Ki ou pli grand priorité?
1 Couma ou pou reponn sa question-la? Bien-sur nou tou nou envie mette Royaume Bondié premier place dan nou la-vie. (Mat. 6:33) Mais nou kapav demann nou-mem, ‘Eski bann choix ki mo faire montré ki mo pé faire sa?’ La Bible encourage nou: “Contigne examiné seki zot été zot-mem.” (2 Cor. 13:5) Couma nou kapav examine nou-mem pou guetté si nou pé mette Royaume Bondié dan premier place?
2 Nou lé-temps: D’abord nou kapav guetté ki nou pé faire avek nou lé-temps. (Éph. 5:15, 16) Comié lé-temps nou passé chaque semaine avek nou bann camarade, devant television, lor Internet, ou-soit dan enn passe-temps? Si nou ecrire comié lé-temps nou passé dan sa bann activité-la ek nou compare sa avek quantité lé-temps ki nou passé dan bann activité spirituel, nou kapav etonné. Eski nou accepté pou neglige nou service sacré pou faire overtime zis pou gagne tou bann confort materiel? Comié fois nou’nn sacrifié nou bann reunion ou-soit predication pou al passe enn week-end vacance?
3 Etabli bann priorité: La plupart parmi nou pena beaucoup lé-temps pou faire tou seki nou envie. Alors, pou nou kapav mette Royaume Bondié dan premier place, nou bizin examine nou bann priorité. Nou bizin aussi reserve le temps pou “bann kitsoz ki pli important” couma etudié parole Bondié, participe dan predication, prend soin nou famille, ek assisté bann reunion. (Phil. 1:10; Ps. 1:1, 2; Rom. 10:13, 14; 1 Tim. 5:8; Héb. 10:24, 25) Lezot activité couma par exemple faire enn tipé l’exercice ek enn bon detente, kapav faire nou di-bien. (Marc 6:31; 1 Tim. 4:8) Mais fodé pa ki sa bann kitsoz-la prend place bann kitsoz spirituel ki pli important.
4 Enn jeune frere ti mette Royaume Bondié premier place dan so la-vie kan li ti prend service a plein temps au lieu ki li al faire bann grand l’etude pou li gagne enn bon travail plitar. Li ti aprann enn lot langue ek li ti al servi la kot ti bizin plus proclamateur. Li ti dire: “Mo pé passe bann pli bon moment mo la-vie. Enn plaisir pou preché ici! Mo zis souhaité ki tou bann jeune faire enn l’experience coumsa, ek ressenti seki mo ressenti. Pena nanyin ki pli bon ki servi Jéhovah avek tou seki nou ena.” Oui, kan nou mette Royaume Bondié dan premier place nou gagne bann benediction, mais pli important encore, sa faire Jéhovah plaisir.—Héb. 6:10.