Eski Bann Temwin Zeova Obliz Bann Dimounn pou Sanz Relizion?

Non, nou pa fer sa. Nou finn dir dan nou magazinn prinsipal, Latour Degard: “Pa bon fors bann dimounn pou sanz zot relizion.”a Nou pa fer presion lor bann dimounn pou sa bann rezon-la:

• Zame Zezi ti fors bann dimounn pou aksepte so bann lansegnman. Li ti kone ki tigit dimounn ti pou aksepte so mesaz. (Matie 7:13, 14) Kan sertin so bann disip ti soke par seki Zezi ti dir ek ti kit li, Zezi ti les zot ale. Li pa ti fors zot pou reste.​—Zan 6:60-62, 66-68.

• Zezi ti ansegn so bann disip pou pa fors lezot pou sanz zot krwayans. Olie fors bann dimounn pou aksepte mesaz bon nouvel lor Rwayom Bondie, bann disip ti bizin rod bann ki ti anvi ekoute.​—Matie 10:7, 11-14.

• Si enn dimounn sanz so relizion parski ki li finn forse pou fer li, so ladorasion pa pou ena valer parski Bondie aksepte bann ki ador Li avek tou zot leker.​—Deteronom 6:4, 5; Matie 22:37, 38.

Eski nou prese pou konverti bann dimounn?

Li vre ki nou partaz mesaz ki ena dan Labib “dan rezion pli lwin lor later,” ek nou fer sa “an piblik ek lakaz-lakaz,” parey kouma Labib inn donn lord pou fer. (Zistwar Bann Apot 1:8; 10:42; 20:20) Parey kouma avek bann premie Kretien, parfwa sertin dir ki nou pe konverti bann dimounn dan enn fason ilegal. (Zistwar Bann Apot 18:12, 13) Me sa bann akizasion-la fos. Nou pa fors bann dimounn pou krwar nou mesaz. Me plito, nou krwar ki bann dimounn lib pou gagn enn konesans nou mesaz ek lerla zot deside par zotmem seki zot pou fer dapre seki zot finn aprann.

Nou pa fors bann dimounn pou sanz zot relizion, ni nou servi relizion pou partisip dan bann aktivite politik. Ek nou pa donn bann lavantaz materyel ouswa sosial pou gagn bann nouvo manb. Li pa parey kouma sertin ki dir ki zot Kretien me zot pe dezonor Zezi Kris kan zot pe fer sa bann kitsoz-la.b

Eski enn kikenn ena drwa sanz so relizion?

Wi, Labib montre ki bann dimounn ena drwa sanz zot relizion. Li koz lor boukou ki pa finn swazir pou swiv relizion zot fami ek ki finn desid pou ador vre Bondie par zotmem. Nou ena par exanp Abraam, Rit, sertin dimounn dan Atenn, lapot Pol ek lezot ankor. (Zozwe 24:2; Rit 1:14-16; Zistwar Bann Apot 17:22, 30-34; Galat 1:14, 23) Anplis, Labib rekonet drwa ki enn dimounn ena pou abandonn ladorasion ki Bondie aprouve mem si li enn move desizion.​—1 Zan 2:19.

Drwa ki enn dimounn ena pou sanz relizion, li soutenir par la Déclaration universelle des droits de l’homme ki l’ONU apel « fondement du droit international relatif aux droits de l’homme. » Sa dokiman-la dir ki tou dimounn lib pou sanz so relizion ouswa so krwayans, pou rode, resevwar ek partaz bann informasion ek lide, mem bann lide lor relizion.c Dapre drwa ki zot ena, zot bizin osi respekte drwa ki lezot ena pou gard zot krwayans ek drwa ki lezot ena pou pa aksepte bann lide ar ki zot pa dakor.

Eski enn kikenn dezonor tradision so fami ouswa so kiltir si li sanz so relizion?

Non, fode pa li koumsa. Labib ankouraz nou pou ena respe pou tou dimounn, ninport ki relizion dimounn-la ete. (1 Pier 2:17) Anplis, bann Temwin Zeova obeir komannman ki dir ki bizin onor nou bann paran, mem si zot pena mem krwayans ki nou.​—Efezien 6:2, 3.

Me pa tou dimounn ki dakor ar seki Labib dir. Enn madam ki finn grandi dan Zambi rakonte: “Dan mo kominote, kan enn kikenn sanz so relizion, koumadir li pe trayir so fami ek so kominote.” Sa madam-la finn fer fas ar sa problem-la kan li ti enn adolesan. Li ti koumans etidie Labib avek bann Temwin Zeova ek inpe letan apre li ti desid pou sanz so relizion. Li dir: “Mo bann paran ti touletan pe dir mwa ki mo ti pe bien desevwar zot ek ki mo ti pe abandonn zot. Sa ti bien dir pou mwa parski mo ti anvi ki mo bann paran aksepte swa ki mo’nn fer. . . . Mem si mo’nn deside pou res fidel anver Zeova plito ki ar bann tradision, sa pa vedir ki mo pe trayir mo fami.”d