Comporte-nou couma enn kikenn ki pli tipti

1, 2. Ki conseil Jésus ti donne so bann zapotre, ek kifer li ti faire sa?

SA TI passé en l’an 32 nou lepok. Jésus ti dan district Galilée kan ti ena enn probleme parmi so bann zapotre. Certain parmi zot ti pé discuté pou koné kisannla ki ti pli grand. Luc ti dire dan so l’Evangile: “Zot ti raisonne entre zot-mem pou koné kisannla ki pou pli grand parmi zot. Jésus ti konn raisonnement ki ti ena dan zot leker, li ti mette enn ti zenfant pré kot li ek li dire zot: ‘Seki accueillir sa ti zenfant-la a cause mo nom, pé accueillir moi aussi, ek seki accueillir moi pé accueillir aussi celui ki’nn envoye moi-la. Parski seki agir couma enn kikenn ki pli tipti parmi zot tou, li-mem ki grand.’” (Luc 9:46-48) Avek patience mais dan enn fason ferme, Jésus ti aide so bann zapotre pou trouve l’importance l’humilité.

² Kan Jésus ti conseil so bann zapotre pou agir couma enn kikenn ki pli tipti, eski sa ti en accord avek l’attitude ki bann Juif dan premier siecle ti ena? Ou-soit eski sa ti contraire ar zot l’attitude en general? Enn dictionnaire biblik, Dictionnaire théologique du Nouveau Testament (en anglais), faire enn commentaire lor condition social ki ti ena dan sa lepok-la, li dire: “Dan tou zot l’activité, touletan zot ti demann-zot kisannla ki ti pli grand, ek li ti bien important ki zot donne sakenn l’honneur ki li merité ek touletan sa ti tracasse-zot.” Jésus ti conseil so bann zapotre pou montré-zot different ar bann dimoune en general.

3. (a) Ki sa vedir comporte-nou couma enn kikenn ki pli tipti, ek kifer li kapav difficile pou faire sa? (b) Ki bann question nou pou examiné dan sa lartik-la?

³ Mot grec ki finn traduire par “kikenn ki pli tipti” vedir enn kikenn ki modeste, humble, ki pa important, ou-soit ki pena enn grand l’autorité ek l’influence lor lezot. Jésus ti servi enn ti zenfant pou faire so bann zapotre bien comprend ki zot bizin humble ek modeste. Sa conseil-la concerne bann vrai chretien zordi pareil couma dan premier siecle. Nou kapav trouve sa difficile pou comporte-nou couma enn kikenn ki pli tipti​—au moins dan certain cas. A cause nou l’imperfection, nou ena tendance pou ena l’orgueil ek sa kapav pousse-nou pou rod grandeur. L’esprit competition ki ena tou autour nou ek l’esprit le monde kapav influence nou pou mette-nou-mem en valeur, pou vinn agressif, pou manipule lezot. Ki pou aide nou pou comporte-nou couma enn kikenn ki pli tipti? Couma eski ‘enn kikenn ki pli tipti parmi nou, li enn kikenn ki grand’? Dan ki bann domaine nou bizin faire zeffort pou manifesté l’humilité?

‘BONDIÉ KONN BEAUCOUP KITSOZ EK SO SAGESSE LI PROFOND!’

4, 5. Ki kapav pousse nou pou developpe l’humilité? Donne enn l’exemple.

⁴ Enn fason ki nou kapav developpe l’humilité c’est kan nou medite lor grandeur ki Jéhovah ena en comparaison avek nou. En realité, “nou pa kapav arrivé comprend so l’intelligence.” (Is. 40:28) L’apotre Paul ti koz lor grandeur ki Jéhovah ena, li ti ecrire: “Ah, bann benediction Bondié, zot grand, so sagesse ek so connaissance, zot bien profond! Kisannla ki kapav explik so bann jugement ek comprend so bann chemin?” (Rom. 11:33) Mem si connaissance bann dimoune lor beaucoup kitsoz finn bien augmenté depuis ki Paul ti ecrire sa bann parole-la ena apepré 2,000 an, seki li ti dire toujours vrai zordi. N’importe ki quantité kitsoz nou koné, nou bizin ena l’humilité pou reconette ki jamais nou pou fini aprann lor Jéhovah, lor so bann action ek lor so fason agir.

