Jiro Hitari-dalana Anao eo Amin’ny Lalam-piainana

“JEHOVAH ô, fantatro fa tsy an’ny olombelona ny làlan-kalehany, na an’ny mpandeha ny hahalavorary ny diany.” (Jeremia 10:23). Tamin’ireo teny ireo no nampisehoan’i Jeremia mpaminany fa tsy afaka mitarika amim-pahombiazana ny lalam-piainany ny olombelona raha tsy misy fanampiana. Aiza no ahafahana mahita izany fanampiana izany? Mamaly toy izao ny mpanao salamo, ao amin’ny vavaka nataony ho an’i Jehovah Andriamanitra: “Fanilon’ny tongotro sy fanazavana ny làlako ny teninao.” — Salamo 119:105.

Ireo izay mianatra ny Tenin’Andriamanitra, ny Baiboly Masina, ka mampihatra izay lazainy, dia ho tahaka ny olona iray izay manomboka ny diany vao maraina be. Eo am-boalohany, dia tsy mahita tsara izy satria maizina. Arakaraka ny anombohan’ny masoandro miposaka anefa, dia mihamahita hatrany izy. Farany, dia mibaliaka eo an-tampon-dohany mihitsy ny masoandro. Hitany amin’ny an-tsipiriany ny zavatra rehetra. Mampahatsiahy ohabolana iray ao amin’ny Baiboly izany fanoharana izany: “Ny làlan’ny marina dia toy ny fipoak’andro maraina, izay mihamazava mandra-pitataovovonan’ny andro.” — Ohabolana 4:18.

Ahoana ny amin’ireo izay mandà ny tari-dalana avy amin’Andriamanitra? Hoy ny Baiboly: “Ny alehan’ny ratsy fanahy dia toy ny aizim-pito; tsy fantany akory izay manafintohina azy.” (Ohabolana 4:19). Eny, ny ratsy fanahy dia toy ny olona tafintohina ao anatin’ny haizina. Na dia izay toa fahombiazan’izy ireo aza dia mihelina raha misy, satria “tsy misy fahendrena, na fahalalana, na fisainana mahaleo an’i Jehovah”. — Ohabolana 21:30.

Noho izany, dia araho ny tari-dalana omen’ny Tenin’Andriamanitra, ny Baiboly. Raha manao izany ianao, dia hahita ny fahamarinan’ireto teny ao amin’ny Ohabolana 3:5, 6 ireto: “Matokia an’i Jehovah amin’ny fonao rehetra, fa aza miankina amin’ny fahalalanao; maneke Azy amin’ny alehanao rehetra, fa Izy handamina ny làlanao”.