Ena confiance en Jéhovah, “Bondié ki donne tou consolation”
“Anou beni Bondié ek Papa nou Seigneur Jésus Christ, Papa ki ena beaucoup misericorde ek Bondié ki donne tou consolation.”—2 COR. 1:3.
1. Ki bann dimoune bizin, n’importe ki l’age zot ena?
DEPUIS nou naissance, nou bizin enn kikenn pou reconforte nou. Enn ti-baba ploré pou faire koné ki li bizin reconfort. Kitfois li envie ki enn kikenn prend li ou-soit donne li mangé. Mem kan nou vinn grand, souvent nou bizin ki lezot reconforte nou. Nou ressenti sa surtout kan nou pé passe dan bann situation difficile.
2. Couma Jéhovah donne l’assurance ki Li pou reconforte bann ki ena confiance en Li?
2 Bann membre nou famille ek bann camarade kapav souvent donne nou enn certaine reconfort. Selman, parfois ena bann situation ki faire nou souffert kot okenn dimoune pa kapav reconforte nou. Zis Bondié ki kapav reconforte nou n’importe ki quantité nou pé souffert. So Parole donne nou sa l’assurance-la: “Jéhovah pré avek tou bann ki invok Li, . . . Li pou tann zot kan zot demann Li l’aide.” (Ps. 145:18, 19) Oui vrai-mem, “lizié Jéhovah lor bann dimoune ki juste, ek so zoreille tann zot suppliye Li pou gagne l’aide.” (Ps. 34:15) Mais si nou envie ki Jéhovah soutenir nou ek reconforte nou, nou bizin ena confiance en Li. David ti montré sa dan enn fason clair kan li ti chanté: “Jéhovah pou vinn enn protection pou bann ki maltraité, oui, enn protection pou bann ki dan detresse. Bann dimoune ki konn to nom pou mette zot confiance en toi, parski jamais to pa pou quitte bann ki rod toi, ah Jéhovah.”—Ps. 9:9, 10.
3. Ki l’exemple Jésus ti servi pou montré l’amour ki Jéhovah ena pou So bann serviteur?
3 Bann adorateur Jéhovah ena valeur pou Li. Jésus ti montré sa bien kan li ti dire: “Dimoune vann cinq moineau pou deux piece la monnaie ki ena enn tigit valeur, pa vrai? Pourtant Bondié pa blié enn sel parmi zot. Mais Li finn mem compte tou bann cheveux lor zot, zot la tête. Pa peur; zot vaut plus ki beaucoup moineau.” (Luc 12:6, 7) A travers prophete Jérémie, Jéhovah ti dire so peuple: “Mo finn content toi avek enn l’amour ki dure pou touletan. C’est a cause sa ki mo finn attire toi avek l’amour fidele.”—Jér. 31:3.
4. Kifer nou kapav ena confiance dan bann promesse Jéhovah?
4 Si nou ena confiance en Jéhovah ek dan realisation so bann promesse, sa kapav reconforte nou dan bann moment difficile. Alors, nou bizin ena mem confiance ki Josué. Li ti dire: “Dan tou bann bon parole ki Jéhovah zot Bondié inn dire zot, pena enn sel parole ki pa finn accompli. Tou finn realisé pou zot. Pena enn sel parole ladan ki pa finn accompli.” (Jos. 23:14) En plus, nou kapav sur ki mem si nou pé souffert pendant enn certain temps a cause bann situation bien difficile, “Bondié Li fidele” ek jamais Li pou abandonne so bann serviteur ki fidele.—Lire 1 Corinthiens 10:13.
