Ahoana no Fiheveran’Andriamanitra sy Kristy ny Vehivavy?

AHOANA no hahalalantsika tsara ny fiheveran’i Jehovah Andriamanitra ny vehivavy? Azo atao, ohatra, ny mandinika ny toe-tsain’i Jesosy Kristy sy ny zavatra nataony. “Endrik’ilay Andriamanitra tsy hita maso” mantsy izy, ka manahaka tanteraka ny toe-tsainy. (Kolosianina 1:15) Hita avy amin’ny fomba nifandraisan’i Jesosy tamin’ny vehivavy, fa manaja azy ireny izy sy Jehovah. Tsy ankasitrahan’izy ireo mihitsy ny fampijaliana vehivavy, izay fahita any amin’ny tany maro.

Diniho, ohatra, izay nataon’i Jesosy, indray andro. Hoy ny Filazantsaran’i Jaona: “Tonga hantsaka ny vehivavy samaritanina iray, ary hoy i Jesosy taminy: ‘Mba omeo rano aho hosotroiko.’ ” Sahy niresaka tamin’ilay vehivavy samaritanina teny an-kalamanjana i Jesosy, na dia tsy nifandray tamin’ny Samaritanina aza ny ankamaroan’ny Jiosy. Milaza Ny Rakipahalalana Ara-baiboly Iraisam-pirenena (anglisy), fa noheverin’ny Jiosy hoe “tena manala baraka ny miresaka amin’ny vehivavy eny an-kalamanjana.” Nanaja sy nangoraka ny vehivavy anefa i Jesosy, ary tsy nanavakavaka azy ireny noho ny volon-kodiny na noho izy vehivavy. Io Samaritanina io mihitsy aza no voalohany nilazany nivantana, fa izy no Mesia.—Jaona 4:7-9, 25, 26.

Nisy vehivavy nanatona an’i Jesosy koa, indray andro. Efa 12 taona izy io no nandeha ra. Mahamenatra io aretiny io sady mandreraka. Sitrana avy hatrany anefa izy, raha vao nikasika an’i Jesosy. “Ary nihodina i Jesosy ka nahita azy, dia nilaza hoe: ‘Mahereza, anaka! Ny finoanao no nahasitrana anao.’ ” (Matio 9:22) Araka ny Lalàn’i Mosesy, dia tsy nahazo niharoharo tamin’ny olona ny vehivavy nandeha ra toa azy, sady tsy nahazo nikasika na iza na iza. Tsy nibedy azy anefa i Jesosy. Nangoraka sy nampionona azy kosa izy, ary niantso azy hoe “anaka.” Tsy maintsy ho nampahery azy io teny io, ka nampihena ny tebitebiny! Azo inoana koa fa tena faly i Jesosy nanasitrana azy!

Rehefa nitsangana tamin’ny maty i Jesosy, dia i Maria Magdalena sy vehivavy iray hafa no nisehoany voalohany. “Ilay Maria anankiray” no iantsoan’ny Baiboly an’io mpianatra io. Azon’i Jesosy natao ny niseho tamin’i Petera na Jaona na lehilahy hafa. Vehivavy anefa no nomeny voninahitra, ka navelany hahita maso voalohany ny nitsanganany. Nisy anjely niteny tamin’izy ireo, mba hilaza io fahagagana io tamin’ny lehilahy mpianatr’i Jesosy. Hoy koa i Jesosy tamin’izy roa vavy: “Mandehana milaza amin’ny rahalahiko.” (Matio 28:1, 5-10) Tsy nanahaka ny toe-tsain’ny ankamaroan’ny Jiosy àry i Jesosy. Anisan’izany ny hoe tsy nekena hijoro ho vavolombelona ny vehivavy.

Tsy nanavakavaka vehivavy i Jesosy, na nankasitraka an’ilay toe-tsaina hoe ny lehilahy no ambony noho ny vehivavy. Nasehony kosa fa sarobidy taminy ny vehivavy, ary nohajainy. Tena tsy mifanaraka amin’ny fampianarany ny fampijaliana vehivavy. Ary azo inoana fa ny toe-tsain’i Jehovah Rainy no notahafiny.

