Lotorite ki Bann Ansien Ena dan Lasanble

1. Sit enn rezon kifer ena linite dan fami Zeova.

NOU kontan ki nou form parti fami Zeova, pa vre! Kifer ena lape ek linite parmi nou? Enn parmi bann rezon se parski nou tou nou fer zefor pou respekte lotorite ki Zeova inn etabli. An realite, plis nou konpran lotorite ki Zeova inn etabli, plis ena linite parmi nou.

2. Ki bann kestion nou pou reponn dan sa lartik-la?

² Dan sa lartik-la, nou pou koz lor lotorite ki Zeova inn etabli dan lasanble. Nou pou osi reponn sa bann kestion-la: Ki rol bann ser ena dan lasanble? Eski sak frer li sef tou bann ser? Eski lotorite ki bann ansien ena lor bann frer ek ser li parey kouma lotorite ki enn sef fami ena lor so fam ek so bann zanfan? Pou koumanse, anou gete kouma nou bizin konsider bann ser dan lasanble.

KOUMA NOU BIZIN KONSIDER BANN SER?

3. Kouma nou kapav ogmant nou rekonesans pou seki nou bann ser pe fer?

³ Nou bien kontan nou bann ser ki fer boukou zefor pou pran swin zot fami, pou pres bonn nouvel, ek pou ed lezot dan lasanble. Nou pou gete kouma nou kapav ogmant nou rekonesans pou nou bann ser kan nou reflesi lor fason ki Zeova ek Zezi konsider zot. Nou pou gete osi seki nou kapav aprann ar fason ki lapot Pol ti azir anver bann madam.

4. Kouma Labib montre ki bann fam ena mem valer ki bann zom pou Zeova?

⁴ Labib montre ki bann fam ena mem valer ki bann zom pou Zeova. Par exanp, Labib montre ki dan premie siek, Zeova ti donn so lespri sin bann zom ek bann fam toulede. Li ti donn zot kapasite pou fer bann kitsoz extraordiner, kouma par exanp pou koz dan diferan lang. (Zist. 2:1-4, 15-18) Zeova inn swazir bann zom ek bann fam toulede pou al regne avek Zezi Kris dan lesiel. (Gal. 3:26-29) Bann zom ek bann fam toulede ena posibilite pou viv pou touletan lor later. (Rev. 7:9, 10, 13-15) Ek toulede partisip dan travay predikasion ek zot ansegn bonn nouvel. (Mat. 28:19, 20) Par exanp, liv Zistwar Bann Apot koz lor enn ser ki ti apel Prisil. Li ek so mari, Akila, ti ed Apolos pou konpran pli bien laverite.​—Zist. 18:24-26.

5. Kouma Lik 10:38, 39, 42 montre ki Zezi ti respekte bann madam?

⁵ Zezi ti respekte bann madam. Zezi pa ti imit bann Farizien ki ti panse ki bann madam inferyer. Bann Farizien pa ti koz ar bann madam an piblik, ek zame zot pa ti koz lor bann Lekritir ar bann madam. Parkont, Zezi ti ansegn bann verite inportan ar bann fam ek bann zom toulede.b (Lir Lik 10:38, 39, 42.) Li ti osi permet bann madam pou akonpagn li kan li ti al prese. (Lik 8:1-3) Zezi ti osi donn bann madam privilez pou al dir so bann zapot ki li ti resisite.​—Zan 20:16-18.

6. Kouma lapot Pol ti montre ki li ti respekte bann madam?

⁶ Lapot Pol ti rapel Timote ki li bizin respekte bann madam. Pol ti ankouraz Timote pou konsider “bann vie madam kouma [bann] mama” ek “bann zennfi kouma [bann] ser.” (1 Tim. 5:1, 2) Pol ti ed Timote pou vinn enn Kretien ki ena matirite. Kanmem sa, li ti rekonet ki se Timote so mama ek so granmer ki an premie ti ansegn Timote bann “Lekritir.” (2 Tim. 1:5; 3:14, 15) Dan so let pou bann Romin, Pol ti mansionn nom bann ser kan li ti felisit zot. Li pa ti zis remark bann bon travay ki zot ti fer, me li ti osi ena boukou rekonesans anver zot.​—Rom. 16:1-4, 6, 12, NW; Fil. 4:3.

