Ki decision mo pou prend concernant bann fraction di-sang ek bann soin medical kot servi mo prop di-sang?
La Bible donne bann chretien sa l’ordre-la: “Pa prend . . . di-sang.” (Actes 15:20) Alors, bann Témoins de Jéhovah refuse prend di-sang, ki li di-sang total ou-soit quatre composant principal di-sang setadir globule rouge, globule blanc, plaquette ek plasma. Zot pa faire don ni zot garde en reserve zot di-sang pou remette sa ar zot plitar.—Lév. 17:13, 14; Actes 15:28, 29.
Ki été bann fraction di-sang, ek kifer chaque chretien bizin decidé si li pou accepté sa ou-soit non?
Bann fraction di-sang c’est bann element ki trouve dan di-sang ek ki nou kapav separé grace a enn methode ki appel fractionnement. Nou prend l’exemple plasma, enn parmi sa quatre principal composant di-sang-la. Nou kapav separe li coumsa: de l’eau (apepré 91%); bann proteine, couma albumine, globuline ek fibrinogène (apepré 7%); ek lezot substance, couma bann nutriment, hormone, gaz, vitamine, saleté, ek électrolyte (apepré 1.5%).
Kan la Bible dire pa prend di-sang, eski li pé koz lor bann fraction aussi? Nou pa kapav reponn sa question-la dan enn fason categorik. La Bible pa donne bann instruction precis lor bann fraction di-sang.a Nou koné ki beaucoup sa bann fraction-la sorti dan di-sang ki bann dimoune finn donné pou servi dan bann domaine medical. Alors, chaque chretien bizin guetté si so conscience permette li pou accepté ou-soit refuse servi sa bann substance-la kan li pé faire enn traitement medical.
Avant ou prend enn decision, pose ou-mem sa bann question-la: ‘Eski mo conscient ki si mo refuse tou bann fraction di-sang sa vedir ki mo pa pou accepté certain medecine, couma par exemple bann medecine ki combatte bann virus ek bann maladie ou-soit ki arrete bann l’hemorragie? Eski mo pou kapav explik enn docteur kifer mo refuse ou-soit accepté pou servi tel ou tel fraction di-sang?’
Kifer eski mo tousel kapav decidé si mo pou accepté ou-soit non bann traitement kot pou servi mo prop di-sang?
Bann chretien pa faire don, ni zot garde en reserve zot di-sang pou servi li plitar; mais, ena certain traitement ou-soit test kot servi nou prop di-sang, ki pa necessairement al kont bann principe la Bible. A cause sa, chaque chretien bizin guetté si so conscience permette li pou accepté ou-soit refuse certain traitement medical kot servi so prop di-sang.
Kan ou pé prend sa bann decision-la, pose ou-mem sa bann question-la: ‘Si enn partie mo di-sang bizin quitte mo lekor ek ki sa di-sang ki’nn tiré-la arrete circulé pou enn ti moment, eski mo conscience pou permette moi considere sa di-sang-la couma enn kitsoz ki toujours faire partie mo lekor ek ki pa necessaire ‘versé lor la terre’? (Deut. 12:23, 24) Eski mo conscience ki’nn formé par la Bible pou troublé si pendant enn traitement, tire enn tipé mo di-sang, traite li, ek ré-mette li dan mo lekor? Eski mo conscient ki si mo refuse tou bann traitement medical kot servi mo di-sang, sa vedir ki mo refuse bann traitement couma dialyse ou-soit servi enn machine ki remplace nou poumon ou-soit nou leker? Eski mo finn prié Bondié pou demann Li so l’aide avant mo prend enn decision?’b
Ki decision personnel mo pou prend?
Guette sa deux tableau ki trouve dan page 5 ek page 6-la. Tableau No. 1 donne enn la liste certain bann fraction ki sorti dan di-sang ek li expliké couma servi zot dan domaine medical. Ecrire si ou choisir pou accepté ou-soit pou refuse sakenn sa bann fraction-la. Tableau No. 2 donne enn la liste certain bann traitement medical kot servi ou prop di-sang. Ecrire si ou choisir pou accepté ou-soit pou refuse sakenn sa bann traitement-la. Sa bann tableau-la zot pa bann document legal, mais ou kapav servi bann reponse ki ou’nn metté lor la pou rempli ou carte No Blood (pa mette di-sang).
Ou bizin prend ou prop decision ek pa base ou lor conscience enn lot dimoune. En plus, fodé pa nou critik decision enn lot chretien. Lor sa bann decision-la “sakenn pou sarié so prop charge” ek pou prend so prop responsabilité.—Gal. 6:4, 5.
[Notes]
a Ou kapav trouve bann renseignement important dan La Tour de Garde 15 juin 2004, en français, page 29-31.
b Ou kapav trouve bann renseignement important dan La Tour de Garde 15 octobre 2000, en français, page 30-1, ek dan DVD Des alternatives à la transfusion — Documentaires.
Note: Chaque docteur ena different methode pou applik sa bann traitement-la. Demann ou docteur pou explik ou couma chaque traitement pou deroulé exactement pou ki ou kapav assure-ou ki li en accord avek bann principe la Bible ek avek bann decision ki ou prend dapré ou conscience.