Zenn​—Ki To Pou Fer ar To Lavi?

“MO ANVI reisi dan lavi.” Se seki enn zennfi ti dir. Sirman to’si to anvi mem zafer. Me kouma to kapav “reisi” dan lavi? Televizion, radio, bann magazinn, to bann kamarad, ek kitfwa mem to bann profeser kapav dir twa ki to bizin gagn boukou kas ek ena enn bon pos travay​—vinn enn gran dimounn​—lerla to pou kapav dir to’nn reisi to lavi!

Parkont Labib donn bann zenn enn lavertisman: Si zot galoup deryer bann kitsoz materyel ek sikse, se koumadir zot pe “galoup deryer divan.” (Ecclésiaste 4:4) Kifer? Dabor parski bien tigit dimounn vremem reisi vinn seleb ek bien ris. Ek bann ki reisi fer li, finalman zot dekonserte. Enn zenn Angle ki ti fer bann gran letid Liniversite dir: “Li koumadir enn bwat vid. Kan to get ladan, pena nanye.” Li vre ki parfwa enn travay kapav fer enn kikenn vinn bien ris ek gagn enn gran nom. Me li pa kapav fer nou vinn ris lor plan spiritiel. (Matthieu 5:3) Anplis, 1 Jean 2:17 averti nou ki “lemond pe al fini.” Mem si to arive reisi dan sa lemond-la, sa sikse-la pa pou dire lontan.

Akoz sa, Ecclésiaste 12:1 donn bann zenn sa lankourazman-la: “Rapel to Gran Kreater, asterla, kan to ankor zenn.” (Today’s English Version) An realite, meyer fason pou servi to lavi, se dan servis Bondie Jéhovah. Me avan, to bizin ranpli sertin kondision. Kouma to kapav fer sa? Ek ki sa inplike pou donn to lavi dan servis Bondie?

Kalifie pou Vinn enn Temwin pou Jéhovah

Pou koumanse, li bon ki to devlop enn dezir pou servi Bondie. Sa dezir-la pa vini enn kout koumsa, mem si to ena bann paran Kretien. To bizin ena enn relasion personel avek Jéhovah. Enn zennfi ti dir: “Lapriyer ed twa pou ena enn relasion personel avek Jéhovah.”​—Psaume 62:8; Jacques 4:8.

Romains 12:2 montre bien enn lot pa ki to bizin fer. Li dir: “Verifie par zotmem ki volonte Bondie, li bon, li akseptab ek li parfe.” Eski finn deza arive ki to pa tro dakor avek bann lansegnman ki to’nn gagne? Si wi, alor swiv konsey ki Labib done, ek ‘verifie par tomem’ si sa bann kitsoz-la zot vre! Fer to prop resers. Lir Labib ek bann piblikasion ki baze lor Labib. Pou to aprann konn Bondie, pa zis to lespri ki to bizin servi, to bizin pran letan pou medit lor seki to lir, lerla sa pou desann dan to leker. Se koumsa ki to lamour pou Bondie pou grandi.​—Psaume 1:2, 3.

Apre sa, fer zefor pou partaz seki to pe aprann, kitfwa avek to bann kamarad lekol. Prosin letap se predikasion lakaz par lakaz. Parfwa dan predikasion, to kapav tom lor enn kamarad lekol, ek to koumans panike. Me Labib ankouraz nou pou pa “onte akoz bon nouvel.” (Romains 1:16) To pe amenn enn mesaz lavi ek lespwar! Kifer to bizin gagn onte?

Si to bann paran zot Kretien, sirman to akonpagn zot dan predikasion. Me apart res trankil devan laport ouswa zis plas bann peryodik ek bann trak, eski to kapav fer plis ki sa? Kan to devan enn laport, eski to kapav koze ek servi Labib san led personn, pou ansegn sa dimounn-la? Si to pa kapav, alor demann to bann paran ouswa enn Kretien ki ena lexperyans pou ed twa. Fixe lobzektif pou ranpli bann kondision pou vinn enn proklamater bon nouvel!

Avek letan tomem to pou anvi ofer Jéhovah to lavi, setadir promet Li ki asterla to pou servi Li. (Romains 12:1) Me sa langazman-la li pa enn kitsoz ki to fer zis an prive. Bondie demann nou tou pou fer “deklarasion piblik pou gagn lavi sov.” (Romains 10:10) Zour to batem, dabor to pou fer deklarasion to lafwa. Apre sa, to pou batize dan delo. (Matthieu 28:19, 20) Li kler ki batem li enn pa bien serye. Me fode pa to ezite pou fer li, zis parski to per pangar to tonbe dan enn sertenn fason. Si to kont lor Bondie, Li pou donn twa “sa pwisans ki plis ki seki normal la” pou ed twa tini ferm.​—2 Corinthiens 4:7; 1 Pierre 5:10.

Kan to pran batem, to vinn enn Temwin Jéhovah. (Isaïe 43:10) Sa bizin ena enn gran linflians lor fason ki to pou servi to lavi. Ofer Jéhovah to lavi vedir ‘renie tomem.’ (Matthieu 16:24) Kitfwa to pou bizin abandonn sertin lobzektif personel, ek sertin dezir pou ‘rod rwayom Bondie avan tou.’ (Matthieu 6:33) Kan enn kikenn inn vwe so lavi ar Jéhovah ek inn pran batem, boukou laport ouver devan li. Anou get sertin.

