Imite Jéhovah, nou ‘Bondié ki heureux’
1 Jéhovah vrai-mem envie ki bann dimoune vive heureux. La Bible koz lor bann benediction extraordinaire ki Li finn reservé pou bann dimoune, ek nou pé attann sa avek impatience! (Is. 65:21-25) Kan nou pé partage ‘bon nouvel ki sorti kot nou Bondié ki heureux,’ fodé ki bann dimoune trouvé ki nou pé faire li avek la joie. (1 Tim. 1:11) Fason ki nou koz lor sa message-la, bizin demontré nou l’amour pou la verité ek nou l’interet sincere pou bann dimoune avek ki nou kozé.—Rom. 1:14-16.
2 Li vrai ki dé-fois li kapav difficile pou garde nou la-joie. Dan certain territoire, pena beaucoup dimoune ki accepté message Royaume Bondié. Ena aussi bann jour kot nou-mem nou bizin faire face ar bann situation difficile dan nou la-vie. Couma nou kapav garde nou la-joie? Nou bizin reflechi kifer li important ki bann dimoune dan nou territoire ecouté ek comprend sa message ki nou pé preché-la. (Rom. 10:13, 14, 17) Kan nou faire sa, c’est avek la joie ki nou pou contigne faire lezot konn bann disposition ki Jéhovah finn prend avek misericorde, pou sauve bann dimoune.
3 Koz lor bann kitsoz positif: Nou bizin aussi prend compte seki nou dire. Mem si arrivé au commencement nou conversation, nou cite enn problem ou-soit enn nouvel ki tracasse bann dimoune, fodé pa ki nou allé-mem ar sa bann kitsoz negatif-la. Nou mission c’est pou partage “bon nouvel lor enn kitsoz ki pli bon.” (Is. 52:7; Rom. 10:15) Sa bon nouvel-la li enn message ki basé lor bann promesse ki Bondié finn faire concernant enn pli bon l’avenir. (2 Pierre 3:13) Si touletan nou rappel sa, nou pou servi la Bible pou “soulage bann dimoune ki ena enn grand chagrin dan zot leker.” (Is. 61:1, 2) Sa pou aide nou tou pou garde nou la-joie ek ena toujours bann parole positif.
4 Pena doute ki bann dimoune pou remarké ki nou pé preché avek la joie. Alors, anou toujours montré nou la-joie pareil couma Jéhovah, nou ‘Bondié ki heureux,’ kan nou pé partage bon nouvel lor Royaume Bondié avek bann dimoune dan nou territoire.