Watchtower BIBLIOTEK LOR INTERNET
Watchtower
BIBLIOTEK LOR INTERNET
Kreol Morisien
  • LABIB
  • PIBLIKASION
  • RENION
  • w21 Mars p. 20-25
  • Lamour Ed Nou pou Sirmont Laenn

Pena video ki disponib pou seki ou finn swazir.

Sori, enn erer inn anpes sa video-la zwe.

  • Lamour Ed Nou pou Sirmont Laenn
  • Latour Degard Pe Anons Rwayom Zeova (Edision Letid)—2021
  • Soutit
  • Lor Mem Size
  • LAMOUR POU ZEOVA ED NOU POU SIRMONT LAENN
  • LAMOUR POU NOU BANN FRER EK SER ED NOU POU SIRMONT LAENN
  • LAMOUR POU NOU BANN LENNMI ED NOU POU SIRMONT LAENN
  • ERE KAN LEZOT ENA LAENN POU NOU
  • Developpe l’amour ki pa pou disparette jamais
    La Tour de Garde pé annonce Royaume Jéhovah—2009
  • Pa Les To Lamour Diminie
    Latour Degard Pe Anons Rwayom Zeova (Edision Letid)—2017
  • Kontign Ogmant To Lamour
    Latour Degard Pe Anons Rwayom Zeova (Edision Letid)—2023
  • Kontign Ena enn Gran Lamour pou Lezot
    Latour Degard Pe Anons Rwayom Zeova (Edision Letid)—2023
Rod Plis
Latour Degard Pe Anons Rwayom Zeova (Edision Letid)—2021
w21 Mars p. 20-25

LARTIK LETID 12

Lamour Ed Nou pou Sirmont Laenn

“Mo donn zot enn komannman: kontan zot prosin. Kan lemonn pou air zot, pa bliye ki li finn air mwa avan.”​—ZAN 15:17, 18.

KANTIK 129 Anou Kontign Andire

REZIMEa

1. Dapre Matie 24:9, kifer fode pa nou etone si lemond ena laenn pou nou?

ZEOVA inn kree nou pou ki nou kontan lezot ek ki lezot kontan nou. Se pou sa rezon-la ki, kan enn kikenn ena laenn pou nou, sa fer nou dimal, ek kitfwa sa fer nou per osi. Par exanp, enn ser ki apel Georgina ek ki res Lerop, dir: “Kan mo ti ena 14 an, mo mama ti deteste mwa parski mo ti pe servi Zeova. Sa ti rann mwa bien tris ek mo ti santi mwa tousel. Mo ti mem koumans panse ki mo ti enn move dimounn.”b Enn frer ki apel Danylo dir: “Kan bann solda ti bat mwa, maltret mwa, ek menas mwa parski mo ti enn Temwin Zeova, mo ti gagn per ek mo ti santi mwa imilie.” Nou bien soufer kan lezot ena laenn pou nou! Me fode pa ki sa etonn nou. Kifer? Parski Zezi ti predir ki lemond ti pou ena laenn pou nou.​—Lir Matie 24:9.

2-3. Kifer lemond ena laenn pou bann disip Zezi?

2 Lemond ena laenn pou bann disip Zezi. Kifer? Parski parey kouma Zezi, nou pa fer parti dan lemond. (Zan 15:17-19) Akoz sa, mem si nou respekte bann gouvernman imin, nou pa pou donn zot ouswa bann kitsoz ki reprezant zot, loner ki zis Bondie merite. Nou ador zis Zeova tousel, ek nou soutenir drwa ki Li ena pou dirize. Parkont, Satan ek so “desandans” zot pa dakor ki Bondie ena sa drwa-la. (Zen. 3:1-5, 15) Nou ansegn bann dimounn ki Rwayom Bondie pou regle tou bann problem ki ena lor later, ek ki biento li pou detrir tou bann ki opoz ar li. (Dan. 2:44; Rev. 19:19-21) Sa mesaz-la se enn bon nouvel pou bann dimounn ki ena limilite, me se enn move nouvel pou bann move dimounn.​—Ps. 37:10, 11.

3 Enn lot rezon kifer lemond ena laenn pou nou, se parski nou obeir bann lalwa Bondie. Seki Bondie konsider kouma bon ek pa bon, bien diferan ar seki bann dimounn dan sa lemond-la konsider kouma bon ek pa bon. Par exanp, Bondie ti detrir Sodom ek Gomor akoz bann pratik imoral ki ti ena laba. Me azordi, boukou dimounn konsider sa bann pratik imoral la kouma bann kitsoz ki normal. (Zid 7) Ek parski nou obeir bann lalwa Bondie konsernan sa bann pratik-la, bann dimounn boufonn nou ouswa zot dir ki nou bann fanatik.​—1 Pier 4:3, 4.