5. Couma nou kapav reconforte lezot?
5 L’apotre Paul ti dire ki Jéhovah Li “Bondié ki donne tou consolation.” “Consolé” vedir soulage enn kikenn ki dan malheur ou-soit ki bien chagrin. Nou faire sa kan nou aide li dan so la peine ou-soit dan so chagrin ek nou reconforte li. Pena okenn doute ki c’est seki Jéhovah faire. (Lire 2 Corinthiens 1:3, 4.) Personne ni nanyin pa kapav empeche nou Papa ki dan le ciel faire sa, ek Li ena tou sorte qualité moyen pou reconforte bann dimoune ki content Li. En retour, nou kapav reconforte nou bann frere ek soeur ki “dan tou sorte qualité probleme.” Nou kapav faire sa “grace a consolation ki nou-mem nou gagné ar Bondié.” Eski sa pa montré bien ki Jéhovah ena enn capacité ki personne pena pou reconforte bann dimoune ki desesperé?
Faire face ar bann situation ki faire nou souffert
6. Ki bann kitsoz ki kapav faire enn dimoune souffert?
6 Nou bizin reconfort dan beaucoup domaine nou la vie. Enn parmi bann pli grand chagrin ki nou kapav gagné, c’est kan enn kikenn ki nou content, mort, surtout si c’est nou conjoint, ou-soit nou zenfant. Kitfois enn dimoune pou aussi bizin reconfort parski lezot pé faire discrimination ar li. Kitfois aussi enn dimoune bizin reconfort parski li ena enn mauvais la santé, li pé rente dan l’age, li misere, li pé gagne bann probleme dan so menage, ou-soit a cause bann mauvais kitsoz ki pé passé dan le monde.
7. (a) Dan bann situation ki faire nou souffert, ki qualité reconfort nou bizin? (b) Ki Jéhovah kapav faire pou gueri enn leker “ki cassé ek ki dan la peine”?
7 Dan bann moment difficile, kitfois nou bizin reconfort pou soulage nou leker, nou l’esprit, nou bann sentiment, ek ki pou faire nou di-bien lor plan physik ek spirituel. Anou prend l’exemple nou leker. Parole Bondié reconette ki nou leker kapav ’cassé ek dan la peine.’ (Ps. 51:17) Pena doute ki Jéhovah koné couma pou agir dan sa situation-la, parski “Li gueri bann dimoune ki ena enn grand chagrin dan zot leker, ek Li mette enn bandage kot zot ena douleur.” (Ps. 147:3) Mem dan bann situation bien grave, Bondié kapav soulage enn leker ki dan la peine si nou prié Li avek enn grand la foi ek nou obeir so bann commandement.—Lire 1 Jean 3:19-22; 5:14, 15.
8. Kan nou la tête fatigué, couma Jéhovah kapav aide nou?
8 Souvent nou l’esprit bizin gagne reconfort a cause plusieurs different l’epreuve ki faire nou la tête fatigué. Si nou compte lor nou prop la force, kitfois nou pa pou kapav faire face ar sa bann l’epreuve-la. Mais, enn psalmiste ti chanté: “Kan ti ena beaucoup pensée ki ti pé tracasse moi, to bann consolation ti’nn commence caresse mo nâme.” (Ps. 94:19) En plus, Paul ti ecrire: “Pa tracassé pou okenn kitsoz, mais dan tou kitsoz, par la priere, supplication avek bann remerciement, demann Bondié seki zot bizin; ek la paix Bondié ki depasse tou pensée, pou protege zot leker ek zot l’esprit, par moyen Christ Jésus.” (Phil. 4:6, 7) Kan nou lire ek nou medite lor bann pensée ki ena dan la Bible, sa kapav bien aide nou pou faire face ar bann tracas ki fatigue nou la tête.—2 Tim. 3:15-17.
