“Pa fié lor to prop l’intelligence”

“Faire Jéhovah confiance avek tou to leker ek pa fié lor to prop l’intelligence.”​—PROV. 3:5.

1, 2. (a) Ar ki different situation nou kapav faire face? (b) Kan nou dan desespoir, kan nou ena enn decision pou prend, ou-soit nou bizin resisté ar enn tentation, lor kisannla nou bizin compté, ek kifer?

CYNTHIAa so patron finn ferme certain departement dan so compagnie, ek li’nn renvoye plusieurs travailleur. Cynthia peur pangar li-mem prochain lor la liste. Ki li pou faire si sa arrivé? Couma li pou paye so bann bill? Enn soeur ki appel Pamela envie al servi kot bizin plus proclamateur. Mais eski li bizin allé? Enn jeune homme ki appel Samuel ena enn lot probleme. Kan li ti plus jeune li ti guette pornographie. Asterla ki li ena inpé plus ki 20 an, li ressenti enn grand desir pou ré-commencé. Couma eski li kapav resisté ar sa tentation-la?

² Kan ou dan desespoir, kan ou ena bann decision important pou prend, ou-soit ou bizin resisté ar bann tentation, lor kisannla ou compté? Eski ou compte lor ou-mem, ou-soit ou “jette [ou] fardeau lor Jéhovah”? (Ps. 55:22) La Bible dire: “Lizié Jéhovah lor bann dimoune ki juste, ek so zoreille tann zot suppliye Li pou gagne l’aide.” (Ps. 34:15) Alors, li bien important ki nou faire Jéhovah confiance avek tou nou leker ek ki nou pa fié lor nou prop l’intelligence!​—Prov. 3:5.

3. (a) Ki sa impliké pou mette nou confiance dan Jéhovah? (b) Kifer certain ena tendance pou compte lor zot prop l’intelligence?

³ Faire Jéhovah confiance avek tou nou leker implik faire bann kitsoz dan so fason, setadir dapré so volonté. Pou nou kapav faire sa nou bizin contigne prié Li pou ki Li aide nou ek guide nou. Mais selman, beaucoup dimoune trouve sa bien difficile pou compte net lor Jéhovah. Par exemple, guette seki enn soeur ki appel Lynn dire: “Mo ti pé bizin touletan lutté pou mo aprann mette tou mo confiance dan Jéhovah.” Kifer? Li dire: “Mo papa pa ti forme partie mo la vie ek mo mama pa ti gagne mo tracas ditou. Alors, bien vite mo finn bizin aprann debrouille moi par mo-mem.” A cause sa, Lynn ti gagne difficulté pou faire confiance lezot. Capacité ki enn dimoune ena ek reussite ki li’nn gagné kapav aussi faire li compte lor li-mem. Enn ancien kapav developpe tendance pou compte lor so prop l’experience kan li occupe bann kitsoz concernant congregation au lieu ki li rod l’aide Jéhovah dan la priere.

4. Ki nou pou examiné dan sa lartik-la?

⁴ Jéhovah attann ki nou faire bann zeffort sincere pou vive en accord avek nou la priere ek so volonté. Mais couma nou pou trouve enn l’equilibre entre jette nou fardeau lor Jéhovah ek faire bann zeffort pou reglé bann probleme difficile? Kan nou ena pou prend bann decision, ki precaution nou bizin prend? Kifer li important ki nou prié kan nou pé faire face ar tentation? Nou pou reponn sa bann question-la a mesure ki nou pou examine bann l’exemple biblik.

Kan nou dan desespoir

5, 6. Kan le roi l’Assyrie ti menace li, ki Hizqiya ti faire?

⁵ Concernant le roi Juda, Hizqiya, la Bible dire : “Li ti reste attaché ar Jéhovah. Li pa ti tourne lé-dos ek arrete suive Jéhovah, mais li ti contigne garde bann commandement ki Jéhovah ti donne Moïse.” Vrai-mem, “li ti mette so confiance en Jéhovah, Bondié Israël.” (2 Rois 18:5, 6) Enn jour, le roi l’Assyrie, Sennakérib, ek so l’armée ti prend controle lor deux-trois grand la ville dan Juda, ek apré li ti envie attak Jérusalem. Alors, Sennakérib ti envoye so l’armée dan Jérusalem ek li ti envoye Rabshaqé ek deux lezot messager pou al insulté bann habitant Jérusalem ek faire zot gagne peur. Couma eski Hizqiya ti reagir? Hizqiya ti al dan temple Jéhovah ek ti commence prié: “O Jéhovah nou Bondié, s’il te plait, sap nou dan so la main, pou ki tou bann royaume lor la terre kapav koné ki toi, o Jéhovah, to tousel ki Bondié.”​—2 Rois 19:14-19.

