Ansegn Bann Verite Biblik dan Bon Fason ek dan Bon Moman

1. Ki nou bizin fer pou ki nou kapav form parti dan fami Zeova?

KAN nou zwenn enn frer ouswa enn ser pou premie fwa, enn kestion ki souvan nou poz li se, “Kouma to’nn konn laverite?” Lerla, kitfwa li pou dir ki li’nn “grandi dan laverite,” ouswa ki li fek “konn laverite.” Nou reponn koumsa parski laverite ki sorti dan Labib ena enn lefe lor nou lavi. Nou kone ki, pou nou kapav form parti dan fami Zeova, nou bizin kontan laverite ek met li an pratik. Savedir osi ki nou bizin onet dan seki nou dir ek seki nou fer.—Ps. 15:1-3.

2. (a) Ki kitsoz bann dimounn ti kone lor Zezi? (b) Ki lefe bann verite ki Zezi ti ansegne ti pou ena lor bann dimounn?

² Zezi ti touletan koz laverite. Mem si parfwa so bann lennmi pa ti kontan seki li ti dir, zot ti rekonet ki li ti touletan koz laverite. (Mat. 22:16) Zezi ti explik so bann disip lefe ki laverite ti pou ena lor bann dimounn. Li ti dir: “Mo’nn vini pou met divizion ant enn garson ek so papa, ant enn tifi ek so mama, ek ant enn belfi ek so belmer.” (Mat. 10:35) Zezi pa ti anvi ki bann dimounn rezet mesaz ki li ek so bann disip ti pe prese, me li ti kone ki sa ti pou arive. (Mat. 23:37) Li ti kone ki so mesaz ti pou kree divizion ant bann dimounn, parski sertin ti pou kontan bann verite ki li ti pe ansegne, alor ki lezot ti pou rezet sa.—2 Tes. 2:9-11.

3. Ki nou pou examine dan sa lartik-la?

³ Nou swiv lexanp Zezi kan nou touletan fer zefor pou koz laverite, mem si bann dimounn pa kontan nou akoz sa. Ek mem si bann dimounn pa kontan mesaz ki nou prese, nou kontign prese ek nou ansegn bann verite ki ena dan Labib. Selman, eski sa vedir ki nou bizin koz laverite, prese, ek ansegne, ninport kouma? Non! Nou bizin fer sa dan bon fason ek dan bon moman. Dan sa lartik-la, nou pou reponn sa premie kestion-la: Kotsa nou kapav trouv laverite? Apre sa, nou pou osi reponn sa kestion-la: Kifer, kouma, ek kan eski nou bizin ansegn lezot bann verite ki ena dan Labib? Repons sa bann kestion-la, pou ed nou pou koz laverite ek pou ansegn bann verite ki ena dan Labib, dan bon fason ek dan bon moman.

KOTSA NOU KAPAV TROUV LAVERITE?

4. Kifer nou dir ki laverite sorti kot Zeova?

⁴ Laverite sorti kot Zeova. Tou seki Li dir li laverite. Par exanp, tou seki Li dir nou konsernan seki bon ek seki move, li laverite. (Ps. 19:9; 119:142, 151) Tou seki Li dir konsernan lavenir pou vremem realize. (Iza. 55:10, 11) Li touletan tini so bann promes. (Nonb 23:19) Avredir, Zeova pa kapav koz manti! (Ebre 6:18) Alor, nou konpran kifer Zeova Li “Bondie laverite.”—Ps. 31:5.

5. Kifer li pa difisil pou konn “Bondie laverite”? Explike. (Zistwar Bann Zapot 17:27)

⁵ Mem si sertin dimounn dir ki li difisil pou konn Zeova, “Bondie laverite,” sa li fos. Kifer? Parski tou seki ena otour nou, se bann prev ki Li vremem existe. (Rom. 1:20) Kan lapot Pol ti koz ar sertin dimounn intelizan ki ti ena dan Atenn, li ti dir zot ki Bondie anvi ki nou “trouv li” ek ki Li “pa lwin ar sakenn parmi nou.” (Lir Zistwar Bann Zapot 17:27.) Avredir, kan bann dimounn ki ena limilite rod laverite, Zeova atir zot ver Li.—Zan 6:44.

6. Sit sertin verite ki ena dan Labib, ek kifer to rekonesan ki to konn sa bann verite-la?

⁶ Enn lot fason ki nou kapav konn Zeova se kan nou etidie Labib. Kifer? Parski Zeova inn servi so lespri sin pou gid bann dimounn ki’nn ekrir Labib. (2 Pier 1:20, 21) Alor, tou seki ena dan Labib li laverite ek nou kapav fer li konfians. Par exanp, nou kapav ena konfians dan seki Labib dir lor kouma liniver ek lavi lor later inn koumanse. (Zen. 1:1, 26) Nou kapav krwar osi seki Labib dir lor kifer nou tou nou fer pese ek nou mor, ek kifer ena otan soufrans azordi. (Rom. 5:12; 6:23) Nou kapav ena foul konfians osi kan Labib dir ki Zeova pou servi so Garson pou repar tou ditor ki Satan, “papa bann manter,” inn fer. (Zan 8:44; Rom. 16:20) Ek nou kapav sir ki bann promes ki ena dan Labib pou realize, kouma par exanp Zezi pou detrir tou seki move, li pou resisit bann mor, li pou fer later vinn enn paradi, ek li pou ed nou pou vinn parfe. (Zan 11:25, 26; 1 Zan 3:8) Se enn gran privilez ki Zeova inn donn nou! Li’nn ansegn nou laverite, ek Li donn nou posibilite pou ansegn sa lezot.—Mat. 28:19, 20.