9. Couma nou kapav faire face ar bann sentiment negatif?
9 Parfois, li kapav arrivé ki nou tellement decouragé ki nou commence ena bann sentiment negatif. Kitfois nou ena l’impression ki nou pa kapav rempli enn certain responsabilité biblik ou-soit enn privilege dan congregation. La aussi, Jéhovah kapav reconforte ek aide nou. Anou prend enn l’exemple: kan Josué ti gagne mission pou dirige bann Israélite ek pou faire zot al la guerre kont bann nation ennemi ki ti bien puissant, Moïse ti dire le peuple: “Prend courage ek reste fort. Pa gagne peur ek pa tremblé devant zot, parski Jéhovah to Bondié pé marche avek toi. Jamais Li pa pou quitte toi, ni pou abandonne toi net.” (Deut. 31:6) Avek l’aide Jéhovah, Josué ti kapav dirige peuple Bondié dan la Terre promise ek ti faire zot gagne la victoire lor tou zot bann l’ennemi. Avant sa, Jéhovah ti aide Moïse dan mem fason kot la mer Rouge.—Ex. 14:13, 14, 29-31.
10. Si bann moment difficile pé affecté nou la santé physik, ki kapav aide nou?
10 Bann l’evenement ki faire nou souffert kapav ena enn l’effet negatif lor nou la santé physik. Pena doute, si nou mange couma bizin, nou repose-nou assez, nou faire l’exercice, ek nou reste prop, sa kapav ena enn bon l’effet lor nou. Si nou pense aussi lor seki la Bible dire concernant l’avenir, sa kapav ena enn bon l’effet lor nou la santé. Alors, si nou pé passe par enn moment difficile, sa pou aide nou si nou rappel ki Paul aussi ti souffert ek reflechi lor so bann parole encourageant: “Nou bloké dan toute sorte fason, mais nou pa dan enn position kot nou pa kapav bougé; nou pa koné ki pou faire, mais nou cas pa desesperé; nou gagne persecution, mais Jéhovah pa abandonne nou; pé jette nou en-bas, mais nou pa mort.”—2 Cor. 4:8, 9.
11. Couma nou kapav combatte bann faiblesse spirituel?
11 Certain l’epreuve kapav ena enn mauvais l’effet lor nou la santé spirituel. La aussi, Jéhovah kapav aide nou. So Parole donne nou sa l’assurance-la: “Jéhovah soutenir tou bann ki pé tombé, ek Li redresse tou bann ki courbé.” (Ps. 145:14) Pou combatte nou bann faiblesse spirituel, nou bizin rod l’aide avek bann ancien. (Jacq. 5:14, 15) Ek nou bizin contigne pense l’esperance concernant la vie eternel ki kapav soutenir nou kan nou pé passe par bann l’epreuve ki pé testé nou la foi.—Jean 17:3.
L’exemple bann dimoune ki Bondié inn reconforté
12. Couma Jéhovah ti reconforte Abraham?
12 Enn psalmiste ki ti inspiré par Bondié ti dire: “Rappel parole ki to [Jéhovah] ti dire to serviteur, parole ki to ti faire moi attann. Sa-mem ki console moi dan mo souffrance, parski to prop parole finn garde moi vivant.” (Ps. 119:49, 50) Azordi, dan Parole ki Jéhovah inn faire ecrire, ena beaucoup l’exemple bann dimoune ki Bondié inn reconforté. Par exemple, kitfois Abraham ti bien tracassé kan li ti aprann ki Jéhovah ti pou detruire Sodome ek Gomorrhe. Sa serviteur fidele-la ti demann Bondié: “Eski vrai-mem to pou touye enn dimoune juste ensam avek enn mauvais dimoune?” Jéhovah ti reconforte Abraham kan Li ti donne li l’assurance ki si Li ti trouve zis 50 dimoune juste, Li pa ti pou detruire Sodome. Mais encore cinq fois, Abraham ti demann Jéhovah: ’Ki to pou faire si ena zis 45 dimoune juste? 40? 30? 20? 10? A chaque fois, Jéhovah ti montré beaucoup patience ek bonté kan Li ti donne Abraham l’assurance ki Li pa ti pou detruire Sodome si Li ti trouve sa quantité dimoune juste-la. Malgré ki pa ti ena mem dix dimoune juste dan sa l’endroit-la, Jéhovah ti protege Lot ek so bann tifi.—Gen. 18:22-32; 19:15, 16, 26.
