Couma trouve bonheur famillial

Jennya raconté: Mama Ryan pa ti hesité pou montré ki li pa ti content moi. Mais mo bann parent aussi ti montré ki zot pa ti content Ryan. En realité, jamais mo’nn trouve zot agir dan enn fason desagreable coumsa! Visite nou bann parent, ki li mo bann parent ou-soit bann parent Ryan, ti vinn enn kitsoz bien-bien stressant.

Ryan dire: Pou mo mama, personne pa ti assez bon pou so bann zenfant. Alors, depuis commencement-mem, li pa ti content Jenny. Ek li ti pareil avek bann parent Jenny—touletan zot ti critik moi. Probleme-la, seki apré sa, Jenny ek moi, sakenn nou ti commence defann nou bann parent ek nou ti critik nou camarade.

KITFOIS bann comedien content faire bann joke lor bann probleme ki bann couple gagné avek zot beau-parent, mais pou bann ki vive sa, c’est pa enn kitsoz comik ditou. Reena, enn madame ki vive en Inde, dire: “Pendant plusieurs l’année, mo belle-mere ti mette so néné dan nou couple. Parski mo pa ti kapav dire li nanyin, mo ti tire mo colere lor mo mari. Mo ti ena l’impression ki li ti pé bizin touletan choisir entre montré-li enn bon mari ek enn bon garson.”

Kifer certain parent mele-zot dan la vie zot bann zenfant ki’nn marié? Jenny, ki nou fek mentionné, donne enn raison: “Kitfois zot trouve sa difficile ki enn kikenn ki jeune ek ki pena l’experience occupe zot garson ou-soit zot tifi.” Dilip, mari Reena, al pli loin encore: “Bann parent ki’nn faire bann sacrifice pou zot zenfant ek finn elevé zot, kapav ena l’impression ki asterla zot zenfant pé mette zot enn coté. Zot kapav aussi tracassé ki zot garson ou-soit zot tifi pena sagesse ki bizin pou reussi so mariage.”

Mais nou bizin reconette ki parfois, c’est bann couple la-mem ki invite zot beau-parent pou mele-zot dan zot la vie. Par exemple, anou guette l’exemple Michael ek Leanne, enn couple ki vive en Australie. Michael dire: “Leanne sorti dan enn famille bien soudé kot zot tou senti-zot libre pou kozé. Alors, apré nou mariage, li ti contigne demann so papa conseil lor bann decision ki en realité c’est nou deux ki ti bizin prend. So papa ti ena enn grand l’experience, mais mo ti senti-moi blessé ki li ti al guette so papa au lieu ki li ti vinn guette moi!”

Li clair ki bann relation avek bann beau-parent kapav crée enn tension dan la vie enn couple. Eski ou aussi ou ena sa probleme-la? Ki relation ou ena avek ou bann beau-parent, ek ki relation ou conjoint ena avek ou bann parent? Anou examine deux difficulté ki kapav existé ek fason ki ou kapav reglé zot.

DIFFICULTÉ No 1: Ou conjoint parette trop attaché ar so bann parent. Enn mari ki appel Luis, ki vive en Espagne, raconté: “Mo femme ti ena l’impression ki si nou vive loin ar so bann parent, coumadir li ti pou trahir zot.” Mais li ajouté: “Kan nou garson ti né, mo bann parent ti vinn guette li preské toulé-jour. Sa ti faire mo femme stressé ek ti faire nou gagne beaucoup discussion.”

Bann principe: Concernant mariage, la Bible dire ki kan li marié “enn zom pou quitte so papa ek so mama ek li pou bizin attaché avek so madame ek zot pou bizin vinn enn sel la chair.” (Genèse 2:24) Vinn “enn sel la chair” c’est plus ki zis vive ensam. Sa vedir ki enn mari ek so femme forme enn nouveau famille ki passe avant famille sakenn so camarade. (1 Corinthiens 11:3) Bien sur, zot toulé-deux bizin contigne honore zot bann parent, ek souvent sa implik ki prend zot compte. (Éphésiens 6:2) Mais ki ou pou faire si fason ki ou conjoint faire sa, donne ou sentiment ki li pé mette ou enn coté?

Seki ou kapav faire: Examine sa situation-la dan enn fason positif. Eski vrai-mem ou conjoint trop attaché ar so bann parent, ou-soit eski c’est ou ki pena sa qualité relation-la avek ou bann parent? Si c’est sa, eski fason ki ou finn elevé ena enn l’effet lor fason ki ou considere sa situation-la? Eski li possible ki ou jaloux?—Proverbes 14:30; 1 Corinthiens 13:4; Galates 5:26.

Pou ou kapav reponn sa bann question-la, ou bizin examine ou-mem dan enn fason honnete. Mais li important ki ou faire sa. Si touletan ou pé gagne probleme dan ou couple a cause bann relation avek ou bann beau-parent, alors sa vedir ki ou ena enn probleme dan ou mariage, pa avek ou bann beau-parent.

