“Console bann ki en deuil”

“Jéhovah finn choisir moi . . . pou console tou bann ki en deuil.”​—IS. 61:1, 2.

1. Ki Jésus ti faire pou bann ki ti en deuil, ek kifer?

JÉSUS CHRIST ti dire: “Faire volonté Celui ki’nn envoye moi ek fini so travail, c’est coumadir enn mangé pou moi.” (Jean 4:34) Kan Jésus ti pé accompli travail ki Bondié ti donne li, li ti manifesté mem qualité extraordinaire ki so Papa. Parmi sa bann qualité-la, nou trouve grand l’amour ki Jéhovah ena pou bann dimoune. (1 Jean 4:7-10) L’apotre Paul ti koz lor enn fason ki Jéhovah montré so l’amour kan li ti decrire Jéhovah couma enn “Bondié ki donne tou consolation.” (2 Cor. 1:3) Jésus ti manifesté sa qualité l’amour-la kan li ti faire seki prophetie Isaïe ti annoncé. (Lire Isaïe 61:1, 2.) Jésus ti lire sa prophetie-la kan li ti dan synagogue dan Nazareth ek li ti applik sa bann parole-la ar li-mem. (Luc 4:16-21) Toute longue so ministere, avek amour Jésus ti console bann ki ti en deuil, li ti encourage zot ek bann dimoune ti senti-zot en paix.a

2, 3. Kifer bann disciple Christ bizin imite li ek console lezot?

² Tou bann disciple Jésus bizin imite li ek console bann ki en deuil. (1 Cor. 11:1) Paul ti dire: “Contigne console-zot entre zot-mem ek fortifié sakenn so camarade.” (1 Thess. 5:11) Nou bizin console lezot surtout parski zordi nou pé vive dan bann “lepok critik ki difficile pou supporté.” (2 Tim. 3:1) Pli allé, bann bon dimoune a travers le monde pé bizin vive parmi bann dimoune ki dire ek faire bann kitsoz ki faire zot la peine, ki faire zot leker faire mal ek faire zot souffert.

³ Pareil couma enn prophetie la Bible ti annoncé, dan bann dernier jour sa mauvais le monde-la, beaucoup dimoune “pou content zot-mem, zot pou content l’argent, zot pou vantard, zot pou ena l’orgueil, zot pou koz en mal lor lezot ek lor Bondié, zot pou desobeir zot parent, zot pou ingrat, zot pa pou fidele, zot pa pou ena okenn affection naturel, zot pa pou d’accord entre zot-mem, zot pou mette bann fausse accusation lor lezot, zot pa pou konn controle-zot, zot pa pou ena okenn pitié, zot pa pou content seki bien, zot pou traitre, zot pou ena la tête dur, zot pou rempli ar l’orgueil, zot pou content plaisir plutot ki Bondié.” Zordi, sa bann l’attitude-la zot pli pire ki avant, parski ’bann dimoune mauvais ek bann faussaire inn vinn pli pire.’​—2 Tim. 3:2-4, 13.

4. Ki finn arrive bann condition lor la terre dan nou lepok?

⁴ Tou sa bann kitsoz-la pa bizin etonne nou, parski Parole Bondié montré dan enn fason clair ki “le monde entier li dan pouvoir sa kikenn ki mauvais-la.” (1 Jean 5:19) “Le monde entier” implik systeme politik, religieux ek commercial, ek aussi bann moyen ki sa le monde-la servi pou fann bann l’information. Alors, sa pa etonne nou ki la Bible appel Satan le Diable “chef le monde” ek “bondié sa systeme-la.” (Jean 14:30; 2 Cor. 4:4) Partout lor la terre, bann condition pé contigne vinn pli pire parski Satan dan enn grand colere. Li koné ki li reste zis enn tigit le temps avant ki Jéhovah reglé so compte. (Rév. 12:12) Sa vrai-mem reconforte nou kan nou koné ki Jéhovah pa pou tolere Satan ek so mauvais le monde encore pli longtemps, ek Jéhovah pou reglé question ki Satan ti soulevé concernant So droit pou dirigé!​—Gen., chapitre 3; Job, chapitre 2.

