Inona no mibaiko ny fiainanao: ny fomba amam-panao sa ny fotopoto-pitsipiky ny Baiboly?
TOA TSY nino izay hitany, ity Japone iray, nitsidika tany amin’ny tany hafa iray any Azia. Noraisin’ny tompon-trano ny hazokely fihinanany, nanavaka hena teo an-dovia izy, nifidy silany tsara iray ary nametraka izany teo amin’ny viliam-barin’ny vahininy. Ho anisan’ny fomba ratsy izany, any aminy any Japon. Tsy hisy olona hihinana amin’ireo hazokeliny, raha tsy efa nampihodina izany aloha, mba tsy hikasika ilay sakafo ny tendrony entina any am-bava. Kanefa, tsy nikasa hanevateva azy velively ny mpampiantrano azy, fa hanaja azy. Ny fihetsika iray tsy azo saintsainina any Japon dia mari-panajana tany amin’io tany io!
Endrey izany fahasamihafana amin’ny fomba amam-panao! Toy inona ny fahadisoam-piheverana ny amin’izy ireny! Ary iza no afaka milaza izay tsara indrindra amin’izy ireny? Kanefa, miorina amin’ny finoanoampoana sy ny fampianaran-diso ny sasany amin’izy ireny. Ho an’ireo izay manana fieritreretana voataizan’ny Baiboly, dia tsy isalasalana fa tokony hariana ny fanao toy ireny. Inona no afaka manampy olona iray maniry hampifaly an’Andriamanitra hanapa-kevitra ny amin’ny fomba amam-panao mendrika hotandremana, ary hatraiza? Ny fotopoto-pitsipiky ny Baiboly, satria ny kristiana dia manaiky io boky io ho toy ny mari-drefy modely, na aiza na aiza iainany.
Ny fampiharana ny fotopoto-pitsipiky ny Baiboly
Ny hoe ananan’ny Tenin’Andriamanitra tokoa fahefana lehibe hanan-kery amin’ny fon’ny olona manetry tena sy hahatonga ny fiainany hifanaraka kokoa amin’ny làlan’Andriamanitra, izany dia voaporofo tsara mihitsy. Nanambara ny apostoly Paoly fa ny kristiana tany Tesalonika dia nandray ny Tenin’Andriamanitra ‘araka izay marina, dia ny Tenin’Andriamanitra, izay niasa tao anatin’izy ireo izay nino koa’. (I Tesaloniana 2:13.) Mahery aoka izany io teny io ka, araka ny ampisongadinan’ny I Korintiana 6:9-11 azy, dia nahatonga maro tamin’ny mponina tao amin’ny tanànan’ny Korinto fahiny, nalaza noho ny fiainany baranahiny, hiala tamin’ny fanaony taloha: ny halatra, ny fijangajangana, ny fimamoana, ary ny fandrian’ny lehilahy amin’ny lehilahy. Miasa aminao koa ve ny Tenin’Andriamanitra? Mibaiko ny fiainanao araka izay farany azo atao ve ny fotopoto-pitsipiny, ka mamela anao hahafantatra ny tokony hatao manoloana ny fomba amam-panao eo an-toerana?
Miharihary indraindray fa mifanohitra mivantana amin’ny fotopoto-pitsipiky ny Baiboly ny fomba amam-panao iray. Amin’izany, izay mahalala ny fepetran’i Jehovah sy maniry hampifaly azy dia hanary ny fomba aman-panao toy izany. Ohatra, angamba izany ho fandoroana emboka amin’ny fotoam-pandevenana hampitonena ny ‘fanahin’ilay’ maty na koa mba hampifaliana azy amin’ny fanomezana azy “fiaingana” tsara. Mety izany ho fandoroana koa sarim-pananana trano, televiziona, fiarakodia, etsetra, mba hampifaliana ny maty ao amin’ny fanjakan’ny fanahy. Kanefa ny kristiana mino ny fanambaran’ny Baiboly milaza fa “ny maty kosa tsy mba mahalala na inona na inona” dia mahafantatra fa miorina amin’ny finoana diso ireny fanao ireny, ary noho izany no andavany azy. — Mpitoriteny 9:5, 10; Salamo 146:4.
Kanefa, rehefa tsy mandika mivantana ny fotopoto-pitsipiky ny Baiboly ny fomba amam-panao iray, fa mahatonga tsotra fotsiny ny fanompoana an’i Jehovah araka izay tsara indrindra azo atao ho sarotra kokoa, dia tsara kokoa ny mametra fitsipi-pitondrantena iray sy mampiseho fa ny fotopoto-pitsipiky ny Baiboly no mibaiko ny fiainantsika. Ny fiheverana lalina ny fianarana sy ny fahombiazana ara-nofo, ny fanekena amin’ny maha-zanaka mandritra ny androm-piainana, ny fifidianana vady ataon’ny ray aman-dreny dia anisan’ny fomba amam-panao miely izay mety hisy fiantraikany eo amin’ny fifandraisantsika amin’i Jehovah. Ahoana no azo ampiharana ny fotopoto-pitsipiky ny Baiboly amin’ny tarehin-javatra toy izany?
[Sary, pejy 3]
Sarim-pananana trano dorana amin’ny fotoam-pandevenana.