Beaucoup probleme arrivé dan enn mariage parski bann conjoint pena exactement mem l’opinion lor enn kitsoz. Eski ou kapav essaye trouve bann kitsoz dan fason ki ou conjoint li, li trouve sa? (Philippiens 2:4; 4:5) C’est seki Adrián, enn mari ki vive Mexique, ti faire. Li raconté: “Mo femme ti elevé dan enn famille ki pa ti ena enn bon l’effet lor li, alors mo ti evite pou trop frequente mo bann beau-parent. Finalement, mo ti arrete frequente zot net pendant plusieurs l’année. Sa ti faire nou gagne bann probleme dan nou mariage parski mo femme ti envie kan-mem contigne trouve so famille, surtout so mama.”

Avek le temps, Adrián ti essaye trouve enn l’equilibre. Li dire: “Mem si mo koné ki sa affecté mo femme lor plan affectif kan li trop frequente so bann parent, mo’nn comprend ki si nou pena okenn contact avek zot, sa aussi kapav faire nou gagne probleme. Autant ki possible, mo ti essaye retablir ek garde bann bon relation avek zot.”b

ESSAYE SA: Ou ek ou conjoint, ecrire lor enn papier seki zot pensé pli grand probleme zot gagné en rapport avek zot bann beau-parent. Si possible, commence par: “Mo pensé ki . . . ” Apré sa, change zot papier entre zot. Ensam, reflechi lor seki tracasse zot toulé-deux ek prend bann disposition pou zot kapav reglé sa ek faire sa avek enn l’esprit cooperatif.

DIFFICULTÉ No 2: Ou bann beau-parent mette zot néné dan ou la vie ek donne bann conseil sans ki ou’nn demann zot. Nelya, enn madame ki reste Kazakhstan, raconté: “Nou ti passe nou sept premier l’année mariage avek famille mo mari. Touletan zot ti faire nou bann reproche lor fason ki nou elevé nou bann zenfant ek aussi lor fason ki mo cuit mangé ek nettoyé. Mo ti koz sa probleme-la ar mo mari ek mo belle-mere, mais sa ti faire nou gagne plus probleme!”

Bann principe: Kan ou marié, ou nepli enba l’autorité ou bann parent. La Bible dire ki “chef tou bann zom c’est Christ; chef enn femme c’est zom”—setadir, so mari. (1 Corinthiens 11:3) Mais, couma nou finn deja dire, enn zom ek enn femme zot toulé-deux bizin honore zot parent. Proverbes 23:22 dire: “Ecoute to papa ki’nn donne toi la vie, ek pa meprise to mama zis parski li’nn vinn vié.” Mais ki ou pou faire si ou bann parent—ou-soit ou bann beau-parent—depasse zot limite ek essaye impose zot l’idée?

Seki ou kapav faire: Essayé mette-ou dan zot place ek comprend kifer ou pensé ki zot pé rente dan ou la vie. Ryan, ki nou ti mentionné avant, dire: “Dan certain cas, bann parent bizin koné ki zot encore important dan la vie zot zenfant.” Kitfois zot pa faire sa par expré ek ou kapav reglé sa probleme-la kan ou applik sa principe la Bible-la: “Contigne supporte sakenn so camarade, ek si kikenn ena enn kitsoz kont enn lot, li bizin pardonne li avek tou so leker.” (Colossiens 3:13) Mais ki ou pou faire si situation inn tellement deterioré ki a cause ou bann beau-parent, ena probleme entre ou ek ou conjoint?

Certain couple finn aprann pou fixé bann limite raisonnable ar zot parent. Sa pa vedir ki ou bizin impose ou la loi lor zot.c Souvent, zis par ou fason agir, ou kapav montré dan enn fason bien clair ki ou conjoint passe en premier dan ou la vie. Par exemple, Masayuki, enn missié ki reste Japon dire: “Kan ou bann parent donne ou enn conseil, pa dire desuite ki ou d’accord. Rappel ki ou pé fonde enn nouveau famille. Alors, avant, demann ou conjoint seki li pensé lor la.”

ESSAYE SA: Koz avek ou conjoint pou koné ki bann probleme precis zot pé gagné parski zot bann parent mette néné dan zot la vie. Ensam, ecrire bann limite ki zot kapav fixé ek couma zot pou respecté sa bann limite-la ek en mem temps honore zot parent.

Zot kapav evite beaucoup probleme avek zot bann beau-parent si zot comprend l’intention bannla ek si zot pa laisse sa situation-la crée bann tension dan zot couple. Dan sa domaine-la, Jenny reconette: “Parfois bann discussion ki ti ena entre mo mari ek moi lor nou bann parent ti dominé par nou l’emotion. Nou ti conscient ki nou ti kapav faire nou camarade beaucoup la peine kan sakenn ti dire so camarade defaut so bann parent. Mais finalement, nou finn arrete servi bann defaut nou bann beau-parent couma enn zarme, ek nou finn attak probleme-la li-mem. Asterla, nou finn vinn pli proche sakenn ar nou camarade.”

[Notes]

DEMANN OU-MEM . . .

▪ Ki bann bon qualité mo bann beau-parent ena?

▪ Couma mo kapav honore mo bann parent sans ki mo neglige mo conjoint?