Ena enn Grand l’appreciation pou Bann Qualité Jéhovah

1. (a) Ki bann qualité Jéhovah enn Chretien kapav examiné? (b) Ki bann bienfait nou pou gagné kan nou examine bann qualité Bondié?

KAN ou mazinn personnalité Jéhovah, ki qualité ki vinn dan ou l’esprit? Beaucoup parmi nou pense lamour, la justice, la sagesse, ek puissance. Pourtant, nou koné ki Jéhovah ena beaucoup lezot qualité ki bien attirant. En realité, nou kapav faire enn la liste plis ki 40 diferan qualité ki Jéhovah ena ek ki finn examiné dan nou bann publication. Maziné ki quantité kitsoz ou kapav decouvert lor personnalité Jéhovah dan ou letid personnel ou-soit familial! Ki bann bienfait nou kapav gagné ar enn letid coumsa? Sa kapav faire nou ena enn pli grand l’appreciation pou personnalité nou Papa ki dan le ciel. En retour, plis nou apprecié Jéhovah, plis nou envie vinn proche avek Li ek imite Li.​—Jos. 23:8; Ps. 73:28.

2. (a) Donne enn l’exemple couma nou kapav ena enn pli grand l’appreciation pou bann qualité Jéhovah. (b) Ki nou pou examiné dan sa lartik-la ek dan deux lezot lartik?

² Mais, ki sa vedir “apprecié” enn kitsoz? Fason ki nou pou servi sa mot-la dan sa lartik-la vedir reconette vrai valeur enn kitsoz. Tigit par tigit, nou l’appreciation pou enn kitsoz kapav vinn pli grand. Anou prend enn l’exemple: Nou apprecié enn nouveau mangé pli bien kan d’abord nou senti so l’odeur, apré, kan nou mange li, ek finalement kan nou prepare li nou-mem. Li pareil aussi pou bann qualité Jéhovah, nou apprecié pli bien enn qualité kan nou konn sa qualité-la, kan nou reflechi lor la ek kan nou manifesté li dan nou lavi. (Éph. 5:1) L’objectif sa lartik-la ek deux lartik ki nou pou examiné apré, c’est pou faire nou l’appreciation pou bann qualité Bondié vinn pli grand. Kitfois, nou pense sa bann qualité-la moins souvent ki so bann qualité principal. Chaque fois ki nou pou examine enn qualité, nou pou guetté: Ki sa qualité-la vedir? Couma Jéhovah manifesté sa qualité-la? Ek couma nou kapav imite Jéhovah ek manifesté sa qualité-la?

JÉHOVAH, ENN BONDIÉ ABORDABLE

3, 4. (a) Dapré ou, enn dimoune abordable, couma li été? (b) Couma Jéhovah donne nou l’assurance ki Li abordable?

³ D’abord, nou pou examiné ki Jéhovah Li abordable. Couma ou pou decrire enn dimoune ki abordable? Kitfois ou pou dire: ‘C’est enn kikenn ki bon, ki bien disponible ek fasil pou koz ar li.’ Souvent, ou kapav koné si enn dimoune abordable ou-soit non kan ou ecoute seki li dire ek kan ou observe so bann geste, l’expression so figure ek bann kitsoz ki li faire sans ki li kozé.

⁴ Couma Jéhovah montré ki Li abordable? Mem si Li Createur tout-puissant nou grand l’univers, Jéhovah donne nou l’assurance ki Li disposé ek Li envie ecoute ek reponn nou la priere. (Lire Psaume 145:18; Isaïe 30:18, 19.) Nou kapav koz ar Bondié n’importe ki quantité le temps, n’importe ki ler ou-soit dan n’importe ki place. Nou kapav prié Li sans hesité parski nou koné ki jamais Li pa pou faire nou okenn reproche. (Ps. 65:2; Jacq. 1:5) Pou expliké couma Jéhovah été, la Bible servi bann expression ki bann dimoune kapav comprend. Sa montré ki Jéhovah envie ki nou approche ar Li. Par exemple, David ti ecrire ki “lizié Jéhovah lor” nou ek so “la main droite tini [nou] fort.” (Ps. 34:15; 63:8) Prophete Isaïe ti compare Jéhovah ar enn berger, li ti dire: “Avek so lé-bras, Li pou rassemblé so bann ti mouton; ek Li pou sarié zot lor so l’estomac.” (Is. 40:11) Ou rann-ou compte: Jéhovah envie ki nou vinn proche ar Li pareil couma enn ti mouton ki bien en securité dan lé-bras enn berger ki prend li soin. Nou vrai-mem ena enn Papa ki abordable, pa vrai? Couma nou kapav imite Jéhovah dan sa domaine-la?

