Kouma To Kapav Rapel Bann Verse Labib?

Eski to’nn deza gagn difikilte pou rapel enn verse Labib ki to bien kontan? Kitfwa se enn verse ki rekonfort twa, ki ed twa pou sirmont bann move panse, ouswa to anvi partaz sa verse-la avek enn kikenn. (Ps. 119:11, 111) Anou get de-trwa sizesion ki kapav ed twa pou rapel bann verse Labib.

• Servi aplikasion JW Library. Kan to pe lir Labib lor JW Library ek ki to lir enn verse ki to anvi rapel, to kapav kree enn not pou sa verse-la ek met li dan enn kategori (tag) ki to kapav apel “Mo Bann Verse Prefere.” Koumsa, li pou pli fasil pou to retrouv li apre.

• Ekrir verse-la ek met li dan enn plas kot to pou trouv li. Ekrir verse-la lor enn bout papie ek met li dan enn plas kot to pou trouv li souvan. Sertin dimounn met li lor zot laglas ouswa lor laport zot frizider. Ena lezot ki met li lor lekran (screen saver) zot portab ouswa zot computer.

• Fer bann ti kart. Pran enn ti kart, ek lor enn kote kart-la, ekrir liv, sapit, ek verse Labib la, ek lor lot kote kart-la, ekrir seki verse-la dir. Apre sa, detanzantan, pran bann ti kart-la, lir verse ki ena lor enn sa bann kart-la ek esey devine dan ki liv Labib, ki sapit ek ki verse li sorti. Ouswa, to kapav fer lekontrer osi.