Bondié prend soin bann dimoune agé

ZORDI nou pa etonné pou trouve sa quantité dimoune agé ki pé gagne maltraité-la. Depuis longtemps, la Bible ti annoncé ki dan “dernier jour” sa lé-monde ki pena la crainte pou Bondié-la, bann dimoune pou “content zot-mem, . . . zot pa pou ena l’affection.” (2 Timothée 3:1-3) Mot grec ki traduire par “l’affection” implik aussi l’amour ki normalement existé dan bann famille. Pareil couma la Bible ti annoncé, zordi pena sa qualité l’affection-la.

Alors ki bann dimoune agé pé gagne maltraité, Jéhovah parkont, accorde beaucoup valeur bann ki’nn vinn dan l’age ek Li prend zot soin. Guetté couma la Bible montré nou sa.

“Juge bann veuve”

Dan bann Écritures hébraïques, nou trouve bien couma Jéhovah interessé avek bann dimoune agé. Par exemple, dan Psaume 68:5, David appel Bondié “juge bann veuve” ki bien souvent dan l’age.a Dan lezot traduction la Bible, pou mot “juge” servi l’expression “celui ki defann,” ek “celui ki protege.” Li clair ki Jéhovah prend soin bann veuve. En realité, la Bible dire ki kan maltraite zot, sa faire so la-colere monté. (Exode 22:22-24) Bann veuve ek tou bann dimoune agé ki fidel, ena beaucoup valeur pou Bondié ek pou bann ki servi Li. Proverbes 16:31 faire nou konn seki Jéhovah ek so peuple pensé kan li dire: “Bann cheveux gris, zot couma enn couronne beauté kan zot dan chemin la justice.”

Sa pa etonne nou ki la Loi ki Bondié ti donne Israël, ti demann zot pou respecté bann dimoune agé. Bann Israélite ti gagne sa l’ordre-la: “To bizin levé devant bann cheveux gris, ek to bizin ena consideration pou enn vié dimoune, ek to bizin ena la crainte pou to Bondié. Mo-mem Jéhovah.” (Lévitique 19:32) Alors, en Israël, relation ki enn dimoune ti ena avek Jéhovah ti depann en partie lor fason ki li ti considere bann dimoune agé. Enn dimoune pa ti kapav dire ki li ti content Jéhovah si li ti maltraite bann dimoune agé.

Bann chrétien pa bizin suive la Loi Moïse. Mais zot suive “la loi Christ,” ki ena enn grand l’influence lor zot conduite ek zot l’attitude. Sa vedir aussi ki zot montré l’amour ek l’interet pou bann parent ek bann dimoune agé. (Galates 6:2; Éphésiens 6:1-3; 1 Timothée 5:1-3) Bann chrétien pa montré l’amour zis parski zot inn gagne l’ordre pou faire sa mais parski c’est zot leker ki pousse zot pou ena l’amour. L’apotre Pierre ti donne sa conseil-la: “Content sakenn zot camarade avek tou zot leker.”—1 Pierre 1:22.

Disciple Jacques ti donne nou enn lot raison pou prend soin bann dimoune agé. Li ti ecrire: “L’adoration ki pur ek ki sans okenn tache devant lizié nou Bondié ek Papa, c’est prend soin bann orphelin ek bann veuve dan zot difficulté, ek reste sans tache dan sa lé-monde-la.” (Jacques 1:27) Jacques servi enn point bien touchant ki faire nou reflechi. Li rappel nou ki quantité valeur sa bann dimoune agé ki Jéhovah content-la, ena pou Li.

Alors, li pa assez ki nou zis pa maltraite bann dimoune agé. Plutot, nou bizin montré enn l’interet sincere ek faire bann kitsoz ki pou rann zot service. (Guette l’encadré “L’amour en action,” lor page 6-7.) Jacques ti ecrire: “La foi . . . , sans bann action, li mort.”—Jacques 2:26.

Couma pou reconforte bann dimoune agé “dan zot difficulté”

Ena enn lot leson ki nou tiré dan bann parole Jacques. Remarké ki li ti dire bann chrétien pou prend soin bann veuve “dan zot difficulté.” Mot grec ki’nn traduire par “difficulté” vedir tracas, problem, souffrance ki gagné a cause bann difficulté la vie. Pena okenn doute ki beaucoup parmi bann dimoune agé konn sa bann tracas-la. Certain senti-zot tousel. Certain deprimé parski zot nepli kapav faire kitsoz couma avant a cause zot l’age. Mem bann ki bien actif dan service Bondié kapav decouragé. Anou prend l’exemple John,b enn proclamateur fidel depuis plus ki quarante an, ki’nn passe sa trente dernier l’année-la dan service a plein temps. Asterla John ena plus ki 80 an ek li reconette ki parfois li senti-li decouragé. Li dire: “Souvent mo mazinn bann erreur ki mo’nn faire dan le passé; mo’nn faire tellement erreur. Mo contigne dire mo-mem ki mo ti kapav faire pli bien ki sa.”

Bann chrétien ki coumsa kapav gagne reconfort kan zot koné ki mem si Jéhovah parfait, Li pa attann ki nou, nou parfait. Mem si Li konn nou bann erreur, la Bible dire lor Li: “Si to ti prend compte nou bann erreur, Yah, O Jéhovah, kisannla ti pou kapav tini devant toi?” (Psaume 130:3) Oui, Jéhovah pa guette zis nou bann erreur mais Li trouve seki ena dan nou leker. Couma nou konn sa?

