ZEBEDIO

(Zebedìo) [mety ho avy amin’ny fototeny heb. midika hoe “manome”].

Rain’i Jakoba sy Jaona, izay samy apostolin’i Jesosy. (Mt 4:21, 22; 10:2; 26:37; Mr 3:17; 10:35; Lk 5:10; Jn 21:2) Maro no mihevitra fa vadin’i Zebedio i Salome, sady rahavavin’i Maria renin’i Jesosy. Raha izany no izy, dia dadatoan’i Jesosy i Zebedio (satria vadin’ny rahavavin-dreniny), ary zanak’olo-mpiray tam-po i Jesosy sy Jakoba ary Jaona.​—Mt 27:56; Mr 15:40; Jn 19:25; jereo SALOME No. 1.

Nanarato tao amin’ny Ranomasin’i Galilia no fiveloman’i Zebedio, ary azo inoana fa nandeha tsara ny asany satria nisy mpikarama niara-niasa taminy. (Mr 1:16, 19, 20) Afaka nikarakara an’izay nilain’i Jesosy i Salome vadin’i Zebedio. (Mr 15:40, 41) Tsy fantatra raha nanara-dia an’i Kristy i Zebedio na tsia. Ny vady aman-janany kosa afaka nanao izany malalaka.​—Mt 20:20.