Anou marche par la foi, pa par seki nou trouvé!
“Nou pé marche par la foi, pa par seki nou trouvé avek nou lizié.”—2 CORINTHIENS 5:7.
1. Couma nou koné ki l’apotre Paul ti marche par la foi, ek pa par seki li ti trouvé?
NOU en l’an 55 n.l. Sa faire environ 20 an depuis ki Paul, ki avant ti appel Saul, ek ki ti pé persecute bann chrétien, ti’nn vinn li-mem enn chrétien. Li pa finn laisse le temps ki’nn passé affaibli so la-foi en Bondié. Mem si li pa ti trouve bann kitsoz ki dan le ciel avek so lizié, li ti garde enn la-foi solid. C’est a cause sa ki, kan l’apotre Paul ti ecrire bann chrétien oint ki ti ena l’esperance pou al dan le ciel, li ti kapav dire zot: “Nou pé marche par la foi, pa par seki nou trouvé avek nou lizié.”—2 Corinthiens 5:7.
2, 3. (a) Couma nou montré ki nou pé marche par la foi? (b) Ki sa vedir marche par seki nou trouvé?
2 Pou nou marche par la foi, nou bizin ena enn confiance solid dan capacité Bondié pou dirige nou la-vie. Nou bizin bien sur ki Li vrai-mem koné ki pli bon pou nou. (Psaume 119:66) Kan nou prend bann decision dan nou la-vie, ek faire dapré seki nou finn decidé, nou prend compte bann ‘kitsoz ki nou pa trouvé.’ (Hébreux 11:1) Parmi sa bann kitsoz-la ena “enn nouveau lé-ciel ek enn nouveau la-terre.” (2 Pierre 3:13) Mais, kan nou marche par seki nou trouvé, sa vedir ki nou laisse nou la-vie dirigé zis par bann kitsoz materiel ki nou kapav trouvé ek touché. Sa li bien dangereux, parski si nou amenn enn la-vie coumsa, nou pa pou prend compte volonté Bondié.—Psaume 81:12; Ecclésiaste 11:9.
3 Ki nou bann membre “ti troupeau” ki ena l’esperance pou al dan le ciel, ou-soit “lezot brebis” ki ena l’esperance pou vive lor la terre, sakenn parmi nou bizin prend compte conseil pou marche par la foi ek pa par seki nou trouvé. (Luc 12:32; Jean 10:16) Anou guetté couma sa conseil-la kapav protege nou kont certain piege couma par exemple: “profite plaisir temporaire ki gagné dan peché,” materialisme, ek pa prend compte ki la fin sa system-la pé vini. Nou pou examine aussi ki danger ena kan nou marche par seki nou trouvé.—Hébreux 11:25.
Rejette desir pou “profite plaisir temporaire ki gagné dan peché”
4. Ki choix Moïse ti faire ek kifer?
4 Maziné ki qualité la vie, Moïse, garson Amram, ti pou kapav amené. Li ti’nn grandi parmi descendance royal en Égypte, ek li ti ena possibilité pou gagne pouvoir, la richesse ek ena enn grand l’influence lor lezot. Moïse ti kapav dire: ‘Mo finn gagne enn bon l’education dan sagesse bann Égyptien, ek mo ena pouvoir kan mo kozé ek kan mo agir. Si mo contigne reste ici dan palais, mo pou kapav servi mo position pou soulage mo bann frere hébreux ki pé passe misere!’ (Actes 7:22) Pourtant, Moïse ti choisir pou gagne “maltraité avek peuple Bondié.” Kifer? Ki ti pousse Moïse pou rejette tou seki li ti pou kapav gagné en Égypte? La Bible dire: “Par la foi, [Moïse] ti quitte l’Égypte, sans ki li peur colere le roi, parski li ti tini ferme, coumadir li ti pé trouve sa Kikenn ki invisible-la.” (Hébreux 11:24-27) Moïse ti sur ki Jéhovah pou recompense so justice, ek sa ti aide li pou pa tombe dan peché ek pou pa rod profite plaisir temporaire ki gagné dan sa bann peché-la.