⁶ Hizqiya ti agir en accord avek so la priere. Avant-mem ki li ti al dan temple pou prié, li ti donne le peuple l’ordre pou pa reponn kan Rabshaqé ti pé insulté zot. Hizqiya ti envoye aussi deux-trois zom kot prophete Isaïe pou gagne conseil. (2 Rois 18:36; 19:1, 2) Hizqiya ti faire zis bann kitsoz ki ti pou faire Jéhovah plaisir. Dan sa situation-la, li pa ti essaye rod l’aide ar l’Égypte ou-soit lezot nation, parski li ti koné ki Jéhovah pa ti envie li faire sa. Au lieu ki Hizqiya ti fié lor so prop l’intelligence, li ti faire Jéhovah confiance. Apré ki ange Jéhovah ti touye 185,000 zom Sennakérib, Sennakérib “ti allé”ek ti retourne Ninive.​—2 Rois 19:35, 36.

7. Kan nou examine la priere Hanna ek Yona, ki reconfort nou gagné?

⁷ Hanna, femme Elqana enn Lévite, li aussi li ti compte lor Jéhovah. Li ti desesperé parski li ti sterile. (1 Sam. 1:9-11, 18) Jéhovah ti sap prophete Yona dan ventre enn gros poisson apré ki li ti faire sa la priere-la: “Dan desespoir mo’nn appel Jéhovah, ek Li’nn reponn moi. Depuis dan ventre shéol mo’nn criyé pou gagne l’aide. To’nn tann mo la voix.” (Yona 2:1, 2, 10) Sa vrai-mem reconforte nou kan nou koné ki dan n’importe ki mauvais situation nou kapav été, nou kapav appel Jéhovah pou gagne so “faveur”!​—Lire Psaume 55:1, 16.

8, 9. (a) Letan Hizqiya, Hanna ek Yona ti prié, ki kitsoz ti important pou zot? (b) Ki nou kapav aprann ar zot l’exemple?

⁸ L’exemple Hizqiya, Hanna, ek Yona aide nou pou comprend lor ki kitsoz nou bizin prié kan nou pé souffert. Li vrai ki toulé-trois ti dan enn situation difficile, mais zot la priere montré ki zot pa ti pé casse la tête zis ar zot-mem ou-soit ar zot prop probleme. Mais seki ti pli important pou zot c’est: honore nom Bondié, adore Li dan bon fason ek faire so volonté. Hizqiya ti bien chagrin kan bann dimoune ti jette deshonneur lor nom Jéhovah. Hanna ti promette Jéhovah ki li pou donne Li sa garson ki li ti bien envie gagné-la, pou ki li servi dan tabernacle dan Shilo. Ek Yona li, li ti dire: “Promesse ki mo’nn faire, mo pou tini li.”​—Yona 2:9.

⁹ Kan nou prié pou gagne l’aide dan enn situation difficile, li bon ki nou examine nou bann mobile. Eski nou prié zis pou ki Jéhovah tire nou probleme, ou-soit nou rappel aussi Jéhovah ek so projet? Kan nou pé souffert, li kapav arrivé ki nou tellement concentré zis lor nou probleme ki nou blié projet Jéhovah ek so l’adoration. Kan nou prié Jéhovah pou demann Li so l’aide, nou bizin pa blié pou prié ki so nom sanctifié, ek ki so souveraineté li justifié. Si nou faire sa, sa kapav aide nou pou reste positif mem si solution ki nou pé attann pa arrivé. Parfois Jéhovah reponn nou la priere kan Li donne nou la force ki nou bizin pou supporte sa situation-la sans ki Li tire probleme-la desuite.​—Lire Isaïe 40:29; Philippiens 4:13.

Kan nou pé prend bann decision

10, 11. Ki Yehoshaphat ti faire kan li ti bizin prend enn decision bien difficile?

¹⁰ Kan ou ena bann decision bien important pou prend, ki ou faire? Eski ou decidé avant ek apré ou prié Jéhovah pou beni sa decision-la? Yehoshaphat, enn le roi Juda, finn donne nou enn bon l’exemple dan sa domaine-la. Kan bann Moabite ek bann Ammonite ti vinn laguerre ar bann habitant dan pays Juda, sa pays-la pa ti assez fort pou laguerre kont zot. Ki Yehoshaphat ti faire?

