Jeune—Laisse Parole Bondié guide ou

“Gagne sagesse, gagne l’intelligence.”—PROV. 4:5.

1, 2. (a) Ki ti aide l’apotre Paul pou faire face ar la lutte ki li ti ena endan li-mem? (b) Couma ou kapav gagne sagesse ek l’intelligence?

“KAN mo envie faire seki bon, c’est plutot seki mauvais ki mo faire.” Eski ou koné kisannla ti dire sa bann parole-la? C’est l’apotre Paul. Mem si Paul ti content Jéhovah, ti ena bann moment kot li ti trouve sa difficile pou faire seki bon. Ki li ti ressenti concernant sa la lutte ki li ti ena endan li-mem-la? Li ti ecrire: “Mo enn dimoune desesperé!” (Rom. 7:21-24) Eski ou kapav comprend seki Paul ti ressenti? Eski parfois ou trouve sa difficile pou faire seki bon? Eski sa agace ou, pareil couma sa ti agace Paul? Si oui, pa decouragé. Paul ti reussi faire face ar sa bann difficulté ki li ti gagné-la, alors ou aussi ou pou reussi.

² Paul ti reussi parski li ti laisse-li guidé par “bann bon parole.” (2 Tim. 1:13, 14) A cause sa, li ti gagne sagesse ek l’intelligence ki li ti bizin pou faire face ar bann difficulté ek pou prend bann bon decision. Jéhovah kapav aide ou pou gagne sagesse ek l’intelligence. (Prov. 4:5) Li finn donne bann pli bon conseil ki nou kapav gagné dan so Parole, la Bible. (Lire 2 Timothée 3:16, 17.) Reflechi couma ou kapav tire profit ar bann principe ki trouve dan la Bible kan sa concerne ou relation avek ou bann parent, kan ou decidé couma pou servi ou l’argent, ek kan ou tousel.

Laisse Parole Bondié guide ou dan la famille

3, 4. Kifer li possible ki ou trouve sa difficile pou obeir bann regle ki ou bann parent inn fixé, mais kifer bann parent fixé bann regle?

³ Eski ou trouve sa difficile pou vive en accord avek bann regle ki ou bann parent inn fixé? Kifer ou ena sa sentiment-la? Enn raison c’est kitfois parski ou ti pou content gagne plus liberté. Li normal ki ou ena sa desir-la kan ou pé grandi pou vinn enn adulte. Selman, pendant ki ou pé vive kot ou bann parent, c’est ou devoir pou obeir zot.—Éph. 6:1-3.

⁴ Kan ou comprend bien kifer ou bann parent fixé bann regle ek bann condition, sa kapav pli facile pou ou pou suive zot. Li vrai ki parfois li possible ki ou ena mem sentiment ki Brielle,a ki ena 18 an, ek ki dire lor so bann parent: “Zot finn blié net ki sa vedir ena mo l’age. Zot pa’lé ki mo dire seki mo pensé, prend bann decision, ou-soit reagir couma enn adulte.” Pareil couma Brielle, kitfois ou ena sentiment ki ou bann parent refuse pou donne ou plus liberté ki ou pensé zot ti bizin donne ou. Selman, ou bann parent fixé bann regle surtout parski zot tracassé pou ou. En plus, bann parent chretien koné ki zot bizin rann compte Jéhovah dan fason ki zot prend ou soin.—1 Tim. 5:8.

5. Couma ou kapav tire profit kan ou obeir ou bann parent?

⁵ En realité, kan ou obeir bann regle ou bann parent, li pareil coumadir ou pé paye enn dette ki ou doit enn la banque—plus kapav compte lor ou pou payé, plus la banque-la pou disposé pou donne ou plus credit. Li pareil pou ou aussi, ou doit ou bann parent respé ek l’obeissance. (Lire Proverbes 1:8.) Plus ou obeir zot, plus li possible ki zot pou donne ou enn pli grand liberté. (Luc 16:10) Bien sur, si touletan ou pé desobeir zot bann regle, pa etonné si ou bann parent diminué ou-soit mem coupe ou “credit.”

6. Couma bann parent kapav aide bann jeune pou obeir?

⁶ Enn fason ki bann parent kapav aide zot bann jeune pou obeir zot bann regle c’est par zot l’exemple. Zot l’obeissance volontaire pou seki Jéhovah demandé bizin montré ki bann regle ki Bondié fixé zot raisonnable. Lerla, li pou pli facile pou bann jeune pou trouve bann regle ki zot bann parent fixé, dan mem fason. (1 Jean 5:3) En plus, la Bible mentionne bann moment kot Jéhovah ti mem donne so bann serviteur l’occasion pou dire seki zot ti pensé concernant certain kitsoz. (Gen. 18:22-32; 1 Rois 22:19-22) Eski parfois bann parent kapav donne zot zenfant l’occasion pou dire seki zot pensé lor different sujet?

