Tovolahy Modely—Hezekia

Nisy fiovana lehibe teo amin’ny fiainan’i Hezekia. Vao 25 taona izy dia efa lasa mpanjakan’ny Joda. Mpanjaka tsara ve izy? Sa kosa mpanjaka ratsy fanahy toa an’i Ahaza rainy? Mpivadi-pinoana i Ahaza, ary tsy nibebaka mihitsy mandra-pahafatiny. Nampirisika ny olona hanompo sampy izy. Nodorany ho an’ny andriamani-diso mihitsy aza ny zanany sasany. (2 Tantara 28:1-4) Mbola niezaka ny ho tia ny fivavahana tamin’i Jehovah foana anefa i Hezekia, na teo aza izany rehetra izany. Tsy nieritreritra koa izy hoe tsy maintsy nanaraka izay nataon-drainy. “Nifikitra tamin’i Jehovah” foana izy.—2 Mpanjaka 18:6.

Tsy tia ny fivavahana amin’i Jehovah koa ve ny dadanao na mamanao? Mampijaly anao ve izy? Sa manao zava-dratsy hafa, ary tsy mety miala amin’izany? Miezaha tsy hanahaka azy! Marina fa nampalahelo ny zava-nisy tao an-tranon-dry Hezekia, nefa tsy navelany hanimba ny fiainany izany. Lasa mpanjaka tena tsara izy, ka ‘tsy nisy tahaka azy ny mpanjakan’ny Joda rehetra taoriany.’ (2 Mpanjaka 18:5) Ho tsara koa ny fiainanao any aoriana any, raha ‘mifikitra amin’i Jehovah’ foana ianao, na dia mafy aza izao ny manjo anao ao an-trano.