¹¹ La Bible dire: “Yehoshaphat ti gagne peur ek ti bien decidé pou rod Jéhovah.” Li ti dire tou dimoune dan Juda garde careme ek li ti rassemblé zot pou “demann Jéhovah conseil.” Apré sa, li ti deboute parmi le peuple Juda ek Jérusalem ek li ti prié: “Ah nou Bondié, eski to pa pou execute jugement lor zot? Parski nou pena okenn la force devant sa grand la foule ki pé vinn kont nou-la; ek nou, nou pa koné ki nou pou faire, mais nou lizié tourné vers toi.” Vrai Bondié ti ecoute la priere Yehoshaphat, Li ti laguerre pou zot ek ti sap zot. (2 Chron. 20:3-12, 17) Kan nou bizin prend enn decision important, surtout enn decision ki kapav affecté nou relation avek Jéhovah, nou bizin compte lor Li au lieu ki nou compte lor nou prop l’intelligence.

12, 13. Kan nou prend bann decision, couma l’exemple le roi David kapav aide nou?

¹² Ki nou bizin faire kan nou devant enn probleme ki parette de l’eau di-sucre pou nou? Kitfois nou kapav pensé ki nou kapav trouve enn solution vite-vite parski nou’nn deja passe par sa mem situation-la. L’exemple le roi David aide nou pou comprend seki nou bizin faire. Kan bann Amaléqite ti vinn attak la ville Tsiqlag, zot ti enleve bann femme David ek so bann zenfant ek aussi pou so bann zom. David ti prié Jéhovah ek ti demann li: “Eski mo bizin al derriere sa groupe bandit-la?” Jéhovah ti reponn li: “Al derriere zot, parski vrai-mem to pou reussi rattrape zot, ek vrai-mem to pou reussi delivré bannla.” David ti obeir ek “ti reussi libere tou seki bann Amaléqite ti prend.”​—1 Sam. 30:7-9, 18-20.

¹³ Enn tipé apré ki bann Amaléqite ti attak Tsiqlag, bann Philistin ti attak Israël. Encore enn fois, David ti demann Jéhovah seki li bizin faire. Bondié ti donne li enn reponse bien clair: “Monté, parski vrai-mem mo pou livré bann Philistin dan to la main.” (2 Sam. 5:18, 19) Inpé le temps apré, bann Philistin ti ré-vinn laguerre ar David. Ki li ti pou faire sa fois-la? Li ti kapav raisonne coumsa: ‘Mo’nn passe par la deux fois, bé laisse mo al laguerre kont bann l’ennemi Bondié pareil couma mo ti faire avant.’ Ou-soit eski David ti pou rod l’aide Jéhovah? David pa ti compte lor so prop l’experience. Encore enn fois, li finn prié Jéhovah. Couma li finn content ki li’nn faire sa! Sa fois-la Jéhovah finn donne li bann lot qualité l’instruction. (2 Sam. 5:22, 23) Kan nou devant enn situation ou-soit enn probleme ki nou finn deja joinde, nou bizin faire attention ki nou pa compte zis lor nou l’experience.​—Lire Jérémie 10:23.

14. Ki nou kapav aprann ar recit lor Josué ek bann Guibéonite?

¹⁴ Nou tou nou imparfait. Alors nou tou, mem bann ancien ki ena l’experience, bizin pa blié demann Jéhovah so direction kan nou ena pou prend bann decision. Anou guette seki ti arrivé kan bann Guibéonite ti vinn guette Josué ek bann ancien dan Israël. Zot ti deguisé ek zot ti pretann ki zot ti sorti bien-bien loin. Sans ki zot demann Jéhovah so direction, Josué ek bann ancien ti faire la paix avek zot, ek ti mem faire enn l’alliance avek zot. Li vrai ki Jéhovah ti accepté sa l’alliance-la, mais Li finn faire ecrire sa recit-la dan la Bible pou nou koné ki Josué ek bann ancien pa finn demann Li so direction. Nou bizin touletan demann Jéhovah so direction avant ki nou prend bann decision.​—Jos. 9:3-6, 14, 15.

