Tou sorte qualité dimoune pou sapé
1. Nou reputation devant Bondié depann lor ki kitsoz?
1 Bondié donne nou so faveur ki nou pa merité, ek grace a sa nou kapav gagne delivrance. Jéhovah envie ki “tou sorte qualité dimoune sauvé ek gagne enn connaissance exact lor la verité.” (1 Tim. 2:3, 4) Nou reputation devant Bondié pa depann lor nou race, ni lor nou position social, ni lor nou bann capacité, ni lor nou l’apparence. Li depann plutot lor la foi ki nou ena dan sacrifice Jésus. (Jean 3:16, 36) En tant ki bann serviteur Bondié, nou bizin tire dan nou leker tou tendance pou faire preference, parski sa kapav faire nou rejette bann dimoune ki pourtant Jéhovah pré pou accepté.
2, 3. Ki kapav aide nou pou pa juge bann dimoune par zot l’apparence?
2 Evite jugé: Jéhovah guette seki ena dan leker enn dimoune, sans okenn arriere pensé ou-soit preference. (1 Sam. 16:7) Li trouve aussi capacité ki zot ena. Alors, Li considere bann ki envie faire Li plaisir couma bann dimoune desirable. (Hag. 2:7) Eski nou considere lezot pareil couma Bondié considere zot?
3 Nou kapav choqué par l’apparence certain dimoune ki nou joinde dan predication. Zot kapav habille enn fason debraillé, misere, ou-bien indecent. Zot kapav ena enn la-barbe malang, ou-soit zot kapav ena piercing lor zot nené ou-soit lor zot la-levre. Certain kitfois pena lakaz. Lezot kapav maltraite nou. Au lieu ki nou pensé ki bann dimoune coumsa jamais pa pou vinn bann serviteur Jéhovah, nou bizin ena enn l’attitude positif, “parski nou aussi, longtemps nou ti bann dimoune ki pa ti reflechi, ki pa ti obeir, [ek] ki ti dan l’erreur.” (Tite 3:3) Si nou realise sa, nou pou envie preche avek tou dimoune, mem avek bann ki pa parette digne kan nou zis guette zot l’apparence.
4, 5. Ki leson nou kapav aprann ar l’exemple Jésus ek Paul?
4 Bann l’exemple dan premier siecle: Jésus Christ ti prend le temps pou aide bann dimoune ki dapré certain, pa ti ena okenn chance pou vinn bann serviteur Bondié. (Luc 8:26-39) Mem si jamais li pa ti tolere bann mauvais pratik, li ti koné ki bann dimoune kapav arrivé amenn enn mauvais la-vie. (Luc 7:37, 38, 44-48) Alors, li ti montré ki li ti comprend zot, “li finn gagne pitié pou zot, parski zot ti coumadir bann mouton ki pena berger.” (Marc 6:34) Eski nou kapav faire plus pou imite so l’exemple?
5 L’apotre Paul ti gagne coup-de-roche, ti gagne batté ek ti al dan prison. (Actes 14:19; 16:22, 23) Eski sa bann mauvais l’experience-la ti faire li vinn enn dimoune amer, et faire li croire ki li ti pé perdi so lé-temps ar certain nation ek certain race? Jamais. Li ti koné ki dan tou nation ena bann dimoune sincere, et li ti determiné pou al rod zot. Dan nou territoire, eski c’est coumsa ki nou considere bann dimoune ki ena different l’origine ou-soit different culture?
6. Ki l’effet nou l’attitude kapav ena lor bann nouveau ki vinn assisté bann reunion dan congregation?
6 Accueillir lezot zordi: Beaucoup serviteur Bondié bien content ki bann frere ek soeur ti accueillir zot dan congregation sans juge zot par zot l’apparence. En Allemagne, enn missié ti vinn dan enn la-Salle du Royaume avek enn la-barbe malang, so cheveux ti bien longue ek so linge ti bien sale. Li ti ena enn mauvais reputation. Mais kan-mem sa, bann frere ti bien accueillir li. Li ti tellement etonné, ki li finn ré-vini enn semaine apré. Li pa finn tardé pou change so l’apparence; li finn arrete fumé, et li finn marié civile avek madame ar ki li ti pé resté. Enn tipé apré, sa couple-la ek zot deux zenfant ti pé servi Jéhovah couma enn famille bien uni.
7. Couma nou kapav imite nou Bondié ki pa faire preference?
7 Anou imite nou Bondié ki pa faire preference, ek anou invite tou dimoune pou profite So faveur ki nou pa merité.
[L’encadré page 3]
“Bondié pa faire preference, mais dan tou nation, dimoune ki ena la crainte pou Li ek ki pratik la justice, Bondié accepté li.”—Actes 10:34, 35.