Zeova Inn ‘Fer Mo Bann Semin Vinn Drwat’

MO BANN PARAN TI ED MWA POU RES LOR SEMIN KI DRWAT

Mo bann paran ti gagn laverite dan bann lane 1920, avan ki zot marye. Mo ti ne an 1939. Kan mo ti zenn, nou ti pe res Langleter, ek mo ti pe al renion avek mo bann paran. Mo ti bien kontan Lekol Minister Teokratik. Mo ankor rapel premie devwar ki mo ti fer. Mo ti bizin debout lor enn bwat pou ki mo gagn oter lor lestrad ek ki mo reisi trouv lasistans. Mo ti ena si-z-an ek mo ti bien strese kan mo ti trouv tou sa bann adilt ki dan lasal la pe get mwa.

Mo papa ti ekrir enn prezantasion bien sinp lor enn kart pou ki mo servi dan predikasion. Premie fwa ki mo ti pres tousel devan laport enn dimounn, mo ti ena wit-an. Enn misie ti ouver laport, li ti lir prezantasion ki ti lor mo kart, ek li ti aksepte liv « Que Dieu soit reconnu pour vrai ! » Mo ti telman kontan ki mo ti galoupe pou al rakont sa mo papa. Mo ti bien kontan bann renion ek predikasion, ek sa finn ed mwa pou devlop dezir pou servi Zeova aplintan.

Mo lamour pou bann verite Biblik ti vinn pli for ankor, kan mo papa ti fer mwa gagn enn labonnman ar Latour Degard. Sak fwa ki enn magazinn ti arive par lapos, mo ti lir li deswit. Mo konfians an Zeova ti kontign grandi ek sa ti motiv mwa pou vwe mo lavi ar Li.

An 1950, mo bann paran ek mwa nou ti bann delege pou lasanble « L’accroissement de la théocratie » dan New York. Zedi le 3 Out, tem pou lasanble ti “Zourne Bann Misioner.” Sa zour-la, Frer Carey Barber, ki plitar ti form parti dan Komite Santral, ti fer diskour batem. Kan li ti poz bann kandida batem de kestion ki ti ena alafin so diskour, mo ti deboute ek mo ti reponn: “Wi!” Mo ti ena 11 an ek mo ti kone ki mo ti pran enn desizion bien inportan. Selman, mo ti per pou al dan delo parski mo pa ti konn naze. Mo tonton ti akonpagn mwa kot pisinn ek li ti rasir mwa ki tou ti pou pas bien. An realite, tou ti pas telman vit ki mo lipie pa ti mem tous fon pisinn. Bann frer ti fer enn lasenn, zot ti soulev mwa ek ti pas mwa ar zot kamarad; enn ti batiz mwa, ek enn lot ti tir mwa andeor pisinn. Depi sa zour bien inportan la, Zeova finn touletan fer mo bann semin vinn drwat.

MO DESIDE POU FER ZEOVA KONFIANS

Kan mo ti kit lekol, mo ti anvi fer pionie, me mo bann profeser ti ankouraz mwa pou al liniversite. Zot ti reisi konvink mwa ek mo ti al liniversite. Selman, bien vit mo ti realize ki mo pa ti pou kapav res for dan laverite si mo ti kontign mo bann letid. Alor, mo ti desid pou kit liniversite. Mo ti priye Zeova ek mo ti fer enn let pou explike ki mo ti pou kit liniversite lafin lane. Mo ti ena konfians an Zeova ek deswit mo ti koumans fer pionie.

Mo ti koumans mo servis pionie dan lavil Wellingborough an 1957. Mo ti demann bann frer dan Betel Langleter si mo ti kapav gagn enn konpagnon servis ki ena lexperyans. Frer Bert Vaisey ti aprann mwa boukou kitsoz. Li ti enn predikater bien zele, ek li ti ed mwa pou fer enn bon program predikasion. Dan mo lasanble, ti ena zis Frer Vaisey, mwa, ek sis ser aze. Mo bann preparasion pou renion ek mo bann partisipasion ti donn mwa lokazion pou ogmant mo konfians an Zeova ek pou montre Li mo lafwa.