Kan nou pé lutté pou resisté ar bann tentation

15. Kifer la priere li important pou nou kapav resisté ar bann tentation?

¹⁵ Nou tou nou faire peché, a cause sa nou ena pou lutté kont tendance ki nou ena pou faire bann mauvais kitsoz. (Rom. 7:21-25) Mais nou kapav gagne la victoire. Couma? Jésus ti dire so bann disciple ki la priere, li enn kitsoz bien important pou resisté ar tentation. (Lire Luc 22:40.) Mais mem si nou prié, li kapav arrivé ki nou encore ena bann mauvais desir ou-soit bann mauvais pensée. Dan sa cas-la, nou bizin “contigne demann Bondié” sagesse pou ki nou kapav resisté ar bann tentation. Nou ena l’assurance ki “[Li] donne [sa] tou dimoune, sans faire okenn reproche.” (Jacq. 1:5) Jacques ti aussi ecrire: “Eski ena enn kikenn parmi zot ki malade [lor plan spirituel]? Ki li appel bann ancien dan congregation, ek ki zot prié pou li ek mette de l’huile lor li au nom Jéhovah. Ek la priere ki zot faire avek la foi pou faire malade-la bien.”​—Jacq. 5:14, 15.

16, 17. Kan nou pé rod l’aide pou resisté ar tentation, kan pli bon moment nou bizin prié?

¹⁶ La priere bien important pou nou kapav resisté ar bann tentation, mais nou bizin garde dan nou l’esprit ki nou bizin prié dan bon moment. Anou guette l’exemple sa jeune homme ki mentionné dan Proverbes 7:6-23-la. La nuit fek tombé, pé faire sombre. Sa jeune homme-la pé marche dan enn chemin kot li bien koné enn femme ki amenn enn mauvais la vie resté. Femme-la invite li kot li. Pou maye li dan so filet, li dire li enn quantité parole ek attire li par so la levre bien douce. Jeune homme-la tombe dan so piege ek suive sa femme-la couma enn taureau ki vinn dan l’abattoir. Kifer sa jeune homme-la ti prend sa chemin-la? Parski li ti “mank leker,” setadir li pa ti ena l’experience. Surement li ti pé lutté kont bann mauvais desir. (Prov. 7:7) Dan ki moment li ti pou pli bon ki li prié? Li vrai ki pendant ki sa femme-la ti pé koz ar li, li ti kapav prié. Mais pli bon moment ki li ti bizin prié c’est desuite couma li ti pé pense pou passe dan sa chemin-la.

¹⁷ Zordi, enn zom kapav faire beaucoup zeffort pou pa guette pornographie. Mais, faire coumadir li rente lor bann site Internet kot li koné ena bann photo ek bann video immoral. Eski li pa pou retrouve-li dan mem situation ki sa jeune homme ki mentionné dan Proverbes chapitre 7-la? Prend enn chemin coumsa, c’est coumadir pé al direct dan precipice! Pou resisté ar tentation pou guette pornographie, enn dimoune bizin rod l’aide Jéhovah dan la priere. Si li envie al lor bann site Internet ki li koné dangereux, avant ki li faire sa, li bizin arreté, ek prié Jéhovah.

18, 19. (a) Kifer li difficile pou lutté ar bann tentation, mais couma nou kapav reussi? (b) Ki ou bien decidé pou faire?

¹⁸ Li pa facile pou lutte ar bann tentation ou-soit ar nou bann mauvais l’habitude. L’apotre Paul ti ecrire: “La chair, avek so bann desir, li kont l’esprit ek l’esprit li kont la chair.” C’est a cause sa, ki “bann kitsoz ki [nou] ti pou content faire [nou] pa faire li.” (Gal. 5:17) Pou nou reussi, nou bizin prié avek tou nou leker kan nou pé commence ena bann mauvais pensée ou-soit gagne bann tentation, ek agir en accord avek nou la priere. “Pena okenn tentation ki zot inn gagné ki lezot pa’nn gagné,” ek avek l’aide Jéhovah nou pou kapav reste fidele envers Li.​—1 Cor. 10:13.

¹⁹ La priere li enn joli don ki Jéhovah inn donne nou. Sa aide nou kan nou pé faire face ar enn situation difficile, kan nou bizin prend bann decision important, ou-soit kan nou pé lutté ar bann tentation. Kan nou prié Jéhovah, nou montré ki nou pé compte lor Li pou aide nou. Nou bizin contigne demann Bondié so l’esprit saint pou guide nou ek pou donne nou la force. (Luc 11:9-13) Anou faire Jéhovah confiance avek tou nou leker ek pa fié lor nou prop l’intelligence.

[Note]

Eski ou rappel?

• Ki ou finn aprann ar Hizqiya, Hanna, ek Yona concernant faire Jéhovah confiance?

• Couma eski l’exemple David ek Josué montré ki nou bizin faire attention kan nou ena pou prend bann decision?

• Kan eski nou bizin surtout prié pou resisté ar bann tentation?

[Zimage page 13]

Pou resisté enn tentation, ki pli bon moment nou bizin prié?