Eski Bann Temwin Zeova Partisip Ansam Avek Lezot Relizion pou Ador Bondie?

Antan ki bann Temwin Zeova, nou kontan koz lor Bondie avek bann dimounn dan tou relizion me nou pa ador Bondie avek bann ki pena mem krwayans ki nou. Labib montre ki bann vre Kretien “bizin rasanble ansam,” ek enn kitsoz inportan kifer ena sa larmoni-la se parski zot ini dan zot krwayans. (Efezien 4:16; 1 Korintien 1:10; Filipien 2:2) Sa inplik plis ki ena mem valer moral kouma lamour, konpasion ek pardon. Nou bann krwayans relizie baze lor enn konesans exakt lor Labib ek san sa konesans-la nou lafwa ti pou dan vid.​—Romin 10:2, 3.

Labib konpar ladorasion avek bann dimounn ki ena lezot krwayans kouma enn zoug ki pa egal, ki pa konpatib avek lafwa enn Kretien ek ki kapav fer li ditor. (2 Korintien 6:14-17) Alor, Zezi pa ti permet so bann disip pou partisip ansam avek lezot relizion pou ador Bondie. (Matie 12:30; Zan 14:6) Dan mem fason, Lalwa Bondie atraver Moiz ti interdi bann Izraelit pou partisip dan ladorasion avek lezot nasion otour. (Exod 34:11-14) Plitar, bann Izraelit fidel ti rezet enn led ki ti pou amenn zot form enn lalians relizie avek bann ki pratik lezot relizion.​—Esdras 4:1-3.

Eski bann Temwin Zeova koz avek bann ki ena enn lot relizion?

Wi. Parey kouma lapot Pol, nou interese pou konpran panse ek krwayans “plis dimounn posib” dan nou minister. (1 Korintien 9:19-22) Pandan nou konversasion, nou esey avek tou nou leker aplik bann konsey Labib pou montre enn “gran respe” pou dimounn-la.​—1 Pier 3:15.