Eski Jésus li Bondié Tout-Puissant?

Bann reponse ki souvent nou tendé:

▪ “Oui, Jésus li Bondié Tout-Puissant.”

▪ “Jésus, c’est Bondié ki’nn vini ek ki’nn manifesté li-mem dan la chair.”

Ki Jésus ti dire?

▪ “Si zot ti content moi, zot ti pou content ki mo pé al kot mo Papa, parski mo Papa pli grand ki moi.” (Jean 14:28) Jésus ti reconette ki li ek so Papa zot pa ti egal.

▪ “Mo pé monte kot mo Papa ek zot Papa ek kot mo Bondié ek zot Bondié.” (Jean 20:17) Jésus pa ti presente li-mem couma Bondié mais par so parole li’nn montré ki Bondié Li enn lot Personne separé.

▪ “Mo pa finn koz par mo prop l’autorité, mais mo Papa ki finn envoye moi Li-mem finn donne moi enn commandement concernant seki mo bizin dire ek seki mo bizin kozé.” (Jean 12:49) Bann l’enseignement Jésus pa ti sorti ar li, mais ar so Papa.

JÉSUS ti dire ki li Garson Bondié, pa Bondié Tout-Puissant. Si Jésus ti Bondié, ar kisannla li ti pé prié kan li ti lor la terre? (Matthieu 14:23; 26:26-29) Li pa pou logik pou croire ki Jésus ti pé zis faire semblant koz avek enn lot kikenn!

Kan deux parmi so bann disciple ti demann li pou donne zot bann position special dan so Royaume, Jésus ti reponn: “Pou assize dan mo coté droite ou-soit dan mo coté gauche, pa moi ki donne sa place-la, mais sa li pou bann dimoune pou ki mo Papa inn prepare sa.” (Matthieu 20:23) Eski Jésus ti pé koz zot menti kan li ti dire ki li pena pouvoir pou faire seki zot demann li? Non! Au contraire, li ti reconette avek humilité ki selman Bondié ena pouvoir pou prend enn decision pareil. Jésus ti aussi expliké ki ena certain kitsoz ki ni li ni bann ange pa koné mais selman so Papa.—Marc 13:32.

Eski Jésus ti inferieur ar Bondié selman kan li ti lor la terre en tant ki enn humain? Non. Mem apré so la mort ek so resurrection, la Bible decrire Jésus couma inferieur ar Bondié. L’apotre Paul rappel nou ki “chef Christ c’est Bondié.” (1 Corinthiens 11:3, Parole vivante) La Bible dire ki dan l’avenir “kan tou kitsoz pou . . . vinn enba so l’autorité, lerla, Garson-la li-mem pou rann hommage sa Kikenn ki finn soumette tou kitsoz ar li-la ek li pou soumette ar so l’autorité. C’est coumsa ki Bondié pou vinn pou tou ek en tou, souverain ki personne pa kapav contesté so l’autorité.”—1 Corinthiens 15:28, Parole vivante.

Li clair, ki Jésus li pa Bondié Tout-Puissant. A cause sa-mem ki kan li ti koz lor so Papa, li ti dire “mo Bondié.”—Révélation 3:2, 12; 2 Corinthiens 1:3, 4.a

[Note]

[Zimage lor page 7]

Jésus ti dire ki ena certain kitsoz ki ni li ni bann ange pa koné mais selman so Papa