REPONS POU BANN KESTION BIBLIK
Eski ena enn rezon kifer nou planet existe?
Bondie inn kree later pou ki bann dimounn kapav res lor la ek viv ere
Nou planet bien adapte pou antretenir lavi. Lor later ena delo an-abondans—enn kitsoz ki bien inportan pou lavi. Kantite degre ki later li inkline, so rotasion, ek traze ki li fer otour soley, tousala inn kalkile dan enn fason parfe pou anpes bann losean vinn glason ouswa bwi. Anplis, ler ki ena otour later ek so lafors magnetik protez li kont bann reyon soley ki mortel. Lor later, bann plant ek bann zanimo inn kree dan enn fason kot sakenn depann lor zot kamarad, ek sa li enn kitsoz extraordiner. Ala kifer, boukou dimounn inn tir konklizion ki bizin ena enn rezon kifer nou planet existe.—Lir Isaïe 45:18.
Kitfwa ou pe demann oumem: ‘Si later finn kree pou enn rezon, eski sa rezon-la inplik osi soufrans ek linzistis?’—Lir Deutéronome 32:4, 5.
Eski seki Bondie inn pans pou fer avek later pou realize enn zour?
Bondie inn kree later pou ki bann dimounn ki respekte zot kamarad ek kontan zot Kreater kapav res lor la ek viv ere. Li vre ki ena enn rezon kifer Bondie inn kree bann plant ek bann zanimo. Me rezon kifer Li’nn kree bann dimounn li pli inportan ankor. Nou kapav kone kisannla inn kree nou. Nou kapav osi admir ek imit so lamour ek so lazistis.—Lir Ecclésiaste 12:13; Mika 6:8.
Nou Kreater kapav akonpli tou seki Li’nn pans pou fer. Alor nou kapav sir ki Li pou tir tou linzistis ek tou soufrans ek Li pou fer nou planet vinn enn landrwa parfe pou ki bann dimounn kapav viv ere.—Lir Psaume 37:11, 29; Isaïe 55:11.