Eski Bondié accepté tou forme l’adoration?

Bann reponse ki souvent nou tendé:

▪ “Tou religion amenn nou vers Bondié.”

▪ “Seki ou croire pa important, pourvi ou sincere.”

Ki Jésus ti dire?

▪ “Rente par la porte ki tipti; parski chemin ki al vers destruction, li grand ek large, ek ena beaucoup dimoune ki pé passe par la; mais chemin ki amenn vers la vie, li serré, so la porte tipti, ek zis enn tigit dimoune ki trouve li.” (Matthieu 7:13, 14) Jésus pa ti croire ki tou chemin amenn vers Bondié.

▪ “Sa jour-la beaucoup pou dire moi, ‘Seigneur, Seigneur, eski c’est pa par to nom ki nou’nn prophetisé, ek par to nom ki nou’nn tire bann demon, ek par to nom ki nou’nn faire bann mirak?’ Ek pourtant, lerla mo pou dire zot franc: Jamais mo ti konn zot! Sorti devant moi, allé, zot ki pratik seki kont la loi.” (Matthieu 7:22, 23) Jésus pa approuve tou bann ki pretann suive li.

BEAUCOUP dimoune ki croire dan Bondié attache enn grand l’importance ar zot bann croyance ek zot bann tradition. Mais ki pou arrivé si sa bann l’enseignement-la zot pa en accord avek seki ena dan Parole Bondié, la Bible? Jésus ti montré danger ki ena kan suive tradition bann dimoune, kan li ti dire bann chef religieux so lepok: “Zot finn faire parole Bondié perdi tou so valeur a cause zot tradition.” Apré, li ti dire sa bann parole ki Bondié ti dire-la: “Sa peuple-la honore moi ar zot la levre, mais zot leker bien loin ar moi. C’est pou nanyin ki zot contigne adore moi, parski zot enseigne bann commandement dimoune couma bann doctrine.”—Matthieu 15:1-9; Isaïe 29:13.

Bann croyance zot important, mais conduite aussi bien important. La Bible dire concernant certain dimoune ki ti pretann adore Bondié: “Zot declare en publik ki zot konn Bondié, mais zot renié Li par zot bann action.” (Tite 1:16) Avredir, la Bible dire concernant bann ki pé vive dan nou lepok: “Au lieu ki zot content Bondié, zot pou content plaisir. Zot pou faire semblant ki zot fidele ar Bondié, mais en realité zot pou rejette puissance ki la foi ena. Vire to ledo ar sa bann dimoune-la.”—2 Timothée 3:4, 5, Parole de Vie.

Pou ki Bondié approuve nou l’adoration, nou bizin sincere, mais sa li pa assez. Kifer? Parski mem si enn dimoune li sincere, li kapav dan l’erreur. A cause sa, li bien important gagne enn connaissance exact lor Bondié. (Romains 10:2, 3) Si nou gagne sa connaissance-la ek nou agir en accord avek seki la Bible dire, sa pou aide nou faire Bondié plaisir. (Matthieu 7:21) Vrai-mem, vrai religion implik ki nou ena bann bon mobile, bann croyance ki exact, ek bann bon action. Ek bann bon action vedir faire volonté Bondié chaque jour!—1 Jean 2:17.

Si ou ti pou content konn plus lor seki la Bible dire nou concernant Bondié, pa hesité pou contacté bann Témoins de Jéhovah pou demann zot enn l’etude Biblik gratis.

[Zimage lor page 9]

Vrai religion implik ki nou ena bann bon mobile, bann croyance ki exact,ek bann bon action