5. Couma l’exemple Moïse encourage nou?
5 Nou aussi, souvent nou bizin prend bann decision difficile, par exemple nou kapav demann-nou: ‘Eski mo bizin abandonne bann pratik ek bann l’habitude ki pa vrai-mem en accord avek bann principe la Bible? Eski mo pou accepté enn travail ki mo pensé pou donne moi bann l’avantage materiel mais ki pou enn obstacle pou mo bann progré spirituel?’ L’exemple Moïse encourage nou pou pa faire bann choix pareil couma bann dimoune dan le monde, ki guette zis bann avantage ki zot kapav gagné dé-suite, sans trouve pli devant. Au contraire, nou bizin ena la foi dan sagesse “sa Kikenn ki invisible-la” setadir Jéhovah, ek dan so capacité pou trouve bien loin. Pareil couma Moïse, anou apprecié l’amitié ki nou ena avek Jéhovah plus ki n’importe ki kitsoz ki le monde kapav offert nou.
6, 7. (a) Couma Ésaü ti montré ki li ti prefere marche par seki li ti trouvé? (b) Ki l’avertissement l’exemple Ésaü donne nou?
6 L’attitude Moïse ti bien different avek l’attitude Ésaü, garson Isaac. Ésaü ti prefere profite bann l’avantage ki li ti gagné dé-suite. (Genèse 25:30-34) Parski li pa ti ena okenn “respé pou bann kitsoz sacré,” Ésaü ti change so droit premier-né, “pou enn sel l’assiette mangé.” (Hébreux 12:16) Kan li ti vann sa droit-la, li pa ti reflechi lor l’effet ki sa ti pou ena lor so relation avek Jéhovah, ou-soit ki consequence sa ti pou ena lor so descendance. Li pa ti trouve kitsoz dan enn fason spirituel. Li ti ferme so lizié lor bann promesse Bondié, parski pou li, zot pa ti ena enn grand valeur. Li ti marche par seki li ti trouvé, pa par la foi.
7 L’exemple Ésaü donne nou enn l’avertissement zordi. (1 Corinthiens 10:11) Kan nou bizin prend bann decision, ki zot bann grand ou bann ti decision, fodé pa ki nou laisse propagande le monde Satan influence nou. Sa propagande-la encourage bann dimoune pou satisfaire tou zot desir, dé-suite. Nou bizin demann nou-mem: ‘Eski bann decision ki mo prend montré ki mo ressemblé Ésaü? Si mo pé rod gagne seki mo envie asterla, eski sa pou faire moi mette bann kitsoz spirituel dan deuxieme place? Eski bann choix ki mo faire pé mette en danger mo l’amitié avek Bondié, ek recompense ki Li pou donne moi dan l’avenir? Ki l’exemple mo pé donne lezot?’ Si nou bann choix dan la vie montré ki nou apprecié bann kitsoz sacré, Jéhovah pou beni nou.—Proverbes 10:22.
Pa tombe dan piege materialisme
8. Ki l’avertissement bann chrétien dan la ville Laodicée ti gagné, ek kifer sa interesse nou?
8 Vers la fin premier siecle, Jésus Christ, dan so la-gloire, ti donne l’apotre Jean enn revelation. Ladan li ti donne enn message pou congregation Laodicée, ki ti trouve dan l’ouest l’Asie. Sa message-la ti mette zot en garde kont materialisme. Mem si bann chrétien ki ti reste Laodicée ti riche lor plan materiel, mais lor plan spirituel, zot ti’nn faire faillite. Au lieu ki zot ti contigne marche par la foi, zot ti laisse bann kitsoz materiel aveuglé zot lor plan spirituel. (Révélation 3:14-18) Zordi aussi, materialisme ena mem l’effet. Li affaibli nou la-foi, ek li empeche nou contigne “galope avek endurance sa lé-course” ki faire gagne la vie-la. (Hébreux 12:1) Si nou pa faire attention, nou kapav tellement occupé par “bann plaisir ki ena dan sa la-vie-la,” ki zot ‘touffe net’ nou bann activité spirituel.—Luc 8:14.
9. Couma eski sa protege nou kan nou contente-nou avek seki nou ena, ek kan nou apprecié nourriture spirituel ki nou gagné?