7, 8. (a) Ki difficulté certain jeune gagné? (b) Ki kitsoz ou bizin comprend pou ou kapav tire profit ar discipline?

⁷ Kitfois bann jeune bizin aussi faire face ar critik ki zot gagné ar zot parent ek ki zot pensé pa juste. Li possible ki parfois ou finn ena mem sentiment ki enn jeune ki appel Christian, ki ti dire: “Mo mama ti pareil couma enn detective—touletan li ti rod bann domaine kot mo pa ti reussi.”

⁸ Souvent nou pensé ki pé critik nou kan nou pé gagne enn correction ou-soit enn discipline. La Bible reconette ki li difficile pou accepté discipline, mem si li bien merité. (Héb. 12:11) Ki kapav aide ou pou tire profit ar discipline ki ou gagné? Enn kitsoz bien important ki ou bizin rappel c’est ki surement ou bann parent donne ou bann conseil parski zot content ou. (Prov. 3:12) Zot envie empeche ou pou prend bann mauvais l’habitude ek aide ou pou gagne bann bon l’habitude. Surement, ou bann parent realisé ki si zot pa discipline ou, c’est coumadir zot ena la haine pou ou! (Lire Proverbes 13:24.) Ou bizin aussi comprend ki, faire bann erreur forme partie dan bann kitsoz ki ou aprann dan la vie. Alors, kan ou gagne enn correction, kifer ou pa rod sagesse dan bann parole ki pé dire ou? “Vaut mieux ena [sagesse] couma enn profit ki ena l’argent couma enn profit, ek seki li rapporté vaut mieux ki l’or.”—Prov. 3:13, 14.

9. Au lieu ki zot fixé zot l’esprit lor seki parette enn l’injustice, ki bann jeune kapav faire?

⁹ Mais, bann parent aussi faire erreur. (Jacq. 3:2) Kan zot pé discipline ou, parfois li kapav arrivé ki zot kozé sans reflechi. (Prov. 12:18) Ki kapav faire ou bann parent agir dan sa fason-la? Kitfois zot stressé, ou-soit zot pensé ki si ou faire bann erreur sa vedir ki zot pa pé reussi elevé ou bien. Au lieu ki ou fixé ou l’esprit lor seki ou considere couma enn l’injustice, kifer ou pa montré ou reconnaissance pou desir sincere ki zot ena pou aide ou? Ou capacité pou accepté discipline pou enn grand l’aide pou ou kan ou pou vinn enn adulte.

10. Couma ou kapav accepté pli facilement bann regle ek bann condition ki ou bann parent fixé?

¹⁰ Eski ou ti pou content accepté pli facilement bann regle ek bann condition ki ou bann parent fixé? Si oui, ou bizin ameliore fason ki ou koz ar ou bann parent. Couma ou kapav faire sa? Enn premier kitsoz c’est ecouté. La Bible dire: “[Ou] bizin pré pou ecouté, pa pressé pou kozé ek pa en colere vite.” (Jacq. 1:19) Au lieu ki ou pressé pou defann ou-mem, essaye controle ou bann sentiment ek ecoute bien seki ou bann parent ena pou dire. Reflechi lor seki ou bann parent inn dire, pa lor fason ki zot inn dire sa. Apré sa, montré zot ki ou accepté seki zot inn dire kan avek respé ou reconette ou erreur ek dire ki ou pa pou ré-faire sa encore. Kan ou faire sa, sa pou rassure zot ki ou finn ecoute seki zot inn dire. Ki ou pou faire si ou envie donne enn l’explication lor seki ou finn dire ou-soit finn faire? La plupart du temps, li sage ki ou ‘tini ou la langue’ ziska ki ou finn fini faire seki ou bann parent souhaité. (Prov. 10:19) Enn fois ki ou bann parent trouvé ki ou finn ecoute zot, zot pou plus disposé pou ecoute ou. Si ou agir dan enn fason mur coumsa, sa pou montré ki ou pé laisse Parole Bondié guide ou.

Laisse Parole Bondié guide ou kan ou servi l’argent

11, 12. (a) Concernant l’argent, ki Parole Bondié encourage nou pou faire, ek kifer? (b) Couma ou bann parent kapav aide ou pou servi bien ou l’argent?

