Tou Dimounn dan Lasanble Kapav Ede pou ki Bann Etidian Labib Progrese Ziska Batem

1-2. Kisannla kapav ed enn etidian Labib pou progrese ziska batem?

AMY, ki res Fiji dir: “Mo ti extra kontan seki mo ti pe aprann dan mo letid Labib. Mo ti kone ki samem laverite. Kan mo’nn koumans frekant bann frer ek ser, sa finn ed mwa pou fer bann sanzman ki bizin pou ki mo progrese ziska batem.” Sa lexanp-la montre nou enn kitsoz bien inportan: Enn etidian Labib pou fer bann pli bon progre kan li gagn led ar bann frer ek ser dan lasanble.

² Sak proklamater kapav ede pou ki bann etidian Labib form parti lasanble. (Efe. 4:16, NW) Enn pionie ki apel Leilani ek ki res Vanuatou, dir: “Ena enn koze ki dir ki bizin enn vilaz pou grandi enn zanfan. Mo panse ki pou fer bann disip osi li parey; bizin led bann frer ek ser dan lasanble pou amenn enn kikenn dan laverite.” Par exanp, bizin led bann paran, bann fami, bann kamarad, ek bann profeser pou ki enn zanfan vinn enn adilt ki responsab. Zot fer sa kan zot ankouraz zanfan-la ek zot ansegn li bann kitsoz ki inportan. Dan mem fason, bann frer ek ser dan lasanble kapav konsey, ankouraz, ek donn enn bon lexanp bann etidian Labib. Lerla, bannla pou kapav progrese ziska batem.​—Prov. 15:22.

3. Ki nou kapav aprann ar lexanp Ana, Dorin, ek Leilani?

³ Enn proklamater bizin kontan kan bann frer ek ser dan lasanble ed so etidian. Kifer? Ana, enn pionie spesial dan Moldavi, dir: “Kan enn etidian Labib koumans progrese, li bien bizin led, ek li difisil pou so ansegnan fer sa li tousel.” Dorin, enn pionie spesial ki servi dan mem pei, dir: “Souvan, lezot proklamater dir bann kitsoz ki tous leker mo bann etidian, bann kitsoz ki momem mo pa ti pou panse pou dir.” Leilani dir: “Kan enn etidian Labib trouv latansion ek lamour ki bann frer ek ser ena pou li, sa ed li pou trouve ki nou vremem bann serviter Zeova.”​—Zan 13:35.

4. Ki nou pou examine dan sa lartik-la?

⁴ Selman, to kapav demann tomem, ‘Kouma mo kapav ed enn etidian Labib pou progrese, alor ki se pa mo etidian?’ Dan sa lartik-la, nou pou gete seki nou kapav fer kan nou pe akonpagn enn kikenn pou enn letid. Apre sa, nou pou gete seki nou kapav fer kan enn etidian Labib koumans asiste bann renion. Ek finalman, nou pou gete kouma bann ansien kapav ed bann etidian Labib pou progrese ziska batem.

KAN TO AKONPAGN ENN KIKENN POU ENN LETID

5. Kan to akonpagn enn kikenn pou enn letid, ki responsabilite to ena?

⁵ Pandan enn letid Labib, se ansegnan-la ki, an premie, ena responsabilite pou ed so etidian pou konpran Labib. Si ansegnan-la invit twa pou akonpagn li, to responsabilite se pou soutenir li. (Ekle. 4:9, 10) Me ki to kapav fer pou ede?

6. Kan to bizin akonpagn enn kikenn pou enn letid, kouma to kapav swiv prinsip ki ena dan Proverb 20:18?

⁶ Prepar twa bien pou letid. Pou koumanse, demann ansegnan-la inpe plis detay lor so etidian. (Lir Proverb 20:18.b) Par exanp, to kapav demann li: “Ki laz etidian-la ena? Ki so bann krwayans? Dan ki lanvironnman li sorti? Kotsa zot inn arive dan letid? Lor ki kitsoz to pou met laksan dan letid-la? Eski ena enn kitsoz ki mo bizin dir ouswa pa dir pandan letid? Kouma mo kapav ankouraz etidian-la pou progrese?” Biensir, ansegnan-la pa pou dir twa bann kitsoz konfidansiel lor so etidian, me seki li pou dir twa kapav bien itil pou to ed etidian-la. Enn misioner ki apel Joy abitie donn sa bann linformasion-la ar bann dimounn ki akonpagn li pou enn letid Labib. Li dir: “Sa bann linformasion-la ed mo konpagnon pou interes li ar etidian-la ek pou reflesi lor seki li li kapav dir pandan letid.”

