Noho Izy Io, dia Nanjary Nisy Peratra Indray ny Rantsantanany

“JEREO ny rantsantanako. Mahita zavatra niova eto ve ianao?” Nampiseho ny tanany tamin’ny vehivavy iray, Vavolombelon’i Jehovah, ny lehilahy iray; nijery azy io ilay vehivavy, ka nahamarika avy hatrany fa tsy teo intsony ny peratra mariaziny. Nanazava ilay lehilahy fa tsy afaka nifanaraka intsony izy mivady, ka nanapa-kevitra ny hisaraka. “An an an!”, hoy ilay Vavolombelona. “Raiso ity boky ity ary vakio. Hanampy anareo amin’ny fanambadianareo izy io.” Tamin’izay, dia nanome azy ilay boky miorina amin’ny Baiboly hoe Fahalalana Izay Mitarika ho Amin’ny Fiainana Mandrakizay, ilay Vavolombelona.a

Andro vitsivitsy tatỳ aoriana, dia niverina tany amin’ilay Vavolombelona ilay lehilahy, falifaly. Nasehony azy ny tanany. Tamin’io fotoana io, dia nanao ny peratra mariaziny izy. Nolazainy taminy fa namaky ilay boky Fahalalana izy mivady, ary tena sambatra izy ireo izao. Namerina indray ara-bakiteny ireo peratra teo amin’ny rantsantanan’izy ireo ilay boky.

Ny torohevitra ara-baiboly dia afaka manampy ny mpivady hifaneho tena fitiavana. Izany no izy, satria tsy iza ilay loharanon’ny Baiboly fa ny Mpamorona antsika, izay milaza toy izao: “Izaho, Jehovah Andriamanitrao, no mampianatra anao hahita soa sady mitarika anao amin’ny làlana tokony halehanao.”​—Isaia 48:17.

[Fanamarihana ambany pejy]