Mo ti fer inpe letan dan prizon parski mo ti refiz fer servis militer. Me apre sa, mo ti zwenn Barbara, enn ser ki ti pionie spesial. Nou ti marye an 1959, ek nou ti dispoze pou aksepte ninport ki afektasion ki nou ti pou gagne. Nou premie lafektasion ti dan rezion Lancashire dan nor-wes Langleter. Apre sa, an Zanvie 1961, mo ti gagn linvitasion pou asiste Lekol pou Bann Frer Nome, pandan enn mwa dan Betel Langleter. Alafin lekol, mo ti bien kontan parski mo ti pou al servi dan sirkonskripsion. Pandan de semenn, mo ti gagn enn formasion dan lavil Birmingham avek enn responsab sirkonskripsion ki ena boukou lexperyans, ek Barbara ti akonpagn mwa laba. Apre sa, nou ti al dan nou lafektasion dan rezion Lancashire ek Cheshire.

MO KONTAN KI MO’NN FER ZEOVA KONFIANS

Kan nou ti an vakans an Out 1962, nou ti gagn enn let ar biro nasional. Ladan, ti ena bann form pou Lekol Galaad! Apre ki nou ti priye Zeova, Barbara ek mwa nou ti ranpli bann form-la ek nou ti avoy zot biro nasional. Sink mwa plitar, nou ti al Brooklyn, dan New York, pou 38^em klas Lekol Galaad, kot nou ti pou gagn enn formasion dis mwa lor bann lansegnman Biblik.

Pandan lekol Galaad, nou ti aprann boukou kitsoz lor Labib, lor lorganizasion Zeova, ek lor nou bann frer ek ser dan lemond antie. Barbara ek mwa nou ti ena apepre 25 an, alor nou ti aprann boukou ar bann lezot zelev dan nou klas. Sa ti enn gran privilez pou mwa pou travay toulezour avek Frer Fred Rusk, ki ti enn parmi nou bann instrikter. Enn parmi bann leson lor ki li ti met laksan se pou touletan donn bann konsey dan bon fason, setadir pou fer sir ki konsey ki nou pe done sorti dan Labib. Parmi bann frer ki ti fer bann diskour pandan nou bann kour, ti ena bann frer ki ena boukou lexperyans kouma Nathan Knorr, Frederick Franz, ek Karl Klein. Nou ti aprann boukou ar lexanp limilite Frer A. H. Macmillan, ki ti explik nou kouma Zeova ti ed so bann serviter dan bann difikilte ki zot ti gagne ant lane 1914 ek koumansman lane 1919!

MO SANZ AFEKTASION

Inpe avan ki nou fini Lekol Galaad, Frer Knorr ti dir mwa ek Barbara ki nou ti pou al servi dan Bourounndi dan Lafrik. Nou ti al dan bibliotek Betel pou al get dan l’Annuaire komie proklamater ti ena dan Bourounndi sa lepok-la. Nou ti bien etone, parski nou pa ti trouv okenn par ki kantite proklamater ti ena dan Bourounndi. Personn pa ti ankor al pres dan sa teritwar-la! Nou ti pou al dan Lafrik, enn kontinan ki nou pa ti konn ditou. Nou ti bien trakase! Me apre ki nou ti priye, nou ti reisi re-gagn nou kalm.

Tou kitsoz ti bien diferan dan nou nouvo lafektasion: klima, kiltir, ek langaz. Asterla, nou ti bizin aprann koz Franse. Nou ti bizin osi al rod enn plas pou reste. De zour apre ki nou ti ariv laba, Harry Arnott, enn parmi nou bann kamarad Lekol Galaad, ti vizit nou avan ki li retourn dan so lafektasion dan Zanbi. Li ti ed nou pou trouv enn ti lapartman, ki ti pou vinn nou premie lakaz misioner. Me inpe letan apre, nou ti koumans gagn bann problem ar gouvernman, parski zot pa ti konn nanye lor bann Temwin Zeova. Zis kouma nou ti pe koumans apresie nou lafektasion, bann lotorite ti fer nou kone ki nou pa ti pou kapav res dan pei, amwin ki nou gagn enn permi travay. Malerezman, nou ti bizin kit Bourounndi. Nou ti bizin osi adapte ar enn lot pei, Ouganda.

