‘Allé ek faire bann disciple, baptise zot’
“Allé ek faire bann disciple parmi bann dimoune dan tou bann nation, baptise zot . . . , enseigne zot pou suive tou mo bann commandement.” —Matthieu 28:19, 20.
1. Ki decision nation Israël ti prend devant montagne Sinaï?
ENA 3,500 an, enn nation en entier ti faire enn serment ar Bondié. Bann membre nation Israël ti rassemblé devant montagne Sinaï, ek zot ti dire devant tou dimoune: “Nou accepté pou faire tou seki Jéhovah inn dire.” Depuis sa jour-la, bann Israélite ti vinn enn peuple voué ar Jéhovah, so “di-bien special.” (Exode 19:5, 8; 24:3) Zot ti attann pou gagne so protection ek pou vive generation apré generation, dan enn pays “kot di-lait ek di-miel coulé.”—Lévitique 20:24.
2. Ki relation bann dimoune kapav ena avek Bondié zordi?
2 Mais, Asaph, enn ecrivain Psaume ti dire ki bann Israélite “pa finn garde l’alliance Bondié, ek zot finn refuse pou suive so la-loi.” (Psaume 78:10) Zot pa finn garde serment ki zot bann grand dimoune finn faire ar Jéhovah. Finalement, nation Israël ti perdi sa relation special ki zot ti ena avek Jéhovah-la. (Ecclésiaste 5:4; Matthieu 23:37, 38) Alors, Bondié finn “prend compte bann nation pou choisir enn peuple pou so nom.” (Actes 15:14) Ek zordi, dan lepok dernier jour, Li pé rassemblé ‘enn grand la-foule, ki personne pa kapav compté, ki sorti dan tou nation, ek tribu, ek peuple ek langue,’ ek ki dire avek beaucoup la joie: “Nou delivrance, nou doit sa nou Bondié ki pé assize lor So trone, ek nou doit sa aussi l’Agneau [Bondié].”—Révélation 7:9, 10.
3. Ki enn kikenn bizin faire pou li kapav ena enn relation personnel avek Bondié?
3 Pou ki enn kikenn kapav ena enn relation special avek Bondié, li bizin voué so la-vie ar Jéhovah ek lerla, montré sa tou dimoune kan li prend bapteme. Kan li faire sa, li pé obeir sa l’ordre ki Jésus ti donne so bann disciple-la: “Allé ek faire bann disciple parmi bann dimoune dan tou bann nation, baptise zot au nom du Père, du Fils ek l’esprit saint, enseigne zot pou suive tou mo bann commandement.” (Matthieu 28:19, 20) Bann Israélite ti ecoute Moïse lire “livre l’alliance.” (Exode 24:3, 7, 8) Grace a sa, zot ti comprend ki responsabilité zot ti ena envers Jéhovah. Li pareil aussi zordi, avant enn kikenn prend bapteme, li bien important ki li gagne enn connaissance exact, basé lor la Bible, lor volonté Bondié.
4. Ki enn kikenn bizin faire pou li rempli condition pou prend bapteme? (Guette l’encadré la-haut.)
4 Li clair ki Jésus ti envie ki so bann disciple ena enn la-foi ki basé lor enn fondation solid, avant zot prend bapteme. Li pa ti zis dire so bann disciple allé ek faire lezot disciple, mais zot ti bizin aussi enseigne bannla ‘pou suive tou so bann commandement.’ (Matthieu 7:24, 25; Éphésiens 3:17-19) Sa vedir ki normalement bann ki rempli condition pou prend bapteme, finn etudié la Bible pendant plusieurs mois, parfois mem pendant enn ou deux an. Zot pa finn prend enn decision rapide, ek zot decision basé lor enn connaissance exact. Jour bann candidat prend bapteme, zot reponn oui ar deux question ki pose zot. Nou rappel ki Jésus ti dire ki nou bizin sur ki ‘nou Oui vedir Oui, nou Non vedir Non.’ Alors, li pou bon ki nou tou, nou ré-guette en detail ki sa deux question-la vedir.—Matthieu 5:37.
Repenti ek voué ou la-vie ar Jéhovah
5. Lor ki deux kitsoz, premier question bapteme mette l’accent?
5 Premier question ki pose bann candidat bapteme c’est si zot inn abandonne la-vie ki zot ti pé amené avant, ek si zot inn voué zot la-vie pou faire volonté Jéhovah. Sa question-la mette l’accent lor deux kitsoz important ki enn kikenn bizin faire avant li baptisé: premierement li bizin repenti, ek deuxiemement, li bizin voué so la-vie ar Jéhovah.
6, 7. (a) Kifer li necessaire ki tou bann ki pou prend bapteme, zot repenti? (b) Ki changement enn kikenn bizin faire kan li’nn fini repenti?
