa dimoune ki li pensé finn offense li-la, pou retablir la paix entre zot. (Matthieu 18:15) Enn raison kifer parfois bann problem persisté parmi bann chrétien, c’est parski enn entre sa deux chrétien-la, ou-soit toulé-deux, trop fiere pou admette ki li en tort. Ou-soit, celui ki decide pou al reglé problem-la, li faire sa dan enn fason critik, ek montré ki c’est li ki ena raison. Mais, kan enn chrétien manifesté enn vrai l’humilité, sa pou aide li pou reglé beaucoup problem.
20, 21. Ki pli grand l’aide nou gagné pou manifesté l’humilité?
20 Pou ki enn chrétien kapav developpe l’humilité, li bizin demann Bondié So l’aide ek So l’esprit saint. Mais pa blié ki “Bondié . . . donne so faveur ki nou pa merité [so l’esprit saint aussi] bann ki ena l’humilité.” (Jacques 4:6) Alors, si ou ena enn problem avek enn lot chrétien, prié Jéhovah pou aide ou pou admette avek l’humilité ou tort dan problem-la, ki li enn grand tort ou enn ti tort. Si ou finn offensé ek ki lot chrétien-la dire ou avek sincerité: “Excuse moi,” alors, pardonne li avek humilité. Si li difficile pou faire sa, prié Jéhovah ek dire Li aide ou pou tire tou l’orgueil ki kapav ena dan ou leker.
21 Kan nou comprend ki l’humilité amenn enn quantité bienfait, sa bizin pousse nou pou developpe ek pou garde sa qualité-la. Pou nou kapav faire sa, nou ena l’exemple extraordinaire ki Jéhovah ek Jésus Christ donne nou! Jamais pa blié l’assurance ki Jéhovah donne nou: “Resultat l’humilité ek la crainte pou Jéhovah, c’est la richesse ek la gloire ek la vie.”—Proverbes 22:4.
Point lor ki nou kapav medité
• Kisannla ki donne nou pli grand l’exemple l’humilité?
• Kifer li difficile pou developpe l’humilité?
• Ki kapav aide nou pou ena l’humilité?
• Kifer li tellement important ki nou reste humble?
[Zimage, page 17]
Jésus ti manifesté vrai l’humilité
[Zimage, page 19]
Le monde encourage dimoune pou faire tou pou vinn pli bon ki lezot
[Remerciement photo]
Photo OMS par L. Almasi/K. Hemzǒ
[Zimage, page 20]
L’humilité aide nou pou koz avek dimoune ki nou pa koné dan predication
[Zimage, page 21]
Souvent nou kapav reglé bann problem si nou passe lor la avek l’humilité ek l’amour