Ki Bondié pé faire?

“Ah Jéhovah, kifer to reste loin? Kifer to reste cachiette dan lepok malheur?”a—PSAUME 10:1.

ZIS enn ti coup d’oeil lor titre bann journal, confirmé ki nou pé vive dan “lepok malheur.” Ek kan enn malheur arrive nou prop famille—kan personnellement nou victime la violence, enn accident grave, ou-soit nou perdi enn kikenn ki nou bien content—kitfois nou demann nou-mem: eski Bondié trouvé seki pé passé? Eski Li interessé ar seki pé passé? En realité, eski vrai-mem Li la?

Mais selman, eski ou finn reflechi ki seki nou pé attann ar Bondié kapav basé lor bann fausse supposition? Anou prend enn l’exemple: mazinn enn zenfant ki triste parski so papa finn al travail. Sa zenfant-la mank so papa ek envie ki li rente lakaz. Li senti li abandonné. Toute longue la journée, li contigne demandé: “Kot mo papa été?”

Li facile pou nou comprend ki sa zenfant-la ena enn mauvais raisonnement. Li senti-li abandonné, alors ki dan sa ler-la, so papa pé travail pou permette la famille entier vive. Eski li kapav arrivé ki nou aussi nou ena bann mem pensée, setadir enn mauvais raisonnement kan nou criyé: “Kot Bondié été”?

Par exemple, certain envie ki Bondié agir desuite ek detruire bann ki pé faire seki mauvais. Lezot considere Bondié zis coumadir enn bonhomme Noël ki reste dan le ciel ek ki offert bann cadeau—enn travail, enn conjoint, ou-soit mem enn billet loterie ki pou gagne premier lot.

Ki sa deux l’idée-la rod faire nou comprend? Si Bondié pa amenn la justice desuite ou-soit si Li pa donne nou seki nou demandé, alors sa vedir ki Li insensible ar nou bann souffrance ek Li pa koné ki nou bizin. Pourtant, tousala bien loin ar la verité! En realité, asterla-mem, Jéhovah pé travail pou donne l’humanité en entier seki li bizin, mais pa couma beaucoup pé attann.

Mais alors, ki Bondié pé faire? Pou reponn sa question-la, li important ki nou réguette seki ti arrivé dan commencement l’histoire bann dimoune, kan relation ki bann dimoune ti ena avek Bondié ti bien deterioré—mais pa ziska enn point kot li impossible pou reparé.

Bann degat ki peché inn amené

Mazinn enn lakaz ki finn reste dan enn mauvais l’etat pendant plusieurs l’année. So toit finn versé, so bann la porte pé apendan, ek en dehors bann dimoune inn casse-casse partout. Ti ena enn lepok sa lakaz-la ti dan enn bon l’etat—mais li nepli coumsa. Kan guette quantité degat ki finn ena, nou rann nou compte ki so reparation pa pou enn travail facile; pa pou kapav repare li dan enn sel jour.

Asterla, reflechi lor ki quantité degat l’humanité finn koné ek ki finn arrivé ena 6,000 an environ, kan Satan, enn l’esprit invisible, ti pousse Adam ek Ève pou rebellé kont Bondié. Avant ki sa arrivé, premier couple humain ti pé profite enn la santé parfait ek ti ena l’esperance pou vive pou touletan ensam avek zot bann descendance ki ti pou multiplié. (Genèse 1:28) Mais selman, kan Adam ek Ève inn faire peché, coumadir zot finn cause beaucoup dommage lor l’humanité ki ti pou existé apré.

Pa sous-estime bann degat ki sa rebellion-la finn ena. La Bible dire: “Par enn sel zom [Adam], peché finn rente dan le monde ek peché finn amenn la mort.” (Romains 5:12) Peché pa finn amenn zis la mort, mais li finn gate nou relation avek nou Createur ek li finn affecté nou lor plan physik, mental, ek affectif. Resultat: nou ressemblé sa lakaz ki dan enn mauvais l’etat-la. Job ki ti enn zom juste, ti resume dan enn fason realiste nou situation, kan li ti dire ki la vie enn dimoune “li courte ek rempli avek probleme.”—Job 14:1, Bible en français courant.