4. Ki bann kalite pou ed nou sirmont laenn ki bann dimounn ena pou nou?

4 Ki kitsoz pou ed nou andire kan bann dimounn ena laenn pou nou ek zot maltret nou? Nou bizin ena enn lafwa solid ek nou bizin sir ki Zeova pou ed nou. Parey kouma enn boukliye, nou lafwa kapav “tegn tou fles anflame ki diab avoye.” (Efe. 6:16) Me lafwa pa ase. Nou bizin osi ena lamour. Kifer? Parski lamour “pa ankoler vit.” Li siport ek andir tou bann kitsoz ki kapav fer li ditor. (1 Kor. 13:4-7, 13, NW) Asterla, anou gete kouma lamour pou Zeova, lamour pou nou bann frer ek ser, ek mem lamour pou nou bann lennmi, kapav ed nou pou sirmont laenn ki bann dimounn ena pou nou.

LAMOUR POU ZEOVA ED NOU POU SIRMONT LAENN

5. Ki Zezi ti kapav fer parski li ti kontan so Papa?

5 Lanwit avan so lamor, Zezi ti dir so bann disip ki ti fidel: “Mo kontan mo Papa, akoz samem tou seki mo Papa dir mwa fer, mo fer.” (Zan 14:31) Zezi ti kontan so Papa, ek sa ti donn li lafors pou andir bann leprev. Nou osi, nou lamour pou Zeova kapav ed nou pou andir bann leprev.

6. Dapre Romin 5:3-5, ki enn serviter Zeova resanti kan li gagn bann leprev?

6 Lamour ki zot ena pou Bondie finn touletan ed bann serviter Zeova pou andir bann persekision. Par exanp, kan lakour siprem Zwif ti donn bann zapot lord pou aret prese, lamour ki zot ti ena pou Zeova ti motiv zot pou “obeir Bondie plito ki obeir dimoun.” (Zist. 5:29; 1 Zan 5:3) Azordi osi, se lamour ki nou bann frer ek ser ena pou Zeova ki donn zot lafors pou andir lopozision bann gouvernman. Kan lemond ena laenn pou nou, nou pa dekouraze. Okontrer, nou ere!​—Zist. 5:41; lir Romin 5:3-5, NW.c

7. Kouma nou bizin reazir kan bann manb nou fami opoz ar nou?

7 Enn parmi bann pli gran difikilte ki nou kapav gagne, se kan bann manb nou fami opoz ar nou. Kan zot remarke ki nou pe koumans interese ar laverite, bann manb nou fami kapav panse ki bann dimounn pe rod anbet nou. Ouswa zot kapav panse ki nou pe vinn fou. (Konpar ar Mark 3:21.) Kitfwa zot kapav mem opoz ar nou. Me fode pa nou etone si bann kitsoz koumsa arive. Zezi ti dir: “To lennmi pou dan to prop fami.” (Mat. 10:36) Biensir, mem si nou fami opoz ar nou, nou pa pou ena laenn pou zot. Okontrer, plis nou lamour pou Zeova grandi, plis nou lamour pou bann dimounn osi pou grandi. (Mat. 22:37-39) Selman, zame nou pa pou aret obeir bann lalwa ek bann prinsip Labib zis pou fer bann dimounn kontan.

Enn ser ki pe amenn rol Georgina pe deboute ek pe riye. Zimaz: 1. Li pe asiz anba pandan ki so mama pe kriy ar li ek pe desir so bann piblikasion. 2. Li pe lir Labib. 3. Li avek enn lot ser ek zot pe etidie Labib ansam. 4. Dan Lasal, li pe koz avek bann frer ek ser.

Mem si enn sitiasion fer nou soufer, Zeova touletan akote ar nou pou rekonfort nou ek soutenir nou (Get paragraf 8-10)

8-9. Ki kitsoz ti ed enn ser pou andir lopozision?

8 Georgina, ki nou ti mansione avan, ti reisi andir lopozision ki li ti gagne ar so mama. Georgina dir: “Mo mama ek mwa nou ti koumans etidie Labib avek bann Temwin Zeova. Me sis mwa apre, kan mo ti anvi koumans asiste bann renion, mo mama ti koumans opoz ar mwa. Mo ti aprann ki li ti gagn kontak avek bann aposta. Li ti pe servi rezonnman bann aposta pou koz avek mwa. Li ti osi maltret mwa, ris mo seve, trangle mwa, ek li ti zet mo bann piblikasion. Mo ti ena 15 an kan mo ti pran batem. Mo mama ti avoy mwa formantori pou esey anpes mwa servi Zeova. Laba, ti ena bann zenn ki ti droge ek ki ti fer bann krim. Li kapav bien difisil pou andir lopozision, sirtou kan se enn kikenn ki sipoze kontan twa ek pran twa swin, ki opoz ar twa.”

