Anou aprann ar Parole Bondié

Sa lartik-la examine bann question ki kitfois ou finn deja demann-ou-mem ek li montré kot-sa ou kapav trouve bann reponse dan ou la Bible. Bann Témoins de Jéhovah pou bien content pou examine sa bann reponse-la avek ou.

1. Eski Bondié ecoute tou bann la priere?

Jéhovah invite bann dimoune dan tou nation pou vinn proche ar Li par la priere. (Psaume 65:2) Mais Li pa ecoute tou la priere. Par exemple, kan bann Israélite ti persisté faire bann mauvais kitsoz, Bondié ti refuse pou ecoute zot la priere. (Isaïe 1:15) Ek aussi, si enn mari maltraite so femme, sa kapav blok so la priere. (1 Pierre 3:7) Pourtant, Bondié pou ecoute la priere mem bann dimoune ki faire bann grand peché si zot repenti.​—Lire 2 Chroniques 33:9-13.

2. Couma nou bizin prié?

La priere li enn privilege ek li forme partie dan nou l’adoration, alors nou bizin prié zis Jéhovah. (Matthieu 4:10; 6:9) Nou bann dimoune imparfait, alors nou bizin prié au nom Jésus parski li-mem “chemin” ki Bondié inn choisir. (Jean 14:6) Jéhovah pa envie ki nou repete bann la priere ki nou finn aprann par coeur ou-soit ki nou lire dan enn livre. Mais Li envie ki nou la priere sorti dan nou leker.​—Lire Matthieu 6:7; Philippiens 4:6, 7.

Nou Createur kapav mem tann bann la priere ki nou faire en silence. (1 Samuel 1:12, 13) Li invite nou pou prié dan chaque l’occasion, par exemple, gramatin ek tantot, kan nou mangé, ek kan nou faire face ar bann probleme.​—Lire Psaume 55:22; Matthieu 15:36.

3. Kifer bann chretien bizin joinde ensam?

Li pa facile pou vinn proche ar Bondié parski nou pé vive parmi bann dimoune ki pena la foi dan Bondié ek ki bouffonne so promesse pou amenn la paix lor la terre. (2 Timothée 3:1, 4; 2 Pierre 3:3, 13) Alors, nou bizin frequente nou bann frere ek soeur, parski sa pou encourage nou.​—Lire Hébreux 10:24, 25.

Ou kapav vinn proche ar Bondié si ou faire camarade avek bann dimoune ki content Li. Bann reunion ki bann Témoins de Jéhovah faire, donne ou l’occasion pou gagne bann bienfait kan ou trouve la foi lezot.​—Lire Romains 1:11, 12.

4. Couma ou kapav vinn proche ar Bondié?

Ou kapav vinn proche ar Jéhovah kan ou medite lor seki ou finn aprann dan so Parole. Reflechi lor so bann action, so bann instruction ek so bann promesse. Kan ou prié ek medité, sa faire ou developpe enn grand reconnaissance pou l’amour Bondié ek so sagesse.​—Lire Josué 1:8; Psaume 1:1-3.

Ou kapav vinn proche ar Bondié zis si ou faire Li confiance setadir si ou ena la foi en Li. Mais la foi, li pareil couma enn kitsoz vivant ki nou bizin nourri. Ou bizin contigne nourri ou la foi kan ou ré-examine bann kitsoz lor ki ou croyance basé.​—Lire 1 Thessaloniciens 5:21; Hébreux 11:1, 6.

5. Couma ou kapav gagne bann bienfait kan ou vinn proche ar Bondié?

Jéhovah prend soin bann ki content Li. Li protege zot ar n’importe ki kitsoz ki kapav mette zot la foi ek zot l’esperance pou vive pou touletan, en danger. (Psaume 91:1, 2, 7-10) Li mette nou en garde kont bann fason vive ki mette en danger nou la santé ek nou bonheur. Jéhovah enseigne nou ki pli bon fason nou kapav amenn nou la vie.​—Lire Psaume 73:27, 28; Jacques 4:4, 8.

Pou gagne plus renseignement, guette chapitre 17 dan livre Ki la Bible enseigné vrai-mem?, publié par bann Témoins de Jéhovah.