Le roi David ti koné ki été faire bann erreur ek commette bann peché. L’esprit saint ti pousse li pou compose sa bann parole ki nou lire dan Psaume 139:1-3: “Jéhovah, to finn examine moi bien, ek to konn moi. To’nn koné kan mo assizé ek kan mo levé. To’nn konn mo pensée depuis bien loin. Kan mo voyagé ek kan mo allongé, to’nn mesure sa, ek to’nn konn tou mo bann fason agir.” Ici, sa l’expression “finn mesure” vedir litteralement “vanné,” pareil couma enn planteur vanne bann cereale pou faire la paille allé ek pou garde bann la-grain. Guidé par l’esprit Bondié, David donne nou l’assurance ki Jéhovah koné couma pou vanne seki nou faire ek garde zis nou bann bon action dan so memoire.

Tant ki nou reste fidel, nou Papa ki ena beaucoup misericorde, rappel ek apprecié nou bann bon action. Oui, la Bible dire ki pou Li, sa pou couma enn l’injustice si Li blié seki nou’nn faire ek l’amour ki nou’nn montré pou so nom.—Hébreux 6:10.

“Bann kitsoz avant finn disparette”

La Bible montré ki bann problem ki bann dimoune agé gagné, pa ti forme partie dan projet Bondié. C’est seulement apré ki nou bann premier parent, Adam ek Ève, ti rebelle kont zot Createur ki bann mauvais l’effet la vieillesse inn commence forme partie dan la vie bann dimoune. (Genèse 3:17-19; Romains 5:12) Sa pa pou contigné pou touletan.

Pareil couma nou’nn trouvé avant, beaucoup mauvais condition ki nou pé vive zordi, zot enn preuve ki nou pé vive dan bann “dernier jour” sa lé-monde-la. Parmi sa bann mauvais condition-la, nou trouvé couma bann dimoune agé pé gagne maltraité. (2 Timothée 3:1) Bondié ena projet pou tire tou bann l’effet peché, parmi ena aussi bann ravage ki la vieillesse ek la mort pé faire. La Bible dire: “[Bondié] pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur. Bann kitsoz avant finn disparette.”—Révélation 21:4.

Dan le monde nouveau ki Bondié inn promette, bann douleur ki bann dimoune agé gagné, pou bann kitsoz ki dan le passé. Bann dimoune agé pou nepli gagne maltraité; sa aussi pou dan le passé. (Mika 4:4) Mem bann ki finn mort ek ki dan memoire Bondié pou regagne la vie pou ki zot aussi, zot gagne l’occasion pou vive pou touletan lor enn la-terre ki pou vinn enn paradi. (Jean 5:28, 29) Lerla, plus ki jamais avant, nou pou trouvé couma Jéhovah prend soin pa zis bann dimoune agé mais tou bann ki obeir Li.

[Note]

[L’encadré, page 6 ek 7]

L’amour en action

Dan congregation bann Témoins de Jéhovah, bann ancien, zot-mem premier pou prend compte bann dimoune agé. Pou zot sa conseil ki l’apotre Pierre donné-la, li bien important: “Prend soin troupeau Bondié, ki lor zot charge.” (1 Pierre 5:2) Prend compte bann dimoune agé dan bann fason pratik, li enn maniere pou prend soin troupeau Bondié. Mais ki sa impliké?

Bizin ena patience, ek souvent c’est apré plusieurs visite ek plusieurs conversation ki kapav konn bien bann besoin enn dimoune agé. Kitfois li bizin enn kikenn pou al laboutik pou li, pou nettoye so lakaz, pou amenn li reunion dan l’auto, pou lire la Bible ek bann publication pou li, ek pou faire lezot kitsoz encore. Kan situation permette, bizin reflechi lor bann disposition pratik ki kapav prend ek guetté couma pou mette zot en place pou ki sa marché.c

Mais ki nou pou faire si enn frere ou-soit enn soeur agé, li dan enn situation bien difficile, kot kitfois li bizin enn l’aide financier? Premierement li bon guetté si li ena bann zenfant ou-soit famille ki kapav aide li. Sa li en accord avek 1 Timothée 5:4: “Si enn veuve ena bann zenfant ou-soit ti-zenfant, bannla bizin aprann pratik l’attachement envers Bondié d’abord dan zot prop lakaz, ek zot bizin rempli zot devoir fidelement envers zot parent ek grand-parent, parski sa faire Bondié plaisir.”

Li possible ki sa dimoune agé-la bizin l’aide pou koné si li kapav beneficié kit l’aide ki gouvernement donné. Kitfois certain dan la congregation pou kapav aide li pou gagne sa l’aide-la. Si li pa kapav beneficié l’aide so famille ni l’aide gouvernement, bann ancien kapav decidé si sa dimoune-la rempli condition pou ki la congregation aide li. Dan premier siecle, c’est coumsa ki ti faire parfois dan congregation. L’apotre Paul ti ecrire sa bann parole-la pou so compagnon Timothée:“Mette enn veuve ki ena au moins soixante an lor la liste; li ti bizin ena enn sel mari, li bizin ena enn bon reputation pou bann bon kitsoz ki li’nn faire, si li finn elevé bann zenfant, si li finn recevoir bann etranger kot li, si li finn lave lipié bann saint, si li finn aide bann ki ti dan difficulté, si li finn touletan contigne faire seki bon.”—1 Timothée 5:9, 10.

[Note]

[Zimage, page 5]

Dorcas ti prend soin bann veuve ki ti dan le besoin.—Actes 9:36-39