9 Ki kitsoz ti ed Georgina pou andire? Li dir: “Sa zour ki mo mama ti koumans opoz ar mwa la, mo ti fek fini lir Labib an-antie. Mo ti sir ki mo ti dan laverite, ek mo ti santi mwa bien pros ar Zeova. Mo ti priye Li souvan, ek Li ti tann mo bann lapriyer. Kan mo ti dan formantori, enn ser ti invit mwa kot li ek nou ti etidie Labib ansam. Sa lepok-la, bann frer ek ser ti bien ankouraz mwa kan mo ti al renion. Zot ti fer mwa santi ki mo form parti zot fami. Mo ti trouve ki Zeova pli for ki ninport ki opozan.”

10. Ki kitsoz nou kapav sir konsernan nou Bondie Zeova?

10 Lapot Pol ti ekrir ki nanye pa “kapav separ nou ar lamour ki Bondie ena pou nou dan Kris Zezi nou Segner.” (Rom. 8:38, 39) Mem si enn sitiasion fer nou soufer, Zeova touletan akote ar nou pou rekonfort nou ek soutenir nou. Ek parey kouma nou’nn trouve dan lexanp Georgina, Zeova kapav ed nou osi gras-a nou bann frer ek ser.

LAMOUR POU NOU BANN FRER EK SER ED NOU POU SIRMONT LAENN

11. Kouma lamour ki mansione dan Zan 15:12, 13 ti ed bann disip Zezi? Donn enn lexanp.

11 Lanwit avan so lamor, Zezi ti rapel so bann disip ki zot bizin kontan zot kamarad. (Lir Zan 15:12, 13.) Li ti kone ki si zot ti ena sa kalite lamour-la ant zot, enn lamour kot zot ti dispoze pou sakrifie zotmem pou zot kamarad, sa ti pou ed zot pou viv dan linite ek pou andir laenn sa lemond-la. Anou pran lexanp bann Kretien dan lasanble Tesalonik. Depi ki sa lasanble-la ti forme, sa bann Kretien-la ti gagn persekision. Kanmem sa, zot ti kontign ena lamour, zot ti andire, ek zot ti res fidel. (1 Tes. 1:3, 6, 7) Pol ti ankouraz zot pou kontign montre “ankor plis” lamour. (1 Tes. 4:9, 10) Lamour ti motiv zot pou rekonfort bann ki deprime ek pou soutenir bann ki feb. (1 Tes. 5:14) Sa bann Kretien-la ti swiv bann konsey Pol, parski dan deziem let ki Pol ti ekrir enn an plitar, Pol ti dir zot: “Lamour ki sakenn ena ant zot pe . . . grandi.” (2 Tes. 1:3-5) Zot lamour ti ed zot pou andir bann difikilte ek bann persekision.

Enn koup ki pe amen rol Danylo ek so madam pe deboute ek pe riye. Zimaz: 1. Frer-la pe azenou avek so lame deryer so latet pandan ki enn solda pe menas li avek enn fizi. 2. Dan lagar trin, koup-la pe dir orevwar bann frer ek ser. 3. Enn frer ek enn ser pe donn zot bann sak komision.

Lamour ki bann Kretien ena ant zot kapav ed zot pou sirmont laenn (Get paragraf 12)d

12. Kan ti ena lager dan enn pei, kouma bann frer ek ser ti montre lamour pou zot kamarad?

12 Anou get lexanp Danylo ek so madam, ki nou ti mansione avan. Kan ti ena lager dan zot pei ek ki sa ti vinn ziska lavil kot zot ti reste, Danylo ek so madam ti kontign asiste bann renion. Zot ti fer zot maximum pou prese ek zot ti partaz zot manze ar bann frer ek ser. Me enn zour, bann solda ti vinn get Danylo. Danylo rakonte: “Zot ti dir mwa aret servi Zeova. Mo ti refize, ek zot ti bat mwa. Zot ti menas mwa avek enn fizi, ek zot ti tir bann kout bal pre ar mo latet. Avan ki zot ale, zot ti dir mwa ki zot ti pou retourne pou viol mo madam. Lerla, bann frer ti fer nou pran enn trin pou al dan enn lot lavil. Zame mo pa pou bliye lamour ki sa bann frer-la ti ena pou nou. Kan nou ti ariv dan lavil-la, bann frer ti donn nou manze ek zot ti ed mwa pou gagn enn travay ek enn lakaz. Lerla, nou osi nou ti kapav ed bann frer ek ser ki ti pe sove akoz sa lager-la.” Bann lexanp koumsa montre ki lamour ki bann Kretien ena ant zot kapav ed zot pou sirmont laenn!