Miahy ny vehivavy Andriamanitra

‘Tsy mba nomena fahalalahana toy ny vehivavy ankehitriny any amin’ny tany tandrefana, ny vehivavy fahiny tany amin’ny faritr’i Mediterane sy Palestina. Noheverina ho ambany noho ny lehilahy izy ireny, toy ny niheverana ny andevo ho ambany noho ny olona afaka, sy ny tanora ho ambany noho ny antitra. Nohajaina kokoa noho ny ankizivavy ny ankizilahy. Navela ho faty indraindray ny zazakely, raha vavy.’ Izany no voalazan’ny diksionera iray momba ny Baiboly, mikasika ny toe-tsaina nanjaka fahiny momba ny vehivavy. Matetika izy ireo no nentina toy ny andevo.

Tamin’ny fotoana nanjakan’izany toe-tsaina izany tany amin’ny firenena maro no nanoratana ny Baiboly. Hita amin’ireo lalàna ao anefa, fa tena miahy ny vehivavy Andriamanitra, tsy mba toy ireny firenena ireny.

Imbetsaka i Jehovah no nanampy ny vehivavy nanompo azy. Narovany indroa, ohatra, i Saraha, ilay vehivavy tsara tarehy vadin’i Abrahama, rehefa saika nisy nametaveta. (Genesisy 12:14-20; 20:1-7) Niantra an’i Lea vadin’i Jakoba koa izy. Tsy dia tian’i Jakoba mantsy i Lea. “Nampanan-anaka” azy i Jehovah, ka nitera-dahy izy. (Genesisy 29:31, 32) Notahin’i Jehovah koa ireo mpampivelona israelita roa vavy natahotra azy, ka ‘nomeny zanaka.’ Sahy niaro ny zazalahy kely hebreo rehetra tany Ejipta mantsy izy ireo, mba tsy ho voavono. (Eksodosy 1:17, 20, 21) Novalian’i Jehovah koa ny vavaka mafy nataon’i Hana. (1 Samoela 1:10, 20) Tsy navelany hiady irery koa ny vehivavy iray, vady navelan’ny mpaminany. Nisy olona tonga mantsy tao aminy, mba haka ny zanany ho andevo noho izy tsy nahaloa trosa. Niantra azy àry Andriamanitra, ka naniraka an’i Elisa mpaminany mba hampitombo ny menaka sisa tavela tao aminy. Iny no namidiny mba handoavany ilay trosa. Mbola nisy ambiny ho azy mianakavy aza ilay menaka. Tsy lasa andevo àry ny zanany, ary tsy afa-baraka izy.—Eksodosy 22:21, 22; 2 Mpanjaka 4:1-7.

Matetika ny mpaminany no nilaza fa tsy mety ny manararaotra na mampijaly vehivavy. Nirahin’i Jehovah hilaza toy izao tamin’ny Israelita i Jeremia: “Manaova fitsarana sy fahamarinana hianareo, ka afaho amin’ny tànan’ny mpampahory ny olona voaroba; ary aza mampahory na mampidi-doza amin’ny vahiny sy ny kamboty ary ny mpitondratena, ary aza mandatsaka ra marina amin’ity fitoerana ity.” (Jeremia 22:2, 3) Nilazana koa ny mpanankarena sy ny olona ambony, fa ratsy toetra izy ireo, satria nandroaka ny vehivavy hiala amin’ny tranony, ary nampijaly ny zanak’izy ireny. (Mika 2:9) Hitan’ilay Andriamanitra tia rariny ny fampijaliana ny vehivavy sy ny zanany. Halany ny fanao toy izany.

Vehivavy mahay

Voalazan’ny Ohabolana ny andraikitra sy toerana tanan’ny vehivavy manambady. Resahina ao ny atao hoe vehivavy tsara na mahay. Mahafinaritra erỳ ny fomba ilazana izany, ary azo antoka fa ankasitrahan’i Jehovah, matoa nosoratana tao amin’ny Teniny. Hita ao fa tsy natao hampahorina na hambanina ny vehivavy, fa natao hankasitrahana sy hohajaina ary hatokisana kosa.