ENN QUALITÉ KI ENA ENN GRAND VALEUR

5. Kifer li important ki bann ancien abordable?

⁵ Pa trop longtemps, ti demann plusieurs Témoins ki bien zelé ek ki vive dan diferan pays sa question-la: “Ki qualité ou pli apprecié dan enn ancien?” La majorité ti reponn: “Enn ancien ki abordable.” Li vrai ki chaque Chretien bizin developpe bien sa qualité-la, mais li bien important surtout ki bann ancien abordable. (Is. 32:1, 2) Enn soeur ti dire kifer li pensé ki sa qualité-la bien important: “C’est selman kan enn ancien abordable ki nou kapav apprecié bann lezot qualité ki li kapav ena.” Eski ou trouve bon raisonnement ki ena dan sa commentaire-la? Mais ki kitsoz faire enn dimoune abordable?

6. Ki enn kikenn bizin faire pou li abordable?

⁶ Pou enn kikenn abordable, li bizin montré ki li vrai-mem interessé ar lezot. Si enn ancien interessé ar lezot ek disposé pou faire tou seki li kapav pou zot, so bann frere ek soeur, ek mem bann jeune pou senti-zot a l’aise avek li. (Marc 10:13-16) Carlos, enn jeune ki ena 12 an dire: “Mo bien content kan mo trouve bann ancien dan la salle pé riyé ek pé agir avek bonté.” Bien sur, li pa assez ki enn ancien dire ki li abordable; li bizin manifesté sa qualité-la. (1 Jean 3:18) Couma li kapav faire sa?

7. Kifer enn badge l’assemblée souvent provok enn conversation, ek ki leson nou kapav aprann ar sa l’exemple-la?

⁷ Reflechi lor sa l’exemple-la. Pa trop longtemps, enn frere ti ena so badge l’assemblée lor li kan li ti prend avion pou retourne kot li apré ki li ti assisté enn l’assemblée dan enn lot pays. Kan missié ki ti travail dan avion-la ti trouve seki’nn ecrire lor so badge, “Ki Royaume Bondié Vini!” li ti dire frere-la: “Oui, ti a bon li vini​—nou bizin koz plis lor-la.” Plitar, zot ti gagne enn conversation ek missié-la ti bien content pou accepté nou bann periodik. Beaucoup parmi nou finn faire bann l’experience coumsa. Mais kifer enn badge l’assemblée souvent provok enn conversation? Parski dan enn certain sens, coumadir li pé dire bann dimoune: “Senti-zot libre pou vinn koz ar moi. Demann moi kot mo pé allé.” Sa badge-la li enn signe visible ki faire bann dimoune koné ki nou disposé pou partage nou bann croyance. Li pareil aussi pou bann ancien, zot envie donne bann signe ki dire lezot Chretien: “Senti-zot libre pou vinn koz ar moi.” Ki certain signe zot kapav donné?

8. Couma bann ancien montré ki zot vrai-mem interessé avek lezot, ek ki l’effet sa ena lor congregation?

⁸ Li possible ki bann coutume pa pareil dan tou pays, mais en general, kan nou faire enn joli sourire ar nou bann frere ek soeur, nou serre zot la main pou souhaite zot la bienvenue, nou pé montré ki nou vrai-mem interessé avek zot. Kisannla ki bizin prend l’initiative pou faire sa? Anou guetté ki l’exemple Jésus ti donne nou. Matthieu dire ki pendant enn reunion avek so bann disciple, “Jésus ti vinn pré ar zot ek ti koz ar zot.” (Mat. 28:18) Li pareil aussi pou bann ancien zordi, zot prend l’initiative pou approche zot bann frere ek soeur ek pou koz avek zot. Couma sa kapav ena enn l’effet lor congregation? Enn soeur pionnier ki ena 88 an ti dire: “Kan mo rente dan la Salle du Royaume ek bann ancien faire moi enn joli sourire ek dire moi bann kitsoz encourageant, sa faire moi pli content zot.” Enn lot soeur fidele ti ajouté: “Kitfois nou kapav considere sa couma enn kitsoz banal, mais kan enn ancien accueillir moi avek enn sourire, sa represente beaucoup pou moi.”