LAMOUR POU NOU BANN LENNMI ED NOU POU SIRMONT LAENN

13. Kouma lespri sin kapav ed nou pou kontign persevere dan nou servis pou Zeova mem kan bann dimounn ena laenn pou nou?

13 Zezi ti dir so bann disip ki zot bizin kontan zot bann lennmi. (Mat. 5:44, 45) Sa pa fasil pou fer! Me avek led lespri sin Zeova, nou kapav fer li. Parmi bann laspe frwi lespri sin Bondie, ena lamour, pasians, bonte, douser, ek metriz lor noumem. (Gal. 5:22, 23, NW) Sa bann kalite-la kapav ed nou pou sirmont laenn. Boukou dimounn ki ti opoze ar nou, inn sanze parski zot mari, zot fam, zot zanfan, ouswa zot bann vwazin inn manifeste sa bann zoli kalite-la. Boukou parmi zot inn mem vinn nou bann frer ek ser. Alor, si bann dimounn ena laenn pou twa parski to pe servi Zeova ek ki to trouv sa difisil pou kontan zot, priye pou gagn lespri sin. (Lik 11:13) To kapav sir ki obeir Zeova se touletan meyer kitsoz ki to kapav fer.​—Prov. 3:5-7.

14-15. Kouma Romin 12:17-21 inn ed Yasmeen pou montre lamour anver so mari ki ti opoze ar li?

14 Anou get lexanp Yasmeen. Kan Yasmeen ti vinn enn Temwin Zeova, so mari ti panse ki bann dimounn ti anbet li, ek li ti esey fer Yasmeen aret servi Zeova. So mari ti insilte li ek ti fer so fami, enn pret, ek enn sorsie menas li ek fer li panse ki li ti pe abandonn so fami. So mari ti mem insilte bann frer pandan enn renion! Sa sitiasion-la ti bien afekte Yasmeen ek souvan li ti plore.

15 Kan Yasmeen ti al renion, bann frer ek ser ti rekonfort li ek ankouraz li. Bann ansien ti ankouraz li pou met an pratik bann parol ki ena dan Romin 12:17-21. (Lir.) Yasmeen dir: “Sa ti bien difisil. Me mo ti rod led Zeova, ek mo ti fer mo maximum pou met an pratik sa konsey Labib la. Par exanp, kan mo mari ti ankoler ek ki li ti zet later partou dan lakwizinn, mo ti netwaye. Kan li ti insilte mwa, mo ti reponn li avek douser. Ek kan li ti malad, mo ti pran li swin.”

Enn ser ki pe amenn rol Yasmeen pe deboute ek pe riye. Zimaz: 1. So mari ankoler ek pe maltret li. 2. Li pe ekout bann lankourazman Biblik ki de ansien pe donn li. 3. Pandan ki so mari pe get li, li pe azenou ek li pe ramas bann dezord ki so mari inn fer. 4. Li pe fer so mari manze kan mari-la malad.

Si nou montre lamour anver lezot, kitfwa zot kapav aret opoz ar nou (Get paragraf 16-17)e

16-17. Ki nou aprann ar lexanp Yasmeen?

16 Yasmeen ti gagn bann bienfe parski li ti montre lamour anver so mari. Li dir: “Mo mari ti koumans ena plis konfians an mwa, parski li ti kone ki mo ti touletan koz laverite. Li ti koumans ekout mwa kan mo ti koz lor larelizion avek li, ek li ti aksepte pou fer lape. Azordi, li ankouraz mwa pou al renion. Asterla, mo mari ek mwa nou ena enn pli bon relasion ek ena lape dan lakaz. Mo espere ki enn zour mo mari aksepte laverite ek ki li servi Zeova ansam avek mwa.”

17 Lexanp Yasmeen montre nou ki lamour “siport tou, . . . esper tou, andir tou.” (1 Kor. 13:4, 7, NW) Si nou montre lamour anver lezot, kitfwa zot kapav aret opoz ar nou. Ek sa pou fer Zeova plezir. Me mem si nou bann lennmi kontign ena laenn pou nou, nou kapav ere. Kifer nou dir sa?