Mem si nou ti trakase parski nou ti pe al Ouganda san viza, nou ti fer Zeova konfians. Enn frer ki ti sorti Kanada ek ki ti pe servi dan Ouganda ti explik nou sitiasion ar enn ofisie limigrasion, ek ofisie-la ti dir nou ki nou ti kapav res de-trwa mwa ziska ki nou gagn nou permi rezidans. Sa ti enn prev ki Zeova ti pe ed nou.

Nou lafektasion dan Ouganda ti bien diferan ar Bourounndi. Travay predikasion ti deza koumanse dan Ouganda, mem si ti ena zis 28 Temwin dan pei-la. Dan Ouganda, boukou dimounn ti koz angle. Me nou ti realize ki, si nou ti anvi ki nou bann etidian progrese, nou ti pou bizin aprann enn parmi bann lang ki koze dan pei-la. Nou ti koumans prese dan rezion Kampala, kot boukou dimounn koz Louganda. Alor, nou ti koumans aprann sa lang-la. Nou ti pran boukou lane pou aprann koz bien Louganda, me gras-a sa lang-la, nou ti vinn pli efikas dan nou minister. Nou ti koumans konpran pli bien seki nou bann etidian Labib ti bizin aprann pou zot progrese. Kan zot ti trouve ki kantite nou ti vremem interese ar zot, nou bann etidian ti ouver zot leker ar nou ek zot ti dir nou seki zot ti resanti konsernan bann kitsoz ki zot ti pe aprann.

NOU FER PLIZIR VWAYAZ

Nou ti bien kontan pou ed bann dimounn aprann laverite. Ek nou ti plis zwaye ankor kan ti demann nou pou fer servis sirkonskripsion partou dan pei. Nou ti travay anba biro nasional Kenia ek nou ti al partou dan pei pou gete ki teritwar ti plis bizin pionie spesial. Bann dimounn ki pa ti konn bann Temwin Zeova plizir fwa finn montre lospitalite anver nou. Zot ti bien akeyir nou ek zot ti mem prepar manze pou nou.

Mo ti fer enn lot vwayaz apre sa. Mo ti pran enn trin depi Kampala ek apre de zour, mo ti ariv dan lavil Mombasa dan Kenia. Lerla, mo ti pran enn bato pou al Sesel, enn group zil ki trouv dan Losean Indien. Plitar, ant 1965 ek 1972, Barbara ti akonpagn mwa dan bann vizit ki mo ti fer dan Sesel. O-koumansman, ti ena zis de proklamater dan Sesel, me plitar finn gagn enn group ek apre enn lasanble inn forme. Plitar, mo ti osi al vizit bann frer dan Leritre, Letiopi, ek Soudan.

Sitiasion dan Ouganda ti sanze bien vit kan enn group militer ti met gouvernman deor ek ti pran pouvwar. Bann lane ki ti vini apre ti bien difisil, ek sa ti aprann mwa ki li pli bon kan nou obeir bann lotorite, parey kouma Labib dir. (Mark 12:17) Enn zour, gouvernman ti deside ki tou bann rezidan etranze ti bizin al anrezistre zot dan stasion lapolis ki pli pre kot zot reste. Mo ti obeir deswit. De-trwa zour apre, kan mo ti pe roule dan Kampala, lapolis ti aret mwa ek enn lot misioner. Nou leker ti pe bat dan mole! Zot ti dir nou ki nou ti bann espion ek zot ti amenn nou dan zot kazern santral. Laba, nou ti explik zot ki nou ti bann misioner ek ki nou pa ti fer nanye demal. Mem si nou ti dir zot ki nou ti fini fer nou lanrezistreman stasion lapolis, zot pa ti ekout nou. Lerla, bann gard arme ti amenn nou stasion lapolis ki ti pli pre ar lakaz misioner. Nou ti bien soulaze kan enn ofisie dan stasion-la ti rekonet nou. Li ti kone ki nou ti fini fer nou lanrezistreman, ek li ti dir bann gard-la les nou ale!