Posibilite pou Servi Bondie Aplintan

● Servis Pionie li enn posibilite. Enn pionie, li enn Kretien batize exanpler ki’nn organiz li pou pas omwin 70 er sak mwa pou pres bon nouvel. Si to pas plis letan dan predikasion sa pou ed twa devlop bann kapasite pou prese ek pou ansegne. Boukou pionie finn ed zot bann etidian Labib pou vinn bann Temwin batize, ek sa finn fer zot gagn enn gran lazwa. Eski ena enn travay dan sa lemond-la ki kapav fer twa gagn enn lazwa ek enn satisfaksion koumsa?

Pou kouver zot bann depans personel, laplipar pionie ena enn travay part-time. Boukou finn prepar zot pou sa responsabilite-la kan zot finn aprann enn metie dan lekol ouswa avek zot bann paran. Si twa ek to bann paran panse ki li pou pli bon ki to gagn enn formasion siplemanter apre lekol segonder, asir twa ki to pe fer li avek bann bon lintansion: Pa pou gagn boukou kas, me plito pou ed twa dan to minister ek kitfwa mem pou fer servis aplintan.

Me seki inportan dan lavi enn pionie se pa so travay, me se so servis​—ed lezot pou gagn lavi! Kifer to pa fixe lobzektif pou fer servis pionie? Souvan servis pionie amenn lezot privilez. Par exanp, sertin pionie finn al dan bann landrwa kot bizin plis proklamater. Ena lezot ki aprann enn lot lang pou soutenir enn kongregasion lang etranze dan zot prop pei, ouswa mem dan enn lot pei. Servis pionie li vremem enn lavi ranpli ar benediksion!

● Lekol Biblik pou Bann Koup Kretien se enn lot posibilite. Gras-a sa lekol-la, bann koup marye gagn enn formasion spesial, koumsa Jéhovah ek so lorganizasion kapav servi zot ankor pli bien. Boukou diplome al servi dan bann teritwar kot bizin led, dan zot pei. Lezot al servi dan enn lot pei, si zot sitiasion permet zot. Sa bann diplome-la servi kouma pionie spesial tanporer dan bann landrwa izole koumsa zot kapav amenn bon nouvel dan sa bann teritwar-la ek devlop travay predikasion.

● Lekol Biblik pou Bann Frer Selibater ti etabli pou form bann ansien ek bann asistan ministeryel bien kalifie. Sa wit semenn kour bien pouse la kouver diferan size, kouma par exanp responsabilite bann ansien ek bann asistan ministeryel, lorganizasion ek kapasite pou koze an piblik. Sertin diplome al servi dan zot prop pei, alor ki lezot al servi dan lezot pei.

● Servis Béthel se enn lot posibilite. Enn Betelit li enn volonter ki servi dan enn Biro Nasional bann Temwin Jéhovah. Sertin manb fami Béthel travay direkteman lor prodiksion bann piblikasion Biblik. Lezot soutenir sa travay-la kan zot antretenir bann batiman ek bann lekipman, ouswa zot pran swin fami Béthel lor plan fizik. Tou sa bann travay-la zot bann privilez sakre dan servis Jéhovah. Anplis, bann Betelit kontan kan zot kone ki tou seki zot pe fer, pe ed zot bann frer dan lemond antie.

Parfwa Béthel apel sertin frer ki kalifie dan sertin domenn. Me selman, laplipar zot forme kan zot rant dan Béthel. Bann Betelit pa travay pou gagn kas. Zot kontant zot avek seki zot gagne, setadir manze, lozman, ek enn ti-ranboursman pou zot bann depans personel. Get seki enn zenn Betelit dir lor so servis: “Sa servis-la extra! Li vre ki li pa touzour fasil pou gard mem routinn, me mo’nn gagn boukou benediksion depi ki mo la.”

● Servis Internasional permet enn kikenn pou partisip dan konstriksion bann Béthel ek Lasal Bann Temwin Jéhovah. Bann serviter internasional, kouma nou apel zot, al dan bann pei etranze pou donn koudme dan sa travay konstriksion la. Se enn servis sakre, parey kouma servis ki bann ki ti konstrir tanp Salomon, ti fer. (1 Rois 8:13-18) Bann serviter internasional profit bann mem dispozision ki bann Betelit. Pou sa bann frer ek ser-la, se enn gran loner pou servi dan sa kalite form servis la pou donn Jéhovah laglwar!

Servi Jéhovah Avek Tou To Nam

Servi Jéhovah, samem meyer fason pou servi to lavi. Kifer to pa fixe lobzektif pou fer servis aplintan? Koz sa ar to paran, ar bann ansien dan to kongregasion, ek ar to sirveyan sirkonskripsion. Si to interese ar servis Béthel, Lekol Biblik pou Bann Frer Selibater, ouswa Lekol Biblik pou Bann Koup Kretien, alor asiste bann renion ki fer dan bann lasanble sirkonskripsion ek distrik.

Li vre ki tou dimounn pa kapav fer servis aplintan. Sertin kitfwa ena bann problem lasante, problem finans, ouswa bann responsabilite familial, ek akoz sa zot pa kapav fer boukou. Malgre sa, tou bann Kretien ki’nn vwe zot lavi ar Bondie bizin pran kont sa komannman Biblik la: “To bizin kontan Jéhovah to Bondie avek tou to leker ek avek tou to nam ek avek tou to lespri.” (Matthieu 22:37) Jéhovah demann twa pou fer tou seki to kapav dapre to sitiasion. Alor, dan ninport ki sitiasion to ete, fer servis pou Jéhovah vinn enn priorite dan to lavi. Fixe bann lobzektif rezonab dan servis Bondie. “Rapel to Gran Kreater pandan to ladolesans”​—si to fer sa, to pou gagn bann benediksion pou touletan!

Amwin ki’nn mansionn enn lot tradiksion, tou bann text Labib ki site dan sa piblikasion-la finn tradir apartir New World Translation of the Holy Scriptures.