7. Ki kestion nou pou examine asterla?

⁷ Dan bann paragraf avan, nou’nn trouve ki Labib pa dir ki bann madam zot inferyer. Nou bann ser ki nou bien kontan, zot enn led pou lasanble, ek zot bon kondwit ede pou ki ena lape ek linite dan lasanble. Me ena sertin kestion ki nou bizin reponn. Par exanp: Kifer Zeova parfwa demann bann ser pou kouver zot latet? Se zis bann frer ki kapav vinn ansien ek asistan ministeryel, alor eski savedir ki sak frer li sef tou bann ser dan lasanble?

ESKI SAK FRER LI SEF TOU BANN SER?

8. Dapre Efezien 5:23, eski sak frer li sef tou bann ser? Explike.

⁸ Repons-la se non! Enn frer li pa sef tou bann ser dan lasanble, se Zezi ki Sef. (Lir Efezien 5:23, NW.c) Dan lafami, se enn mari ki sef so madam. Enn garson ki batize, li pa sef so mama. (Efe. 6:1, 2) Ek dan lasanble, bann ansien ena zis enn sertenn lotorite lor bann frer ek ser. (1 Tes. 5:12; Ebre 13:17) Bann ser selibater ki nepli viv kot zot paran, zot bizin ena respe pou zot paran ek bann ansien. Selman, parey kouma tou bann frer dan lasanble, zot ena zis enn sel sef, Zezi.

9. Kifer bann ser parfwa bizin kouver zot latet?

⁹ Li vre ki Zeova finn swazir bann zom pou pran latet dan lasanble, ek Li pa’nn donn bann madam sa lotorite-la. (1 Tim. 2:12) Kifer? Pou mem rezon ki Li’nn etabli Zezi kouma sef lor bann zom, setadir pou ki ena lord dan lasanble. Si, pou ninport ki rezon, enn ser bizin asim responsabilite enn frer, se Zeova ki demann ser-la pou kouver so latet.d (1 Kor. 11:4-7) Zeova demann bann ser pou fer sa, pa pou rabes zot, me pou zot kapav montre zot respe anver lotorite ki Zeova inn etabli. Asterla, anou reponn sa kestion-la: Ki kantite lotorite bann sef fami ek bann ansien ena?

LOTORITE BANN SEF FAMI EK BANN ANSIEN

10. Kifer parfwa bann ansien ena tandans pou etabli bann reg dan lasanble?

¹⁰ Bann ansien kontan Zezi, ek zot kontan bann “mouton” ki Zeova ek Zezi inn demann zot pou pran swin. (Zan 21:15-17, NW) Enn ansien kapav ena bann bon lintansion ek panse ki li kouma enn papa pou lasanble. Li kapav panse ki, parey kouma enn sef fami ena drwa pou etabli bann reg pou protez so fami, li ena drwa pou etabli bann reg pou protez bann frer ek ser. Parfwa, ena osi sertin frer ek ser ki ankouraz bann ansien pou azir kouma zot sef, kan zot demann sa bann ansien-la pou pran bann desizion dan zot plas. Me eski bann ansien ek bann sef fami ena mem lotorite?

11. Ki pwin komin ena ant responsabilite bann sef fami ek responsabilite bann ansien?

¹¹ Lapot Pol ti explike ki ena sertin pwin komin ant responsabilite enn sef fami ek responsabilite enn ansien. (1 Tim. 3:4, 5, NW) Par exanp, Zeova anvi ki tou bann manb enn fami obeir zot sef fami. (Kol. 3:20) Dan mem fason, Zeova anvi ki tou bann manb lasanble obeir bann ansien. Zeova anvi ki bann sef fami ek bann ansien pran swin lor plan spiritiel ek afektif, bann dimounn ki anba zot lotorite. Ek parey kouma enn bon sef fami, enn ansien pou ed bann frer ek ser ki bizin led. (Zak 2:15-17) Anplis, Zeova demann bann sef fami ek bann ansien pou ed lezot pou obeir So bann lalwa. Me Li osi averti zot pou “pa al andeor limit seki finn ekrir” dan Labib.​—1 Kor. 4:6.