7. Kan to akonpagn enn kikenn pou enn letid, kifer to bizin prepar twa?

⁷ Kan to akonpagn enn kikenn pou enn letid, li bon ki to prepar alavans seki zot pou examine pandan letid. (Esdr. 7:10) Dorin, ki nou ti mansione avan, dir: “Mo kontan kan mo konpagnon prepar li bien pou letid. Sa ed li pou fer bann komanter ki pou ed etidian-la.” Anplis, etidian-la pou remarke ki zot toulede zot inn bien prepare, ek sa pou enn bon lexanp pou li. Mem si to pa’nn reisi prepar twa bien pou enn letid Labib, to kapav omwin pran letan pou get bann pwin prinsipal ki zot pou etidie.

8. Dan enn letid Labib, kouma to kapav fer enn lapriyer ki presi?

⁸ Dan enn letid Labib, lapriyer se enn kitsoz bien inportan. Alor, reflesi alavans lor seki to pou dir si demann twa pou fer enn lapriyer. Koumsa, to pou kapav fer enn lapriyer ki presi. (Ps. 141:2, NW) Hanae, ki res Zapon, ankor rapel lapriyer ki enn ser ti fer. Sa ser-la ti pe akonpagn so ansegnan. Hanae dir: “Mo ti trouve ki li ti ena enn bon lamitie avek Zeova, ek mo ti anvi vinn parey kouma li. Anplis, kan li ti sit mo nom dan lapriyer, mo ti santi ki li kontan mwa.”

9. Dapre Zak 1:19, kouma to kapav soutenir enn ansegnan pandan enn letid?

⁹ Soutenir ansegnan-la pandan letid. Omamuyovbi, enn pionie spesial dan Nizerya, dir: “Enn bon konpagnon li ekout bien pandan letid. Li fer bann bon komanter, me li pa koz tro boukou, parski li kone ki se ansegnan-la ki ena responsabilite pou ansegn etidian-la.” Alor, kouma to pou kone ki kitsoz to bizin dir ek kan to pou dir sa? (Prov. 25:11) Ekout bien kan ansegnan-la ek etidian-la pe koze. (Lir Zak 1:19.) Lerla, to pou kapav ede dan moman ki bizin. Biensir, to bizin reflesi avan to koze. Par exanp, to pa pou koz tro boukou, to pa pou koup ansegnan-la kan li pe koze, ek to pa pou koz lor enn lot size. Me to kapav fer enn ti komanter, servi enn lexanp, ouswa poz enn kestion pou ed etidian-la konpran seki li pe aprann. Parfwa, to kapav ena linpresion ki to pa partisip boukou dan enn letid. Me si to felisit etidian-la ek to montre ki to interese ar li, to pou ed li pou progrese.

10. Kouma sa kapav ed enn etidian Labib kan to rakont li to bann lexperyans personel?

¹⁰ Partaz ar etidian-la to bann lexperyans personel. Si sa kapav ed etidian-la, to kapav rakont li kouma to’nn gagn laverite, kouma to’nn sirmont enn difikilte, ek kouma to’nn trouv lame Zeova dan to lavi. (Ps. 78:4, 7) Dan sertin sitiasion, kitfwa se to bann lexperyans personel ki etidian-la bizin tande. Sa kapav ogmant so lafwa ek ankouraz li pou kontign progrese ziska batem. Sa kapav osi montre li kouma li kapav sirmont enn difikilte. (1 Pier 5:9) Gabriel, ki res Brezil ek ki pionie asterla, rapel bann bienfe ki li ti gagne kan li ti pe etidie Labib. Li dir: “Kan mo ti ekout bann frer ek ser rakont zot bann lexperyans personel, mo ti konpran ki Zeova konn nou bann problem. Ek si zot inn reisi sirmont zot bann difikilte, mwa osi mo kapav.”

KAN ENN ETIDIAN LABIB ASISTE BANN RENION

11-12. Kifer nou bizin akeyir bien enn etidian Labib ki asiste bann renion?