La bonne nouvelle pé preché partout lor la terre

5. Couma eski prophetie ki concerne predication pé realisé dan dernier jour?

⁵ Seki Jésus ti annoncé pé realisé dan nou lepok. Li ti dire: “Sa bon nouvelle lor royaume-la pou preché partout kot dimoune resté lor la terre couma enn temoignage pou tou bann nation; ek lerla la fin pou vini.” (Mat. 24:14) Sa bon nouvelle-la pé preché partout lor la terre dan enn fason ki jamais finn faire avant. Zordi, plus ki 7,500,000 Témoins de Jéhovah ki forme partie dan plus ki 107,000 congregation partout lor la terre, pé preche Royaume Bondié. Pareil couma Jésus, zot aussi zot faire Royaume Bondié theme zot predication ek zot l’enseignement. (Mat. 4:17) Grace a travail predication ki nou pé faire dan nou lepok, nou pé kapav console bann ki pé souffert. A cause sa, pendant sa deux dernier l’année-la, 570,601 dimoune inn prend bapteme ek inn vinn Témoins de Jéhovah.

6. Ki ou pensé lor travail predication ki pé faire partout zordi?

⁶ Bann Témoins de Jéhovah pé traduire ek pé distribué bann publication ki basé lor la Bible dan plus ki 500 langue. Sa permette nou pou trouve pli bien ki quantité travail predication pé faire dan le monde zordi. Jamais finn arrive enn kitsoz coumsa dan l’histoire l’humanité avant! Mem si zot pé vive dan enn le monde ki pé controlé par Satan, bann serviteur Jéhovah zot bien actif dan zot service, ek zot pé contigne augmenté. Enn kitsoz coumsa ti pou impossible sans direction ek l’aide l’esprit saint Bondié ki bien puissant. Parski la bonne nouvelle pé preché partout lor la terre, nou bann frere ek soeur ek aussi bann dimoune ki pé accepté message lor Royaume Bondié, pé gagne reconfort a travers Parole Bondié.

Nou bann frere ek soeur reconforte nou

7. (a) Kifer nou pa kapav attann ki Jéhovah tire tou nou bann probleme asterla? (b) Couma nou koné ki nou kapav endure bann persecution ek bann l’epreuve?

⁷ Dan sa le monde kot ena beaucoup mechanceté ek souffrance-la, nou sur ki nou pou konn certain situation difficile. Nou pa kapav attann ki Bondié tire tou bann mauvais kitsoz ki rann nou malheureux ou-soit ki faire nou souffert, ziska ki Li detruire sa systeme-la. Entre-temps, kan nou pé faire face ar persecution ki finn annoncé, nou fidelité envers Jéhovah ek aussi envers so Souveraineté, pé testé. (2 Tim. 3:12) Mais, grace a l’aide ek reconfort ki nou gagné avek nou Papa ki dan le ciel, nou kapav ressemblé bann chretien oint ki ti vive dan ancien la ville Thessalonique. Pareil couma zot, nou aussi nou pou kapav supporte bann persecution ek bann l’epreuve avek l’endurance ek la foi.​—Lire 2 Thessaloniciens 1:3-5.

8. Couma la Bible montré ki Jéhovah reconforte so bann serviteur?

⁸ Pena okenn doute ki Jéhovah donne so bann serviteur reconfort ki zot bizin. Par exemple, kan la reine Jézabel ti menace pou touye prophete Éliya, sa prophete-la ti decouragé ek ti sauvé. Li ti mem dire ki li envie mort. Mais au lieu ki Jéhovah ti critik Éliya, Li ti reconforte li ek ti donne li courage pou contigne so travail couma enn prophete. (1 Rois 19:1-21) Nou kapav trouvé aussi ki Jéhovah reconforte so bann serviteur kan nou examine seki ti arrive congregation chretien dan premier siecle. Par exemple, nou lire ki ti ena enn periode kan “congregation partout dan Judée, Galilée ek Samarie ti konn enn periode la paix ek ti pé vinn fort.” En plus, “a mesure ki li ti ena la crainte pou Jéhovah ek consolation l’esprit saint, li ti pé contigne multiplié.” (Actes 9:31) Nou vrai-mem reconnaissant ki nou aussi nou gagne “consolation [ar] l’esprit saint”!

9. Kifer kan nou aprann lor Jésus, sa kapav reconforte nou?

⁹ En tant ki chretien, nou gagne reconfort kan nou aprann lor Jésus Christ ek kan nou suive so trace. Jésus ti dire: “Vinn vers moi, zot tou ki pé rinté ek ki ena fardeau lor zot, ek moi mo pou reconforte zot. Prend mo joug lor zot ek aprann ar moi, parski mo ena enn caractere doux ek enn leker humble, ek zot pou gagne reconfort pou zot nâme. Parski mo joug, li doux ek mo charge, li leger.” (Mat. 11:28-30) Kan nou aprann couma Jésus ti traite bann dimoune avek amour ek bonté, ek apré nou suive so bon l’exemple, sa soulage nou stress.

