Nou bizin l’endurance pou preché
1 Pendant plus ki 30 an, l’apotre Paul ti gagne beaucoup la joie parski predication la bonne nouvelle ti l’activité principal dan so la vie. Pareil couma dan n’importe ki travail ki vaut la peine, nou gagne bann difficulté, Paul aussi li ti gagne certain difficulté. (2 Cor. 11:23-29) Selman, Paul pa ti arrete preché. (2 Cor. 4:1) Li ti comprend ki Jéhovah ti pou donne li la force pou enduré pendant ki li ti pé accompli so ministere. (Phil. 4:13) Parski li ti donne enn bon l’exemple fidelité ek l’endurance, Paul ti kapav dire: “Imite moi, pareil couma moi mo imite Christ.”—1 Cor. 11:1.
2 Couma pou endure bann difficulté zordi: Chaque jour, beaucoup nou bann frere ek soeur faire face ar moquerie, l’opposition, ou-soit l’indifference ar zot famille, zot bann collegue travail, ou-soit zot camarade lekol. (Mat. 10:35; Jean 15:20) Kitfois c’est ou cas. Li possible aussi ki ou pé bizin lutté kont enn probleme la santé, ou-soit toulé-jour ou pé faire zeffort pou rejette bann distraction ek bann tentation ki testé ou la foi ek ou l’endurance. Nou kapav gagne la force kan nou considere l’exemple bann serviteur fidele ki’nn vive dan le passé, ek aussi l’exemple nou bann compagnon zordi ki’nn bizin faire face ek surmonte bann difficulté.—1 Pierre 5:9.
3 Nou kapav gagne la force pou reste ferme dan nou ministere kan nou faire sur ki nou’nn ‘mette lor nou l’equipement la guerre ki complet, ki Bondié donné.’ (Éph. 6:10-13, 15) Li aussi bien important ki nou prié pou gagne l’endurance. Bondié donne nou so l’esprit saint pou ki nou kapav endure bann l’epreuve. (2 Cor. 6:4-7) Pou nou kapav gagne la victoire dan nou la guerre spirituel, nou bizin prend en consideration bann rappel ki Bondié donné pou renouvelé nou l’esprit. (Ps. 119:24, 85-88) Pareil couma enn zenfant kapav lire plusieurs fois enn lettre ki li’nn gagné ar so papa ki bien content li, nou aussi, kan nou lire la Bible toulé-jour, sa pou faire nou relation avek Jéhovah vinn pli fort. Nou gagne la sagesse pou faire face ar nou bann probleme, ek coumsa nou laisse fason pensé Bondié influence nou bann decision ek faire nou l’integrité vinn pli fort.—Prov. 2:10, 11.
4 L’endurance faire nou gagne bann benediction: Pareil couma sa ti arrivé dan cas l’apotre Paul, kan nou enduré avek fidelité pendant ki nou pé accompli nou ministere, sa faire leker Jéhovah content ek faire nou ek lezot dimoune gagne bann benediction. (Prov. 27:11) Anou determiné pou perseveré dan nou ministere, ek pou montré ki nou la foi li solide, ek ki li “ena enn pli grand valeur ki l’or ki kapav fonn malgré ki li finn passe par difé.”—1 Pierre 1:6, 7.