Mais eski Bondié ti abandonne l’humanité apré ki Adam ek Ève ti faire peché? Pa ditou! Au contraire, depuis sa moment-la ziska asterla, nou Papa ki dan le ciel finn travail dan l’interet l’humanité. Pou apprecié pli bien seki Li pé faire pou nou, anou guette trois l’etape important dan reparation enn lakaz ek anou guetté couma chaque l’etape ena enn rapport avek seki Bondié inn faire pou retablir bann condition ki ti ena au commencement.

1 Apré ki enn proprietaire inn examine bann degat so lakaz, li bizin decidé si li pou repare lakaz-la ou-soit si li pou crase li.

Desuite apré rebellion ki ti ena dan Éden, Jéhovah ti annonce so projet pou retablir bann condition ki ti ena au commencement. Li ti dire sa l’esprit invisible ki ti derriere sa rebellion-la: “Mo pou mette la haine entre toi ek la femme ek entre to descendance ek so descendance. Li pou crase to la tête ek to pou blesse so talon.”—Genèse 3:15.

Par sa bann parole-la, Jéhovah ti promette pou detruire sa kikenn ki responsable rebellion ki ti ena dan Éden-la. (Romains 16:20; Révélation 12:9) En plus, Jéhovah ti predire ki pou ena enn “descendance” ki ti pou delivré l’humanité ar peché.b (1 Jean 3:8) Sa bann promesse-la ti annonce enn verité bien important: Bondié pa ti pou detruire so creation, mais Li ti pou repare li. Mais selman, sa reparation-la ti pou prend le temps.

2 Enn architecte dessine enn plan lor couma lakaz-la pou été apré bann reparation.

Jéhovah ti donne bann Israélite enn code la loi ek ti donne modele enn temple kot bannla ti bizin adore Li. La Bible dire: “Sa bann kitsoz-la zot coumadir enn l’ombrage pou bann kitsoz ki pou vini.” (Colossiens 2:17) Pareil couma enn plan, zot ti represente enn kitsoz ki pli grand.

Par exemple, bann Israélite ti bizin offert bann sacrifice zanimo pou gagne pardon zot bann peché. (Lévitique 17:11) Seki zot ti pé faire ti annonce enn pli grand sacrifice ki ti pou offert plusieurs siecle plitar—enn sacrifice ki ti pou donne l’humanité enn vrai delivrance.c Fason ki ti faire tabernacle ek temple kot bann Israélite ti adore Bondié, ti represente bann different l’etape ki futur Messie ti pou realisé, prend a partir so la mort en sacrifice ziska ki li monte dan le ciel.—Guette l’encadré lor page 7.

3 Choisir enn constructeur ki pou suive plan-la ek faire bann reparation ki bizin.

Jésus, Messie ki Bondié ti promette, ti pou suive modele ki ti’nn tracé par sacrifice ki bann Israélite ti offert ek ti pou donne so prop la vie pou delivré l’humanité. A cause sa, Jean Baptiste ti appel Jésus “l’Agneau Bondié ki tire peché le monde.” (Jean 1:29) Jésus volontairement ti accepté sa mission-la. Li ti dire: “Mo finn sorti dan le ciel mo finn vinn lor la terre, pa pou faire mo volonté, mais volonté celui ki finn envoye moi.”—Jean 6:38.

Volonté Bondié pou Jésus c’est pa zis ki li “donne so nâme couma enn ranson en echange pou beaucoup,” mais aussi ki li faire enn l’alliance pou enn Royaume avek so bann disciple. (Matthieu 20:28; Luc 22:29, 30) Sa Royaume-la c’est moyen ki Bondié pou servi pou realise so projet pou l’humanité. La Bible appel message ki concerne Royaume Bondié enn “bon nouvelle” parski li expliké ki Bondié inn etabli enn gouvernement dan le ciel ek sa gouvernement-la pou controle tou seki pé passé lor la terre!—Matthieu 24:14; Daniel 2:44.d

Bann travail reparation pé contigné

Avant ki li ti monte dan le ciel, Jésus ti donne so bann disciple sa commandement-la: “Faire bann disciple parmi bann dimoune dan tou bann nation, baptise zot au nom du Père, du Fils ek l’esprit saint . . . Ek, guetté! Mo avek zot toulé-jour ziska la fin sa systeme-la.”—Matthieu 28:19, 20.