⁵ Anou prend l’exemple Leoa ki ti vinn pli humble kan li ti realisé ki jamais li ti pou kapav aprann tou lor creation Bondié. Kan li ti jeune, Leo ti bien content science. Li ti envie comprend tou seki li ti kapav lor l’univers, alors li ti etudié physik dan lekol ek li ti tire enn conclusion important. Li dire: “Kan mo reflechi lor mo bann l’etude, mo ti realisé ki bann theorie scientifik tousel pa kapav aide bann dimoune pou comprend tou lor l’univers. Alors, mo ti changé ek mo ti al etudié la loi.” Avek le temps, Leo ti vinn enn avocat ek plitar enn juge. Finalement, li ek so madame ti etudié la Bible avek bann Témoins de Jéhovah, zot ti accepté la verité ek zot ti prend bapteme. Malgré ki li ti ena enn grand l’education, ki ti aide Leo pou comporte-li couma enn kikenn ki pli tipti? Sans hesité, li reponn: “C’est kan mo ti realisé ki n’importe ki quantité kitsoz ki nou aprann lor Jéhovah ek lor l’univers, ena encore beaucoup kitsoz ki nou bizin decouvert.”

6, 7. (a) Ki grand l’exemple Jéhovah donne nou en rapport avek l’humilité? (b) Couma l’humilité Bondié kapav faire nou vinn “grand”?

⁶ Enn lot kitsoz ki aide nou pou vinn humble c’est kan nou rappel ki Jéhovah Li-mem manifesté l’humilité. Reflechi lor seki sa verset-la dire: “Nou, nou bann ki travail ensam avek Bondié.” (1 Cor. 3:9) Ou rann-ou compte! Jéhovah, enn Bondié ki Tout-Puissant, honore nou kan Li donne nou l’occasion pou servi so Parole, la Bible, pou accompli nou ministere. Mem si c’est Jéhovah ki faire bann la grain poussé, Li donne nou enn grand privilege pou travail ensam avek Li pou planté ek pou arrose sa bann la grain-la. (1 Cor. 3:6, 7) Eski c’est pa enn grand l’exemple l’humilité ki Bondié inn laisse nou? Pena doute, ki so l’exemple bizin encourage sakenn parmi nou pou agir couma enn kikenn ki pli tipti.

⁷ L’humilité ki Bondié ti manifesté ti ena enn grand l’effet lor psalmiste David. Li ti chante sa cantik-la pou Jéhovah: “To pou donne moi to bouclier delivrance, ek c’est to l’humilité ki eleve moi.” (2 Sam. 22:36) David ti koné ki, si li ti reussi accompli bann grand kitsoz en Israël c’est selman grace a l’humilité Jéhovah, ki ti abaisse-Li, setadir ti humilié-Li-mem pou prend David compte. (Ps. 113:5-7) Eski Li faire pareil avek nou? Concernant bann qualité, bann capacité, ek bann privilege ki nou ena, eski nou ‘pa’nn gagne’ tousala grace a Jéhovah? (1 Cor. 4:7) La Bible dire ki si nou comporte-nou couma enn kikenn ki pli tipti, nou “grand.” Couma? Devant Jéhovah, nou ena plus valeur en tant ki so bann serviteur. (Luc 9:48, note) Anou guetté couma.

‘ENN KIKENN KI PLI TIPTI PARMI ZOT LI-MEM KI GRAND’

8. Couma l’humilité ena enn l’effet lor nou l’attitude envers l’organisation Jéhovah?

⁸ L’humilité c’est enn qualité bien important pou nou heureux dan l’organisation Bondié ek pou nou soutenir bann disposition ki prend dan congregation. Anou guette l’exemple Petra, enn jeune madame ki ti elevé dan enn famille Témoins de Jéhovah. Petra ti envie faire kitsoz dan so fason, alors li ti quitte congregation. Plusieurs l’année apré, li ti ré-commence frequente congregation. Zordi, li heureux pou faire partie dan l’organisation Jéhovah ek pou soutenir bann disposition ki prend dan congregation. Ki finn faire li change so l’attitude? Li ecrire: “Pou mo senti-moi bien dan l’organisation Bondié, mo ti bizin comprend ek developpe deux qualité bien important: l’humilité ek modestie.”