ABORDABLE EK DISPONIBLE

9, 10. (a) Ki bon l’exemple Jéhovah donne nou? (b) Couma bann ancien kapav rann-zot disponible pou lezot?

⁹ Li clair ki nou pa pou kapav abordable si nou pa disponible. Jéhovah donne nou enn bon l’exemple dan sa domaine-la. “Li pa loin ar sakenn parmi nou.” (Actes 17:27) Enn fason ki bann ancien rann-zot disponible pou lezot c’est kan zot reserve le temps avant ek apré reunion pou koz ar zot bann frere ek soeur​—bann jeune ek bann agé toulé-deux. Enn frere ki pionnier ti dire: “Kan enn ancien demann moi mo nouvelle ek apré li arreté pou ecoute moi, mo senti ki li apprecié moi.” Enn soeur ki finn servi Jéhovah pendant preské 50 an ti dire: “Mo senti-moi ena valeur kan bann ancien prend inpé le temps pou koz ar moi apré reunion.”

¹⁰ Nou comprend ki bann ancien bizin occupe aussi lezot responsabilité. Mais dan reunion, zot responsabilité principal c’est pou prend compte bann brebis.

JÉHOVAH PA FAIRE PREFERENCE

11, 12. (a) Ki vedir enn dimoune ki pa faire preference? (b) Couma Jéhovah donne nou l’exemple dan sa domaine-la?

¹¹ Enn lot qualité bien attirant ki Jéhovah ena c’est ki Li pa faire preference. Ki vedir enn dimoune ki pa faire preference? C’est enn dimoune ki juste, ki pa favorise personne ou-soit ki pa faire discrimination. Ena deux kitsoz ki vrai-mem important pou enn dimoune pa faire preference: so l’attitude ek so bann action. Kifer bizin ena toulé-deux? Parski c’est zis si enn kikenn pa faire preference dan so l’attitude ki sa pou pousse li pou traite tou dimoune sans discrimination. Dan bann l’Écritures Grecques Chrétiennes, l’expression “pa faire preference” vedir “pa guette figure,” setadir, pa prefere enn figure plis ki enn lot. (Actes 10:34; Kingdom Interlinear) Alors, enn kikenn ki pa faire preference, pa pou guette l’apparence ou-soit situation enn dimoune, mais li pou considere enn dimoune pou seki li été.

¹² Jéhovah Li-mem pli grand l’exemple enn kikenn ki pa faire preference. So Parole dire ki Li “pa faire preference,” ek dan fason ki Li traite lezot aussi Li “pa faire preference.” (Lire Actes 10:34, 35; Deutéronome 10:17.) Enn situation ki ti arrivé dan lepok Moïse montré sa.

13, 14. (a) Ki probleme cinq tifi Tselophehad ti gagné? (b) Couma Jéhovah ti montré ki Li pa ti faire preference?

¹³ Zis avant ki bann Israélite ti rente dan la Terre Promise, cinq soeur celibataire ti faire face ar enn probleme. Ki ti arrivé? Zot ti koné ki zot famille, pareil couma lezot famille Israélite, ti pou gagne enn part later ki ti pou zot papa. (Nomb. 26:52-55) Selman, Tselophehad, zot papa, ki ti dan tribu Manassé, ti’nn mor. Dapré coutume bann Israélite, c’est so bann garson ki ti ena droit pou herite sa later-la. Mais Tselophehad ti ena zis bann tifi. (Nomb. 26:33) Pa ti ena okenn garson pou herite so later. Eski c’est bann lezot famille ki ti pou herite sa di-bien-la ek so bann tifi pa ti pou gagne l’heritage zot papa?

