Corruption pou disparette!

ESKI, couma beaucoup dimoune, ou pensé ki pa pou kapav arrete corruption ek ki jamais pa pou kapav tire li net? Si ou pense coumsa, nou comprend ou. Toute longue l’histoire, bann dimoune finn essaye tou sorte qualité gouvernement. Pourtant, zot pa finn reussi tire corruption lor la terre. Eski ena enn l’espoir ki enn jour tou dimoune pou honnete sakenn envers so camarade?

Heureusement, la Bible dire oui! Li dire nou ki bientot Bondié pou faire kitsoz pou tire corruption net lor la terre. Couma Li pou faire sa? Par moyen so Royaume, enn gouvernement dan le ciel ki pou transforme la terre. C’est pou sa Royaume-la mem ki Jésus ti montré so bann disciple pou prié. Dan enn la priere ki certain appel Notre Père, Jésus ti dire: “Ki to Regne vini. Ki to Volonté faire lor la terre.”​—Matthieu 6:10, Bible de Jérusalem.

Concernant dirigeant sa Royaume-la, Jésus Christ, la Bible annoncé: “Li pou sap sa dimoune misere ki criyé au secours-la, ek aussi sa dimoune ki dan grand chagrin-la, ek n’importe kisannla ki pena personne pou aide li. Li pou ena pitié pou bann ti-dimoune ek pou bann pauvre, ek Li pou sap nâme bann pauvre. Li pou delivré zot nâme ar bann ki pé faire dominere ar zot ek li pou tire zot nâme dan violence.” (Psaume 72:12-14) Remarké ki Jésus ena compassion pou bann ki victime corruption, ek ki li pou tire bann dimoune ki faire dominere! Eski sa pa reconforte-nou?

Dan la main sa Dirigeant ki ena compassion ek ki puissant-la, Royaume Bondié pou faire corruption disparette lor la terre. Couma? Kan li pou tire sa trois raison pou kifer ena corruption-la.

L’influence peché

Zordi, nou tou nou bizin lutté kont nou bann tendance pou faire peché ki pousse nou pou agir dan enn fason egoïste. (Romains 7:21-23) Malgré sa, ena bann bon dimoune ki envie faire seki droite. Zot ena la foi dan valeur di-sang ki Jésus inn versé, ek zot kapav gagne pardon zot peché.a (1 Jean 1:7, 9) Sa bann dimoune-la ena possibilité gagne bann bienfait grace a grand l’amour Bondié. C’est seki nou lire dan Jean 3:16: “Bondié finn tellement content le monde ki Li finn donne so sel Garson ki Li finn crée direct, pou ki tou seki ena la foi en li pa detruire, mais gagne la vie pou touletan.”

Pou bann dimoune fidele, Bondié pou faire enn kitsoz ki vrai-mem extraordinaire. Dan le monde nouveau ki pé vini, Li pou tire tou trace peché, ek tigit par tigit, Li pou faire bann dimoune fidele vinn parfait ek Li pou considere zot couma bann dimoune juste. (Isaïe 26:9; 2 Pierre 3:13) Jamais l’influence peché pa pou pousse enn dimoune agir dan enn fason malhonnete. Kan Royaume Bondié pou dirigé, bann dimoune fidele ‘pou nepli esclave ar seki pé detruire zot.’​—Romains 8:20-22.

L’influence sa mauvais le monde dan ki nou pé vive-la

Malheureusement, zordi beaucoup dimoune faire lezot souffert par expré. Zot profite bann ti-dimoune ek bann pauvre, ek zot influence lezot pou agir dan enn fason malhonnete zot aussi. La Bible donne sa conseil-la sa bann dimoune-la: “Fodé ki enn mauvais dimoune quitte so mauvais chemin, ek enn dimoune ki faire lezot di-tort quitte so bann mauvais pensée.” Si bann dimoune coumsa repenti, la Bible promette ki zot pou gagne enn ‘grand pardon.’​—Isaïe 55:7.

Selman, Bondié pa pou ena okenn choix a part detruire bann dimoune ki persisté ek pa’lé change zot conduite. Grace a Royaume Bondié, sa promesse la Bible-la pou realisé: “Mette to l’espoir en Jéhovah ek obeir Li . . . Kan bann mauvais dimoune pou detruire, to pou trouvé.”b (Psaume 37:34) Kan bann mauvais dimoune ki pa’lé changé pou disparette, bann adorateur fidele ki servi Bondié pou nepli victime corruption.

L’influence Satan le Diable

Parmi bann ki faire peché ek ki pa’lé changé, Satan le Diable li-mem pli pire. Nou bien reconnaissant ki bientot Jéhovah pou empeche Satan influence bann dimoune. Finalement, Bondié pou detruire Satan net. Sa monstre ki pena okenn pitié-la, jamais pa pou kapav influence bann dimoune pou faire bann kitsoz malhonnete encore.

Li vrai ki sa l’idée ki Bondié pou tire tou bann raison kifer ena corruption-la, kapav parette enn joli rêve. Kitfois ou demann-ou-mem: ‘Eski Bondié vrai-mem pou kapav faire tou sa bann changement-la? Si oui, kifer Li pankor faire nanyé?’ C’est bann bon question, ek la Bible donne bann bon reponse aussi.c Nou invite ou pou examine par ou-mem seki la Bible enseigné concernant l’avenir, kan tou corruption pou disparette pou touletan.