9. Ki l’attitude enn dimoune humble ena pou la nourriture spirituel, ek kifer sa faire li ena plus valeur pou Jéhovah?

⁹ Enn dimoune humble ena enn grand reconnaissance pou bann disposition ki Jéhovah prend, parmi ena la nourriture spirituel. Alors, li etudié avek serieux ek regulierement la Bible ek li impatient pou lire La Tour de Garde ek Réveillez-vous ! Pareil couma lezot serviteur fidele ki servi Jéhovah, kitfois li prend l’habitude pou lire chaque nouveau publication avant ki li ramasse li dan so bibliothek. Nou montré nou l’humilité ek nou reconnaissance kan nou lire ek etudié regulierement nou bann publication biblik. Sa pou permette nou progressé lor plan spirituel ek lerla nou pou plus utile dan service Jéhovah.​—Héb. 5:13, 14.

10. Couma nou kapav comporte-nou couma enn kikenn ki pli tipti dan congregation?

¹⁰ Enn kikenn ki comporte-li couma enn pli tipti, li “grand” dan enn lot fason encore. Dan chaque congregation ena bann zom qualifié ki’nn etabli par l’esprit saint Jéhovah pou servi couma bann ancien. Zot organise bann reunion, predication ek zot faire bann visite pastoral. Kan nou comporte-nou couma enn kikenn ki pli tipti ek nou accepté pou soutenir sa bann disposition-la, nou favorise la joie, la paix ek l’unité dan congregation. (Lire Hébreux 13:7, 17.) Si ou enn ancien ou-soit enn assistant ministeriel, eski ou pa apprecié avek humilité ek reconnaissance sa responsabilité ki Jéhovah inn donne ou-la?

11, 12. Ki l’attitude pou faire nou ena plus valeur pou l’organisation Jéhovah, ek kifer?

¹¹ Enn kikenn ki comporte-li couma enn pli tipti, li “grand,” setadir li ena valeur pou l’organisation Jéhovah, parski so l’humilité faire li vinn enn bon serviteur ki bien utile pou Bondié. Jésus ti bizin conseil so bann disciple pou comporte-zot couma bann ki pli tipti parski certain parmi zot ti laisse-zot influencé par enn l’attitude ki ti bien populaire dan sa lepok-la. Luc 9:46 dire: “Zot ti raisonne entre zot-mem pou koné kisannla ki pou pli grand parmi zot.” Eski nou aussi nou pensé ki dan enn certaine fason nou meilleur ki nou bann frere ek soeur, ou-soit nou superieur ki bann dimoune en general? Beaucoup dimoune dan le monde ena l’orgueil ek zot egoïste. Anou montré ki nou different ar enn kikenn ki orgueilleux kan nou agir avek humilité. Kan nou faire sa ek nou mette volonté Jéhovah en premier, nou pou plus encourageant pou nou bann frere ek soeur.

¹² Conseil ki Jésus ti donné pou comporte-nou couma enn kikenn ki pli tipti, vrai-mem motive nou. Eski sa pa pousse-nou pou manifesté l’humilité dan tou domaine nou la vie? Anou examine trois domaine.

FAIRE ZEFFORT POU COMPORTE-OU COUMA ENN KIKENN KI PLI TIPTI

13, 14. Couma enn mari ou-soit enn femme bizin agir couma enn kikenn ki pli tipti, ek couma sa kapav ena enn l’effet lor enn mariage?

¹³ Dan mariage. Beaucoup dimoune zordi rod zis zot prop l’interet. L’interet lezot dimoune pena l’importance pou zot. Mais enn dimoune ki comporte-li couma enn kikenn ki pli tipti pou ena l’attitude ki Paul ti encourage bann chretien dan Rome pou ena. Li ti ecrire: “Anou contigne faire bann kitsoz ki favorise la paix ek bann kitsoz ki fortifié sakenn so camarade.” (Rom. 14:19) Enn dimoune ki comporte-li couma enn kikenn ki pli tipti faire tou pou favorise la paix avek lezot ek surtout avek so conjoint ki li content.