Alors bann travail reparation pa ti pou arreté avek la mort Jésus. Sa ti pou contigné ziska “la fin sa systeme-la”—lepok kot Royaume Bondié ti pou commence controle tou seki pé passé lor la terre. Nou pé vive sa periode le temps-la. Nou konn sa parski signe ki Jésus ti donné concernant “la fin sa systeme-la” azordi pé realisé.e—Matthieu 24:3-14; Luc 21:7-11; 2 Timothée 3:1-5.

Azordi, dan 236 pays ek territoire, bann Témoins de Jéhovah pé obeir commandement Jésus pou preche sa bon nouvelle lor Royaume Bondié-la. En realité, sa magazine ki ou pé lire-la inn faire pou aide ou aprann plus lor sa Royaume-la ek lor seki li pou faire. Lor page 2 dan chaque numero La Tour de Garde, ou pou trouve sa commentaire-la: “Sa magazine-la . . . reconforte bann dimoune avek enn bon nouvelle, ki bientot Royaume Bondié, ki enn vrai gouvernement dan le ciel, pou tire tou mechanceté ek pou transforme la terre en enn paradis. Li encourage bann dimoune pou ena la foi dan Jésus Christ, ki’nn mort pou ki nou kapav gagne la vie pou touletan ek ki pé regné zordi en tant ki le Roi dan Royaume Bondié.”

C’est vrai ki azordi ou kapav encore pé tann bann attak terroriste ou-soit bann catastrophe naturel, ou-soit ou kapav passe par bann malheur ki affecté ou personnellement. Mais enn l’etude la Bible pou convaink ou ki Bondié pa finn abandonne l’humanité. Au contraire, “Li pa loin ar sakenn parmi nou.” (Actes 17:27) Ek so promesse pou retablir seki nou bann premier parent inn perdi, pou reussi.—Isaïe 55:11.

[Notes]

[L’encadré page 7]

(Guette publication)

“Enn copie la realité”—Seki tabernacle ti representé

L’AUTEL

Volonté Bondié pou accepté sacrifice Jésus.—HÉBREUX 13:10-12.

GRAND PRETRE

Jésus.—HÉBREUX 9:11.

1 Jour Propitiation, grand pretre ti offert enn sacrifice pou peché bann Israélite.—LÉVITIQUE 16:15, 29-31.

1 Le 14 Nisan 33 nou lepok, Jésus ti donne so la vie en sacrifice pou bann dimoune.—HÉBREUX 10:5-10; 1 JEAN 2:1, 2.

LE TRÈS-SAINT

Le ciel.—HÉBREUX 9:24.

RIDEAU

Jésus so lekor physik, enn barriere ki ti separe so la vie lor la terre ek so la vie dan le ciel.—1 CORINTHIENS 15:44, 50; HÉBREUX 6:19, 20; 10:19, 20.

2 Grand pretre ti al lot coté rideau ki ti separe le Saint ek le Très-Saint.

2 Apré so resurrection, Jésus ti ‘al lot coté rideau’ kan li ti monte dan le ciel “pou parette . . . pou nou devant Bondié.”—HÉBREUX 9:24-28.

LE SAINT

Condition Jésus en tant ki garson ki Bondié inn choisir avant ki li al dan le ciel.—MATTHIEU 3:16, 17; ROMAINS 8:14-17; HÉBREUX 5:4-6.

3 Kan grand pretre ti dan le Très-Saint, li ti fann inpé di-sang sacrifice devant l’arche de l’alliance.—LÉVITIQUE 16:12-14.

3 Kan li ti presente valeur so di-sang ki finn versé, Jésus inn donne bann dimoune enn vrai moyen pou couvert ek efface bann peché enn fois pou tou.—HÉBREUX 9:12, 24; 1 PIERRE 3:21, 22.