Pou Progrese, “Tir Bann Obstak lor To Semin”

KAN pep Bondie ti kit Babylone an 537 Avan Nou Lepok, Jéhovah ti interese ar semin ki zot ti pou pran pou al Jérusalem. Li ti dir zot: “Fer enn semin pou lepep. Ranze, ranz gran semin-la. Tir tou bann ros lor la.” (Is. 62:10) Esey mazine ki sertin Zwif inn bizin fer pou ranz sa semin-la. Bann Zwif ki ti’nn ale avan, kitfwa ti ranpli bann kanal ek tir tou bann obstak. Sa ti ed zot bann frer ki ti pe swiv zot lor semin retour.

Li parey, nou’si nou pe mars lor enn semin ki permet nou realiz bann lobzektif spiritiel. Jéhovah anvi ki tou so bann serviter mars lor sa semin-la avek pli tigit obstak ki kapav. So Parol ankouraz nou: “Tir bann obstak lor to semin, ek tou to bann semin pou bien etabli.” (Prov. 4:26) Ki to zenn ouswa pli aze, to pou gagn bann bienfe si to swiv sa konsey-la.

PRAN BANN BON DESIZION

Kitfwa to’nn deza tann bann dimounn dir enn kitsoz koumsa lor enn adolesan: ‘Li ena tou so lavenir devan li.’ An zeneral bann zenn ena enn bon lasante, enn lespri vif, ek anvi reisi dan lavi. Akoz sa, Labib ena rezon kan li dir: “Laglwar bann zennzan, se zot lafors.” (Prov. 20:29) Enn zenn kapav realiz bann lobzektif spiritiel ek konn vre boner kan li servi so talan ek so lenerzi pou fer volonte Jéhovah.

Selman, bann dimounn dan lemond osi bien apresie kapasite ki nou bann zenn ena. Kan enn zenn Temwin travay bien dan lekol, bann konseye, bann profeser, ouswa bann kamarad lekol kapav met presion lor li pou fer bann long letid, parski pou zot, se sa ki pou fer li reisi dan sa sistem-la. Kan enn zenn frer ouswa enn zenn ser enn bon atlet, bann antrener kapav esey ankouraz li pou fer enn karyer dan spor. Eski to’nn deza pas dan enn sitiasion koumsa, ouswa eski to konn kikenn ki pe fer fas ar sa kalite presion-la? Ki pou ed enn Kretien pou pran bann bon desizion?

Bann prinsip Labib kapav ed enn zenn pou reisi dan servis Jéhovah. Ecclésiaste 12:1 dir: “Alor rapel to Gran Kreater pandan to zenes.” Kouma twa ouswa enn zenn ki to kone kapav ‘rapel zot Gran Kreater’ dan enn pli bon fason?

Anou get seki ti ariv Erica ki res dan Lwes l’Afrique. Li ti kontan zwe football. Letan Eric ti ena 15 an, li ti deza pe zwe dan enn lekip nasional. Sa vedir ki plitar li ti kapav atann pou al l’Europe pou gagn bann pli bon lantrennman ek kitfwa vinn enn zwer profesionel. Me ki lefe konsey “rapel to Gran Kreater” ti pou ena lor li? Ek ki leson twa ouswa sertin zenn kapav aprann ar seki ti ariv Eric?

Kan li ti lekol, Eric ti koumans etidie Labib avek bann Temwin Jéhovah. Ek li ti aprann ki so Kreater pou regle pou touletan bann problem ki bann dimounn pe kone. Eric ti’nn konpran ki li bizin servi so letan ek so lenerzi pou fer volonte Bondie. Akoz sa, li ti swazir pou pa fer karyer dan spor. Olie sa, li ti batize ek ti fer zefor pou progrese lor plan spiritiel. Avek letan, Eric ti vinn asistan ministeryel ek plitar li ti gagn linvitasion pou al Lekol Biblik pou Bann Frer Selibater.

Si li ti fer enn karyer dan spor, kitfwa Eric ti pou vinn ris ek seleb. Me li ti rann li kont ki sa prinsip Labib la bien vre: “Bann dibien enn ris zot kouma enn lavil for; ek dan so limazinasion zot koumadir enn miray ki proteze.” (Prov. 18:11) Wi, sekirite ki enn dimounn paret pou gagne atraver bann dibien materyel, an realite se zis enn ilizion. Anplis, bann ki ena enn gran dezir pou vinn ris “pik zotmem partou ar boukou douler.”​—1 Tim. 6:9, 10.