KIFER NOU BIZIN KOZ EK ANSEGN LAVERITE?

7-8. Kan nou koz laverite, kifer nou lintansion bien inportan? Donn enn lexanp. (Mark 3:11, 12) (Get zimaz osi.)

⁷ Kouma nou’nn trouve taler-la, nou bizin koz laverite si nou anvi form parti dan fami Zeova. Selman, pou nou fer Zeova plezir, li pa ase ki nou zis koz laverite. Rezon pou kifer nou koz laverite, setadir nou lintansion, sa osi bien inportan pou Zeova. Anou gete seki ti arive kan Zezi ti lor later. (Lir Mark 3:11, 12.) Kan li ti pe prese pre ar Lamer Galile, enn gran lafoul dimounn ti rasanble otour li. Dan sa lafoul-la, ti ena bann dimounn ki ti posede par bann demon. Zot ti tom azenou devan Zezi ek zot ti kriye bien for: “Tomem Garson Bondie.” Kifer sa bann demon-la ti dir laverite lor Zezi? Kitfwa zot ti anvi ki bann dimounn ki ti pe tann zot, fer zot konfians, koumsa zot ti pou kapav fer sa bann dimounn-la aret servi Zeova. Mem si sa bann demon-la ti dir laverite lor Zezi, zot pa ti fer sa avek bann bon lintansion. Selman, zot pa ti reisi anbet Zezi. Lerla, Zezi ti donn zot lord pou pa koz lor li.

⁸ Ki leson sa aprann nou? Rezon pou kifer nou koz laverite, setadir nou lintansion, bien inportan pou Zeova. Akoz sa, li bien inportan ki se nou lamour pou Zeova ki motiv nou pou pres ek ansegn bann dimounn laverite lor Li, ek si arive ki bann dimounn flat nou akoz mesaz ki nou prese, nou bizin fer zot konpran ki se Zeova ki merite gagn laglwar, pa nou!—Mat. 5:16; konpar ar Zistwar Bann Zapot 14:12-15.

9. Ki kitsoz fode pa nou fer, ek kifer?

⁹ Fode pa ki nou rod atir latansion lor nou-mem. Anou pran enn lexanp ki pou montre nou kouma sa kapav arive. Fer koumadir enn ansien dir twa bann kitsoz ki konfidansiel, ek ki twa to al dir sa lezot. Apre inpe letan, sa bann dimounn-la trouve ki seki to’nn dir inn vremem arive. Alor, zot inpresione ek zot koumans panse ki to konn boukou kitsoz konfidansiel. Enn sitiasion koumsa, kapav fer bann dimounn panse ki to enn kikenn ki inportan. Selman, sa pa pou fer Zeova plezir. (Prov. 11:13) Kifer? Parski mem si to’nn dir laverite, to lintansion pa ti bon parski to pa ti ena drwa dir lezot sa bann kitsoz konfidansiel la.

KOUMA NOU BIZIN KOZ EK ANSEGN LAVERITE?

10. Explike ki sa vedir bann parol ki ‘touzour fer plezir pou tande’? (Kolosien 4:6)

¹⁰ Lir Kolosien 4:6. Lapot Pol ti rapel bann Kolosien ki zot bann parol bizin ‘touzour fer plezir pou tande.’ Ki savedir? Lexpresion Grek ki’nn servi isi vedir ki nou bann parol bizin zanti, ankourazan, ek fer lezot dibien.

11-12. Kifer nou bizin fer atansion ar fason ki nou ansegn bann dimounn laverite? Servi enn lexanp pou explike. (Get zimaz osi.)

¹¹ Kan nou ansegn bann dimounn bann verite ki ena dan Labib, nou bann parol bizin ‘touzour fer plezir pou tande.’ Labib konpar laverite ar enn lepe ki bien fite, ki kapav “separ lekor ek lespri.” Savedir ki Labib kapav fer bann dimounn kone seki zot vremem ena dan zot leker ek zot bann lintansion. (Ebre 4:12) Si nou pa servi Labib kouma bizin, nou pou swa ofans bann dimounn, swa fer zot ankoler. Anou gete kouma sa kapav arive.

