4 Bondié pa faire la justice—Eski li vrai?

Seki ou finn deja tendé: “Bondié dirige sa le monde-la ek tou seki arrivé, arrivé par so volonté. Parski le monde rempli ar bann dimoune ki faire discrimination, faire dominere ar lezot, ek l’injustice, surement Bondié ki responsable tousala.”

Seki la Bible enseigné: Si ena l’injustice dan le monde c’est pa Bondié ki responsable. Guetté couma la Bible decrire Jéhovah: “Seki Li faire, parfait, parski dan tou seki Li faire ena la justice.”—Deutéronome 32:4.

Bondié so leker grand envers tou dimoune, mem envers bann ki parette pa merite sa. Par exemple, “Li faire so soleil levé lor mauvais dimoune ek lor bon dimoune, ek Li faire la pluie tombé lor dimoune juste ek injuste.” (Matthieu 5:45) Li traite tou dimoune pareil, n’importe ki zot race ou-soit ki zot culture, pareil couma Actes 10:34, 35 montré nou: “Bondié pa faire preference, mais dan n’importe ki nation, dimoune ki ena la crainte pou Li ek ki pratik la justice, Bondié accepté li.”

Mais alors, kot-sa l’injustice sorti? Beaucoup dimoune decide pou faire l’injustice, zot pa suive l’exemple nou Bondié la justice. (Deutéronome 32:5) La Bible montré aussi ki Bondié pé permette so l’ennemi, Satan le Diable, pou controle le monde.a (1 Jean 5:19) Mais bientot Bondié pou nepli permette li faire sa. Li’nn fini mette en place enn moyen pou “detruire bann travail ki le Diable finn faire.”—1 Jean 3:8.

Couma kan ou konn la verité sa aide ou: Zordi surement ou tracassé kan ou tann bann cas corruption, l’injustice, ek lezot pé faire dominere ar zot camarade, ek kitfois ou ena l’impression ki jamais sa pa pou fini. Mais si ou koné pou ki raison tousala pé arrivé sa kapav aide ou pou comprend deux kitsoz: (1) kifer ena bann mauvais condition dan le monde, ek (2) kifer malgré tou bann zeffort ki bann dimoune pé faire pou ki le monde vinn enn pli bon place, jamais zot reussi. (Psaume 146:3) Au lieu ki nou fini tou nou le temps ek nou l’energie pou faire bann changement ki mal-mal pou dur zis inpé le temps, ou kapav ena enn l’esperance solide pou l’avenir. Sa l’esperance-la li basé lor confiance ki ou ena dan bann promesse Bondié.—Révélation 21:3, 4.

Kan nou comprend kot-sa l’injustice sorti, sa kapav aide nou kan malheur tape nou la porte. Kan enn kikenn faire l’injustice ar nou, nou kapav ena mem sentiment ki Habaqouq, enn serviteur Bondié, ki ti dire: “La loi inn coumadir engourdi, ek la justice jamais sorti gagnant.” (Habaqouq 1:4) Bondié pa ti puni Habaqouq parski li ti dire sa. Au contraire, Li ti donne so serviteur l’assurance ki Li finn fixé enn le temps pou reglé tou bann probleme, ek Li finn aide Habaqouq pou trouve la joie, mem si li ti bizin faire face ar bann situation difficile. (Habaqouq 2:2-4; 3:17, 18) Li pareil pou ou aussi. Kan ou ena confiance dan promesse ki Bondié finn faire pou repare bann l’injustice, sa kapav aide ou pou ressenti enn trankilité ek la paix dan ou leker, dan sa le monde rempli ar l’injustice-la.

[Note]

a Pou koné couma le Diable finn existé, guette chapitre 3 dan livre Ki la Bible enseigné vrai-mem?

[L’encadré page 7]

Eski Bondié vrai-mem responsable souffrance ek l’injustice ki ena?

[Remerciement photo page 7]