¹⁴ Sa cinq soeur-la ti al guette Moïse ek ti demann li: “Kifer nom nou papa bizin disparette dan so famille parski li pena garson?” Zot ti suppliye Moïse: “Donne nou enn part later parmi bann frere nou papa.” Eski Moïse ti dire ‘Pa kapav faire okenn exception ar sa regle-la’? Non, li ti “presente zot cas devant Jéhovah.” (Nomb. 27:2-5) Ki Jéhovah ti reponn? Jéhovah ti dire Moïse: “Bann tifi Tselophehad ena raison. To bizin donne zot enn part later en heritage au milieu bann frere zot papa, ek to bizin faire zot gagne l’heritage zot papa.” Jéhovah ti al pli loin. Li ti faire sa exception-la vinn enn regle. Li ti donne Moïse sa l’instruction-la: “Si n’importe ki zom mor sans ki li ena enn garson, alors, zot bizin faire so tifi gagne so l’heritage.” (Nomb. 27:6-8; Jos. 17:1-6) Depuis sa lepok-la, tou bann femme Israélite ki ti pou dan sa mem situation-la, ti pou protegé.

15. (a) Couma Jéhovah traite so bann serviteur, surtout bann ki pena personne pou protege zot? (b) Ki lezot recit Biblik montré ki Jéhovah pa faire preference?

¹⁵ Sa decision-la ti vrai-mem bon ek montré ki Jéhovah pa ti faire preference envers personne. Alors ki pa ti ena personne pou protege sa bann tifi-la, Jéhovah ti traite zot avek dignité, pareil couma Li ti traite lezot Israélite. (Ps. 68:5) Sa c’est zis enn parmi plusieurs recit ki ena dan la Bible ki montré enn verité bien encourageant: Jéhovah traite tou so bann serviteur sans faire preference.​—1 Sam. 16:1-13; Actes 10:30-35, 44-48.

NOU KAPAV IMITE JÉHOVAH

16. Couma nou kapav ameliore-nou pou vinn bann dimoune ki pa faire preference?

¹⁶ Couma nou kapav imite Jéhovah ek pa faire preference nou aussi? Pa blié ki ena deux kitsoz bien important ki pou aide nou pa faire preference. C’est selman si nou-mem nou pa faire preference ki nou pou traite lezot sans okenn discrimination. Li vrai ki nou tou, nou content pou pensé ki nou bann dimoune ouvert ek nou pa habitué faire preference. Mais surement ou pou d’accord ki li pa toujours fasil pou juge nou prop sentiment dan enn fason honnete. Alors, ki nou kapav faire pou koné si lezot trouve nou couma bann dimoune ki pa faire preference? Kan Jésus ti envie koné ki bann dimoune dire lor li, li ti demann so bann camarade en ki li ti ena confiance: “Ki bann dimoune dire lor Fils de l’homme?” (Mat. 16:13, 14) Kifer ou pa imite l’exemple Jésus? Ou kapav demann enn camarade ki ou koné pou dire ou franc si ou enn dimoune ki pa faire preference. Si li reconette ki kitfois ou ankor parfois ena tendance pou faire preference avek bann dimoune a cause zot race, zot condition social ou-soit economik, ki ou pou faire? Prié Jéhovah avek tou ou leker lor la, suppliye Li pou aide ou change ou l’attitude pou ki, pareil couma Li, ou pa faire preference.​—Mat. 7:7; Col. 3:10, 11.

17. Cite bann fason couma nou kapav traite lezot sans faire preference.

¹⁷ Dan congregation, nou montré nou desir pou imite Jéhovah ek pa faire preference kan nou traite tou nou bann frere ek soeur avek dignité ek lamour fidele. Par exemple, kan nou invite lezot kot nou, nou pa pou faire preference, nou pou invite tou dimoune, mem bann ki dan enn lot culture, bann ki pauvre, bann orphelin, ou-soit bann ki’nn perdi zot conjoint. (Lire Galates 2:10; Jacques 1:27.) En plis, dan predication, nou pa faire preference, nou partage la bonne nouvelle avek bann dimoune n’importe ki culture zot été, ek avek bann etranger aussi. Nou bien content ki nou kapav gagne bann publication Biblik dan preské 600 langue. C’est vrai-mem enn preuve ki nou pa faire preference!

18. Couma personnellement ou pou montré ki ou apprecié ki Jéhovah Li enn Bondié abordable ek ki pa faire preference?

¹⁸ Oui, a mesure ki nou prend le temps pou reflechi couma Jéhovah Li enn Bondié ki abordable ek ki pa faire preference, nou apprecié plis so personnalité. En retour, sa kapav pousse nou pou imite pli bien bann qualité Jéhovah, pou manifesté zot dan nou rapport avek nou bann frere ek soeur ek envers bann dimoune dan predication.