¹¹ Pou ki enn etidian Labib progrese ziska batem, li bizin asiste bann renion regilierman ek gagn bann bienfe gras-a bann renion. (Ebre 10:24, 25) Pena dout ki ansegnan-la pou invit so etidian pou asiste so premie renion. Me kan etidian-la vinn Lasal, nou tou nou bizin ankouraz li pou kontign asiste bann renion. Kouma nou kapav fer sa?

¹² Akeyir bien etidian-la. (Rom. 15:7) Si nou akeyir bien enn etidian Labib, kitfwa sa pou ankouraz li pou anvi kontign asiste bann renion. San ki to fer etidian-la santi li malalez, akeyir li bien, ek prezant li bann lezot frer ek ser. Fode pa to panse ki lezot pe deza pran li kont; kitfwa so ansegnan pankor arive ouswa li pe okip bann lezot responsabilite. Ekout bien etidian-la ek montre ki to interese ar li. Kan to akeyir bien enn etidian Labib, ki lefe sa kapav ena lor li? Dmitrii, ki’nn pran batem depi de-trwa lane ek ki asterla pe servi kouma asistan ministeryel, rapel premie renion ki li ti asiste. Li dir: “Kan mo ti pe deboute andeor Lasal ek ki mo ti inpe strese, enn frer ti vinn get mwa ek ti akonpagn mwa andan. Boukou dimounn ti vinn akeyir mwa ek mo ti bien etone. Mo ti telman kontan ki mo ti anvi ki ena renion toulezour. Mo ti resanti enn kitsoz ki zame mo pa ti resanti avan.”

13. Kouma to bon lexanp kapav ed enn etidian Labib?

¹³ Donn enn bon lexanp. To bon lexanp kapav konvink enn etidian ki nou bann vre Kretien. (Mat. 5:16) Vitalii, ki asterla enn pionie dan Moldavi, dir: “Mo ti trouve kouma bann frer ek ser zot viv, zot panse, ek zot azir. Sa ti konvink mwa ki vre relizion se bann Temwin Zeova.”

14. Kouma to lexanp kapav ed enn kikenn pou kontign progrese?

¹⁴ Avan ki enn etidian pran batem, li bizin met an pratik seki li pe aprann. Sa pa touletan fasil. Me kan etidian-la trouve kouma to gagn bann bienfe kan to met an pratik bann konsey ki ena dan Labib, sa kapav ankouraz li pou swiv to lexanp. (1 Kor. 11:1) Anou get lexanp Hanae, ki nou ti mansione avan. Li dir: “Bann frer ek ser ti pe deza met an pratik bann kitsoz ki mo ti pe aprann. Gras-a zot lexanp, mo ti trouve kouma mo kapav kontan, ankouraz, ek pardonn lezot. Bann frer ek ser ti touletan dir bann bon kitsoz lor lezot. Mo ti anvi imit zot.”

15. Kouma Proverb 27:17 ed nou pou konpran kifer li inportan ki nou fer kamarad avek bann etidian Labib?

¹⁵ Fer kamarad ar etidian-la. Kan enn etidian Labib kontign asiste bann renion, montre li ki to interese avek li. (Fil. 2:4) To kapav esey aprann konn li pli bien. To kapav felisit li pou bann progre ki li pe fer. San ki to rant dan so lavi prive, to kapav poz li bann kestion lor so letid, so fami, ek so travay. Bann konversasion koumsa kapav fer twa vinn pli pros ar li. Kan to fer kamarad avek enn etidian Labib, to pe ed li pou progrese ziska batem. (Lir Proverb 27:17.c) Hanae enn pionie permanan asterla. Li rapel bann premie renion ki li ti asiste, ek li dir: “Kan mo ti koumans fer bann kamarad dan lasanble, mo ti plis anvi al renion, ek mo ti asiste bann renion mem kan mo ti bien fatige. Mo ti kontan pas letan avek mo bann nouvo kamarad, ek sa ti ed mwa pou aret frekant mo bann kamarad ki pa servi Zeova. Mo ti anvi vinn pli pros ar Zeova ek mo bann frer ek ser. Alor, mo ti desid pou pran batem.”