¹¹ La Bible dire: “L’argent donne enn protection.” Mais sa mem verset-la montré ki la sagesse ena encore plus valeur ki l’argent. (Eccl. 7:12) Parole Bondié encourage nou pou ena enn bon l’attitude envers l’argent, pa pou content li. Kifer ou bizin evite developpe l’amour pou l’argent? Anou prend enn l’exemple: dan la main enn chef cuisinier ki bien qualifié, enn couteau fité li enn zouti bien utile. Mais sa mem couteau-la dan la main enn dimoune ki ena la tête en l’air ou-soit ki pa habitué faire attention, kapav faire beaucoup di-tort. L’argent aussi kapav bien utile si nou servi li couma bizin. Parkont, bann ki “bien decidé pou vinn riche” souvent zot sacrifié zot l’amitié, zot famille, ek mem zot relation avek Bondié. Resultat ki zot gagné c’est ki zot pique zot-mem “partout ar beaucoup douleur.”—Lire 1 Timothée 6:9, 10.

¹² Couma ou kapav aprann pou servi bien ou l’argent? Kifer ou pa demann ou bann parent conseil lor fason ki ou kapav servi ou l’argent? Salomon ti ecrire: “Enn dimoune sage pou ecouté ek pou gagne plus l’enseignement, ek enn zom ki ena l’intelligence c’est enn kikenn ki gagne capacité pou dirige bien.” (Prov. 1:5) Enn adolescent ki appel Anna ti demann so bann parent bann bon conseil. Li dire: “Mo papa ti montré moi couma faire enn budget, ek li ti montré moi ki quantité li important ki mo bien organisé dan fason ki mo servi ek mo garde enn compte lor mo l’argent.” Mama Anna aussi ti donne li bann conseil pratik. Anna dire: “Li ti montré moi l’importance pou compare bann prix avant acheté.” Couma Anna inn tire profit ar sa bann conseil-la? Li reponn: “Asterla, mo konn servi mo kass couma bizin. Mo controle bien mo bann depense, alors mo senti-moi libre ek mo l’esprit trankil parski mo pa faire bann dette inutile.”

13. Couma ou kapav controle ou-mem kan ou pé depense ou kass?

¹³ Ou kapav bien vite tombe dan bann dette si ou acheté bann kitsoz sans reflechi ou-soit si ou depense ou kass zis pou impressionne ou bann camarade. Ki kapav aide ou pou evite sa bann piege-la? Kan ou pé depense ou kass, ou bizin kapav aprann pou controle ou-mem. C’est seki Ellena, ki ena environ 20 an, faire. Li dire: “Kan mo sorti avek mo bann camarade, mo fini calculé avant ek fixé enn limite lor quantité [kass] ki mo pou depensé. . . . Mo trouve sa sage aussi pou al faire shopping zis ar bann camarade ki faire bien attention [dan fason ki zot depense] zot l’argent ek ki pou encourage moi pou compare bann prix au lieu ki mo acheté premier kitsoz ki mo trouvé.”

14. Kifer ou bizin faire bien attention ar “pouvoir ki la richesse ena pou embete dimoune”?

¹⁴ Gagne l’argent ek konn bien servi li c’est enn kitsoz important dan la vie. Selman, Jésus ti dire ki c’est bann dimoune ki “reconette ki zot pauvre lor plan spirituel,” ki gagne vrai bonheur. (Mat. 5:3) Li ti averti ki “pouvoir ki la richesse ena pou embete dimoune” kapav touffe l’interet ki enn dimoune ena pou bann kitsoz spirituel. (Marc 4:19) Alors, li bien important ki ou laisse Parole Bondié guide ou ek garde enn l’attitude equilibré lor l’argent!

Laisse Parole Bondié guide ou kan ou tousel

15. Kan eski li kapav vinn pli difficile pou garde ou fidelité envers Bondié?

¹⁵ Kan eski ou pensé ki ou fidelité envers Bondié pou plus testé? Kan ou avek lezot dimoune ou-soit kan ou tousel? Surement, kan ou dan lekol ou-soit dan travail, ou faire plus attention ar n’importe ki kitsoz ki kapav faire di-tort ou bann relation avek Bondié. C’est kan ou pé detann-ou ek ou pa assez faire attention ki lerla ou vinn pli faible ek ou pa kapav defann-ou ar enn l’attak lor ou bann principe moral.