9 Enn fason pou protege nou lor plan spirituel, c’est kan nou contente-nou avek seki nou ena, plutot ki nou rod profite tou seki sa lé-monde-la kapav offert nou ek nou rod vinn riche. (1 Corinthiens 7:31; 1 Timothée 6:6-8) Kan nou marche par la foi ek pa par seki nou trouvé avek nou lizié, nou pou ena la joie dan paradi spirituel kot nou été zordi. Oui, sa bon nourriture spirituel ki nou pé gagné-la, eski sa pa pousse nou pou ‘crié dan la joie parski nou leker content’? (Isaïe 65:13, 14) En plus, nou content pou frequente bann dimoune ki manifesté fruit l’esprit saint Bondié. (Galates 5:22, 23) Alors, li bien important ki nou satisfait avek seki Jéhovah donne nou lor plan spirituel ek ki nou laisse sa encourage nou!
10. Ki bann question li bon ki nou pose nou-mem?
10 Li bon ki nou demann nou-mem sa bann question-la: ‘Ki quantité bann kitsoz materiel zot important dan mo la-vie? Eski mo pé servi mo bann kitsoz materiel pou vive dan plaisir, ou-soit pou faire plus dan service Jéhovah? Ki donne moi plus satisfaction: etudié la Bible ek assisté reunion kot mo joinde mo bann frere ek soeur, ou-soit passe bann week-end sans assume mo bann responsabilité spirituel? Eski souvent mo amusé dan week-end au lieu ki mo al preché ek faire lezot activité spirituel?’ Si nou envie marche par la foi, nou bizin reste bien occupé dan bann activité spirituel ek ena enn confiance solid ki bann promesse Jéhovah pou realisé.—1 Corinthiens 15:58.
Pa blié ki la fin pré
11. Couma kan nou marche par la foi, sa aide nou pou pa blié ki la fin pré?
11 Si nou marche par la foi, sa pou aide nou pou rejette bann pensée ki pa spirituel. Par exemple, nou pa pou dire ki la fin pa pou vinn asterla, ou-soit ki li pa pou arrive jamais. Nou pa pareil couma bann dimoune ki ena bann doute ek ki bouffonne bann prophetie biblik. Au contraire, nou trouvé couma bann evenement ki pé arrivé dan le monde pé realise seki finn ecrire dan la Bible pou nou lepok. (2 Pierre 3:3, 4) Par exemple, l’attitude ek conduite bann dimoune en general montré ki nou pé vive dan “dernier jour,” pa vrai? (2 Timothée 3:1-5) Grace a nou la-foi, nou comprend ki bann l’evenement ki pé arrivé dan le monde, zot pa zis enn repetition seki finn passé dan l’histoire. Au contraire, zot faire partie dan ‘signe ki montré presence [Jésus Christ] ek lepok la fin sa system-la.’—Matthieu 24:1-14.
12. Couma bann parole ki Jésus ti dire en Luc 21:20, 21 ti realisé dan premier siecle?
12 Anou examine enn evenement ki’nn arrivé dan premier siecle nou lepok, ki inpé pareil avek situation dan nou lepok. Kan Jésus ti lor la terre, li ti mette so bann disciple en garde, li ti dire zot: “Kan zot trouve Jérusalem entouré par bann l’armée ki pé campé, zot pou koné ki so destruction finn kosté. Lerla, bann ki dan Judée bizin sauvé, al dan bann montagne, ek bann ki dan la ville bizin sorti allé.” (Luc 21:20, 21) Sa prophetie-la finn realisé kan l’armée romain ki ti commandé par Cestius Gallus, ti entoure Jérusalem en 66 n.l. Mais enn sel coup, sa l’armée-la ti allé, ek sa ti donne bann chrétien enn signal ek en mem temps enn l’occasion, pou zot ‘sauvé ek al dan bann montagne.’ En 70 n.l., l’armée romain ti retourné, zot ti attak la ville Jérusalem ek zot ti detruire so temple. Dapré l’historien Josèphe, plus ki enn million Juif ti mort ek bann Romain ti amenn 97,000 Juif couma prisonnier. Bondié ti amenn so jugement lor system juif sa lepok-la. Bann ki ti marche par la foi ek ki ti suive l’avertissement Jésus, ti sap dan sa malheur-la.