Sa lepok-la, souvan nou ti pe fer bann move lexperyans kan bann solda ti met bann baraz lor sime, sirtou kan sa bann solda-la ti bien sou. Kanmem sa, sak fwa nou ti priye Zeova, nou ti res kalm, ek bannla ti les nou pase. Malerezman, an 1973, tou bann misioner etranze ti gagn lord pou kit Ouganda.

Nou ti gagn enn lot afektasion. Nou ti bizin al servi dan Kot Divwar, ki trouv dan lwes Lafrik. Sa ti enn gran sanzman pou nou. Nou ti bizin adapte ar enn nouvo kiltir, re-koumans koz Franse, ek adapte nou ar bann lezot misioner ki ti sorti diferan pei. Me ankor enn fwa, nou ti trouv lame Zeova kan bann dimounn sinser dan nou teritwar ti koumans progrese bien vit. Barbara ek mwa nou ti trouve kouma, kan nou fer Zeova konfians, Li fer nou bann semin vinn drwat.

Me apre sa, nou ti gagn enn move nouvel. Bann dokter ti dekouver ki Barbara ti ena enn kanser. Plizir fwa nou ti retourn Lerop pou li fer so bann tretman, ek an 1983 nou ti realize ki nou ti pou nepli kapav servi dan Lafrik. Sa ti enn gran desepsion pou nou toulede!

SITIASION SANZE

Nou ti dan Betel Langleter kan Barbara ti mor akoz so kanser. Lafami Betel ti bien soutenir mwa. Ena enn koup an partikilie ki ti bien ed mwa pou adapte ar mo nouvo sitiasion ek pou kontign fer Zeova konfians. Plitar, mo ti zwenn enn ser ki ti pe vinn servi detanzantan dan Betel. Li ti apel Ann. Li ti enn pionie spesial dan lepase, li ti bien kontan Zeova, ek li ti enn kikenn ki bien spiritiel. Ann ek mwa nou’nn marye an 1989, ek nou ankor pe servi dan Betel Langleter.

Depi 1995 ziska 2018, mo ti gagn privilez pou servi kouma enn reprezantan biro mondial (ki lontan nou ti apel sirveyan zonn), ek mo ti vizit preske 60 pei. Sak vizit ki mo ti fer, mo ti trouve kouma Zeova ti beni so bann serviter dan diferan fason.

An 2017, pandan enn mo bann vizit, mo ti retourn Lafrik. Mo ti bien kontan pou amenn Ann pou premie fwa dan Bourounndi, ek nou toulede nou ti bien kontan pou trouve ki kantite dimounn ti vinn dan laverite. Dan mem semin ki mo ti prese lakaz-lakaz an 1964, azordi ena enn zoli Betel. Ek ena plis ki 15,500 proklamater dan pei-la azordi.

Mo ti bien kontan kan mo ti gagn lalis mo bann vizit pou lane 2018. Parmi bann pei ki mo ti bizin vizite, ti ena Kot Divwar. Kan nou ti ariv dan Abidjan, kapital Kot Divwar, se koumadir mo ti pe rant lakaz. Lor lalis nimero telefonn bann frer ki ti travay dan Betel, mo ti remarke ki frer ki ti res akote ar mo lasam ti apel Frer Sossou. Mo ti konn enn Frer Sossou ki ti pe servi kouma sirveyan lavil kan mo ti dan Abidjan. Me mo ti pe fer erer. Sa frer-la ti Frer Sossou so garson.

Zeova inn tini so promes. Dan mo bann difikilte, mo’nn aprann ki, kan nou fer Zeova konfians, Li vremem fer nou bann semin vinn drwat. Alor, mo anvi kontign swiv sa semin-la ziska ki li amenn mwa dan lemond nouvo.​—Prov. 4:18.