6 Kifer enn dimoune bizin repenti avant li prend bapteme? L’apotre Paul ti donne sa l’explication-la: “Nou tou, nou ti vive dapré bann desir nou lekor.” (Éphésiens 2:3) Avant nou gagne enn connaissance exact lor volonté Bondié, nou ti pé vive en accord avek sa lé-monde-la, dapré so bann principe ek seki li considere couma important. Nou la-vie ti controlé par Satan, bondié sa lé-monde-la. (2 Corinthiens 4:4) Kan nou finn aprann volonté Bondié, nou finn decidé pou “nepli vive pou faire plaisir bann dimoune, mais pou faire volonté Bondié.”—1 Pierre 4:2.
7 Sa nouveau la-vie-la faire nou gagne beaucoup bienfait. Premierement, nou kapav ena bann bon relation avek Jéhovah. David ti compare sa relation-la avek enn l’invitation pou rente dan “la-tente” Jéhovah, dan so “montagne sacré”—c’est enn grand privilege. (Psaume 15:1) Li normal ki Jéhovah pa ti pou invite n’importe kisannla, mais zis bann ki ‘amenn enn la-vie sans defaut ek ki pratik la justice ek ki dire la verité dan zot leker.’ (Psaume 15:2) Nou tou, nou la-vie pa ti pareil avant nou konn la verité. Kitfois certain finn bizin faire bann changement dan zot conduite ek dan zot personnalité pou zot kapav mette en pratik seki sa psaume-la dire. (1 Corinthiens 6:9-11; Colossiens 3:5-10) Nou finn kapav faire sa bann changement-la, parski nou finn repenti. Sa vedir ki nou ti bien regrette fason ki nou ti pé vive avant, ek nou bien determiné pou faire Jéhovah plaisir. Sa finn faire nou change nou la-vie net—nou finn abandonne enn la-vie egoïste ki le monde encouragé, ek nou vive pou faire Bondié plaisir.—Actes 3:19.
8. Couma eski nou voué nou la-vie pou servi Jéhovah, ek ki rapport sa ena avek bapteme?
8 Deuxieme partie sa premier question-la demann bann ki pou prend bapteme si zot finn voué zot la-vie pou faire volonté Jéhovah. Avant nou prend bapteme, li bien important ki nou faire sa. Nou voué nou la-vie dan la priere, ek nou dire Jéhovah ki nou envie donne Li nou la-vie pou servi Li, par Jésus Christ. (Romains 14:7, 8; 2 Corinthiens 5:15) Lerla, Jéhovah vinn nou Maitre ek nou Proprietaire, ek pareil couma Jésus, nou faire volonté Jéhovah avek plaisir. (Psaume 40:8; Éphésiens 6:6) Nou faire sa promesse-la enn sel fois, ek nou faire li en privé, zis entre nou ek Jéhovah. Pou faire lezot koné ki nou finn faire sa promesse-la, jour nou bapteme nou faire enn declaration en publik.—Romains 10:10.
9, 10. (a) Ki nou bizin faire pou faire volonté Bondié? (b) Couma mem bann nazi ti reconette sa serment ki nou faire-la?
9 Pou nou suive l’exemple Jésus pou faire volonté Bondié, ki nou bizin faire? Jésus ti dire so bann disciple: “Si kikenn envie suive moi, li bizin renié li-mem ek prend so poteau ek contigne suive moi.” (Matthieu 16:24) Ici, Jésus ti montré trois kitsoz ki nou bizin faire. Premierement, nou bizin “renié” nou-mem. Setadir nou rejette nou bann desir egoïste ek nou bann tendance imparfait, ek nou accepté pou suive conseil ek direction Bondié. Deuxiemement, nou bizin ‘prend nou poteau.’ Dan lepok Jésus, enn poteau ti enn symbol la honte ek souffrance. En tant ki chrétien, nou accepté ki parfois nou bizin souffert a cause la bonne nouvelle. (2 Timothée 1:8) Mem si le monde kapav faire nou bann reproche, nou imite Jésus Christ ek nou ‘pa prend compte la honte,’ parski nou koné ki nou pé faire Bondié plaisir. (Hébreux 12:2) Finalement, nou “contigne” suive Jésus.—Psaume 73:26; 119:44; 145:2.
10 Li interessant ki mem certain dimoune ki kont la verité, comprend promesse ki bann Témoins inn faire ar Bondié pou servi zis Li tousel. Par exemple, dan lepok nazi, dan camp concentration Buchenwald, en Allemagne, bann Témoins ki ti refuse pou abandonne zot la-foi, ti bizin signe enn papier kot ti ecrire: “Mo toujours enn Etudiant la Bible devoué, ek jamais mo pa pou casse sa serment ki mo’nn faire ar Jéhovah-la.” Oui, tou bann serviteur fidel Jéhovah ki finn voué zot la-vie pou servi Li, ena sa sentiment-la!—Actes 5:32.
