Kisannla ki responsable tou bann mauvais kitsoz?

KAN li ti reflechi lor massacre ki ti ena en Rwanda en 1994, enn commandant dan l’armée Nations unies ti dire ki coumadir li ti trouve le Diable. Dan sa pays-la, ti pé touye bann dimoune enn certain race ek zot pa ti reussi arrete sa massacre-la. Enn lot dimoune ti faire enn commentaire lor sa bann crime bien cruel ki ti ena dan sa lepok-la. Li ti dire: “Si enn kikenn encore dire ki Satan pa existé, mo donne li rendez-vous kot enn grand trou kot finn jette enn quantité lekor dimoune mort dan Rwanda.” Eski c’est vrai-mem Satan le Diable ki responsable sa bann kitsoz cruel-la?

La plupart dimoune pa croire ki ena enn mauvais creature spirituel invisible ki derriere bann violence ek bann kitsoz cruel ki ena dan le monde. Beaucoup pensé ki si ena sa bann kitsoz-la c’est parski bann dimoune finn né avek tendance pou faire seki mauvais ek raison principal kifer ena bann mauvais kitsoz c’est a cause nou prop tendance egoïste. Lezot pretann ki enn groupe dimoune bien riche ek ki ena pouvoir, ki dan enn reseau secret dan le monde, pé manipule bann dimoune pendant plusieurs dizaine l’année pou zot kapav dirige le monde. Ek bien sur, ena certain ki dire ki si ena tou sa bann l’injustice ek souffrance-la c’est a cause bann gouvernement ek bann dirigeant.

Ki ou pensé ou? Kifer eski bann kitsoz ki bien cruel, bann massacre ek bann souffrance pé contigne augmenté dan le monde zordi, mem si bann dimoune pé faire zeffort pou arrete sa? Kifer eski bann dimoune, sans ki zot reflechi, pé coumadir prend enn chemin ki pou detruire zot-mem, ek pé bouche zot zoreille ar bann l’avertissement ki zot contigne gagné? Eski ena enn kikenn ki derriere tousala? Kisannla ki vrai-mem pé dirige le monde? Li possible ki ou pou etonné ar reponse sa question-la.