13. Couma Hanna ti montré ki li ti ena confiance en Jéhovah?
13 Hanna, madame Elqana, ti bien envie gagne enn zenfant. Mais li ti sterile ek sa ti bien fatigue-li. Li ti prié Jéhovah lor-la, ek grand pretre Éli ti dire li: “Ki Bondié Israël donne toi seki to’nn demann Li.” Sa ti reconforte Hanna ek so “figure ti nepli parette tracassé.” (1 Sam. 1:8, 17, 18) Hanna ti ena confiance en Jéhovah, ek li ti laisse tou dan So la main. Mem si li pa ti koné ki ti pou arrivé, Hanna ti ressenti enn grand la paix au fond li-mem. Avek le temps, Jéhovah ti reponn so la priere. Li ti tombe enceinte, li ti gagne enn garson ek li ti appel li Samuel.—1 Sam. 1:20.
14. Kifer David ti bizin reconfort, ek ar kisannla li ti demann sa?
14 Le roi David, ti enn lot dimoune ki Bondié ti reconforté. Jéhovah “trouve seki ena dan leker” enn dimoune. Alors, kan Li ti choisir David pou vinn le roi en Israël, Li ti koné ki David ti sincere ek ti bien devoué pou vrai l’adoration. (1 Sam. 16:7; 2 Sam. 5:10) Mais plitar, David ti commette l’adultere avek Bath-Shéba, ek li ti rod cachiette so peché kan li ti faire touye mari Bath-Shéba. Kan David ti realisé ki li ti’nn faire enn peché bien grave, li ti dire Jéhovah dan la priere: “Efface mo bann peché, parski to ena misericorde en abondance. Lave moi net pou tire mo bann peché ek faire moi vinn pur. Parski moi mo konn bann peché ki mo’nn faire ek mo peché li touletan devant moi.” (Ps. 51:1-3) David ti vrai-mem repenti ek Jéhovah ti pardonne li. Mais selman, li ti bizin paye consequence so peché. (2 Sam. 12:9-12) Mais, misericorde ki Jéhovah ti manifesté ti reconforte sa serviteur humble-la.
15. Couma Jéhovah ti aide Jésus zis avant li mort?
15 Kan Jésus ti lor la terre, li ti faire face ar beaucoup situation difficile. Bondié ti permette ki Jésus passe par sa bann l’epreuve-la mais Jésus ti garde so l’integrité. Jésus ti enn zom parfait ki ti touletan faire Jéhovah confiance ek ki ti soutenir So souveraineté. Kan Judas ti pré pou trahir li ek li ti pré pou mort, Jésus ti dire Jéhovah dan la priere: “Ki to volonté li faire, mais pa mo volonté.” Lerla, enn ange ti apparette ar Jésus ek ti fortifié li. (Luc 22:42, 43) Jéhovah ti reconforte Jésus, ti donne li la force ek ti soutenir li dan sa moment-la.
16. Couma Jéhovah kapav aide nou si nou bizin faire face ar la mort a cause nou l’integrité?
16 Mem si nou bizin faire face ar la mort parski nou pé tini ferme en tant ki chretien, Jéhovah ena capacité ek Li pou aide nou pou garde nou l’integrité envers Li. En plus, l’esperance resurrection reconforte nou. Ek nou pé attann avek impatience kan nou dernier l’ennemi, la mort “pou detruire net.” (1 Cor. 15:26) Bann fidele serviteur Jéhovah ek lezot dimoune ki’nn mort, zot dan memoire Jéhovah. Li impossible ki Jéhovah blié zot ek zot pou ressuscité. (Jean 5:28, 29; Actes 24:15) Kan nou ena confiance dan promesse Jéhovah concernant la resurrection, sa reconforte nou ek donne nou enn vrai l’espoir kan nou gagne persecution.