¹⁴ Anou guette enn l’exemple concernant bann divertissement. Dan enn couple, kitfois sakenn ena so preference lor divertissement. Kitfois, pou detann-li, mari-la content reste kot li ek lire enn livre. Mais kitfois madame-la content sorti pou al mangé enn place ou-soit li content al kot bann camarade. Eski li pa pou beaucoup pli facile pou madame-la respecté so mari, kan li trouvé ki so mari humble ek prend en consideration seki li content ek pa content plutot ki so prop preference? Eski enn mari pa pou content ek apprecié so madame, si madame-la prend en consideration seki faire so mari plaisir, au lieu ki li rod so prop l’interet? Enn mariage pou vinn pli solide si chaque conjoint comporte-li couma enn kikenn ki pli tipti.​—Lire Philippiens 2:1-4.

15, 16. Dan Psaume 131, ki l’attitude David ti encourage bann Israélite pou ena, ek ki l’effet sa bizin ena lor nou comportement dan congregation?

¹⁵ Dan congregation. Dan le monde, beaucoup dimoune pensé ki zot bizin gagne seki zot envie desuite. Zot pena patience ek zot pa content attann. Kan nou faire zeffort pou comporte-nou couma enn kikenn ki pli tipti, sa aide nou pou attann ki Jéhovah agir. (Lire Psaume 131:1-3.) Kan nou humble ek nou attann Jéhovah, nou gagne bann bienfait. Nou senti-nou en securité ek nou gagne benediction Jéhovah, nou senti-nou reconforté ek nou heureux. Alors, nou comprend kifer David ti encourage bann Israélite pou attann zot Bondié avek patience!

¹⁶ Ou kapav konn mem reconfort si ou attann Jéhovah avek humilité. (Ps. 42:5) Kitfois ou envie faire plus dan congregation, alors ou pé faire zeffort pou vinn enn ancien. (1 Tim. 3:1-7) Bien sur, ou bizin faire tou seki ou kapav pou permette l’esprit saint aide ou pou developpe bann qualité ki enn ancien bizin. Mais ki pou arrivé si dan ou cas, sa prend pli beaucoup le temps ki lezot? Enn kikenn ki comporte-li couma enn ki pli tipti, li attann avek patience pou gagne enn privilege. Li pou contigne servi Jéhovah avek la joie n’importe ki responsabilité ki li ena.

17, 18. (a) Ki bienfait nou pou gagné si nou demann pardon ek nou disposé pou pardon lezot? (b) Ki nou bizin faire dapré Proverbes 6:1-5?

¹⁷ Dan nou relation avek lezot. Li difficile pou la plupart dimoune demann excuse. Mais selman, bann serviteur Bondié montré ki zot comporte-zot couma bann ki pli tipti kan zot reconette zot erreur ek zot demann pardon. Zot disposé aussi pou pardonne lezot pou bann erreur ki zot faire. Alors ki l’orgueil encourage division ek discussion, kan nou pardonné, sa favorise la paix dan congregation.

¹⁸ Kitfois nou bizin ‘humilié-nou-mem’ ek demann excuse kan nou pa finn reussi respecté enn l’engagement ki nou finn prend avek enn dimoune. Kitfois nou ena enn bon raison kifer nou pa’nn kapav faire sa. Mem si pa zis li tousel ki en tort, enn chretien humble pou reconette so erreur ek ki li ena enn part responsabilité dan sa situation-la.​—Lire Proverbes 6:1-5.

19. Kifer nou bizin reconnaissant ki la Bible encourage nou pou comporte-nou couma enn kikenn ki pli tipti?

¹⁹ Nou bien reconnaissant ki la Bible encourage nou pou comporte-nou couma enn kikenn ki pli tipti! Parfois li difficile pou nou manifesté enn l’attitude coumsa. Mais, kan nou reflechi ki nou Createur Li beaucoup pli grand ki nou ek Li manifesté l’humilité, sa kapav pousse-nou pou developpe sa bon qualité-la. Kan nou faire sa, nou pou ena plus valeur devant Jéhovah en tant ki so bann serviteur. Alors, ki sakenn parmi nou comporte-li couma enn kikenn ki pli tipti!