Mavitrika sy be zotom-po ilay “vehivavy tsara” na mahay resahin’ny Ohabolana toko faha-31. “Mazoto miasa amin’ny tànany” izy. Manao raharaham-barotra, ohatra, izy, ka manjaitra akanjo hamidy, ary mamatsy fehikibo ho an’ny mpivarotra. Mividy saha koa anefa izy. Asehony amin’izany fa tia miasa izy. Mendri-piderana koa izy, satria be fitiavana sy tsara fanahy, sady feno fahendrena ny teniny. Vokatr’izany, dia manaja lalina azy ny vady aman-janany, ary indrindra i Jehovah.

Tsy natao hampahorin’ny lehilahy ny vehivavy, na koa hampijaliny na hohararaotiny. Tokony hataony kosa izay hahasambatra azy, ary hoheveriny ho mahay sy ho “vady sahaza” izy, izany hoe famenony.—Genesisy 2:18.

Omeo voninahitra izy

Ahoana no tokony hitondran’ny lehilahy kristianina ny vadiny? Nasain’i Jehovah nanoratra ho azy ireo i Petera. Nampirisihiny izy ireo hanahaka an’i Jehovah sy Jesosy Kristy. Hoy izy: ‘Ianareo lehilahy, omeo voninahitra foana ny vadinareo.’ (1 Petera 3:7) Ny hoe manome voninahitra olona iray, dia midika hoe mihevitra azy ho sarobidy, ary manaja azy lalina. Raha tena manome voninahitra ny vadiny àry ny lehilahy, dia tsy hanambany na hampijaly azy. Asehony amin’ny teniny sy ny ataony kosa fa tiany ny vadiny, na eny imason’olona izany, na rehefa izy roa irery.

Ho sambatra ny tokantrano raha manome voninahitra ny vadiny ny lehilahy. Diniho, ohatra, ny tantaran’i Carlos sy Cecilia. Niady matetika izy roa raha vao nivady kelikely, nefa tsy nifandefitra mihitsy. Tsy nifampiteny tsotra izao izy ireo indraindray. Tsy hainy hoe ahoana no handaminana ny olana nisy teo aminy. Nasiaka mantsy i Carlos, ary i Cecilia kosa kizitina sy be hambom-po. Nihatsara anefa ny tokantranony tatỳ aoriana, rehefa nianatra Baiboly izy roa, ary nampihatra izay nianarany. Hoy i Cecilia: “Nanova ny toetranay mivady ny fampianaran’i Jesosy sy ny modely nomeny. Lasa manetry tena sy mangoraka kokoa aho izao. Nianatra nangataka ny fanampian’i Jehovah tamin’ny vavaka koa aho, toy ny nataon’i Jesosy. I Carlos kosa niezaka nandefitra sy nifehy tena ary nanome voninahitra ahy, satria izany no tian’i Jehovah.”

Naharitra ny tokantranon’izy roa, na dia tsy tonga lafatra aza. Niatrika olana goavana izy ireo, vao haingana. Very asa i Carlos, nefa tsy maintsy nodidiana koa satria voan’ny kansera. Tsy naharava ny tokantranon’izy roa anefa izany zava-tsarotra izany. Vao mainka kosa nifankatia izy ireo.

Tsy nohajaina intsony ny vehivavy any amin’ny tany maro, rehefa lasa tsy lavorary ny olona. Ampijalina sy vetavetaina ary anaovana teny mandratra izy ireo. Tsy izany anefa no tian’i Jehovah hitondrana azy ireo. Asongadin’ny Baiboly fa tokony hohajaina sy homena voninahitra ny vehivavy, na inona na inona toe-tsaina manjaka eo amin’ny fiaraha-monina. Zo nomen’Andriamanitra azy izany.

[Sary, pejy 4, 5]

Ilay vehivavy samaritanina

[Sary, pejy 4, 5]

Ilay vehivavy narary

[Sary, pejy 4, 5]

Maria Magdalena

[Sary, pejy 6]

Narovan’i Jehovah indroa i Saraha

[Sary, pejy 7]

Saika rava ny tokantranon’i Carlos sy Cecilia

[Sary, pejy 7]

Carlos sy Cecilia ankehitriny