13, 14. (a) Ki bann l’evenement pou ena bientot? (b) Kifer eski nou bizin prend compte realisation bann prophetie la Bible?
13 Enn kitsoz pareil pré pou arrivé dan nou lepok. Jéhovah pou servi certain partie dan Nations unies kan Li pou faire so jugement. Pareil couma dan premier siecle, l’armée romain ti ena responsabilité pou veillé ki ena pax romana (la paix romain), zordi aussi, Nations unies ena responsabilité pou veillé ki ena la paix. Mem si l’armée romain ti essaye amenn enn certain securité dan le monde sa lepok-la, c’est zot ki ti detruire Jérusalem. Zordi aussi pareil, bann prophetie la Bible montré ki bann la-force militaire ki forme partie dan Nations unies pou considere la religion couma enn kitsoz ki crée problem. Zot pou detruire seki Jérusalem representé zordi—bann religion la chrétienté—ek le reste Babylone la Grande. (Révélation 17:12-17) Oui, l’empire mondial la fausse religion pré pou detruire.
14 La grande tribulation pou commencé avek destruction la fausse religion. Dan dernier partie la grande tribulation, seki resté dan sa mauvais lé-monde-la pou detruire. (Matthieu 24:29, 30; Révélation 16:14, 16) Kan nou marche par la foi, sa aide nou pou prend compte couma bann prophetie la Bible pé realisé. Nou pa laisse-nou trompé ek pensé ki Bondié pou servi enn organisation couma Nations unies, ki’nn crée par bann dimoune, pou amenn vrai la-paix ek securité lor la terre. Dan sa cas-la, eski nou pa bizin montré par nou fason vive, ki nou sur ki “grand jour Jéhovah bien pré”?—Tsephania 1:14.
Ki danger ena kan nou marche par seki nou trouvé?
15. Malgré ki bann Israélite ti gagne bann benediction Bondié, dan ki piege zot inn tombé?
15 Bann l’experience ki ancien nation Israël inn faire dan le passé montré ki danger pé attann bann ki marche par seki zot trouvé, ek ki finn laisse zot la-foi vinn faible. Malgré ki zot ti temoin dix plaie ki ti abaisse bann fausse bondié en Égypte, ek ki zot ti delivré a travers la mer Rouge, bann Israélite ti desobeir Jéhovah ek zot ti faire enn veau en or, ek zot ti commence adore sa. Kifer? Parski zot ti perdi patience ek zot ti commence fatigué attann Moïse ki “ti pé tardé pou desann lor montagne.” (Exode 32:1-4) Parski zot pa ti ena patience, sa ti pousse zot pou adore enn idole ki zot kapav trouvé avek zot prop lizié. Zot ti insulté Jéhovah kan zot ti marche par seki zot ti trouvé, ek sa finn cause la mort “environ trois mille dimoune.” (Exode 32:25-29) Zordi, li vrai-mem triste kan enn serviteur Jéhovah prend bann decision ki montré ki li ena doute lor Jéhovah ek ki li pena confiance dan So capacité pou realise So bann promesse!
16. Couma bann Israélite ti laisse bann kitsoz ki visible influence zot?
16 Parski bann Israélite ti guette zis seki ti visible, sa ti affecté zot dan lezot fason. Le fait ki zot ti marche par seki zot ti trouvé, sa ti faire zot tremblé devant zot bann l’ennemi, tellement zot ti peur. (Nombres 13:28, 32; Deutéronome 1:28) Sa ti faire zot aussi commence rebelle kont l’autorité ki Jéhovah ti donne Moïse ek zot ti plaigne zot sort. Parski zot pa ti ena la foi, zot ti dire ki zot ti prefere l’Égypte, enn pays ki controlé par bann demon, plutot ki la Terre promise. (Nombres 14:1-4; Psaume 106:24) Surement Jéhovah ti bien offensé kan Li ti trouvé ki so peuple pena okenn respé pou zot lé-Roi invisible!