16. Kifer ou bizin ena desir pou obeir Jéhovah mem kan ou tousel?

¹⁶ Kifer ou bizin ena desir pou obeir Jéhovah mem kan ou tousel? Rappel sa: ou kapav soit blesse bann sentiment Jéhovah ou-soit faire so leker content. (Gen. 6:5, 6; Prov. 27:11) Ou bann action touche Jéhovah parski “Li interessé ar [ou].” (1 Pierre 5:7) Li envie ki ou ecoute Li pou ki ou kapav tire profit ar so bann conseil. (Is. 48:17, 18) Kan certain serviteur Jéhovah en Israël pa ti prend compte so conseil, zot ti faire Li la peine. (Ps. 78:40, 41) De lot coté, Jéhovah ti ena enn grand l’affection pou prophete Daniel, a cause sa, enn ange ti appel li enn “dimoune bien desirable.” (Dan. 10:11) Kifer? Daniel ti reste fidele ar Bondié pa zis kan li ti avek lezot dimoune, mais aussi en privé.—Lire Daniel 6:10.

17. Ki bann question ou kapav demann ou-mem kan ou choisir ou divertissement?

¹⁷ Pou ou reste fidele envers Bondié kan ou tousel, ou bizin developpe ou “bann capacité mental . . . pou faire difference entre seki bon ek seki mauvais” ek apré, forme sa bann capacité-la grace a la ‘pratik’ kan ou faire seki ou koné bon. (Héb. 5:14) Par exemple, kan ou choisir la musik ki ou ecouté, film ki ou guetté, ou-soit site Internet lor ki ou allé, sa bann question ki ena apré-la pou aide ou pou choisir seki bon ek pou rejette seki mauvais. Demann ou-mem: ‘Eski sa pou encourage moi pou ena enn grand compassion ou-soit eski sa pou influence moi pou content “malheur [mo] prochain”?’ (Prov. 17:5) ‘Eski sa pou aide moi pou “content seki bon” ou-soit eski sa pou faire ki li difficile pou moi pou “ena la haine pou seki mauvais”?’ (Amos 5:15) Seki ou faire kan ou tousel montré ki kitsoz ki ena vrai-mem valeur pou ou.—Luc 6:45.

18. Ki ou bizin faire si ou finn commence ena enn mauvais conduite en secret, ek kifer?

¹⁸ Ki ou bizin faire si ou finn commence ena en secret enn conduite ki ou koné pa bon? Rappel ki enn “kikenn ki cachiette so bann peché pa pou reussi, mais si li confesse ek arrete faire sa bann peché-la, li pou gagne misericorde.” (Prov. 28:13) Li pa pou sage ditou si ou contigne ena enn mauvais conduite ek ou “faire la peine l’esprit saint Bondié”! (Éph. 4:30) Ou ena enn devoir envers Bondié, envers ou bann parent, ek envers ou-mem pou confesse n’importe ki mauvais conduite ki ou ena. Dan sa domaine-la, “bann ancien dan congregation” kapav aide ou beaucoup. Disciple Jacques dire: “Ki zot prié pou [sa kikenn ki’nn faire peché-la] ek mette de l’huile lor li au nom Jéhovah. Ek la priere ki zot faire avek la foi pou faire malade-la bien, ek Jéhovah pou releve li. En plus, si li’nn faire peché, Jéhovah pou pardonne li.” (Jacq. 5:14, 15) Li vrai ki ou kapav senti-ou gené ek kitfois ou pou gagne bann consequence ki pa faire ou plaisir. Mais si ou ena courage pou demann l’aide, sa pou evite-ou gagne bann lezot mauvais consequence ek ou pou senti-ou soulagé parski ou pou ré-gagne enn bon conscience.—Ps. 32:1-5.

Faire leker Jéhovah content

19, 20. Ki Jéhovah envie pou ou, mais ki ou bizin faire?

¹⁹ Jéhovah enn “Bondié heureux,” ek Li envie ki ou heureux. (1 Tim. 1:11) Li bien interessé ar ou. Mem si personne pa remark ou bann zeffort pou faire seki bon, Li, Li remarké. Nanyin pa cachiette devant lizié Jéhovah. Li guette ou, pa pou rod ou defaut, mais pou soutenir ou dan ou bann zeffort pou faire seki bon. “Lizié [Bondié] pé guette partout lor la terre pou montré so la force en faveur bann dimoune ki ena enn leker complet envers Li.”—2 Chron. 16:9.

²⁰ Alors, laisse-ou guidé par Parole Bondié, ek applik so conseil. Lerla, ou pou gagne sagesse ek l’intelligence ki ou bizin pou surmonte bann grand probleme ek pou faire bann choix ki difficile dan la vie. Ou pa pou zis faire plaisir ou bann parent ek Jéhovah, mais aussi ou pou ena enn la vie ki vrai-mem heureux.

[Note]

Couma ou pou reponn?

• Couma bann jeune kapav accepté ek tire profit ar bann regle ek discipline zot parent?

• Kifer li important pou ena enn l’attitude equilibré lor l’argent?

• Couma ou kapav reste fidele ar Jéhovah mem kan ou tousel?