10, 11. Dan congregation, kisannla ki kapav reconforte lezot?

¹⁰ Nou kapav aussi gagne reconfort avek nou bann frere ek soeur dan congregation. Par exemple, anou guetté couma bann ancien dan congregation aide bann ki pé passe par bann situation difficile. Disciple Jacques ti ecrire: “Eski ena enn kikenn parmi zot ki malade [lor plan spirituel]? Ki li appel bann ancien dan congregation, ek ki zot prié pou li.” Ki pou arrivé? “La priere ki zot faire avek la foi pou faire malade-la bien, ek Jéhovah pou releve li. En plus, si li’nn faire peché, Jéhovah pou pardonne li.” (Jacq. 5:14, 15) Lezot membre congregation aussi kapav reconforte zot bann frere ek soeur.

¹¹ En general, bann femme trouve sa pli facile pou koz ar lezot femme lor different probleme. Surtout bann soeur ki pli agé ek ki ena plus l’experience kapav donne bann bon conseil bann jeune soeur. Kitfois, sa bann soeur ki pli mur-la finn passe par mem situation dan zot la vie. Kan zot montré ki zot comprend lezot ek bann qualité ki zot ena en tant ki femme, kapav enn grand l’aide. (Lire Tite 2:3-5.) Bien sur bann ancien ek lezot dan congregation kapav ek bizin “koz dan enn fason ki pou encourage bann ki deprimé” parmi nou. (1 Thess. 5:14, 15) Li bon nou rappel ki Bondié “console nou dan tou nou bann probleme, pou ki nou kapav console bann ki dan tou sorte qualité probleme.”​—2 Cor. 1:4.

12. Kifer li bien important ki nou assisté bann reunion?

¹² Enn bon moyen pou nou gagne reconfort c’est kan nou assisté bann reunion kot nou examine la Bible ek sa bien encourage nou. La Bible dire nou ki Judas ek Silas “ti encourage bann frere par beaucoup discours ek ti fortifié zot.” (Actes 15:32) Avant ek apré nou bann reunion, bann membre congregation ena bann conversation encourageant entre zot. Alors, mem si nou pé souffert parski nou pé passe par bann situation bien difficile, fodé pa nou mank bann reunion, parski si nou faire sa, nou situation pa pou amelioré. (Prov. 18:1) Au contraire, li bon ki nou suive conseil inspiré ki l’apotre Paul ti donné: “Anou interesse-nou sakenn ar nou camarade, pou encourage sakenn parmi nou pou montré l’amour, ek faire bann bon action, sans ki nou neglige nou bann rassemblement, couma certain ena l’habitude, mais anou encourage sakenn parmi nou, ek encore plus kan zot trouve jour-la pé kosté.”​—Héb. 10:24, 25.

Parole Bondié donne nou reconfort

13, 14. Montré couma bann l’Ecriture kapav reconforte nou.

¹³ Ki nou enn chretien baptisé ou-soit nou fek commence aprann lor Bondié ek so projet, nou kapav gagne reconfort dan Parole Bondié. Paul ti ecrire: “Tou bann kitsoz ki finn ecrire longtemps finn ecrire pou nou l’instruction, pou ki par nou l’endurance ek par consolation ki nou gagné dan bann l’Ecriture, nou ena enn l’esperance.” (Rom. 15:4) La Bible kapav reconforte nou ek faire nou “bien qualifié, bien equipé pou tou bon travail.” (2 Tim. 3:16, 17) Kan nou konn la verité lor projet Bondié ek kan nou ena enn vrai l’esperance concernant l’avenir, pena doute ki sa pou donne nou enn grand reconfort. Alors, anou servi bien Parole Bondié ek bann publication biblik parski sa kapav reconforte nou ek faire nou gagne bann bienfait dan beaucoup fason.