ERE KAN LEZOT ENA LAENN POU NOU

18. Kifer nou kapav ere kan lezot ena laenn pou nou?

18 Zezi ti dir: “Bienere kan dimoun air zot.” (Lik 6:22) Nou pa anvi ki bann dimounn ena laenn pou nou. Ek nou pa kontan ki bann dimounn persekit nou akoz nou lafwa. Alor, kifer eski nou ere kan lezot ena laenn pou nou? Anou get trwa rezon. Premierman, kan nou andire, nou gagn faver Bondie. (1 Pier 4:13, 14) Deziemman, nou lafwa vinn pli for. (1 Pier 1:7) Ek trwaziemman, nou pou gagn nou rekonpans, setadir lavi pou touletan.​—Rom. 2:6, 7.

19. Kifer bann zapot ti ere kan zot ti gagn bate?

19 Bann zapot ti gagn sa lazwa lor ki Zezi ti pe koze la. Inpe letan apre rezireksion Zezi, bann zapot ti gagn bate ek zot ti gagn lord pou aret prese. Me kanmem sa, zot ti zwaye. Kifer? “Parski ti konsider zot dign pou gagn maltrete akoz nom Zezi.” (Zist. 5:40-42) Bann zapot ti bien kontan zot Met, ek sa lamour-la ti pli for ki laper ki zot ti ena pou zot bann lennmi. Anplis, zot ti montre zot lamour pou Zezi kan zot ti “kontign ansegne e proklam Bonn Nouvel.” Azordi osi, boukou frer ek ser pe kontign servi Zeova avek fidelite malgre zot bann difikilte. Zot kone ki Zeova zame pa pou “bliye seki zot inn fer ek lamour ki zot finn montre pou so nom.”​—Ebre 6:10, NW.

20. Ki nou pou examine dan prosin lartik?

20 Tanki Zeova pa detrir sa lemond-la, bann dimounn dan sa lemond-la pou touletan ena laenn pou nou. (Zan 15:19) Me nou pena pou per. Kouma nou pou trouve dan prosin lartik, Zeova ‘pou fortifie ek protez’ so bann serviter ki fidel. (2 Tes. 3:3) Alor, anou kontign kontan Zeova, kontan nou bann frer ek ser, ek kontan nou bann lennmi. Kan nou swiv sa konsey-la, nou pou viv dan linite ek nou pou vinn pli for lor plan spiritiel. Lerla, nou pou donn Zeova loner ek nou pou montre ki lamour pli for ki laenn.

POU NOU SIRMONT LAENN, KIFER NOU BIZIN . . .

  • kontan Zeova?

  • kontan nou bann frer ek ser?

  • kontan nou bann lennmi?

KANTIK 106 Kiltiv Lamour

a Dan sa lartik-la, nou pou trouve kouma lamour pou Zeova, lamour pou nou bann frer ek ser, ek mem lamour pou nou bann lennmi, kapav ed nou pou kontign servi Zeova mem si lemond ena laenn pou nou. Nou pou trouve osi kifer Zezi ti dir ki nou kapav ere kan lezot ena laenn pou nou.

b Finn sanz sertin nom dan sa lartik-la.

c Romin 5:3-5: “3 Ek pa zis sa, me nou bizin zwaye kan nou pe pas dan bann leprev, parski nou kone ki leprev prodir landirans, 4 ek landirans, an retour, enn kondision aprouve; sa kondision aprouve la prodir lesperans, 5 ek lesperans pa pou fer nou gagn desepsion; parski finn ranpli nou leker avek lamour Bondie atraver lespri sin, ki nou’nn gagne.”

d DESKRIPSION ZIMAZ: Apre ki bann solda ti menas Danylo, bann frer ti ed li ek so madam pou al res dan enn lot lavil, ek bann frer laba ti bien akeyir zot.

e DESKRIPSION ZIMAZ: Kan Yasmeen so mari ti opoz ar li, bann ansien ti donn Yasmeen enn bon konsey. Kan so mari ti malad, Yasmeen ti pran li swin ek ti montre ki li ti enn bon madam.

    Piblikasion Kreol Morisien (2000-2025)
    Dekoneksion
    Koneksion
    • Kreol Morisien
    • Partaze
    • Preferans
    • Copyright © 2025 Watch Tower Bible and Tract Society of Pennsylvania
    • Linformasion Legal
    • Prinsip Konfidansialite
    • Reglaz Konfidansialite
    • JW.ORG
    • Koneksion
    Partaze