Erezman, boukou zenn inn gagn lazwa ek vre sekirite kan zot inn rant dan servis aplintan. Eric dir: “Mo finn rant dan enn gran ‘lekip’ bann serviter aplintan. Se meyer lekip kot mo kapav ete, ek mo remersie Jéhovah ki Li finn montre mwa sel semin pou konn vre boner ek reisi dan lavi.”

Ki to kapav dir lor twa? Olie ki to fixe bann lobzektif ki pa spiritiel, kifer to pa bien etabli “to bann semin” devan Jéhovah? Par exanp, eski to kapav fer pionie?​—Get lankadre “Li Gagn Bann Bienfe ki Li Pa Ti Pou Gagne dan Liniversite.”

TIR BANN OBSTAK LOR TO SEMIN

Kan zot ti pe vizit biro nasional bann Temwin Jéhovah dan l’États-Unis, enn koup ti trouv lazwa ki bann Betelit ki servi Jéhovah laba ena. Plitar, ser-la ti ekrir: “Nou ti santi nou inpe tro bien dan nou lavi toulezour.” Sa koup-la ti deside pou servi plis zot letan ek zot lenerzi pou fer plis dan servis Jéhovah.

Ti ariv enn moman kot bann sanzman ki sa koup-la ti anvi fer ti paret bien difisil pou zot. Me enn zour, zot ti reflesi lor text pou sa zour-la. Sa text-la ti Jean 8:31, kot nou lir sa bann parol Jésus la: “Si zot kontign gard mo parol, zot vremem mo bann disip.” Sa koup-la ti tir sa konklizion-la: “Tou seki nou fer pou sinplifie nou lavi li vo lapenn.” Zot ti vann zot gran lakaz, ti debaras zot ar lezot kitsoz ki ti pe anpes zot progrese, ek ti al servi dan enn kongregasion ki ti bizin led. Asterla zot pe fer pionie, ek pe osi ede dan konstriksion Lasal bann Temwin Jéhovah ek ede kouma volonter dan bann lasanble distrik. Ki zot resanti? “Nou inpresione ar lazwa ki nou gagne kan nou amenn enn lavi sinp ek fer seki lorganizasion Jéhovah ankouraz nou.”

KONTIGN PROGRESE LOR PLAN SPIRITIEL

Salomon ti ekrir: “To lizie bizin get drwat devan, wi, kontign get drwat devan twa.” (Prov. 4:25) Parey kouma enn sofer ki kontign get so semin drwat devan li, nou bizin evit bann distraksion ki kapav anpes nou fixe ek realiz bann lobzektif spiritiel.

Ki bann lobzektif spiritiel to kapav fixe ek realize? Enn bon lobzektif se rant dan servis aplintan. Kitfwa enn lot lobzektif se al ede dan enn kongregasion vwazin ki bizin bann proklamater ki ena lexperyans pou kapav kouver gran teritwar sa kongregasion-la. Ouswa to kapav servi dan enn kongregasion kot kitfwa ena boukou proklamater ki ena lexperyans me pena ase ansien ek asistan ministeryel. Eski to kapav ede dan enn sa bann fason-la? Kifer to pa koz sa avek sirveyan sirkonskripsion pou gete si to kapav ede? Si to interese pou al pres dan bann teritwar pli lwin, to kapav demann bann ransegnman lor bann kongregasion ki lwin ek ki bizin led.b

Anou reget seki Jéhovah ti demann bann Izraelit fer dan Isaïe 62:10. Kitfwa sertin sa bann Zwif-la inn bizin travay dir pou ki semin ki ti pou retourn pep Bondie dan so pei, li nivo ek pena okenn obstak. Si to pe fer bann zefor pou realiz bann lobzektif spiritiel, pa bes lebra. Avek led Bondie, to’si to pou reisi. Kontign demann Jéhovah sazes amezir ki to pe esey tir bann obstak lor to semin. Avek letan, kitfwa to pou trouve kouma Li kapav ed twa pou “tir bann obstak lor to semin.”​—Prov. 4:26.