17. Dan lepok Samuel, pou ki raison bann Israélite ti rejette direction Jéhovah?
17 Dan lepok Samuel, bann membre nation Israël, mem si zot ti ena faveur Bondié, ti tombe encore enn fois dan piege pou marche par seki zot ti trouvé. Bann Israélite ti envie ena enn lé-roi ki zot ti kapav trouvé. Mem si Jéhovah ti montré zot ki Li-mem ti zot lé-Roi, sa pa ti assez pou faire zot marche par la foi. (1 Samuel 8:4-9) Zot ti rejette direction parfait Jéhovah, ek zot ti prefere pou faire pareil couma bann nation ki ti entoure zot. Sa ti faire zot gagne beaucoup malheur. —1 Samuel 8:19, 20.
18. Ki leson nou kapav tiré concernant bann danger ki ena kan nou marche par seki nou trouvé?
18 En tant ki bann serviteur Jéhovah zordi, bann relation ki nou ena avek Bondié ena enn grand valeur pou nou. Nou envie tire bann leson important dan bann l’evenement ki’nn arrivé dan le passé, ek mette zot en pratik dan nou la-vie. (Romains 15:4) Kan bann Israélite ti marche par seki zot ti trouvé, zot ti blié ki c’est Bondié ki ti pé dirige zot a travers Moïse. Si nou pa faire attention, nou aussi nou kapav blié ki c’est nou Bondié, Jéhovah, ek Jésus Christ, Grand Moïse, ki pé dirige congregation zordi. (Révélation 1:12-16) Nou bizin aussi faire attention pou pa guette l’organisation ki Jéhovah ena lor la terre, dan enn fason humain. Sinon, nou kapav commence ena enn l’esprit critik, ek mank reconnaissance pou bann dimoune ki Jéhovah pé servi, ek pou nourriture spirituel ki nou gagné a travers “l’esclave fidel et avisé.”—Matthieu 24:45.
Anou decidé pou marche par la foi
19, 20. Ki ou bien decidé pou faire, ek kifer?
19 La Bible dire ki “nou bizin lutté, pa kont di-sang ek la chair, mais kont bann gouvernement, kont bann l’autorité, kont bann dirigeant le monde ki dan sa noirté-la, kont bann mauvais l’esprit ki trouve dan le ciel.” (Éphésiens 6:12) Nou principal l’ennemi c’est Satan le Diable. So l’objectif c’est pou detruire nou la-foi en Jéhovah. Li pa pou laisse okenn moyen passé pou li detourne nou ar nou decision pou servi Jéhovah. (1 Pierre 5:8) Ki kitsoz pou protege nou pou nou pa laisse-nou trompé par seki le monde parette été? C’est kan nou marche par la foi, pa par seki nou trouvé avek nou lizié! Kan nou ena confiance dan bann promesse Jéhovah, sa pou protege nou ek ‘nou la-foi pa pou faire naufrage.’ (1 Timothée 1:19) Alors, anou faire tou seki nou kapav pou contigne marche par la foi, ek pou mette tou nou confiance dan benediction Jéhovah. Anou contigne prié pou ki nou sapé kan bann kitsoz ki ti annoncé pou l’avenir, pou arrivé.—Luc 21:36.
20 Pou aide nou marche par la foi, ek pa par seki nou trouvé, nou ena enn grand l’exemple. La Bible dire ki “Christ aussi finn souffert pou zot, ek li finn laisse enn model pou zot, pou ki zot suive bien so trace.” (1 Pierre 2:21) Dan prochain lartik, nou pou examiné couma nou kapav contigne marche pareil couma Jésus Christ ti marché.
Eski ou rappel?
• Ki ou finn aprann par l’exemple Moïse ek Ésaü concernant dimoune ki marche par la foi, ek pa par seki zot trouvé?
• Ki kitsoz important pou aide nou pou rejette materialisme?
• Couma kan nou marche par la foi, sa aide nou pou pa pensé ki la fin encore bien loin?
• Kifer li dangereux si nou marche par seki nou trouvé?
[Zimage, page 9]
Moïse ti marche par la foi
[Zimage, page 10]
Eski souvent bann moment detente empeche ou faire bann l’activité spirituel?
[Zimage, page 12]
Couma sa protege nou kan nou prend compte seki Parole Bondié dire?