Identifié-zot couma bann Témoins de Jéhovah
11. Ki privilege enn chrétien ki prend bapteme gagné?
11 Deuxieme question ki pose enn candidat bapteme c’est si li comprend ki so bapteme identifié-li couma enn Témoin de Jéhovah. Kan enn dimoune prend bapteme, li vinn enn ministre ki Jéhovah inn choisir ek ki porte So nom. C’est enn grand privilege, mais aussi enn responsabilité bien serieux. Sa nouveau baptisé-la ena aussi possibilité pou gagne la vie eternel, a condition ki li reste fidel envers Jéhovah.—Matthieu 24:13.
12. Ki responsabilité nou ena kan nou porte nom Jéhovah?
12 Li vrai-mem enn grand privilege ki nou ena pou porte nom nou Grand Bondié tout-puissant, Jéhovah! Prophete Mika ti dire: “Tou bann peuple zot, zot pou marche sakenn dapré nom zot bondié, mais nou, nou pou marche dapré nom Jéhovah nou Bondié pou touletan, oui pou toujours.” (Mika 4:5) Mais seulement, ena enn responsabilité ensam avek sa privilege-la. Nou bizin faire tou seki nou kapav pou ena enn conduite ki donne l’honneur sa nom-la. Pareil couma Paul ti dire bann chrétien dan Rome, si kikenn pa mette en pratik seki li preché, bann dimoune pou “koz en mal” lor nom Bondié, et sa pou jette deshonneur lor sa nom-la.—Romains 2:21-24.
13. Kifer bann serviteur Jéhovah ki finn voué zot la-vie pou servi Li, ena responsabilité pou rann temoignage lor zot Bondié?
13 Kan enn dimoune vinn enn Témoin de Jéhovah, li accepté responsabilité pou rann temoignage lor Bondié. Jéhovah ti demann nation Israël, ki ti voué ar Li, pou vinn so bann Témoins pou zot rann temoignage ki Li enn Bondié eternel. (Isaïe 43:10-12, 21) Mais zot pa ti faire sa, ek finalement, zot ti perdi faveur Jéhovah, ek Li ti rejette zot. Zordi, bann vrai chrétien fiere pou rann temoignage lor Jéhovah. Zot considere sa couma enn grand privilege. Nou faire sa parski nou content Li ek nou envie ki so nom sanctifié. Nou pa kapav reste trankil kan nou konn la verité lor Bondié ek lor seki Li pou faire, pa vrai? Nou ena mem sentiment ki l’apotre Paul kan li ti dire: “C’est enn obligation ki mo ena. Oui, malheur lor moi si mo pa annonce la bonne nouvelle!”—1 Corinthiens 9:16.
14, 15. (a) Couma l’organisation Jéhovah aide nou pou progressé lor plan spirituel? (b) Ki disposition Jéhovah inn prend pou aide nou lor plan spirituel?
14 Sa deuxieme question-la rappel aussi bann candidat bapteme ki zot ena responsabilité pou cooperé avek l’organisation Jéhovah. Jéhovah dirige so l’organisation par so l’esprit saint. Dan nou service pou Jéhovah nou pa tousel, ek nou bizin l’aide, soutien ek l’encouragement “la famille international nou bann frere.” (1 Pierre 2:17; 1 Corinthiens 12:12, 13) L’organisation Bondié joué enn role important dan nou progré spirituel. Li donne nou enn quantité publication ki basé lor la Bible, ek ki augmente nou connaissance exact. Sa bann publication-la aide nou aussi pou agir avek sagesse kan nou ena problem, ek pou developpe bann bon relation avek Bondié. Pareil couma enn mama ki prend soin so zenfant ek veillé ki li bien nourri, “l’esclave fidel et avisé” aussi donne nou enn grand quantité mangé lor plan spirituel, dan l’heure ki bizin, pou nou progressé ek vinn pli proche avek Jéhovah.—Matthieu 24:45-47; 1 Thessaloniciens 2:7, 8.
15 Chaque semaine dan reunion, bann serviteur Jéhovah gagne formation ek l’encouragement necessaire pou zot reste bann Témoins de Jéhovah fidel. (Hébreux 10:24, 25) Lekol ministere theocratik montré nou couma pou koz en publik. Reunion service forme nou pou presente nou message dan enn fason efficace. Par bann reunion ek aussi par nou l’etude personnel, nou trouvé couma Jéhovah dirige so l’organisation par so l’esprit saint. Grace a sa bann disposition-la, Bondié mette nou en garde kont bann danger, Li forme nou pou vinn bann proclamateur efficace, ek Li aide nou pou reste lor nou garde lor plan spirituel.—Psaume 19:7, 8, 11; 1 Thessaloniciens 5:6, 11; 1 Timothée 4:13.
