“Jéhovah Inn Pardonn Zot Avek Tou So Leker”

“Enn dimounn ki pa kapav pardonn lezot, li pe detrir enn pon lor ki limem li bizin pase.” Se seki Edward Herbert, enn istorien Angle ki ti viv dan 17^em siek ti dir. Sa bann parol-la met laksan lor enn rezon kifer nou bizin pardonn lezot: Pa zordi pa dime, kitfwa nou osi nou pou bizin demann lezot pardonn nou. (Matthieu 7:12) Me, ena enn lot rezon bien pli inportan kifer nou bizin pardonn lezot. Get seki lapot Paul dir dan Colossiens 3:13.​—Lir.

Parski nou tou nou inparfe, parfwa nou kapav irit ouswa ofans lezot, ek lezot osi kapav fer parey. (Romains 3:23) Kouma nou kapav kontign viv anpe avek nou prosin ki inparfe? Paul, ki ti inspire par Bondie, konsey nou pou manifeste tolerans ek pardon. Sa fer de mil an depi ki’nn ekrir sa konsey-la, me li ankor touzour itil azordi. Anou get plis an detay bann parol Paul.

“Kontign siport sakenn so kamarad.” Lexpresion “kontign siport” tradir enn mo Grek ki vedir manifeste tolerans ouswa montre pasians anver lezot. Enn liv referans dir ki bann Kretien manifeste sa kalite-la kan zot “pre pou siport lezot mem si zot agase ar bann defo ek bann vilin manier ki sa bann dimounn-la ena.” Lexpresion “sakenn so kamarad” montre nou ki sa kalite tolerans-la li bizin toulede kote. Savedir, kan nou rapel ki nou osi nou ena bann defo ki kapav irit lezot, nou pa pou les defo ki lezot ena anpes nou kontign res anpe avek zot. Me ki nou pou fer si lezot ofans nou?

“Kontign . . . pardonn [sakenn so kamarad] avek tou [zot] leker.” Dapre enn biblis, mo Grek ki’nn servi pou tradir ‘pardonn avek tou zot leker’ “se pa mo ki abitie servi pou tradir pardone . . . me se enn mo pli for ki met lanfaz lor fason nou pardone, ki volonter.” Enn lot liv referans dir ki sa mo-la donn lide “fer plezir, donn enn faver, fer gagn enn bienfe.” Nou montre ki nou pardonn dan enn fason volonter kan nou dispoze pou pardone mem si nou “ena enn kitsoz kont enn lot.” Me kifer eski nou bizin dispoze pou montre sa kalite faver-la? Parski to-ou-tar, nou pou bizin ki sa dimounn ki’nn ofans nou la, donn nou so faver an-retour, ek pardonn nou.

“Parey kouma Jéhovah inn pardonn zot avek tou so leker, fer parey zot osi.” Rezon pli inportan kifer nou bizin pardonn lezot avek tou nou leker, se parski Bondie pardonn nou avek tou So leker. (Mika 7:18) Reflesi pou enn ti moman lor gran faver ki Jéhovah donn bann dimounn ki fer pese ek ki repanti. Jéhovah Li pa parey kouma nou, Li pa fer pese. Kanmem sa, Li pre pou manifeste enn vre pardon anver bann ki’nn fer pese ek ki’nn repanti, mem si Li kone ki zame sa bann dimounn-la pa pou bizin montre zot faver anver Li ek pardonn Li. Pena dout ki Jéhovah les nou pli bon lexanp parski Li pardonn avek tou so leker bann ki fer pese me ki repanti!

Mizerikord Jéhovah rapros nou ar Li ek sa pous nou pou imit Li. (Éphésiens 4:32–5:1) Alor, li bon nou demann noumem: ‘Si Jéhovah Li, Li pardonn mwa avek tou so leker, kouma mwa ki inparfe, mo kapav refiz pardonn enn lot imin inparfe ki’nn ofans mwa me ki pe repanti sinserman?’​—Luc 17:3, 4.