12-13. Kouma Proverb 6:20 ed nou pou trouv diferans ki ena ant responsabilite enn sef fami ek responsabilite enn ansien?

¹² Selman, ena osi bann gran diferans ant responsabilite enn ansien ek responsabilite enn sef fami. Par exanp, Zeova demann bann ansien pou azir kouma bann ziz. Parkont, bann sef fami pa’nn gagn sa responsabilite-la. Zeova inn osi donn bann ansien lotorite pou exkli bann peser ki pa repanti.​—1 Kor. 5:11-13, NW.

¹³ Me Zeova inn donn bann sef fami sertin lotorite ki Li pa’nn donn bann ansien. Li’nn donn enn sef fami lotorite pou etabli bann reg pou so fami ek pou fer sir ki bannla swiv sa bann reg-la. (Lir Proverb 6:20.e) Par exanp, enn sef fami ena drwa pou deside ki ler so bann zanfan bizin rant lakaz aswar. Li ena lotorite osi pou disiplinn so bann zanfan si zot pa obeir so bann reg. (Efe. 6:1) Biensir, avan ki enn sef fami etabli bann reg pou so fami, li pou koz avek so madam parski zot “enn sel” laser.f​—Mat. 19:6.

RESPEKTE LOTORITE KI ZEZI KRIS ENA DAN LASANBLE

14. (a) Dapre Mark 10:45, kifer li apropriye ki Zeova inn swazir Zezi kouma sef lasanble? (b) Ki responsabilite Komite Santral ena? (Get lankadre “Responsabilite Komite Santral.”)

¹⁴ Gras-a laranson, Zeova inn aste lavi sak dimounn dan lasanble. (Lir Mark 10:45; Zist. 20:28, NW; 1 Kor. 15:21, 22) Alor, li bien apropriye ki Zeova inn swazir Zezi kouma sef lasanble parski Zezi inn donn so lavi an ranson. Zezi li nou sef, alor li ena drwa pou etabli bann reg pou sak serviter Bondie, pou bann fami, ek pou bann lasanble. Ek li ena drwa osi pou fer sir ki tou dimounn obeir sa bann reg-la. (Gal. 6:2) Me Zezi pa zis etabli bann reg. Li osi pran swin ek kontan sakenn parmi nou.​—Efe. 5:29, NW.

15-16. Ki nou kapav aprann ar lexanp Marley ek Benjamin?

¹⁵ Bann ser montre ki zot respekte Zezi kan zot swiv direksion bann frer ki Zezi inn etabli. Boukou ser dakor avek seki Marley, enn ser ki res Letazini, dir: “Mo bien kontan mo responsabilite antan ki madam ek ser dan lasanble. Mo bizin touletan fer zefor pou respekte lotorite ki Zeova finn donn mo misie ek bann ansien. Me mo misie ek bann frer dan mo lasanble bien respekte mwa. Zot rekonesan pou tou seki mo fer. Akoz sa, li pli fasil pou mo respekte zot lotorite.”

¹⁶ Bann frer montre ki zot respekte lotorite ki Zeova inn etabli kan zot respekte bann ser. Benjamin, enn frer ki res Langleter, dir: “Mo’nn aprann boukou kitsoz gras-a bann komanter ki bann ser fer dan renion. Zot donn mwa bann tips lor kouma pou etidie ek kouma pou vinn efikas dan mo minister. Pou mwa, bann ser ena boukou valer.”

17. Kifer nou bizin respekte lotorite ki Zeova inn etabli?

¹⁷ Kan tou dimounn dan lasanble, setadir bann zom, bann fam, bann sef fami, ek bann ansien, konpran ek respekte lotorite ki Zeova inn etabli, ena lape dan lasanble. Me pli inportan, nou donn laglwar nou Papa ki dan lesiel, Zeova.​—Ps. 150:6.