17. Couma Jéhovah kapav reconforte nou kan enn kikenn ki nou content, mort?
17 Sa vrai-mem reconforte nou pou koné ki bann ki nou content ek ki’nn mort ena l’esperance pou ré-gagne la vie dan le monde nouveau! Lerla pa pou ena okenn souffrance couma ena zordi. Bann serviteur Jéhovah ki forme partie dan “grand la foule” ek ki pou sapé kan sa mauvais le monde-la pou detruire, pou accueillir ek pou enseigne bann ki pou ressuscité lor la terre. Sa pou vrai-mem enn grand privilege!—Rév. 7:9, 10.
Lé-bras eternel Bondié soutenir toi
18, 19. Couma bann serviteur Bondié inn gagne reconfort kan zot ti gagne persecution?
18 Dan enn cantik bien encourageant ki Moïse ti ecrire, li ti donne sa l’assurance-la bann Israélite: “Bondié ki la depuis touletan, Li enn place kot kapav al cachiette, ek so lé-bras eternel soutenir toi.” (Deut. 33:27) Plitar, prophete Samuel ti dire bann Israélite: “Pa detourne-zot ar Jéhovah, ek zot bizin servi Jéhovah avek tou zot leker. . . . Jéhovah jamais pa pou abandonne so peuple a cause so grand nom.” (1 Sam. 12:20-22) Tant ki nou reste attaché ar Jéhovah ek nou contigne pratik vrai l’adoration, jamais Li pou abandonne nou. Li pou toujours donne nou l’aide ki nou bizin.
19 Dan lepok dernier jour, ki enn lepok bien critik, Bondié pé contigne aide ek pé reconforte so bann serviteur. Pendant plus ki enn siecle, beaucoup parmi nou bann frere ek soeur a travers le monde finn gagne persecution ek finn al dan prison zis parski zot ti pé servi Jéhovah. Zot l’experience montré ki dan bann moment difficile, Jéhovah vrai-mem reconforte so bann serviteur. Par exemple, enn parmi nou bann frere ki reste dan ancien l’Union soviétique ti condamné pou passe 23 an dan prison a cause so la foi. Mais kan-mem, li ti reussi gagne la nourriture spirituel ki ti fortifié li ek ti reconforte li. Li ti dire: “Pendant tou sa bann l’année-la, mo finn aprann pou ena confiance en Jéhovah ek Li ti donne moi la force.”—Lire 1 Pierre 5:6, 7.
20. Kifer nou kapav sur ki Jéhovah pa pou abandonne nou?
20 N’importe ki situation ki kitfois nou pou bizin supporté, li pou bon ki nou rappel sa bann parole encourageant ki enn psalmiste ti dire-la: “Jéhovah pa pou abandonne so peuple.” (Ps. 94:14) Mem si personnellement nou bizin reconfort, nou aussi nou ena enn grand privilege pou reconforte lezot. Dan prochain lartik, nou pou trouvé couma nou kapav reconforte bann dimoune ki pé souffert dan sa le monde kot ena beaucoup probleme-la.
Couma ou pou reponn?
• Ki certain kitsoz ki kapav faire nou souffert?
• Couma Jéhovah reconforte so bann serviteur?
• Si nou pé faire face ar la mort, ki kapav reconforte nou?
[L’encadré/Zimage page 23]
COUMA POU FAIRE FACE AR BANN KITSOZ KI KAPAV AFFECTÉ NOU . . .
▪ leker Ps. 147:3; 1 Jean 3:19-22; 5:14, 15
▪ l’esprit Ps. 94:19; Phil. 4:6, 7
▪ bann sentiment Ex. 14:13, 14; Deut. 31:6
▪ la santé physik 2 Cor. 4:8, 9
▪ la santé spirituel Ps. 145:14; Jacq. 5:14, 15