16. Ki kitsoz ankor to kapav fer pou ki enn etidian Labib santi li pli alez dan lasanble?

¹⁶ Amezir ki enn etidian kontign fer bann progre ek bann sanzman dan so lavi, ed li pou ki li santi ki li form parti dan lasanble. Par exanp, to kapav fer sa kan to montre lospitalite anver li. (Ebre 13:2) Denis, ki res Moldavi, rapel lepok kot li ti ankor enn etidian Labib. Li dir: “Plizir fwa bann frer ek ser ti invit mwa ek mo madam pou pas bann bon moman avek zot. Zot ti rakont nou kouma Zeova inn ed zot, ek sa ti bien ankouraz nou. Sa bann moman-la ti ed nou pou trouve ki nou ti anvi servi Zeova, ek ki nou ti pou gagn enn zoli lavi si nou ti fer sa.” Kan enn etidian Labib vinn enn proklamater, to kapav osi invit li pou akonpagn twa dan predikasion. Diego, enn proklamater dan Brezil, dir: “Boukou frer ti invit mwa pou al prese avek zot. Sa ti ed mwa pou aprann konn zot pli bien. Kan mo ti fer sa, mo ti aprann boukou avek zot, ek mo ti santi mwa pli pros avek Zeova ek Zezi.”

KOUMA BANN ANSIEN KAPAV ED ENN ETIDIAN LABIB?

17. Kouma bann ansien kapav ed bann etidian Labib?

¹⁷ Rezerv letan pou bann etidian Labib. Ansien, kan to montre lamour ek latansion anver enn etidian Labib, to kapav ed li pou progrese ziska batem. Eski to koz souvan ar bann etidian Labib kan zot vinn renion? Zot pou trouve ki to interese ar zot si to rapel zot nom, sirtou kan zot reponn dan renion. Eski to kapav organiz twa pou akonpagn bann proklamater kan zot pe al fer bann letid Labib? Kitfwa sa kapav ena enn gran lefe lor etidian-la. Enn pionie ki apel Jackie ek ki res Nizerya, dir: “Boukou etidian ti etone kan zot ti aprann ki se enn ansien ki ti akonpagn mwa pou zot letid. Enn etidian Labib ti dir: ‘Zame mo paster pa ti pou fer sa. Li al vizit zis bann dimounn ki ris, ek sa osi fode zot pey li pou sa!’” Asterla, sa etidian-la pe asiste bann renion.

18. Kouma bann ansien kapav met an pratik konsey ki trouv dan Zistwar Bann Apot 20:28?

¹⁸ Form ek ankouraz bann ansegnan Labib. Ansien, to ena enn responsabilite bien inportan: To bizin ed bann proklamater pou vinn efikas dan zot minister ek pou vinn bann bon ansegnan. (Lir Zistwar Bann Apot 20:28, NW.d) Si enn ansegnan onte pou fer letid devan twa, propoz ansegnan-la pou fer letid-la dan so plas. Jackie, ki nou ti mansione avan, dir: “Bann ansien souvan pran nouvel mo bann etidian Labib. Kan mo gagn difikilte pou fer enn letid, zot donn mwa bann bon konsey.” Bann ansien kapav fer boukou pou ankouraz ek motiv bann ansegnan Labib. (1 Tes. 5:11) Jackie azoute: “Mo kontan kan bann ansien ankouraz mwa ek dir mwa ki zot apresie bann zefor ki mo fer. Zot bann parol fer mwa dibien, parey kouma enn ver delo glase pandan enn lazourne bien so. Kan zot felisit mwa, sa ed mwa pou ena plis konfians an momem ek sa fer mwa ena plis lazwa kan mo fer bann letid Labib.”​—Prov. 25:25.

19. Ki lazwa nou tou nou kapav gagne?

¹⁹ Mem si nou pa pe fer letid enn kikenn asterla, nou tou nou kapav ed bann etidian Labib pou progrese ziska batem. Kan nou akonpagn enn kikenn pou al fer enn letid, san ki nou koz tro boukou, nou kapav ed etidian-la kan nou fer bann bon komanter. Kan bann etidian vinn Lasal, nou kapav fer kamarad ar zot ek donn zot enn bon lexanp. Bann ansien kapav ankouraz bann etidian ek bann ansegnan toulede, kan zot rezerv letan pou form zot ek felisit zot. Wi, se vremem enn gran lazwa kan nou ed enn kikenn pou kontan ek servi nou Papa, Zeova!