¹² Fer koumadir dan predikasion, to zwenn enn kikenn ki kontan Bondie, me ki servi bann zidol pou priye Li. Sa dimounn-la bien kontan osi fet Nwel ek Pak ar so fami. To kapav servi Labib pou montre li ki se dan vid ki li servi bann zidol ki pena lavi pou ador Bondie, ek to kapav montre li osi ki Nwel ek Pak zot bann fet ki pa an-akor ar seki Labib ansegne. (Iza. 44:14-20; 2 Kor. 6:14-17) Si to fer sa premie fwa ki to zwenn sa dimounn-la, li vre ki to pe dir li laverite, selman to pa pe servi Labib dan enn bon fason.

13. Kouma nou kapav asezonn nou bann parol?

¹³ Pol ti dir osi ki nou bann parol bizin bien “asezone,” parey kouma enn bon manze. Kan li ti dir sa, Pol pa ti pe rod dir ki nou bizin makiy ouswa kasiet laverite. Okontrer, li ankouraz nou pou asezonn nou bann parol, savedir ki kan nou ansegn lezot bann verite ki ena dan Labib, nou bizin dir zot bann kitsoz ki zot pou kontan pou tande. (Zob 12:11) Selman, nou kapav gagn difikilte pou fer sa. Kifer? Anou pran enn lexanp pou explik sa. Eski tou dimounn asezonn zot manze parey? Non. Selman, parfwa nou kapav panse ki tou dimounn ena mem gou ki nou, ek lerla nou panse ki zot oblize kontan fason ki nou’nn asezonn nou manze. Dan mem fason, kitfwa nou kapav panse ki tou dimounn kontan fason ki nou koze. Selman, sa li fos. Par exanp, dan sertin kiltir, kitfwa li normal kan enn kikenn dir fran-fran seki li panse, mem kan li pe koz ar bann ki pli gran ki li. Selman, dan lezot kiltir, kitfwa fode zame koz koumsa, parski sa pou ofans lezot. Lapot Pol ti dir ki nou bizin kone kouma pou “reponn sak dimounn.” Savedir ki nou bizin asezonn nou bann parol, pa kouma nou nou kontan, me plito pou fer lezot kontan.

KAN ESKI NOU BIZIN KOZ EK ANSEGN LAVERITE?

14. Kan li ti lor later, eski Zezi ti ansegn so bann disip tou seki li ti kone? Explike.

¹⁴ Zezi inn touletan koz dan enn bon fason ar so bann disip ek li ti ansegn zot boukou kitsoz. (Mark 6:34) Selman, mem si zot ti ankor ena boukou kitsoz pou aprann, Zezi pa ti esey ansegn zot tou seki li ti kone. Li ti konn zot bann limit. Li ti kone osi ki pa ti ankor bon moman pou ki zot aprann sertin kitsoz. Li ti dir zot ki zot pa ti ankor pare pou “konpran tousala aster-la.” (Zan 16:12) Ki leson sa aprann nou?

15. Eski nou bizin ansegn nou etidian Labib tou seki nou kone enn sel kout? Explike. (Proverb 25:11) (Get zimaz osi.)

¹⁵ Lexanp Zezi montre nou ki, mem si nou konn bann verite ki ena dan Labib, sa pa vedir ki nou bizin ansegn bann dimounn tou seki nou kone enn sel kout. Kouma nou kapav swiv lexanp Zezi? Nou bizin pran kont sitiasion sak dimounn. Anou revinn lor lexanp sa dimounn ki kontan fet Nwel ek Pak ansam ar so fami la. Nou kone ki sa bann fet-la sorti dan fos relizion ek ki sa pa fer Zeova plezir. Me fer koumadir to’nn koumans etidie Labib ar sa dimounn-la de-trwa semenn avan Nwel. Eski to panse ki se bon moman pou to montre li seki Labib dir lor bann fet ki sorti dan bann fos relizion, ek apre sa to atann ki li aret fet Nwel deswit? Li vre ki ena sertin etidian Labib ki pa tarde pou met an pratik seki zot aprann. Selman, ena lezot ki pran pli boukou letan pou sanz zot fason panse ek zot kondwit. Pou nou ed nou etidian Labib pou progrese, nou bizin dir li seki li bizin tande kan li pare pou tann sa, setadir dan bon moman.—Lir Proverb 25:11.

16. Kouma nou kapav ed nou bann etidian Labib pou “kontign mars dan laverite”?

¹⁶ Enn parmi bann kitsoz ki donn nou boukou lazwa, se ed bann dimounn pou aprann laverite lor Zeova. Ek nou kapav ed zot pou “kontign mars dan laverite” si nou fer sa bann kitsoz-la: Kontign donn zot enn bon lexanp. (3 Zan 3, 4) Montre zot ki nou ena lafwa dan bann promes ki ena dan Labib par fason ki nou viv nou lavi. Koz laverite ek fer sa avek bann bon lintansion. Koz dan enn bon fason ek dan bon moman kan nou ansegn bann verite ki ena dan Labib. Ek kan bann dimounn flat nou, fer zot konpran ki se Zeova ki merite gagn laglwar. Si nou fer sa bann kitsoz-la, sa pou montre ki nou enn serviter Zeova, Bondie laverite.