¹⁴ Jésus inn donne nou enn bon l’exemple kan li ti servi bann l’Ecriture pou enseigne ek reconforte lezot. Par exemple, enn fois apré so resurrection, kan Jésus ti apparette ar deux so bann disciple, li ’ti explik zot bann l’Ecriture a fond.’ A mesure ki li ti pé koz ar zot, zot leker ti bien touché. (Luc 24:32) L’apotre Paul ti suive bon l’exemple Jésus, li ti ’raisonne lor bann l’Ecriture.’ Dan Bérée, bann ki ti ecoute li “ti extra content pou gagne parole Bondié, ek zot ti examine bann l’Ecriture en profondeur toulé-jour.” (Actes 17:2, 10, 11) Alors, li bien important ki nou lire la Bible toulé-jour. Seki nou lire ladan ek dan bann publication biblik reconforte nou ek donne nou l’espoir dan sa lepok difficile-la.

Lezot fason pou reconforte nou bann frere ek soeur

15, 16. Ki bann kitsoz nou kapav faire pou aide ek reconforte nou bann frere ek soeur?

¹⁵ Nou kapav aide ek reconforte nou bann frere ek soeur dan different fason ki bien pratik. Par exemple, nou kapav al acheté commission pou enn chretien ki’nn rente dan l’age ou-soit ki malade. Nou kapav montré enn l’interet sincere envers lezot kan nou aide zot pou faire zot l’ouvrage. (Phil. 2:4) Nou kapav aussi felicite nou bann frere ek soeur pou zot bann bon qualité couma par exemple, zot l’amour, zot courage, zot la foi ek aussi parski zot kapav adapté-zot ar different situation.

¹⁶ Nou kapav faire zeffort pou reconforte bann chretien agé kan nou rann zot visite, nou ecoute bien kan zot raconte nou bann l’experience ki zot inn faire dan le passé, ek bann benediction ki zot inn gagné dan zot service pou Jéhovah. Pena doute ki sa kapav encourage nou ek reconforte nou! Kitfois nou kapav lire la Bible ek bann publication biblik avek bann ki nou visité. Nou kapav guette avek zot lartik ki nou pou examiné dan l’etude La Tour de Garde, ou-soit dan l’etude biblik la congregation pou la semaine. Nou kapav aussi guette enn DVD ki basé lor la Bible avek zot. Apré, nou kapav lire ou-soit raconte bann l’experience encourageant ki trouve dan nou bann publication.

17, 18. Kifer nou kapav sur ki Jéhovah pou soutenir ek reconforte so bann serviteur ki fidele?

¹⁷ Si nou remarké ki enn parmi nou bann compagnon chretien bizin reconfort, nou kapav mentionne li dan nou la priere personnel. (Rom. 15:30; Col. 4:12) A mesure ki nou faire face ar bann probleme ki nou gagné dan la vie ek faire beaucoup zeffort pou reconforte lezot, nou kapav ena mem la foi ek l’assurance pareil couma enn psalmiste ki ti chanté: “Jette to fardeau lor Jéhovah Li-mem, ek Li-mem Li pou soutenir toi. Jamais Li pa pou laisse enn kikenn droite, tombé.” (Ps. 55:22) Pena doute, ki Jéhovah pou touletan la pou reconforte ek soutenir nou. Jamais Li pou abandonne so bann serviteur ki fidele.

¹⁸ Bondié ti dire so bann adorateur dan le passé: “Moi, mo sa Kikenn ki console zot-la.” (Is. 51:12) C’est seki Jéhovah pou faire pou nou aussi ek Li pou beni nou bann bon action ek nou bann parole kan nou reconforte bann ki en deuil. Ki nou ena l’esperance pou vive dan le ciel ou-soit lor la terre, sakenn parmi nou kapav gagne reconfort ar seki Paul ti dire so bann compagnon chretien ki ti oint: “Ki nou Seigneur Jésus Christ li-mem ek Bondié nou Papa, ki’nn content nou ek ki’nn donne enn consolation eternel ek enn bon l’esperance par faveur ki personne pa merité, console zot leker ek fortifié zot pou ki zot faire bann bon action ek dire bann bon parole.”​—2 Thess. 2:16, 17.

[Note]

Eski ou rappel?

• Travail ki nou pé faire pou reconforte lezot, ki quantité sa pé faire partout lor la terre?

• Ki bann kitsoz nou kapav faire pou reconforte lezot?

• Couma la Bible montré ki Jéhovah soutenir so bann serviteur?

[Zimage page 26]

Eski ou faire ou part pou reconforte bann ki pé souffert?

[Zimage page 28]

Bann jeune ek bann agé toulé-deux kapav encourage zot camarade