Seki pousse nou pou prend bapteme
16. Ki pousse nou pou voué nou la-vie pou servi Jéhovah?
16 Sa deux question ki pose bann candidat bapteme-la rappel zot signification bapteme, ek ki responsabilité zot pou ena apré. Alors, ki bizin pousse nou pou prend bapteme? Nou pa prend bapteme parski enn kikenn force nou pou faire sa, mais parski c’est Jéhovah ki “attire” nou. (Jean 6:44) La Bible dire: “Bondié Li l’amour,” alors Jéhovah dirige l’univers par amour, pa par la force. (1 Jean 4:8) Sa vedir ki Li envie nou servi Li parski nou content Li, pa parski nou senti-nou forcé pou faire sa. Nou attiré ar Jéhovah parski Li ena bann bon qualité, ek par fason ki Li traite nou. Jéhovah inn envoye so Garson lor la terre pou nou, ek Li’nn donne nou pli bon l’avenir possible. (Jean 3:16) En retour, nou senti-nou poussé pou voué nou la-vie pou servi Li.—Proverbes 3:9; 2 Corinthiens 5:14, 15.
17. Ar ki kitsoz nou pa finn voué nou la-vie?
17 Nou pa voué nou la-vie ar enn principe ou-soit ar enn travail, mais ar Jéhovah Li-mem. Travail ki Bondié donne so peuple pou changé dan l’avenir, mais promesse ki zot inn faire pou servi Li, pou reste toujours pareil. Par exemple, seki Li ti demann Abraham pou faire, pa ti pareil ditou ar seki Li ti demann Jérémie pou faire. (Genèse 13:17, 18; Jérémie 1:6, 7) Pourtant, toulé-deux ti faire travail ki Bondié ti donne zot, parski zot ti content Li ek zot ti envie faire so volonté avek fidelité. Pendant sa lepok la-fin-la, tou bann disciple Jésus ki’nn prend bapteme, faire tou zot possible pou obeir so l’ordre. Zot preche la bonne nouvelle lor Royaume Bondié ek zot faire bann disciple. (Matthieu 24:14; 28:19, 20) Kan nou faire sa travail-la avek tou nou leker, sa montré ki nou content nou Papa Jéhovah ek aussi ki nou finn vrai-mem voué nou la-vie pou servi Li.—1 Jean 5:3.
18, 19. (a) Kan nou prend bapteme, ki declaration nou faire en publik? (b) Ki nou pou examiné dan prochain lartik?
18 Oui, li bien clair ki bapteme faire nou gagne beaucoup benediction, mais nou bizin prend sa bien serieux. (Luc 14:26-33) Kan nou prend bapteme, nou montré ki nou bien decidé pou faire sa passe avant tou lezot responsabilité ki nou ena. (Luc 9:62) Lerla, en realité, nou pé faire sa declaration publik-la: “Sa Bondié-la, Li vrai-mem nou Bondié pou touletan. Li-mem ki pou guide nou ziska nou la-mort.”—Psaume 48:14.
19 Prochain lartik pou examine bann lezot question ki nou kapav pose-nou en rapport avek bapteme. Par exemple, eski kapav ena bann bon raison pou enn dimoune hesité prend bapteme? Eski ena enn l’age pou prend bapteme? Couma tou dimoune kapav cooperé pou ki sa l’occasion-la reste digne?
Eski ou kapav expliké?
• Kifer tou bann chrétien bizin repenti avant zot prend bapteme?
• Kan nou voué nou la-vie pou servi Jéhovah, ki sa impliké?
• Nou ena privilege pou porte nom Jéhovah, mais ki responsabilité sa donne nou aussi?
• Ki bizin pousse nou pou prend bapteme?
[L’encadré, page 20]
Deux question ki pose bann candidat bapteme
Lor base sacrifice Jésus Christ, eski ou finn repenti ar ou bann peché, ek eski ou finn voué ou la-vie ar Jéhovah pou faire so volonté?
Eski ou comprend ki kan ou voué ou la-vie ek ou prend bapteme, ou pé identifié-ou couma enn Témoin de Jéhovah ek ou pé associé-ou ar l’organisation Bondié ki dirigé par so l’esprit?
[Zimage, page 21]
Nou voué nou la-vie kan nou faire enn promesse ar Jéhovah dan la-priere, pou servi Li
[Zimage, page 23]
Nou travail predication montré ki nou finn voué nou la-vie pou servi Jéhovah